|
Re: إستجداء الترحيب ... المانشيتات المُمَوه ... حاجات ما سمحه تب (Re: عزام حسن فرح)
|
والله سودانيز أون لايِن بتخلي الزول < مُقرِر > قراراتي صعب خلاس يعني أنا مثلاً < قررت > أول ما الإمتِحانات هيل العقاب تخلص ما أقرِب مِن سودانيز أون لايِن لِمُدة (10) أيام بعد ما ناس < باركو لي ولدي نجح > و< بِت ناس خاله جيرانا نجحت بِتَفَوُق وجابت 51% > بعد ما يِكمل رأيهُم تب ... نرجع نشوف البوستات المُفيده ... ومِن ضِمن قراراتي تجنُب الناس البتطلُب < بِإستِجداء > أن نُرحِب بها ... أها النقول رحبت بيك وبعد كمين يوم طبظت ليك ظِبيزة فقعت بيها عينا نقبِل وين الوكِت داك
| |
|
|
|
|
|
|
Re: إستجداء الترحيب ... المانشيتات المُمَوه ... حاجات ما سمحه تب (Re: heba Elmahi)
|
heba Elmahi
صباح الخير بِت سيدي ...
وائِل والله جاب كلام ... ده القاصدو الواحِد وكتين ملكوهو باسويرد يبقى دايِر يِقول شيتًا ... حقو ما يِضَيِع زمنا ساي ... يكتِب الدايِر يِقولو والناس براها حترحِب بيهو عبر الطارحو ليهُم ... لكِن الزول يِكون في إنتِظار بكري أبوبكر كمين شهر أو حول أو أكتر وفيها كمان تلفونات وواسطات وبعدين الحِكاية تتصفى في بوست أول بِعِنوان < أنا جيت رحِبوا بي > أمانةً عليك يا المُطَيِر عينيك لِجِنِس ده أدوك العضوية ...
| |
|
|
|
|
|
|
Re: إستجداء الترحيب ... المانشيتات المُمَوه ... حاجات ما سمحه تب (Re: عبدالوهاب علي الحاج)
|
وهبه ...
والله الواحِد بقى لامِن يشوف إسمك ساي -خلو يتداخل معاك- يِتحسس صمرقعو شكيتك على الله مِن شاتني < دكين > ما شُفت خيرًا تب ... الزول ود عمي نوبي <مُتعرِب> وإتْ عربي <مُتنَوِب> والإتنين بريدكُم ... دخلتونا في حيص بيص ...
أما بعد ... أقرا لِلزول وبعدين أرحِب وأبوس راسو كمان إن أجاد ...
العِيال بِبوسو ايديك ... وبِت إبراهيم الليلة عاملة طرقه بِمُلاح أخضر ماشين بيهو ناس أُمي ...
مبروك شيله صلاح قوش ... بلا وإنجلا ...
رمضان السنة حتصومو برضو؟
| |
|
|
|
|
|
|
Re: إستجداء الترحيب ... المانشيتات المُمَوه ... حاجات ما سمحه تب (Re: عزام حسن فرح)
|
kamal karrar
Quote: أها بحري دي مش ام الشعبية؟؟ |
لا يا كمال يا خوي إتلَومت تب ... بحري بِوصِفوها بِالشعبِية ... بحري مِتِل كُل < الأُمهات > بنريدُم عِلا الشعبِية مِتِل < أُمك > ريدا بِختلِف مِن غيرو يا زول تِحِت كِرعينا الجنة الفوقا الحور وبيوت بنور وعالي السور لا فيها ظُلُم ولا جور خضرا ما لاحقا بور
بحري ذ.م.م الشعبِية الكُل مسؤول
إتْ العجلة الراكِبا جناك دي < رالي >
| |
|
|
|
|
|
|
Re: إستجداء الترحيب ... المانشيتات المُمَوه ... حاجات ما سمحه تب (Re: محمد البشرى الخضر)
|
عزام ياودامى .. المشكلة شنو؟؟؟
ماتخش بوستات ترحيب بس والبورد مليان مواضيع .... كانت ماعجبتك امشى الارشيف والمكتبات ....
اسى فى داعى الزول يجيهو ضيف يقول ليهو جنس كلامك المسيخ دا؟؟
بوستات الترحيب اقلاها الزول بفك بيها برلمة الكيبورد والكبكبة انا شخصيا ماشايفة مشكلة كبيرة واى عضو جديد بدخل وبرحب بيهو
اما حكاية العناوين المضلللة دى معاك فيها مية مية لانو بتخلى المنبر زى جريدة الدار ...
ارقد عافية ونشوفك بعدين فى الاجتماع شان عندى معاك شكلة ..
| |
|
|
|
|
|
|
Re: إستجداء الترحيب ... المانشيتات المُمَوه ... حاجات ما سمحه تب (Re: عزام حسن فرح)
|
الأخ / هاشم محمد الحسن عبدالله
Quote: ان تعريف القادمين الجدد على المنتدى بأنفسهم لايعتبر استجداء او اى شىء آخر فقط اجراء بروتوكولى ليس إلا وانا أعتبره سلوك حضارى |
شكرا جزيلا
الأخ عزام تحية طيبة
للكتابة مواسم وأمزجة, تقتضي في كثير من الأحايين توفر ظروف معينة , لحصول فعل الأندياح فيها, كل الأعضاء الجدد كما ذكرت آنفا انتظروا شهورا طويلة لمجرد حصولهم على العضوية , وتخيل كم المواسم التي مرت عليهم وذهبت دون الحصول عليها. وبوستات الترحيب أوكما أسميتها استجداء الترحيب ما هي الا شعور لا ارادي بالفرحة , لكن تأكد أن من بينهم كثر يملكون مقدرة عالية على الكتابة في شتى ضروب المعرفة , وحتما سيرفدون هذا المنبر بجميل المواضيع وشيقها.
لك احترامي وخالص ودي
| |
|
|
|
|
|
|
Re: إستجداء الترحيب ... المانشيتات المُمَوه ... حاجات ما سمحه تب (Re: عمر التوم)
|
الأخ / عمر التوم
صباح/مساء الخير ...
Quote: الأخ عزام تحية طيبة
للكتابة مواسم وأمزجة, تقتضي في كثير من الأحايين توفر ظروف معينة , لحصول فعل الأندياح فيها, كل الأعضاء الجدد كما ذكرت آنفا انتظروا شهورا طويلة لمجرد حصولهم على العضوية , وتخيل كم المواسم التي مرت عليهم وذهبت دون الحصول عليها. وبوستات الترحيب أوكما أسميتها استجداء الترحيب ما هي الا شعور لا ارادي بالفرحة , لكن تأكد أن من بينهم كثر يملكون مقدرة عالية على الكتابة في شتى ضروب المعرفة , وحتما سيرفدون هذا المنبر بجميل المواضيع وشيقها. |
أنا ما بفترِض إنو الأعضاء الجُدُد ما عِندهُم إنتاج مُفيد أو غير مُفيد أنا بتكلم عن إنو < رحبو بي أنا جديد > ما سمحه حتى لو كتبا البرفسور يوسُف فضل ... وأسبقِية العضوِية ما بتخلي الزول بِعرِف يِكتِب ولا ما بِعرِف يكتِب ... وترجمة الفرحة بِحُصول ِالعضوِية كِتابتًا ما < شعور لا إرادي > لأنك فتحت الكمبِيوتر وجلبت السايِد وكتبت الإسم والباسويرد وإشتغلت أصابعك فوق الكيبورد ده كلو ما < شعور لا إرادي > ... هسِع بوستي ده يِمكشن صاح ويمكِن ما صاح ... بس أنا وقفت مِن بدري التفكير بِصَوت مُنخفِض ... البِخطثر لي زين ولا شين بكتِبو هِنا ده ... يِعجِب فُلان ولا ما يِعجِبو ده ما غرضي ... أي شي بشوفو بِمقايسي مو سمِح بكتِبو ما بتهَيب ...
| |
|
|
|
|
|
|
Re: إستجداء الترحيب ... المانشيتات المُمَوه ... حاجات ما سمحه تب (Re: عزام حسن فرح)
|
بت قضيم
Quote: على فكرة عجبتني فكرة اشاكل لي زول اقول ليه (امشي يا دهم يا مرجرج) من رجرجة ودهماء قيافة مش!! |
حليلك إنتي قايله < دهماء > دي شتيمه ... دهماء دي يعني الناس الكُتار ... الجماعة وما عِندها مُفرد لأن < دهم > معناتا لون أخضر شديد ... أها ما تحرجينا ساي وتقومي تشاكلي ليكي زول وتقولي ليهو يا < دهم > كنكِشي فوق < الرجرجة > دي شتيمة مُدنكه معناتا الناس الكعبين بِالحيل وأنا بفَوِتا ليك لأني دايِر أكضِب الشينه قُلت الزوله غشيمه مو عارفة معناتا أكان عارفاها الرجرجه بقبلا مِن أصحابي عادي عِلا زولاً مو صاحبي بسوي فوقو رأي ... أها النقولِك بِالرغم مِن إنو العلم بِدني ليهو الدايرو ما بِبذلوهو كدي مجاني ... أعمِلي حِسابِك < مرجرج > بتقلِب المعنى تب ...
| |
|
|
|
|
|
|
Re: إستجداء الترحيب ... المانشيتات المُمَوه ... حاجات ما سمحه تب (Re: عزام حسن فرح)
|
شوف باعزام
تحتل سودانيز اون لاين دوت كم حسب تصنيف موقع Alexa العالمي لترتيب المواقع:
* المركز الأول على مستوى المواقع السودانية.
* المركز السادس على مستوى المواقع التى تزار من السودان
* المركز الـ 4300 على مستوى كل مواقع العالم ..كاول موقع سودانى يصل الى هذا الترتيب
* المركز الثامن على مستوى افريقيا
عزام ياخوي
اخوك برلوم إلا السناير فقعوا مرارتنا الواحد يكون فاتح اكتر من بوست وما فيهوا اي قيمة او فائدة لنا كقراء وكما تعلم نحن متابعين من كمين سنة لهذا العملاق سودانيز اون لاين والله السناير زمان كانوا بعجبونا لما يختلفون ولما يتفقون لانه كان كله بأدب حتى الكُتاب اللذين كنا نقرا لهم قل بريقهم لانهم التفتوا الى الشتيمة وقلت القيمة ولو عايزني بعمل تحليل لكل البوستات المفتوحة والسابقة ياخي معقول ولماذا الناس تصل الى هذا المستوى وانت تكتب في بوست مصنف تعرف شنو مصنف يعني جيب المفيد للسودان او بيع الباسورد بتاعك او اعرضه للايجار (التقبيل). ياخي ليه كل الناس اصبحت تلبت لبعض في الخيران انت في بوست سابق قلت لي وانت فعلت لي معقول ياشباب والله كنتم مثل اعلى لنا وفيكم من يقدم الكثير وكثير . عزام ما تتماسخ مع الناس خليهم يعملوا تمرين وياخي وريهم فنون الحوار وارشادات وكده وكيف الناس تعمل روابط يعني بدل مانضيع زمنا في الشيء المامفيد . ياعزام تعرف اصغر واحد بيكت في سودانيز اظن عمرة 40 سنة والاعمار بيد الله والعمر الافتراضي للناس يعني لما تصل في الخمسة وستون خلاص بتكون مجهجه بعد كده وربنا يطّول عمركم وارحمونا بالمفيد ومتعونا وارجعوا الى سابق عهدكم . من اجل منبر معافى ومفيد . ياعزام دي تسجيلات بالجملة زي تسجيلات هلال مريخ سنة 1987م ومنها الكورة مشت الخور وان شاء الله البراملة يسبتون العكس وخلي بالك من (مدثر قرجاج ) (برلوم) وله اربعة روايات كتبها وهو في الثانوي زي قصيدة سال من شعرها الذهب كتبها (ابو امنه حامد) وهو في الثانوي وده واحد من البرالمه وشايف في واحد اسمه وائل برضو خطير اما الاستاذ صلاح عباس فقير ده حكاية ما تخلص وامسكوا الخشب . ياعزام وحات والدتك يديها العافية بطل المساخة ونحن متابعنك مع هشام ادم يالله امشوا لينا هناك . بالله ياعزام نحب حوار نظيف من غير اساءه وتجريح وهذا ما نطلبة من كل فاتح بوست عزام كيف الحاجة والدتك لقيتها وانا بهديها ليك عٌمره كاربه وقول الله يقبل بس .
سلام سلام
| |
|
|
|
|
|
|
Re: إستجداء الترحيب ... المانشيتات المُمَوه ... حاجات ما سمحه تب (Re: الامين موسى البشاري)
|
الأخ / الامين موسى البشاري
Quote: الاخ عزام حسن
تحية الود والتقدير والاحترام شوية شوية علينا يا اخـــوي إن بوستات الترحيب ليست استجداء وأنت لست مجبر بالرد عليها وهي عادة وتقليد متبع في كافة المنابر وليست بدعة ابتدعناها هنا ويقصد بها البرلوم التعريف بنفسه وفتح سكة لمواضيعه وأكثر هؤلاء البرالمة يكتبون في العديد من المنابر السودانية الأخرى يعني سناير ولكن عشان تكتب في البورد محتاج تفهم الجو العام وماهية المواضيع التي تناسب الاعضاء والترحيب أصـــلا هو احد واجبات السناير ... ونشكر الاخ والزميل ياسر بيناوي لترحيبه بناء في بوست أنيق وهو ما لم تفعله انت وكما ترى البورد اغلبه بوستات عن الصحفية لبنى وكورة هلال وكانو والمريخ وزيسكو وأخـــيراً إقـــــــالة عمنا صلاح مشكلة "قوش" عن جهاز الأمن والمخابرات لك خالص مودتي
بالجنبة كده:
أول يوم ادخل المنبر لقيت ليك مشكلة كبيرة بين اختنا "ميادة كمال" وأحد الأعضاء أظنه "محمد عادل" طــــوالي الواحد عامل ساتر. وبوست آخـــر يتحدث عن مساخة الزمـــــــلاء. وشهدنا الكثير من الإساءات في هذا المنبر عندما كنا نتابعه من الخارج اها قلنا نتروى شوية رأيك شنو؟؟؟؟؟؟؟؟ |
- طبعًا ليس مُجبر بِالرد أو أي شئ غيرو ... - وكَون بوستات الترحيب البستجداها الزول لرقبتو معمول بيها في المنابِر الأُخرى ما معناتا صاح ... - السينير ما بِشحد ويستجدى الناس ... - إنتو أديتونا فُرصة ... إستلم البعض منكُم باسويردو وبعد دقيقة فتح ليهو بوست بِعِنوان < هل مِن مُرحِب > - علك دايِر كُل عضو يفتح بِإسمو بوست ترحيب؟ القام بيهو ياسِر بيناوي إسمو فرض كِفاية - رأي بقولو ليك لامِن أقرا ليك شيتًا مُفيد لأنك قُلت : < عشان تكتب في البورد محتاج تفهم الجو > وفي نِهاية مُداخلتك قُلت : < عندما كنا نتابعه من الخارج >
يا زول نجضني ... مبروك عليك ... وحمدلله على السلامة ... جيتًا جيت ... حبابك عشرة بلا كشره ... البيت نَور الرووووووووب أها عاد تاني شِنْ أسو؟
| |
|
|
|
|
|
|
Re: إستجداء الترحيب ... المانشيتات المُمَوه ... حاجات ما سمحه تب (Re: عزام حسن فرح)
|
وليد عبداللطيف ... قول يا لطيف
Quote: كيف الحاجة والدتك لقيتها وانا بهديها ليك عٌمره كاربه وقول الله يقبل بس |
كتر خيرك ... عِلا أُمي دي طَيبه جِنِس طيبه ... ماف طريقة تحَول العُمره دي لِولدا كدي شوف مُفتي مِن ناس الحِجاز قولو ليهو عِندي صاحبًا لي بدور أسيلو عُمرة ... أها زول أكان أجاز زول الحِجاز ما دربي مرق تب ... أنا أخوك ...
| |
|
|
|
|
|
|
Re: إستجداء الترحيب ... المانشيتات المُمَوه ... حاجات ما سمحه تب (Re: عزام حسن فرح)
|
الأخ /عزام
صباح/مساء النور
Quote: ما < شعور لا إرادي > |
في كثير من الأحايين تمر بنا لحظات من الفرح العارم, او الحزن الصادم, يليهما ردات فعل مبهمة وغير مفهومة حينها , بالله تخيل معي
-ارسال طلب عضوية -امل في الحصول عليها -يطول الأنتظار ويتسلل اليك القلق - تعيد ارسال الطلب -يطول الانتظار , قد يكون شهور - احباط يغمرك -دعوات التناسي تتصاعد لديك -أخيرا نسيان للمسألة برمتها
وذات صباح يأتيك الخبر اليقين , بأن هذه العضوية قد منحت لك , هنا يتجلى شعور الفرح العارم , تتكثف حينها في خاطرك فكرة واحدة , تسحب فعل الأرادة من اطرافك اليها , تفتح كل الممرات فيك جهة ذاك الفعل غير المفهوم, الذي هو في حالتنا: - الجلوس على الكمبيوتر - فتح الموقع - تجربة حساب العضوية الجديدة - افتراع موضوع جديد - عليكم الله رحبو بي
--------------------------------------------- هسي ياعزام انا جاي الدوحة عندي شغل فيها , وفي البرنامج كنت عايزك في عشرة ونسة , وفنجان جبنة , اها الحلل شنو بعد بوستيك ده
تحياتي
| |
|
|
|
|
|
|
|