|
Re: عبد الرحمن الزومة يتجه للتأليف وإختراع الاخبار !! (Re: نصار)
|
Quote: وماذا تريد الحركة الاسلامية أكثر من ذلك وما الذى يدعوها الى السرية؟. |
دا سؤال صعب جدا نرجو من السيد مسؤول الاعلام الدولي تبسيطه رأفة بالشعب السوداني الذي تسربت الي عروقه دماء ابناء الحركة الاسلامية سفاحاَ حيث لم تتحقق اي من شروط الزواج الشرعية .. ود الزومة خليك في شتايمك و (دعك عن الفكر لا ترحل لبقية و امدح فانت الطاعم الكاسي) دي طبعا خرمجة لبيت الحطيئة الذي قاربنا بينه و بينك سابقا
| |
|
|
|
|
|
|
Re: عبد الرحمن الزومة يتجه للتأليف وإختراع الاخبار !! (Re: Haydar Badawi Sadig)
|
نصار - كمال - جني الثالوث المكجن الزومة
أنا غايتو عندي مقترح لذيذ جدا لي ناس الأمن..إنو في التعذيب بدل الدق والعوارة البيسووا فيها ديك..يطبعوا كتاب كااااامل كلوووو مقالات عبدالرحمن الزومة..وبعداك اليقبضو أول حاجة يمسكوهو كتاب الزومة لازم يقراهو طرقة طرقة..هسي عليك الله في (وسيلة تعذيب) أقسى من كدة؟! زي جني ده من أول 7 صفحات كان فتّ ليهم المعلومات العندو كلها هشام هباني بعد فصاحتو دي كلها 3 صفحات من (التعذيب) كان خلتو يقول الروووووب كمال ونصار ديل غايتو حدهم 10 صفحات..وكان زودوا عليهم (جرعة التعذيب) يمكن تجيهم فليتة وضربة شمس وانفجار في المصران الغليظ والتهاب مفاصل وشلل أطفال بكتيري ده بالإضافة لي خلطبيطة في الزعاليل وكردنبيس في الشرمرمات.
الكتاب المقترح ده غايتو كان يدوهو للمحققين البيحققوا في قضايا الإرهاب - حول العالم - على اليمين العالم كلو كانوا قلبوا علمانيين ده لو ما كفروا.
ياخي ده بني آدم عجيب خلاص.
| |
|
|
|
|
|
|
Re: عبد الرحمن الزومة يتجه للتأليف وإختراع الاخبار !! (Re: نصار)
|
غايتو يا نصار لو جاك في النوم ده يكون ياهو (أبوالكباس) ذاتو !
أما جني فلو اجتهد شوية وواظب على حبوب الضغط ووجع القلب ممكن يؤلف رواية (كائن لا يُحتمل ثقله) أو (ثقل الكائن الذي لا يُحتمل) زي (خفة الكائن التي لا تحتمل) بتاعة ميلان كونديرا..
احلام سعيدة يا نصار..أشرب حليب وصلي ركعتين وخت المصحف تحت راسك
| |
|
|
|
|
|
|
Re: عبد الرحمن الزومة يتجه للتأليف وإختراع الاخبار !! (Re: خالد عويس)
|
الحمد لله يا عويس مرت الليلة بسلامة جني شديد و لضيض وصل مرحلة داوني باللتي هي الداء لو الزومة يوم ساكت كدا ما كتب ولا كتب كلام عادي يا دوب جني بيجري الدكتور،، ادمان بعيد عنك اما عن الكتاب جني بديك الكلام فلتي و انت ظبط الكتاب
زي واحد لزيز اسمه عباس عملنا حفل وداع لصديقه مسافر برا السودان.. عباس دا لسانه فلقة كنت بقدم فقرات الحفلة.. قدمته يقول كلمة زولك حرن دوت.. مشيت احاول اقنعه قال يا زولت علي الايمان ما بقيف قدام العيون الكتيرة تبحلق فين و انا اتكلم جيبهم لي واحد واحد اكلمه ليك للصباح
| |
|
|
|
|
|
|
Re: عبد الرحمن الزومة يتجه للتأليف وإختراع الاخبار !! (Re: خالد عويس)
|
يا عويس ياخي دا انت بقيت امام مكجنين الزومة جني ميزته الريادة حيث اكتشف موهبة توريم الزومة للقراء في وقت مبكر جداَ و انشأ مدرسة في ذلك تتلمزنا عليها و كمال عباس درجة استاذيته اخدها في التحديد الشديد لمواضع الورم المميت فيما ياتيه قلم الزومة البليد المشكلة انهم الاتنين شايقية غتيتين ما بكشفوا طرق التحصين البتبعوها البدونها كان بقوة زي سمكة التامبرة يحكي عن الشاعر جرير انه قأة عليه احدهم شعرا فسجد سأله الراوي و هو فقيه لماذ سجدت، رد عليه جرير انتم تعلمون موقع السجود في القرآن و نحن نعلمه في الشعر اها شوف انت كصحفي الزول دا بخليك ترف راسك من السجود باشراقاته الكتيرة دي؟ نحنا كان خلاص فاضبينا بنخلي القراية لكن انت بس الله معاك
| |
|
|
|
|
|
|
Re: عبد الرحمن الزومة يتجه للتأليف وإختراع الاخبار !! (Re: Haydar Badawi Sadig)
|
دكتور حيدر حكاية خوفي من انه ود الزومة يجيني في المنام يخرب علي بهجة مداخلتك انت و عويس كانت مجرد منوارة و تمويه، فانا بحمد الله بطلت احلم من سنة 89 البنشوفو و نسمعه صاحيين يكفينا كآبة فياخي ما فضلينا من حقوق انسان سوي النوم الهادي... الناس ديل يا دكتور ورونا عملينا كيف انه البشر من اجل البقاء يضربوا الهم بالفرح و يسخروا من انفسهم و واقعهم سنة 95 كنت في زيارة قصيرة و وحيدة للسودان من ما جوا الناس ديل هربت بعدها عبر اثيوبيا و لي يوم الليلة ما رجعت، في زيارتي دي سمعت الشباب الواحد يقول ليك و الله زهجان امشي اعمل (شيرس) سريع كدا اه اكشن احسن من قعادنا دا، شيرس دي بقصدوا بيها انهم يتعمدوا انهم يعملوا حركة تخلي ناس الامن يعتقلوهم يدوهم الفيها النصيب من ضرب بالكهربا و غيرها من اصناف التعذيب،، تصور يا صديقي... اظرف تعليق كتبه واحد هنا في المنبر ما متذكره منه،، جاب خبر من نوع خبر تدويل الزومة دا و علق عليه (ما بنجنليكم).. بس خايف نركز علي عدم الجن تصيبنا الانراوة الما بتنداوي زي ما بقول المثل..
| |
|
|
|
|
|
|
Re: عبد الرحمن الزومة يتجه للتأليف وإختراع الاخبار !! (Re: خالد عويس)
|
الهلال تاريخيا ضد الدكتاتوريات و الدكتاتوريات ضدة يا عويس دا ما كلام هتافي ساكت شوف حكاية كاس الدهب الخلت نميري يفرتك الكورة و يدمر الرياضة ليوم الليلة بدعته بتاعت الرياضة الجماهيرية.. الان جمال الوادي جوكي الحزب الوطني الراكب المريخ زي الجن الكلكي الركب علي مهدي في خطوبة سهير,, ناس اب شنب كان بغيظوا نيميري يكتبوا اليوم اجتماع الجمعية العمومية لجمهورية الهلال الديموقراطية.. لكن برضو الزول دا ما مضمون انت بس اشتغل بالقاعده الفقهية المعناها انك ما تسأل عن لانه اذا سالت عن حاجة حلال ولا حرام عليك الالتزام بحرمتها اذا كانت الاجابة تدل علي كدا ثم انه هو ما محسوب علي كاحد سكان الارض نمشي وين يعني؟
| |
|
|
|
|
|
|
Re: عبد الرحمن الزومة يتجه للتأليف وإختراع الاخبار !! (Re: نصار)
|
,,,,,,,,,,, ولحزب الأمة أيضا زومة أخر!!
Quote: واعتبر الفريق صديق محمد إسماعيل، الأمين العام لحزب الأمة المعارض بزعامة الصادق المهدي، الخطوة أنها ليست مهمة من الناحية السياسية، وقال لـ«الشرق الأوسط» إن «الأمر لا يخرج عن كونه حراكا طبيعيا داخل هذه المؤسسة الأمنية»، وقال الفريق صديق إن العلاقة بين حزبه وجهاز الأمن «محل احترام متبادل». ............ |
إقالة صلاح قوش: لاتحلموا بعالم سعيد فخلف كل قيصر يموت قيصر جديد!!
| |
|
|
|
|
|
|
Re: عبد الرحمن الزومة يتجه للتأليف وإختراع الاخبار !! (Re: كمال عباس)
|
Quote: زي جني ده من أول 7 صفحات كان فتّ ليهم المعلومات العندو كلها هشام هباني بعد فصاحتو دي كلها 3 صفحات من (التعذيب) كان خلتو يقول الروووووب كمال ونصار ديل غايتو حدهم 10 صفحات..وكان زودوا عليهم (جرعة التعذيب) يمكن تجيهم فليتة وضربة شمس وانفجار في المصران الغليظ والتهاب مفاصل وشلل أطفال بكتيري ده بالإضافة لي خلطبيطة في الزعاليل وكردنبيس في الشرمرمات.
الكتاب المقترح ده غايتو كان يدوهو للمحققين البيحققوا في قضايا الإرهاب - حول العالم - على اليمين العالم كلو كانوا قلبوا علمانيين ده لو ما كفروا.
ياخي ده بني آدم عجيب خلاص. |
يا خالد يا اخوى دا لمن تقرا العمود حقه يلزمك دكتور بطرى لانك حتكون منفوخ عشان يعرف انت العمود ا\\\\\\\\\\\\\\\\\\\\\\\\\\\\\\لكلتو دا أمباز ولا تبن! جنى
| |
|
|
|
|
|
|
Re: عبد الرحمن الزومة يتجه للتأليف وإختراع الاخبار !! (Re: نصار)
|
Quote: واعتبر الفريق صديق محمد إسماعيل، الأمين العام لحزب الأمة المعارض بزعامة الصادق المهدي، الخطوة أنها ليست مهمة من الناحية السياسية، وقال لـ«الشرق الأوسط» إن «الأمر لا يخرج عن كونه حراكا طبيعيا داخل هذه المؤسسة الأمنية»، وقال الفريق صديق إن العلاقة بين حزبه وجهاز الأمن «محل احترام متبادل». ............ |
من نسى قديمه تاه! الراجل قبل ما يكون امين عام كان فريق! قبله زعيم الحزب ورب البيت اسهم اسهاما غير مسبوق فى اضعاف الحزب وتدجينه مسديا خدمة لا تقدر بثمن لجهاز الأمن فما يهم ان رقص امين الحزب أم عرض!! وهو سبق ومحمدة لحزب الأمة ان يكون بينه وبين أجهزة الأمن أحترام متبادل الشئ الذى لا يتوفر لبقية الأحزاب الأخرى فى تعاملها مع جهاز الأمن! الفريق قطعا لا يستطيع التفريق بن جهاز الامن والجهاز الهضمى أو الجهاز البولى والا لما قال ما قال! جنى
| |
|
|
|
|
|
|
Re: عبد الرحمن الزومة يتجه للتأليف وإختراع الاخبار !! (Re: jini)
|
سعادة الفرق الفريق زي العاوز يقول انه علاقه الامة مع جهاز الامن اصبحت سمن علي عسل بفضل تسنمه لامانة الحزب العامة
هو بالمناسبة هل كان صدفة اختياره في المنصب القيادي دا بعد التحاق ابن الصادق المهدي و مجموعة من شباب الحزب بالجهاز سيئ السمعة؟ تصريح سعادة الفريق يؤكد مخاوف شباب الامه
و نقول للراجل مهما فعلت لن يرضي عنك الزومة و اسحاق فضل الله حتي اذا اتبعت ملتهم ديل بقطعوا حتي يعدوا لووول
| |
|
|
|
|
|
|
Re: عبد الرحمن الزومة يتجه للتأليف وإختراع الاخبار !! (Re: نصار)
|
يا أخوانا والله دي حركات منكم ساكت ...
يعني الزومة ده أحسن زول عندهم
تجوا تطلعوه أي كلام....
يجيبوا ليكم ناس من وين؟؟؟ وكمان ناس عاقلين؟؟
هو لو عاقل أو بفهم كان بقي مؤتمر وطني....
عندي صاحبي قالي والله الزومة ده بكون عارف كلامو ده كلو غلط بس داير يطلع .... ساكت
| |
|
|
|
|
|
|
|