|
Re: هل تصدق!!!: سعر كيلو الضاني 14 جنيه..والعجالي 10 جنيه،... وصـدرنا مليون رأس من المواشي!!! (Re: بكري الصايغ)
|
رسالة طريفة وصلتني من صديق عزيز يقيم بالمانيا يقول فيها:
" والله ياصايغ حـيـرتنا ، تقعد يومك كله تكتب عن بدرية سليمان، وفجأة نلقاك تكتب عن اللحمة!!، ...انت يازول مالك مانصيـح!!،
***- وتاني حاجة، اسعار اللحوم من زمااان غالية ولايقدر (الا من استطاع اليها سبيلا)، يااخي حتي علبة السردين بقينا نشيرها علي الحساب والسداد اخر الشهر!!!، اللحمة بقت للناس الزينا من الكماليات ومن الاشياء الغير ضرورية لحياة البشر،
***- ياأخي في انواع كائنات كتيرة في الدنيا بتتغذي علي الاعشاب والخضروات ومابتقرب من اللحمة، اهو احنا طبقة المسحوقين من الفئة دي، لابناكل لحـمة وبنتقرف من شكلها سواء كانت (شـية) ولا ام فتفت او كبدة او سجـق او كستليتة!!!!، والبقرفنا اكتر الكوارع والضلوع وسـط الرز والسمك البلطي!!!
***- اها ياود الصايغ، نحنا الفقرا ديل لما نمشي بيت عرس ويجيبوا لنا صحـون العشاء وفيه قطع السجق ولااللحمة المستوية، بنقوم نبدلها مع الضيوف ونديهم اللحوم بتاعتنا وناخد منهم الطرشي والطعمية!!!، الدكاترة وصونآ وصونا وبشدة وحفاظآ علي بقية حياتنا لانقرب اللحوم لافي الحقيقة ولافي الصور!!!
***- كان عندنا كلب ولوف فجـأة ساب البيت وطـفش!!!
***- ياود الصايغ، البوست بتاعـك ماموفق، وكان داير تذكر الناس بخروف عيد الضحية الجاي، اقول لك مقدمآ، الناس في السودان اتعودوا علي الازمات والغلاء والفقر والمحن، ولكن المشكلة انو العيد الجاي حـيجينا والمجاعة ضربت 37% من مساحة البلد،والخرفان لن يستطيع ان يشتريها الا......
*** - خليتك بعافية حـبينا ودالصايغ.
|
|
|
|
|
|
|
|
|