بلادي أنا تشيل الناس ، كل الناس وساع بي حيلا وليلا يسع
بلدي أمان ، بلدي حنان وناسا حُنان يكفكفوا دمعة المفجوع ويبدّوا الغير على زاتم يقسموا اللقمة بيناتم ويدّوا الزاد حتن كان مصيرم جوع يحبّوا الجار يموتوا عشان حقوق الجار يضوقوا النار عشان فد دمعة وكيف الحال لو شافوها سايلة دموع! ديل أهلي .. ديل أهلي البقيف في الدار في نص الدار وأقول لي الدنيا. كل الدنيا ديل أهلي
لقد أسمعت لو ناديت حياً ولكن لاحياة لمن تنادي عارفة يا استاذة مصر عندي منذ خلقت ووعيت الوجود الجيرة السيئة قدر مكتوب علينا....تفقرنا لتعيش الرفاهية نمرض نحن لتعيش في كامل صحتها تتعامل معنا كإحدي مزارعها الخاصة..كاننا بعض دراهم تنفقها لشحاد تستطيع أن تتعامل مع حكوماتنا بشكل غريب ،تبيع وتشتري في اراضينا كما تريد تستولي علي حصص مياه النيل دون مقارنة للمساحات كما تريد تحتل المدن كما تريد تقيم السدود لحجز المياه كما تريد
كل ما ورد اعلاه صحيح..شعر اسماعين عن من هم نحن الفينا مشهودة برضو صحيح لكن تبقي اضابير وجدان شعب حبيس سياسات الحكومات التي تعطي ما لا تملك
الحقيقة الماثلة هي اننا شعب لا نصلح حتي في تنظيم عيد ميلاد نعيش في الادغال شعب طيب
Quote: لكن تبقي اضابير وجدان شعب حبيس سياسات الحكومات التي تعطي ما لا تملك
تصدق مش الحصل متوقعينو, وعشانو أبينا نشجع مصر, لكن وجـــــعني ياصديق :( واجعني مهما ضحكت ولا هظرت وااااااجعني ..
بس دي ما مساحة حزن, دي مساحة فخر, مساحة حكي جميل عننا, عن السوداني لون الصندل ورائحة القهوه أو لون القهوه ورائحة الصندل
عن كرمنا وشجاعتنا وشهامتنا عن حضارتنا وتاريخنا
خلينا ندي دروس عننا ..
والمساحه مفتوحه لكل من بحلقه غصه مثلي,
شكرا ياصديق لأنك عبّرت عن وجعي ووجعك ووجع محمد أحمد القاعد فييييي عنقريبو ولحقتو الاساءه , من جيران لقوا مننا كل خير ولقينا منهم جحود ونكران جميل, وكمان تشنيع بسمعتنا, اللي هي زادنا الماعندنا غيرو في الدنيا ..
الله في ياصاحب ..
11-23-2009, 08:36 PM
emad altaib
emad altaib
تاريخ التسجيل: 12-27-2007
مجموع المشاركات: 5300
ما تعبي نفسك ساي بالنقل من اليوتيوب فالناس دي حتي كان بقروش ما بفهمو ولا عندهم أستعداد أصلاً يستوعبوا (دراجية سودانية) ولا عندهم أدني تغير بما قالوه عنا في أعلامهم فالإعادة شغاله (تش) للبرامج التي حدث فيها الإساءات والإشكالات ,
Quote: الناس دي حتي كان بقروش ما بفهمو ولا عندهم أستعداد أصلاً يستوعبوا (دراجية سودانية) ولا عندهم أدني تغير بما قالوه عنا في أعلامهم
الرد الوحيد علي حمله اعلاميه مضاده لينا, هو حمله اعلاميه مقابله ليها, طالما مافي يدنا سلطه نرد بيها كرامتنا :(
لولا برنامج الاعلاميه الناجحه ميرفت حسين لمتنا قهرا .. ياريت لو كل قنواتنا الاعلاميه اتصدت للهجوم الاعلامي بعمل منظم قوي زي البرنامج ده, لكن للأسف اعلامنا لسه ما قادر يعبر عننا ..
الصمت الاعلامي البنمارسه في السودان جريمه في حق أنفسنا, واخلاء للساحه للطرف الاخر الذي يملأ الفضاء زعيقا ..
مش الرسول (ص) قال "بلغوا عني ولو بايه",
بنفس الفهم نحن مسئولين نبلّغ عن وطننا وندافع عنه ولو بكلمه, وذلك أضعف الايمان ..
تحياتي,
11-23-2009, 09:42 PM
GamarBoBa
GamarBoBa
تاريخ التسجيل: 03-07-2002
مجموع المشاركات: 4985
عارفة يا أماني الدروس محتاجنها نحن السودانيين قبل المصريين حقوق الارض المنهوبة من الستينات -حلفا- ثاني اجمل المدن الافريقية اغرقت دون دموع حلايب ذهبت ادراج الرياح المصريين خطابهم فوقي لأبعد درجة ما انتظرنا وزير يسمع الاغاني الفوق ويعمل فيها ضكر ويجي يبستف الناس دي لانو ما جانا وزير راجل من سنة 56 الا محمد توفيق الاتحادي القدم استقالته حتي جمال الوالي ود المؤتمر الوطني لما اتصل ما برد بطن سوداني الحاصل انو نحن ما عندنا وجيع المعادلة:حكومات تافهة+شعب طيبان=الواقع الحالي يفيض النيل+ نحيض نحن= يظل حال البلد واقف
الخلاصة: لنا حدود دولة يجب ان نحميها لنا شخصية يجب ان نطور طيبتها للحق والخير والجمال لنا اجمل دولة ويجب ان نحميها
_ اتمناك طيبة يا اماني وكل سنة وانتي بألف خير...وما نجي نناقش موضوع مشابه بعد خمسة سنة لانو اتذكر الموضوع ناقشته في المنبر ده قبل ستة سنة كدة
11-23-2009, 09:59 PM
emad altaib
emad altaib
تاريخ التسجيل: 12-27-2007
مجموع المشاركات: 5300
ازيديك مغصة يااماني سعادة الرئيس ارسل الطفل المعجزة للتوسط بين الجزاير ومصر!!!!!! يااماني وزير الاعلام (لاحجازي لا اديب) صرح بان الرئيس المصري سيرسل قوات لحماية شعبه !!! لاحطي وزير اعلام !!!!!! وحكومتنا الرشيدة عامله اضان الحامل طرشه حتي السفير السوداني لم يطلب توضيح او يشجب التصريح الرسمي !!!! تصريح وزير اعلام وناطق رسمي يمر عادي كان السودان محافظة تابعة لاسوان فعلا ريسنا نايم باالله واحد يصحيهو
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة