|
المعلقة السودانية عن الوضع السياسى الراهن 2009
|
القصيده دي جاتني في الايميل بدون ذكر صاحبها ..
أنشرها ويا ريت نعرفو عشان نحتفظ ليهو بحقوا الأدبي
المعلقة السودانية موديل 2009
الفار فرفر في الفروة
شابكنا يوماتي فتاوي!
كم أرنب جوه الطاقية
مستني منديل الحاوي!
الحاجة اليوم تتحرم
وينكتلو علشانا شباب!
تتحلل في اليوم التاني .
ويقولو لي ناسا حباب!
الجن من جنو اتجنن
واتعوذ من الجايات!
@ @ @
|
|
|
|
|
|
|
|
Re: المعلقة السودانية عن الوضع السياسى الراهن 2009 (Re: مجدى محمد مصطفى)
|
الكان مستور الحال الليلة مقطوع الراس! وابليسنا سارح بي غنمو وغنمو سارحات بالناس! الفاطي سطرين وتلاتة الفاطي كل الكراس! لا يحلو الشيخ الجعلي لا تحلو سيطان كدباس!
عمي على ضاق بيهو الحال ساب مرتو خلالا البيت! عمي على باظت أعصابو وأخلاقو قطعت كم خيت! عمي على أصبح نقناق ومين يسمع في بلاد الواق! عمي على ضاق خيرا زمان والليلة ما شايف حاجة! بتمنى الماضي يعود ويحكمنا من تاني خواجة! لا وطني نافع لا أمة لا حركة لا مؤتمرات!
@ @ @
| |
|
|
|
|
|
|
Re: المعلقة السودانية عن الوضع السياسى الراهن 2009 (Re: مجدى محمد مصطفى)
|
تلفازنا بوظ أعصابنا النشرة زي حفلة ظار! بيجاي واحدين بيكوركو بيهناك بيدقو الطار! النشرة مجروس متحرك والعسكر يلعب بالنار! وعكليتة يقدم برنامج طفشنا من السهرات!
فنانا أصبح هناق بيغنى غنا ما مفهوم! بيعكر جو أمدرمان بيفور دم الخرطوم! النجم الأوحد في سمانا مداح بيغني الراب! يتلولح زي شافع الروضة يطوطح من دون أسباب! حنينا لي حقيبة الجن حنينا لي الحكامات!
@ @ @
| |
|
|
|
|
|
|
Re: المعلقة السودانية عن الوضع السياسى الراهن 2009 (Re: مجدى محمد مصطفى)
|
للهجرة الباب مفتوح الرايح انشالله يروح! الهاجر من ضيق الحال الهاجر من ضيق الروح! الهاجر من فصل جماعي بالجملة أو بالقطاعي! كم جيل بدل جيناتو كم جيل اتناسى قديمو! لو طرتا لي آخر الدنيا لو رحتا بلاد الأسكيمو حتقابل زول أو زولات!
في الغربة بتلاقي مصايب في الغربة بتلاقي ماسي! دكتور شغال جرسون ومهندس شغال تكاسي! واحدين ساكنين مقطورة كان أحسن سكنة تنقاسي! واحدين ساكين الميتة ما شبعو من الصدقات!
@ @ @
| |
|
|
|
|
|
|
Re: المعلقة السودانية عن الوضع السياسى الراهن 2009 (Re: مجدى محمد مصطفى)
|
وحكومة شغالة رجالة بالعلني قالت لي ناسا الداير حقو يحاربنا سيبونا من أي سياسة! كل حتة مرقت بسلاحا كل حتة جمعت فراسا! خايفين من الشايفنو خايفين من الزندية! خايفين سودانا يضيع يتقسم زي كمونية! كل حتة تتناول كوما وتتحول لي جمهورية! الحال ممكن يتلخبت والواقع يصبح كالآتي كل حلة ترفع أعلاما تتمتع بالحكم الذاتي! الشايقي ينازع الجعلي في حدود ما مرسومات!
@ @ @
| |
|
|
|
|
|
|
Re: المعلقة السودانية عن الوضع السياسى الراهن 2009 (Re: مجدى محمد مصطفى)
|
وحكومة شابكنا حليفة الوزرا يحلفو بالدور! قوات دولية يمين ما تدخل اقليم دارفور! وكم قوة دولية تحوم في جنوبنا وجبال النوبة! المنطق راح في حق الله والجوطة قلبت كم هوبة!
وجنوبي وشمالي اتشبكو كل واحد بيكورك عووك! صرتنا في ابيي مدفونة لا جدك هيلو لا ابوك! في ابيي الموت بالكوم في ابيي الدم مسفوك! في ابيي الجن متحرك في ابيي شيطان مفكوك! يا ساتر استر يا ساتر تنحلا باخوي واخوك
@ @ @
| |
|
|
|
|
|
|
Re: المعلقة السودانية عن الوضع السياسى الراهن 2009 (Re: مجدى محمد مصطفى)
|
وسدود بالقوة تقوم وتهدد اوطان وتراث! الراي الرسمي اتنفذ ما مهم رد فعل الناس! الصهين باكر يترحل بالموج أو بالحراس! القاوم خنقو البمبان القاوم كتلو الرصاص! منصوري قمعوه ومحسى مافيش لا خد لا هات!
بالميري مسكون بالهم ناس زهرة يشكن وحواية غير شاينا كيفن حنعيش بنربى جنيات وصبايا الكشة كابوسنا اليومي يا ماشا فوقنا يا جايه يا اخوانا كيف ست الشاي تتعامل زي ست انداية؟! كم مرة ياناس كشونا ما خلو لينا الحبايه! كم مرة طفقو البراد كم مرة كسرو الكبايه كم كشحو شايات وسكاكر كم دفقو ازبط جبنات!
@ @ @
| |
|
|
|
|
|
|
Re: المعلقة السودانية عن الوضع السياسى الراهن 2009 (Re: مجدى محمد مصطفى)
|
أوكامبو بقى اشهر زول وسيرتو في كل لسان! عايز يقبض الريس ذاتو ويختو جوه الليمان! اوكامبو رقصنا السامبا أوكامبو نسانا بطان! بالحكمة لوما حليتوها بتعاقب كل السودان!
أوكامبو من قدم طلبو فرتكنا كيمان كيمان! واحدين طايرين بالفرحة شايفنو احسن ما كان! واحدين هايجين فايرين شاتمين أوكامبو كمان! واحدين عايزين الحكمة شان يسلم كل السودان!
@ @ @
| |
|
|
|
|
|
|
|