|
حرامية الشتاء ( لو جاك حرامى تعمل شنو؟ )
|
كم يوما مضى على الحادث دا لكن الظاهرة اصبحت شاذة بتذكر لما صحيت الصباح وفتاح ياعليم رزاق ياكريم لقيت جارنا بتاع الدكان مسروق!! العجيب طبعآ قصة السرقة كان الموضة زمان انو الحرامية يقدوا الزنك بتاع الدكان بى مقص حديد فوجئت بى طريقة جديدة وهى انهم بيقدوا الحيطة زاتة من جوة البيت (طبعآ لأنو ناس البيت باعوا البطاطين نسبة لغلاء السكر ومصاريف المدرسة وكهربة دفع مقدم وكدا) المهم زولنا الله يعوضو نايم بى برة الدكان قريب لى قدرة الفول للحصول على بعض الدفء والجماعة كان قضوا على الاخضر واليابس الحصيلة كانت خسائر فادحة تلقائيآ رجعت بالذاكرة لليوم الاتسرق فيهو بيتنا وكانت برضو الخسائر فادحة وعشمنا فى الشرطة كان كبير فى استعادة المسروقات بعد التحرى ورفع البصمات ووووالخ مع انو كانت كل الدلائل تشير للبت الكانت شغالة معانا واختفائها المباشر قبل السرقة بى يومين تعذرآ منها انها ماشة لى امها عيانة فى ولاية من الولايات وانقطع الاتصال بيها بعد السرقة مع العلم انها كانت تستعمل تلفون يمكن تعقبه لكن اجراءات الحادث حدث ولا حرج. والمشكل الاكبر عدم وجود (ضهر) الله يكرم القارئين المقال ثلاثة ايام مضت على سماعى طلقتين فى الهوا وناس جاريين وامسك حرامى حرامى وتلتها ثلاثة طلقات فى الهوا بالتلاتة لكن تلاشى الحرامية فى ثوانى معدودة خلف المزارع وتجمهر الناس بعدها عرفت انو بعض شباب الحلة مدورين (من دورية) بس ما تلاتة تسعات, ومعاهم فرد شرطة وجدوا الحرامية وهم بيحاولوا تانى انو يسرقو دكان قريب من الدكان الاتسرق اول (دا طبعآ بعد ما البيت الفى نفس شارع الدكان اتسرق) لكن كانوا فى بداية المشروع عندما داهموهم الشباب ولاذوا بالفرار مع ترك ادوات الجريمة. الحيرنى اكتر فرد الشرطة لما سالته انو ليه ماصوب مباشرة فى رجل الحرامى مع انو كانت المسافة كافية لاصابته وتعطيله فأجاب: حيعملوا لى تحقيق فى الكم طلقة الفكيتهم ديل فمابالك لما اعوقوا ياشيخ دى قصة ممكن تدخلنى السجن!!
لوهلة افتكرتة انو انا بتكلم مع الحرامى وهو خايف انو يضرب فرد الشرطة ولكن بعد لحظات من الشرح تبينت موقفو المحرج اذا عمل كدا نسبة للأجراءات المضنية والطويلة ويمكن ايقافه من الشغل لحين التوضيح.
فى معظم الاحوال يكون الحرامى على علم انو اول تلاتة اربعة طلقات فى الهوا عشان العسكرى خايف من الجرجرة, والخامسة ان غضب الله عليهاان كان من المقبوضين لانو حيكون شتت بالمسروقات والعسكرى يقول يالله الطلقة ماتكون وقعت فيهو والا حيصل ماسردت قبل قليل.
قبل فترة قرأت ان احد ارباب البيوت قد اقام الحد على الحرامى بعد القبض عليه متلبسآ وتسليمه للشرطة (هعععععع) والغريبة انو كنت بتكلم مع صديق لى واقترحت انو لو الحكومة قامت واعلنت انو البيقبض حرامى يقيم عليهو الحدبدل الدفاع عن حقوق الحرامى وايقاف العسكرى القبضو طوالى ياترى حيكون فى حرامية تانى؟
ارآءكم تفيدنا
|
|
|
|
|
|