|
قال ليهو : ماهو شعورك وأنت تصلي بالناس وخلفك الرئيس والمسؤولين والحكومة كلها .. هل تحس بالرهبة
|
العيد في الرياض مضجر وممل وعلى وتيرة واحدة لا تتغير . . تمر أيامه في بطء يجعلك تشتاق إلى أن تعود إلى العمل فما بين النوم نهاراً ورتابة الزيارات العائلية( على أرضك أو ارض الخصم ) في بداية المساء . . والسهر في الحدائق العامة بقية الليل . تتخلل هذه الرتابة . . رتابة من نوع آخر وهي مشاهدة القنوات الفضائية ولأن الإحساس بالغربة والحنين إلى الأهل يزداد في أيام الأعياد تجد نفسك متابعاً للقنوات السودانية علها تعطيك بعض الإحساس بطعم العيد . بضغطة زر على الرقم ( 1 ) في الريموت تحولت إلى تلفزيون السودان ( إنتو ليه الناس دائماً بتخت القناة السودانية في الرقم 1 ؟؟ ) فوجدت مجموعة من الناس يتحلقون في نصف دائرة حول مذيع طويل القامة ( أنا جني وجن الناس الطوال )يجلسون في حديقة غناء طريقة الجلسة تعطيك الإحساس مباشرة بأنها جلسة فنية خاصة لمن تجي داخل في نص البرنامج تلقى المذيع بيسأل ضيوفه : بتتعاملوا كيف مع متاعب الشهرة وحياة النجومية ؟ تعاين في الوجوه ما تشوف ليك شخصية كده مشهورة أو نجم في أي مجال . . تمعن النظر تقول يمكن الزول ده كان نجم زمان وشكله تغير .. برضو مافي أي نتيجة . . تقول يمكن طولنا من البلد ظهروا نجوم جدد أعمار الناس بتخليك تقنع من المبرر ده وكذلك متابعتك الدائمة لوسائل الإعلام المختلفة بقليل من الصبر والمتابعة تكون المفاجأة إنو الناس ديل أئمة مساجد . . آي والله يتحدث المذيع عن متاعب الشهرة والنجومية لائمة المساجد !!! لا تجد أمامك إلا أن تدلي فكك الأسفل في بلاهة وتواصل مع المذيع ( التحفة ) في التلفزيون ( التحفة ) في هذا الزمن ( الفلتة ) المهم تواصل مشاهدة تحويل ممارسة الشعائر الدينية والعبادات إلى مجال للتنافس والمبارزة بين الضيوف حين يطلب منهم المذيع ( الهمام ) أن يتبارو في قراءة القرآن كل واحد يقرأ آيتين واللي بعده يكمل عشان نشوف الصوته أحلى منو ؟؟ آخر سؤال حضرته كان أن سأل المذيع أحد الأئمة وقال ليهو : ياشيخ جبريل بإعتبارك إمام مسجد القصر الجمهوري . . وقاعد تصلي بالناس الفي القصر الجمهوري شعورك شنو وإنت بتصلي بالناس وخلفك الرئيس والمسؤولين والحكومة ( كلها ) هل تحس بالرهبة ؟؟؟ ( يشهد الله كانت هذه صيغة السؤال ) رهبة من منو يالمذيع رهبة من المعبود الذي أقيمت الصلاة من إجل عبادته . . الصلاة دي حسب فهمنا ليها إنها صلة بين العبد وربه فقط . . لا دخل لرئيس ولا غيره بها الصلاة المفترض لمن الزول يدخل فيها يقطع صلته بالدنيا ومافيها . . الإمام ردو كان شنو ؟؟ ما تسألوني لأنو ما حضرتو . . عشان ( مناهل ) ختفت الريموت وحولت إلى قناة إسبيس تون . . وإستمعت معها بتوم أند جيري وأنا أردد ياريت يابنتي ختفتي الريموت ده من بدري
|
|
|
|
|
|