|
|
 إظـهـــــار رقــم !
|
خط الاستواء
عبد الله الشيخ
إظهار رقم!
اختطلت الأمور.. و"اتشقلبت" الصور!.. وهذا هو الإفساد في الأرض.. زول واحد في البلد دي وقعت ليهو "الحاجات دي" في كرتلة المحلية... الزول الواحد دا ممتلكاتو التي تحصى هي: اثنين تلاجة فواكه ( لتخزين الموز والعنب المستورد من بلاد الشام، والشمام، والطماطم، وأيضاً كذلك الجرجير!).. ومصنع للمرايات (مرايات غرف النوم، والعربات، والمرايات الصغيرة التي تحتاجها القوارير من أجل الـcheck الأخير على وجوههن قبل ابتداء الحفل)!.. وكافتريا على الكورنيش (تبيع السندوتشات لركاب البصّات العابرة للقارات من وإلى مدني وبورتسودان والدمازين، وتبيع البارد للقادمين من بادية البطانة للتسوّق في الحصاحيصا)!.. وفرن آلي..! ليس فرناً آلياً وحيداً، إنما فرنان آليان (لبيع الرغيف لسكان كمبو المحالج، وناس الكنابي، ولعريبي الجزيرة اللي شروهو وكروهو.. وختوك تراب)!.. وموقع استثماري في السوق (نحدثكم عن محاسنه بعد اكتمال تشييده)!..
ولسه الخبر ما انتهى.. زول واحد في البلد دي وقعت ليهو (الحاجات دي) في كرتلة المحلية.. بقية تفاصيلها على هذا النحو: تبرعات من الخيرين في الخليج وأرض السودان الحبيب.. كميات معتبرة من العجوة المقرطسة، حاويات.. حاويات من أقمشة التيترون والتوتال الأصلي.. وتصديق بعدد مائتي حافلة هايس "كرّنت حالياً في الكرين"؛ واحتمال يكون أكمل إجراءاتها واشتغلت في خط "سحافا شرق"!..
والخبر لسة ما انتهى.. يمتلك شحنات من السكر، وتصديقات بشحنات أخرى في الطريق.. ثم أخيراً، وليس آخراً.. محاولات حثيثة من جانبه لإفراغ سوق الفاكهة من الفكهنجية وعدد الفكهنجية المستهدفين في "حلة عباس" حوالي خمسين فكهانياً "بيحب الفاكهة، وبيموت في الموز والمنقة"!..
والخبر لسة ما انتهى.. هناك وظائف تم تخصيصها له لاستيعاب خريجيه، سواء كانوا من "الخلوة" أو من "جماعة جزاك الله خير" المتخرجين من الجامعة..
والخبر لسه ما انتهى، لكن نقول شنو؟..
نقول "يا حليلنا"، ويا حليلك!... حليلك يا العشمان في مخدة وملاية، وغيرك بيلغف خروف السماية، وواحد تصدق بيلهط ولاية!..
واستهدوا بالله.. البلد بي خيرا.. شيء بترول، وشيء دهب أسود وأبيض، وشيء عوايد، ومطرنا يرشح، ونيلينا تساب، ومصانع اسمنتينا مدورة، وجرايدنا أكثر من مستشاري الدولة.. ومع ذلك يطلع ليك واحد و"يبراك" كلام عن الأزمة الاقتصادية!.. الحكاية شنو؟ الناس دي أصلها ما بتشبع؟..
في بداية الإنقاذ قادني عشقي للمدائح النبوية إلى "مطب".. كنت أتسمع المدائح وأنا محشور في إحدى بصات الحاج يوسف، وكان عنوان الأزمة في سوق تلك الأيام هو الأسمنت؛ والأسمنت طار وصل السما، وكان راديو البص يمدح: (خليل إبني، خالد إبني، حسن إبني... إلخ).. وفجأة هدر صوت جهور من الزحام، ومن المقاعد الخلفية تحديداً، ولاشك عندي انه صوت واحد شيوعي!! قال: "والله المحيرني إنو الناس دي بتبني!! الناس دي لقت الأسمنت وين"!؟.. دحين خلينا نسألك أيها الرجل، يا أيّها المتحفز لابتلاع الحصايا" حلة عباس" مثلما ابتلع حسين كامل أرض الكويت.. نسألك: الحاجات دي "لميت فيها، ولميتا" كيف؟..
|
|
 
|
|
|
|
|
| العنوان |
الكاتب |
Date |
| إظـهـــــار رقــم ! | عبد الله الشيخ | 10-11-09, 07:09 PM |
| Re: إظـهـــــار رقــم ! | سلمى الشيخ سلامة | 10-11-09, 09:13 PM |
| Re: إظـهـــــار رقــم ! | عبد الله الشيخ | 10-12-09, 11:40 AM |
| Re: إظـهـــــار رقــم ! | سالم أحمد سالم | 10-12-09, 12:00 PM |
| Re: إظـهـــــار رقــم ! | باسط المكي | 10-12-09, 12:56 PM |
| Re: إظـهـــــار رقــم ! | عبد الله الشيخ | 10-12-09, 01:35 PM |
| Re: إظـهـــــار رقــم ! | emad altaib | 10-12-09, 03:11 PM |
| Re: إظـهـــــار رقــم ! | عبد الله الشيخ | 10-12-09, 03:46 PM |
| Re: إظـهـــــار رقــم ! | سالم أحمد سالم | 10-12-09, 04:27 PM |
| Re: إظـهـــــار رقــم ! | عبد الله الشيخ | 10-12-09, 06:27 PM |
| Re: إظـهـــــار رقــم ! | عبد الله الشيخ | 10-13-09, 06:31 PM |
 Re: إظـهـــــار رقــم ! | الطيب عثمان يوسف | 10-13-09, 10:28 PM |
| Re: إظـهـــــار رقــم ! | قرشـــو | 10-13-09, 10:36 PM |
| Re: إظـهـــــار رقــم ! | معتصم الطاهر | 10-13-09, 10:56 PM |
| Re: إظـهـــــار رقــم ! | عبد الله الشيخ | 10-14-09, 03:51 PM |
| Re: إظـهـــــار رقــم ! | عبد الله الشيخ | 10-14-09, 03:29 PM |
| Re: إظـهـــــار رقــم ! | عبد الله الشيخ | 10-14-09, 09:00 AM |
 Re: إظـهـــــار رقــم ! | Tabaldina | 10-14-09, 05:20 PM |
| Re: إظـهـــــار رقــم ! | عبد الله الشيخ | 10-14-09, 06:42 PM |
|
| |
عبد الله الشيخ
فيس بوك
تويتر
انستقرام
يوتيوب
بنتيريست