|
الملايات
|
الملايات اغطيةالسريرالعاديةدى من اشياءالمنزل الضرورة
الملايات تبوأت مكانة عظيمة عند نساء السودان اخواتناوزوجاتنا وامهاتنا
من اهم الوصايا عند السفر جيب لينا معاك ملايات
ودائما هناك شكوى مفتعلة
البيت ما فيهو ملايات الملايات كملن الملايات قدمن
فى كل المناسبات تكون فى البند الاول للمشتروات فى العيد الكبيروالصغير فى السماية وفى العرس وفى الطهور
الاحظ تكدسها فى المنزل هدايا فى مناسبات حضور الاهل والاصدقاء
ثم تبدا فى الترسب فى رحلة دائرية بين الاهداءوالاهداء المضاد
الملايات زمان فى السودان كانت اليفة ديلان ابيض مطرز باليد على شكل زهرة وردية واغصان خضراء
قبل اكتشاف ملايات امريكا ذائعة الصيت ما من مسافرالى امريكا حتى تكون الوصايا ملايات
والى تخوم الصين ومنتجاتها الرخيصة
من مصر ملايات القطن
ملايات العرص والطهور قطيفة بالالوان الصارخة احمرواصفروبرتقالى
فى طقوس الجنازة ايضا تظهر ملاية القطيفة
من حكايات الملايات
صديقى اسامة الخواض حكى عن منغصات يوم العيد ايقاظه مبكرا لفرش الملايات
صديقنا محمد عبد الحميد طلب منه احضارملايات فى سفرته الى امريكا اشترى13 ملاية مافى واحدة شبة التانية فتلقى توبيخاوزجرا مناسباللفعلةالعجيبة
سفورى له طرفة يحكيها على لسان احدهم انتو قايلين العرس دا شنو ما بيت نظيف وملايات مفرشة
من كثرةالتردد على اسواق الملايات فى الامارات اصبح لدينا خبرة فى اماكن البيع فى الشارقة سوق الرولة فى دبى سوق نايف فى العين سوق البتان فى ابوظبى السوق القديم
وفى الخارج العتبة فى مصر وباب شريف فى جدة
لكن امريكا لسا ما عرفنا سوقا وين
السؤال المحير؟؟
ما هو سر المكانة السامية للملايات عند نساء السودان
|
|
|
|
|
|
|
|
Re: الملايات (Re: انور التكينة)
|
:)
محمد سيد احمد
كل سنة وانت طيب
ما كلمتنا، اشتريت ملايات العيد الصغير السنة دي ولا لسه؟ لو حصل ------ استعد لملايات العيد الكبير
:)
إيمان
| |
|
|
|
|
|
|
Re: الملايات (Re: mohmmed said ahmed)
|
من حكاوى الملايات
خالى المرحوم خيرى
وهو مغترب فى السعودية
رسلو ليهو عاوزين 24 ملاية
اتصل بيهم وهو يقول
24 ملاية ليه
انتو حتعملو البيت بنسيون
شقيقى يحيى
قال فى ملايات كدا انا ما بشوفم الا فى العيد
سال زوجتو اسمعى انتى الملايات دى ايجار
| |
|
|
|
|
|
|
Re: الملايات (Re: mohmmed said ahmed)
|
الاخ محمد
كل سنة وانت طيب
دى فرصة عشان يكون البوست دا سوق لملايات حاجة ما تخلص
عندى ملايات تشكيلة جديدة مع خدمة التوصيل الى كل الدول
انت من زمن الامريكى
هنالك تطور فى الشغلانة
(لايوجد فى دولابى اكثر من 6 ملايات )
تحياتى لك وللاسرة الكريمة
انتصار
| |
|
|
|
|
|
|
Re: الملايات (Re: انتصار محمد صالخ بشير)
|
انت يامحمد يا قريبي ما جني داخليات زينا كدة ؟؟ بس قصتك مع الملايات بعد الاغتراب ؟؟ يااخ نحن مع الملايات مما كانت بطانية عليها الختم الحيكومي RS وفي قمرات السكة حديد الختم بيكون SR.. ملايات البطاطيين حدها الثانوي (اللي قبل الجامعة) وفي جامعة الخرطوم الترقية بتحصل الي ملايات من الدبلان الابيض مكويات وبتتغير اسبوعيا ولازم فراش الداخلية يقوم بترتيب السراير مش زي المراحل القبل الجامعة حيث كنا نقوم بذلك وقبل السادسة صباحا ....في الاغتراب انا وقبل الزواج لقيت نفسي مغرم بالملايات وهاك يا غراند ستور وشي ملايات امريكية ويابانية ولكن بعد الزواج تركت الامر بسبب التخصص....والملايات دي مستولية علي ضلفتيين من دولابي انا ما عارف ليه مع انو الدولايب كتيرة
| |
|
|
|
|
|
|
Re: الملايات (Re: mohmmed said ahmed)
|
عيدك مبارك محمد سعيد ولكل الاصحاب والاصدقاء وعلي باب الملايات انا السنة دي فطيتهم كيدا علي الملايات والسراير ؛ طبعا نحنا عيدنا باكر ؛ يعني ما حنصحي اي زول عشان الفريش حقو نخلي اسامة الخواض يجي يعيد معانا !! هن اصلن هوايتين عند النسوان وبحبنهن موت الملايات والعدة ؛ يجي رمضان العدة والطقوم بكل انواعنا والكواري والحلل الخ .. يجي العيد الملايات وشيالات الكعك .. احي اللاتنين ما بحبهن ليه ما بعرف حسي بتي زاراني في شيال .. ورغم ان في البيت توجد شيالات الا بس عايزين جديد .. اها الحب قسم الملايات دي امكن بحبوها عشان الزهوز والورد المجدعات في الملاية وما تنسي زهور الحنة والنشادر وزهور التوب وست التوب اها عيدكم مبارك انا العيد دا عاملة ما بسمع واحسن حاجة الواحد ما يتحاوم مع اتش ون . وكل سنة انتو حلوين ومفرهدين زي ملاياتكم الجديدة.
| |
|
|
|
|
|
|
Re: الملايات (Re: عشة بت فاطنة)
|
محمد سيد احمد
ابو الوليد
كل سنة وانت سالم
ومنو القال في العين سوق الملايات في سوق البتان براه
انت ما شفت جنب محلات خز ووفر
وانت شكلك اتهريت ملايات في العيد ده مع الولاده بتاعت سيد البيت دي
وانور التكينه ده ورانا كل الملايات الاشتراها والله عليكم جنس جرسه يا رجال
| |
|
|
|
|
|
|
Re: الملايات (Re: abubakr)
|
ملايات العيدبراها يا ايمان
اولا
طهور مصطفى ثانيا ملايات السماية ثالثا ملايات العيد
دا كلو فى شهرسبتمبر دا
لكن ملاحظ انوفى مصادر تمويل سرية للملايات
فى واحدات كدا ظهرو اظن بتمويل سرى من النسيبة بعدحضورها من السودان
انتصار
فى ملايات ما بعدالامريكى والله دى لسا ما وصلتنا
قريبى ابوبكر
ملايات الداخليات حظى منهاكان فى داخليات رومانيا
بيضاء من الدبلان وفيها روائح معطرات الغسيل
لكن حكاية احتلال لمناطق كثيرة فى الدولاليب حاجة محيرة
وسط دولابى برضو ليهن حظ
| |
|
|
|
|
|
|
Re: الملايات (Re: mohmmed said ahmed)
|
قريبى ابوبكر
ملايات السيتان ديل
تصنف
زى نوعية كدا اسميها ملايات ممنوع اللمس
تجى تنبطح يقولو ليك لالا
طيب الملاية غير ما يرقدو فوقا شين ثمرتا
| |
|
|
|
|
|
|
Re: الملايات (Re: mohmmed said ahmed)
|
أستاذنا محمد سيداحمد .. كيفنك كل سنة وانت طيب .. والعيد مبارك عليك .. ما تنسى سوق الغوير .. والزبير خان في الشارقة.. ياخ ده عنده ملايات ما حصلت .. أسمها ملايات الحوش .. والسوق المركزي الشارقة .. ودي الملايات الصاح .. طقم كامل ملايات ستائر فوط كراسي وترابيز وعلبة المناديل .. وسلة المهملات كمان مع الطقم الله يعزك .. شفته كيف .. والمشكله نحن هنا نفرش.. ونطلع من الصبح للدوام ونرجع المساء .. يا ربي فارشين لي شنو .. ياخوي الملايات دي في عيد الفطر .. في مقام خروف الضحية ..
... وكل شهر وانت داخل البيت ب 6 ملايات قول مين .....
| |
|
|
|
|
|
|
Re: الملايات (Re: عفاف الصادق بابكر)
|
العزيز عباس
الملايات ما بتجرس
البتجرس حاجات تانية زى الدهب
ونوع حنبنى البيت متين
بت الصادق سوق الغوير وزبير خان
لفيتا حارة حارة والمركزى دا برضو فيهو التياب الحرير الربط
| |
|
|
|
|
|
|
Re: الملايات (Re: mohmmed said ahmed)
|
الملايات بعد المكانة العالية والحظوة عند النساء يكاد لا يوجد لهن ذكر فى الاغنيات
فى ما عدا
فى الديوان الديما مفروش
واغنية خليعة كدا قالو التيتى جايات وفرشو الملايات
غير ديل يطرشنى
السبب شنو
| |
|
|
|
|
|
|
|