|
لما قلنا الاعلام ضيع المريخ .... قالوا حاقدين
|
2009-05-08 أوف سايد
النجم للرجم
سعدت جداً أمس وأنا أتشرف بحضور قرعة دور المجموعات لدوري أبطال إفريقيا بمقر الكاف في مدينة السادس من أكتوبر بالحي المتميز.
وازدادت سعادتي أكثر بأن كل الأنظار اتجهت للمنصة الرئيسية حيث تجري فعاليات القرعة التي أعدت أعدت في ثلاثة أواني زجاجية بالألوان الألصفر والأحمر والأخضر.
وكان أن وضع المريخ والنجم في إناء منفصل بعيداً عن الإناءين اللذين حملا أسماء ناس قرعتي راحت الذين تأهلوا بالتلتلة!
بدأت إجراءات القرعة بأن اختير في أول القائمة أفقياً بالرمز (أ)!
ثم تم اختياره في أعلى القائمة رأسياً بالرقم واحد ليصبح الأول بالحروف والأرقام.
وجاء شاكر على الطاهر مندوب الهلال ليسحب القرعة والرجفة بائنة عليه لأنه كان يرغب في تفادي البعبع.. ولكن خاب فأله عندما ظهر اسم الوصيف بجوار متصدر التصنيف.
وأبت القرعة إلا أن يدور رحى المنافسة بلقاء ملتهب بين المريخ والجماعة الطيبين يوم السبت الموافق 18 يوليو المقبل!
وهو المعروف عندنا باسم سبت الخبت!
إفريقي ومحلي.. ما فيش فرق!
الضحية واحدة في الحالتين.
وكانت الصدفة العجيبة أن يغادر المريخ إلى نيجيريا في أول أغسطس لملاقاة كانو بيلارز النيجيري.
وهو الفريق الذي يشجعه ولدنا قطب المريخ الطبير محمد عثمان الطيب.
يا ود الطيب بل راسك.. وأرجى الراجيك!
إيداهو وطمبل ما سائلين فيك!
ووراغو وكليتشي محمدنك!
الهجاج ليهم عجاج!
سنضرب الجماعة في الافتتاحية.. وسنهزم نيجيريا بطريقة (وداوني بالتي كانت هي الداء)
وقديماٌ قيل: الديب بيعرف عوعاي رفيقو!
بالهجاج سنهزم الهجاج!
وبعدها سنعود إلى قلعتنا الحمراء لنضرب زيسكو في منتصف أغسطس.
يا إيداهور الضرب بالدور.
ثم نسافر لملاقاة الفريق الزامبي في آخر أغسطس.
أما في الحادي عشر من سبتمبر.. أقصد الثالث عشر من سبتمبر فسنطبق الحنة لأحلى زبائن في المقبرة بعد إزالة العجاج منها وتبديل الحمار المدفون بواحد جديد.. آخر موديل.
وشاء الجظ أن يكون يوم أمس يوماً حافلاً تفوق فيه المريخ محلياً وإفريقياً وهو يضرب هلال الساحل في الأنكل رغم عنتريات الدفعة فوزي المرضي الذي توعد المريخ بالويل والثبور وعظائم الأمور!
لكن الهاج إيداهور.. والهاج كليتشي المتخصصين في ضرب اللون أعادا فوزي من بورتسودان وخشمو ملح ملح!
وأرغموه على التسمر في دكة الاحتياط بدون فائدة وهو الذي عودنا على الوقوف في الخط منذ أيام طيب الذكر بانكو!
يا فوزي.. تاني بتجي؟
إن سايد
الكاف قرر أن تكون بداية المريخ بفاتح الشهية
ثلاثة نقاط في الكيس من هسة!
وتلاتة تانية في المفخرة!
ست نقاط مضمونة.. رايح جاي!
يا برجاس أزرع النجيلة سريع عشان ندشنها ليك بي حبتين مع الرأفة!
الكورة الأولى تلاتة على الأقل! ده لو اكتملت والجماعة ما انسحبوا من المريخ زي ما عملوا مع سطيف!
ربنا يستر على كراسينا من الكسير!
الجماعة غالبين كسروها.. لما ياخدوا المعلوم حا يعملوا شنو؟
دي مصيبة شنو دي يا جيمي؟
النصيحة ليك يا الله لما مزمل قال لي أول كورة مع الهلال ركبي ساخت.. وعيوني طششت!
الكاف ده عوير جنس عوارة!
لو وداهم للنجم الساحلي مش كان أحسن؟
أهو برضو متعودة.. الشرميطي قالوا راجع!
اسمو شين وفعلو زين!
لكن الهاج إيداهور قاعد.. وكليتشي موجود!
ووارغو الحارقو حا يقوم بالواجب.. وهو عارف مقاسات المعز كويس وحافظها صم!
في طولك في عرضك يا المعز.. وارغو حا يكرر شريط التلاتة تاني!
هو فين الشريط المدسوس.. لسه ما ظهر؟
الكورة الأولى حقتنا.. والشريط بطرفنا!
طريقة دس مافي!
وتفسيح بالكلاكلة مافي.. حا نفسحكم نحن!
شركة وارغو للرحلات المجانية الدائرية عن طريق شارع ديمبا تقاطع شارع خليفة!
الكاف ما انستر معانا!
ناس استاد ما عندهم.. نلعب معاهم وين؟
أنا خايف يلعبونا في حوش الخليفة ولا ميدان عقرب!
نجيلة تك!
والهالة سأبة!
لو ضربناكم في الكورة الأولى إلا تشوفوا ليكم بلد!
واللييييلة.. المريخ مع الهلال وش!
أمانة ما وقع راجل!
انتهي ....
حسن محجوب بعد إجراء قرعة المجموعات بصحيفة الصدي يوم الجمعة 8/5/2009م
كدى شوفوا احلام زلوط دى كيف ... حسن بسبوسه هسى خلى الكتابه زاتو
من تلاتة كانو ماظهر
|
|
|
|
|
|