المريخ........وصيف وتمهيدي...(متعودة...دائما)

Quote: جنبت القرعة الافريقية التي سحبت قبل ساعات في مقر الاتحاد الافريقي لكرة القدم بمدينة 6 اكتوبر المصرية الهلال من اللعب في الدور التمهيدي مع اندية الاهلي المصري .. اسيك العاجي .. مازمبي الكنغولي .. هارت لاند النيجيري وديناموز الزمبابوي .. بينما يبدأ المريخ مشواره من الدور التمهيدي امام سانت جورج الاثيوبي احد ايام 12 و13 و14 فبراير 2010م باديس ابابا واحد ايام 26 و27 و28 فبراير ايابا بامدرمان .. بينما وضعت قرعة الكونفدرالية فريق الامل العطبراوي في مواجهة اتراكو الرواندي والخرطوم امام فيلا اليوغندي .. وسيلعبان الذهاب في كيجالي وكمبالا .. تابعونا للمزيد من المعلومات

Quote: الحاجة (نصيحة) من صباح بدري رمت (زلابيتها) ولفت علي بيوت الحلة...حلة حلة ...تعلن عن نتيجة ولدها التي ستكون في صباح هذا اليوم. } الحاضر يكلم الغائب ...والعميان يجي شايل المكسر. } الحاجة (نصيحة) ما بتعذر ليها زول ...الما بجيها في نتيجة ولدها ..قالت سلام الله ما بتديهو ليهو. } حاجة نصيحة قال ليها ولدها (انو اشتغل كويس في الامتحانات)..اي امتحان يرجع منو بقول : (ما عندو غلطة). } يا ود الناس انت الغلط ذاتك. } ولد الحاجة (نصيحة) اسمو (النصيّح) تيمنا بي نصيحة جدهم الكبير الذي قال لهم : (الغريق بتعلق بي هداف الدوري). } المهم الحاجة (نصيحة) لمت نسوان الحلة كلهن عشان يجن ويشوفن تفوق ولدها (النصيّح) ونتيجته المشرفة. } النسوان (اترصرصن) في الحيطة متل (مشابك الغسيل). } الجرس بتاع الطابور ضرب ...الطلبة وقوفوا في (الطابور)...الاستاذ طلع في المسرح. } نتيجة الصف الاول ذاعوها ...والنسوان واقفات. } نتيجة الصف الثاني ذاعوها...والنسوان واقفات. } نتيجة الصف الثالث ذاعوها...والنسوان واقفات. } نتيجة الصف الرابع ذاعوها...والنسوان واقفات. } لما جاء الدور علي نتيجة الصف الخامس البقرأ فيه (النصيّح) ...الحاجة نصيحة اسعفت النسوان بي (زغرودة) عشان (يصحصحن) شوية. } الاول ذاعوه...الثاني ذاعوه...والنسوان كل مرة يتلفتن علي الحاجة نصيحة...(نظام الحاصل شنو؟). } الخمسة الاوائل ذاعوهم ..والنصيّح ما فيهم. } نصيّح شنو البدخل الخمسة الاوائل. } الحاجة نصيحة ...قالت للنسوان :اصبروا ...ما تضيقوا. } وقت العشرة الاوائل انتهوا و (النصيّح) ماذاعوه...واحدة من النسوان وقفت و(اتشوبرت) متل (المفتاح الانجليزي) وقالت للحاجة نصيحة : انتي يا (النصيحة) وقت ولدك ما في العشرة الاوائل مصحيانا من النجمة مالك؟ ..ومتلتلانا في البرد دا ليه؟. } الحاجة نصيحة قالت ليهن: انتوا قايلين الفرق بين العشرة الاوائل والعشرة الثواني شنو..(ثواني) بس؟...كلها تلقوها درجة وإلا درجتين...انتوا اصبروا (النصيّح) هسع ح يذيعوا. } الاستاذ وقت قال : العشرين الطالب حمد محمد حمد ...الحاجة نصيحة من الاحراج بقت متل (فرشة المعجون) الضارباها الشمس. } خمسة نسوان رجعن وقالن للحاجة نصيحة : بعد كدا ولدك إلا يذيعوا ليك في لجنة التطعيم ضد الجدري. } النسوان ما خاطيات علي الحاجة نصيحة عندها ولد متل (قدحة التوم) ...من الشارع الخامس تشمو. } الحاجة نصيحة وقت الاستاذ وصل التلاتين وولدها ما ذاعوه ..قطعت ليها (جك موية). } الموية ذنبها شنو؟. } واحدة من النسوان حاولت تهون عليها شوية ...قالت ليها : اكيد ولدك دا الاساتذة قاصدنوا. } والنصيّح واقف في الطابور (متل الساعة الما شغالة) ...وسيدها بظبط في (المنبه) حقها. } يا زول وقت الاستاذ وصل الخمسين والنصيّح ما ذاعوه ...الحاجة النصيحة قالت للنسوان...ولدي دورو قدام. } وقت الاستاذ قال : اما الطالب النصيّح حاج التوم النصيحابي فقد كان من المتفوقين في (نطح المكبورة). } المدرسة كلها صفقت للنصيّح وهو يقدل في حوش المدرسة عشان يستلم شهادتو. } تقول خرجوه من كلية حربية. } في واحدة من النسوان قالت للحاجة (نطح المكبورة) دي شنو كمان يا الحاجة نصيحة؟. } الحاجة نصيحة ما عجبها السؤال ...قالت ليها (نطح المكبورة) دي حاجة زي (الانجليزي)...مادة جديدة دخلوها ناس ثورة التعليم العالي ديل...قالوا البتفوق في المادة دي احسن من الطالب البجي الاول. } في نسوان طبعا الكلام المغطغط دا ما بعجبهن ..مشن سألن من (نطح الكمبورة) دي وعرفن انها حاجة زي (مبيت القوا). } يعني باختصار شديد كدا ..(النصيّح) دا قفل (دفتر العيادة)...كل يوم شايل الدفتر وماشي للعيادة. } اظن كدا الموضوع بقي واضح. } الحاجة نصيحة ...دا (اعلام المريخ). } النصيّح طبعا اخوكم في الاحمر الوهاج (كلتشي). } تلات مجموعات افريقية ما جاب فيها قون. } انا اول مرة اشوف لي ناس تفرحهم (الوصافة). } انتوا وقت (الوصافة) بتفرحكم ...الدوري لزومو شنو؟. } هداف الدوري دي لقب كل سنة ممكن نتنازل ليكم منو. } والله فعلا (اليتيم نجمتو كبيرة)....اقصد (اليتيم لقمتو كبيرة)...اقصد (الوصيف لقمتو كبيرة). } هسع دي حاجة بتفرح ليها زول. } كلتشي المباراة كلها زعلان تقول لاعب ماتش اعتزالو. } يا زول انت زعلان كدا مالك. } تعرف الموضوع ما بستاهل. } وناس الوصيف عاملين ليهو توم وشمار. } انتوا عارفين حالتكم دي زي شنو؟. } قلت ليكم الحكاية دي زي حكاية ناس (الدغيل). } ناس الدغيل ديل كل خميس بعملوا ليهم حفلة ..وبقفلوا الشارع. } رايحة ليهم فرحة. } عندهم عرس بعملوا حفلة...(عادي)...عندهم زول رجع من بره بعملوا حفلة ..(عادي)...عندهم سماية بعملوا حفلة..(عادي)...اي حاجة بعلموا ليها حفلة ...نجاح ..مرور ..خروج من المستشفي...صرفة صندوق ...تعليق ستائر...تبديل ملايات. } اي حاجة. } دا كلو عادي. } الما عادي ...انهم اي حفلة بعملوا ليها (كشف)..الكشف بمر عليك قبل ستة شهور من الحفلة. } امس مشيت عليهم ..لقيت الصيوان قافل الشارع ...قلت ليهم ناس الدغيل ديل عندهم شنو (لمباتهم) للصباح مولعة. } في واحد من الذين مر عليهم (الكشف)..قال لي : ناس الدغيل ديل عندهم سماية. } قلت ليهو سماية شنو؟. } قال سماية سوداني في امريكي جابوا ليهو (تلغراف) بعد عشر سنوات زواج. } هسع ناس الوصيف جابوا ليهم (هدف). } والله يا كلتشي مفروض يضبحوا ليك تاني ويسموك (هدف عكسي). } غايتو الناس ديل فاضيين بشكل. } في اسبانيا وفي نهاية اغسطس يجتمع الاسبان في كل عام ليتحاربوا بـ (الطماطم) ويتجادعوا بها في عيد اسمو (توماتينا). } رمي الطماطم دي يستمر ساعة كاملة...الغريب ان هناك 30000سائح ياتوا من مختلف انحاء العالم للمشاركة في هذا العيد ...الذي تعمل ليهو قومة وقعدة. } علي الطريقة نفسها مفروض ناس الوصيف ديل يعملوا ليهم مهرجان للقب هداف الدوري. } المهرجان دا اخير ليهم من مهرجان الطوب والسيخ البعملوا لينا دا. } اسم المهرجان (اليتيم لقمتو كبيرة). } شروط المهرجان. } (أ) 15 شوال خيش ...لزوم (الخدعة). } (ب) 4 جرادل كبيرة ...(بدل الكاسات). } (ج) 40 جلدة (سفري). } (هـ) ملوة كلتشة مع القليل من الورغنة ...والاعلام السالب. } (ك) يمنع اصطحاب (الكراسي) بعد الكورة. } الهدف من المهرجان. } بقاء اكرم ومجاهد وريتشاد في كشف المريخ. } ملحوظة: المهرجان انتهي. هوامش } في مباراة القمة الاخيرة ...المريخ استحق الانتصار ...وما قدمه الهلال في الشوط الثاني لا يكفل له الانتصار. } الحكم لم يظلم الهلال. } رغبة المريخ وارادته في الانتصار كانت اكبر من رغبة الهلال ومن ارادته. } ريتشارد (لسع بخيرو)...مفروض يمنحوه نجومية المباراة. } اكرم الهادي سليم تجاوز (الخلعة) من البرد. } ننصح اكرم الهادي سليم متابعة مهرجان الطماطم في اسبانيا فيه حاجات ممكن يستفيد منها. } مجاهد نتمني ألا يقود المريخ في الموسم القادم كمساعد مدرب للمريخ.

(عدل بواسطة yasir Abdelgadir on 12-08-2009, 06:19 PM)

Quote: وقال الوالى الذى كان يتحدث لقوون عبر الهاتف وعقب القرعة مباشرة من مقر اقامته بالعاصمة الاماراتية ابوظبى ان القرعة جاءت متوازنة بالنسبة للمريخ وغير مزعجة حتى فى الادوار المتقدمة فى طريق الوصول لدور المجموعات ، واضاف اعتقد ان المريخ اكتسب الخبرة الكافية فى بطولات الكاف من خلال مشواره الطويل خاصة فى السنوات الاخيرة والتى استطاع من خلالها ان يصل للادوار النهائية فى الكونفدرالية ودورى الابطال ( النسخة الماضية ) وقال ان فريقه استفاد من مشاركته الاخيرة فى دورى الابطال مشيرا الى انهم فى مجلس الادارة عملوا على دراسة السلبيات التى صاحبت مشوار الفريق للاستفادة منها فى النسخة الجديدة وذكر انهم وضعوا خطة عمل لتساعد الفريق والجهاز الفنى لتحقيق الاهداف المنشودة وهى الظهور المشرف والمنافسة على اللقب وقال ان المريخ سيشارك فى دورى الابطال ليس من اجل المشاركة فقط بل من اجل المنافسة على اللقب