|
Re: محجوب شريف .. الصحة كيف ؟ .. الحالة والاحوال ؟ .. واخبار العيال ؟ . (Re: shaheen shaheen)
|
(محجوب شريف) الصحة كيف ؟ الحالة والاحوال ؟ واخبار العيال ؟ مالو البلد حالو انقلب ؟ هذا بلد .. هذا ولد كسروا القلم وتمكنوا على انكسارنا تسلطنوا وتسلطوا هم فى الاذاعات اعلنوا (ان لا ولاء لغير سلطان البنوك) ومن الجماجم والكروش صنعوا العروش فتدبروا وتصبروا لو ما عجبكم .. فنجطوا (بوت) عسكرى .. مسمار جحا بنخلخلوا بيثبتوا ومهرج السيرك اشتهر اصبح خطر وطنى الكبير ح يقسموا بس نيلنا يا (محجوبنا) اوعا يخصخصوا
والصحة كيف ؟ (محجوب شريف) اهو انقلاب وراء انقلاب وراء انقلاب اسأل سؤال - سودانا كان الفيو شنو معدول عديل , شان الشباب ديل يقلبوا ؟ . ما كلهم (محجوبنا) كانوا بخرمجوا احزاب جلاليب العمم ندفع تمن دم قلبنا والسلطة تاتى مقشرة واذا بهم سبحان ربى وما وهب يتغيروا ويطنشوا حبة املنا الفينا هما يطفشو وليذهب الشعب الحقير نحو الجحيم اصلو الجحيم ما فيو مزايا عشان عليو يتصارعوا الله عليك (محجوب شريف) لو كنتا فى حزبك اقول ليك يا (زميل) انشاء الله بس الصحة عال ؟ انشاء الله شلال الشعر عندك بخير كيف المدام ؟ كيف الظروف ؟ .. نبض الحروف ؟ عندك قروش ؟ انا حالتى ما بتسر حبيب ندمان على الدرب المشيت فيو يا رفيق ؟ عارفك حديد انسان سوى صنديد .. هصور يا ماركة صالحة لكل عصور (نيم) ما بتهزو الريح ولا حتى السجن لا بتنحنى .. لا بتنثنى سيخك صعب زول يقلعوا راسك قوى جنك نضال انسان سوى - شيوعى وخلاص . طيب خلاص اسأل سؤال - عندك امل فى يوم ح نسمع صوت خلاص ؟ . (محجوب شريف) انسان بسيط عاشق اصيل درب العشق يا زول طويل لا فذلكة لا طنقعة ولا يحزنون ما نخبوى يا شعبى حتى نخاع جذور يا ماركة صالحة لكل عصور اوعك تموت لسه ابتلاءات الزمان ح تدق على الراس زى طبول اوعك تموت محجوب من الاذى يا شريف (محجوب شريف) الصحة كيف ؟ . ...... شاهين. * نُشرت فى سودانيز اون لاين بتاريخ 14 أكتوبر 2006 .
| |
|
|
|
|
|
|
|