إحياءا لذكراها و إبقاءا لسيرتها العطرة في نفسي و في نفوس كل من أحبوها و عطرتْ أيامهم بحلو معشرها.. و إهداء خاص لدكتورة نجاة محمود و بدر الدين شنا و الملا عمر و كل من عاش حياتها هنا معي
كظل شجرة وارفة الظلال ، نهرع للإحتماء بظل فكاهة أم عطية ، لنتقي هجير الغربة و نتكيء إتكاءة ندري في دواخلنا أنها ( زى ضل الضحا ) ، و لكن الكحة ولا صمة الخشم.
إبنها ، كلما أحكي له قصة عن أمه ، يضحك و يتحفني بإحدى نوادرها. قال : شهر رمضان الفائت ، و بعد أن صلت الوالدة صلاة العصر ، وجدتها تضع سفة ماكنة و هي ما زالت تتمتم بأدعية ما بعد الصلاة ، قال فقلت لها : يمة ، إنت نسيتي إنك صايمة ؟ قالت : أنسى كيفن يا الغبيان. صايمة و لله الحمد. قال : طيب إنت سافة ليه؟ قالت و سلطان الكيف يبدد نعاسها : شن جاب الصعوط مع الصوم ؟بطل الفلفسة الفارغة دي. يمة ، الصعوط من المكيفات ، و دة بيبطل الصوم. شوف يا جنا ، أنا بصوم قبال أعرس أبوك ، أمي و حبوبتي كانن بسفن و هن صايمات. بعدين ربنا ما ذكر الصعوط في القرآن ، قال الأكل و الشراب ، و بس.
قال ، حاولت أن أشرح لها المزيد ، فقالت و هي ترفع سبابتها : هوى يا ولد ، عروق راسي بينتحن زى وتر الطمبور ، خلي السفة التسوي المفعول حقها ، روح شوف لك شغلة كان عندك. قال فأخبرت كل من جاء لزيارتنا ، فكان ردها للجميع : كدي واحد فيكم يجيب لي آية ولا حديث واحد. الصعوط لا بنبلع لا بنشرب ، بالعكس ، أنا ممكن أصومن شهرين ورا بعض مادام المكيف شغال و السفة جوة الراس. وحاتكم إنتو ، زمان رمضان يجي في عز الصيف و الشمس تقول إندلت مترين لاتحت ، و نحن بنحش في اللوبيا ، و السفة الماكنة في الخشم ، بالله تنزلق تنزل براها من الشلوفة من شدة العطش و الهجير، إلا نرفعا و نرجعا تاني بيد المنجل.
08-25-2009, 03:59 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
زوجة إبنها ، تحب أن تمازحها كثيرا ، فطلبت منها أم عطية أن تصبغ لها شعرها بالحنة ، فقالت لها زوجة إبنها أن هناك حنة في السوق مخلوطة جاهزة ، و بدلا من الحنة ، صبغت لها شعرها بصبغة سوداء و منعمة للشعر في نفس الوقت ، فإنسابت خصلات أم عطية البيضاء سوداء حريرية ، نظرت إلى المرآة ، فصالت و جالت ، و أرغت و أزبدت ، و نظرت إلى المرآة و جفلت و هي تصرخ : دة شنو دة يا المجنونة ؟ الناس حسه كدي ما حتاكل وشي. ثم تنظر للمراية و تعاود الهجوم ، و رويدا رويدا خفت حدة هجومها و قالت و هي تدندن و تتحسس شعرها : شعرك ليل يا بت بليل ، شعرك حريري يا ست الملك الماهو ميري ، جمالك أصيل يا بت ست الجيل ، جمالك أصلو ما معقول يا أم فاطنة و بتول. و أطلقت زغرودة مخنوقة و هي ترمي شبالا يمنة و يسرة. ثم قالت و هي لا زالت تحتضن المراية : أريتو أبو عطية كان عايش . الأيام دي الكانت أيام العجن و الدلال كنت حأخليهو يشرب ما يروى. و الله يوم عرسي شعري ما كان كدي ، الله يخدر إيدك يا بتي. طوال اليوم و المراية في يدها و هي تدندن بأغاني ( شي من راسا و شي من أغاني الحقيبة ).
08-25-2009, 04:00 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
تتحلق حولها الشابات في حفلات الأعراس : أم عطية ، إنت مشيتي شهر عسل ؟ يا بتي أيام العرس العسل في الصحن ما شفتو. بعدين العسل دة هو شهر كامل ؟ بعد عشرة أيام الضبابين يهشوها باللسان يا بنات أمي. و تتعالى ضحكات البنات و هي في نصهن تتربع بعد رشوتها بشوكولاتة إسنكرز للإستزادة منها. أم عطية تعشق بعد الصعوط : الآيسكريم و الشوكولاتة. تقول و هي تلتهم الشوكولاتة : جنس دة وين كان زمان ؟ زمان الداير يحلي إلا كان يلخبط ليهو سكر مع سمن بلدي و يلحسو. سألتها إحداهن في إحدى الحفلات : أم عطية ، يعني إنتي ما قضيتي شهر عسل ؟ تقول : عليك أمان الله ، بعد خمستاشر يوم جاني و أنا خاتة دلكتي و كركاري و قال لي : قومي رضعي العجل داك البكورك من صباحة ربنا. بالله العجل دة أتقول أنا الوالداهو. هو ذاتو شكلو ما كان شكل عرسان ، الدلكة السووها ليهو محل ما راحت ما بعرف ، و بقى أغبش و شنباتو الكانن زى كليقة البرسيم ، بقن لاتحت زى كرعين البنبر المكسور. و أنا ذاتي من يومتا ، إيدي من كترة الشغل بقت زى مبرد الحديد ، وكت أخيط حاجة، أغز الإبرة في بطن إيدي ، أخلص شغلي و أمرق الإبرة و أخيط.
08-25-2009, 04:02 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
تلح أم عطية على ولدها لتذهب للسودان و ترجع بعد الدميرة ، و أنا متردد بين إقناع إبنها بضرورة ذهابها للتنفيس ، و بين إفتقادنا لها ، فهي ملح غربتنا ، و عسله و فاكهته.
08-25-2009, 04:03 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
فرحت فرحا غامرا ، و حزنت في نفس الوقت لعودة أم عطية بهذ السرعة من السودان ، فقد إستقبلتها الملاريا في الخرطوم بالأحضان و نهشت جسمها النحيل و أدخلوها المستشفى قسم العناية المركزة ، حتى أن إبنها إضطر لأخذ إجازة طارئة و أتى بها إلى هنا قبل أن تمتع ناظريها بنيل قريتها و باسقات نخلها ، و كانت تمني نفسها بأن تحضر حصاد البلح و تستعيد غابر الأيام ( و شبابا كان و حزنا كان و شوقا كان. ). و كنا نمني أنفسنا بحكاوي من ريحة البلد تعطر سماوات غربتنا التي تعطنت بطين الغربة الجاف. زرتها في المستشفى ، كانت كل أنحاء جسدها النحيل به آثار زيارة البعوض ، ناديتها بصوت هامس ، ففتحت عين واحدة و إبتسمت نصف إبتسامة باهتة، ثم إستسلمت لسلطان نوم التعب و الإرهاق و فيح الحمى. لم أنقطع عن زيارتها يوما ، و لساني يلهج بالدعاء لها. كنت كلما أذهب لزيارتها آخذ معي كمية من الإسنكرز التي تحبها ، حتى إرتفع رصيدها إلى ما يملأ ( جردلا) صغيرا.
08-25-2009, 04:04 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
عندما ذهبت آخر مرة لها بالمستشفى قبل خروجها منها ، وجدتها تلتهم الشوكولاتة بنهم و هي تقول : بالله النصيبة دي هناك طعمها غير هني ، أتقول الشوكولاتة كمان هناك بتجيها الملاريا. ضحك الدكتور السوري و قال لها مداعبا : ما توكليش حلويات كتير ، بعدين يجيك سكري. فقالت أم عطية و هي ( تمتشق ) صباعا آخر من الإسنكرز : ما تخاف علي يا سكر إنت ، لو غطسوني في برميل شوكولاتة ، ملاريتنا دي بتجيب خبر السكر الفيها . هاك يا الحكيم ، تاخد ليك شوكولاتة ؟
و هي تلملم أغراضها من المستشفي ، إهتمت فقط بأخذ الشوكولاتة في كيس ماكن. ، و هي تعطي تعليمات لإبنها و زوجته بلملمة باقي الأغراض. يقول إبنها و هو يغالب الضحك : دارت أمي على كل الأقسام بالمستشفى و هي تقول للمرضات : ما نجيكن في شيتن بطال. نفضوا فرشاتي ديل كويس يمكن في بعوضة جات زى ناس الزوغة في نص هدومي ، تقوم تجلبغ ليكم مستشفاكم السمح دة بالملاريا ، و الله جضيماتكن الزى طماطم الشتا دة يبقى بعدين زى الباذنجان المضبلن. دحين يا عطية البنيات بيحملن قرصة بعوضنا ؟ و الله يكبكبن الدم زى دش الحمام. نحن جلدنا ما بقى زى لفة القمر دين ، طبقات طبقات.
08-25-2009, 04:06 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
و تتضاحك الممرضات الفلبينيات من حديثها المتواصل غير المنقطع و هن يتحسسن خدودها المنقوشة بالشلوخ ، و كأنهن يردن التأكد من أنها حقيقية. و في ليلة خروجها ، إجتمعنا عند إبنها في وليمة عشاء ( كرامة السلامة ) ، فجلست على طرف السرير و قلت لها : و الله ألف حمد الله على السلامة . صراحة أنا شفقت عليك يا حاجة. فقالت و هي تزيح السفة من جهة لأخرى بطرف لسانها : و الله أنا إشتقت ليكم في اليومين البسيطات ديل يا حشاى. قلت لها و أنا أحاول أن ( أنكش ) كومة حديثها و أفتح صنبور حكاويها : الملاريا دي كيف حسيتي بيها بالأول ؟ قالت و هي تهز يدها اليمنى كأنها تدق على رق أو طار : بري ، بري يا ولدي ، زمان البعوض تسمع صوتو يون و يزن فوق راسك و جنبك ، حسع عليك أمان الله النوع الجديد دة كاتم صوت زى جنريتر ناس حياة جارتنا في أم بدة. بعدين أنا سمعت إنو في بخت الرضا و علي الجهات ديك البعوض بيجي في شكل عصابة ، إتنين يرفعوا الناموسية و البعوضة التالتة هي البتعضيك. لكن حسع البعوض في الخرطوم بقى شغلو إنفرادي ، الناموسة تجي و ترفع الناموسية و البطانية بي جنحاتا ، و تمد الإبرة حقتا و يا جلد جاك بلا . ثم قالت : كان ما أخاف الكضب تسمع شفيط الدم زيما بتمص ليها في عصير بالشفاطة ديك. ( و ضحكت و هي تضربني ضربة خفيفة على ظهري للدلالة على المبالغة ). قلت لها و أنا أداري ضحكتي : معقولة دي يا حجة ؟ فقالت و هي تعتدل في جلستها : إنت ما مصدقني ، لاكين أحلف لك يا جنا ، وكت تغز إبرتها في جسمك ، زى النغزوك بي ضفر الأصبع.
08-25-2009, 04:07 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
قلت لها : المستشفى هناك كيف ؟ زى هنا ولا أحسن ولا أكعب ؟ قالت : أنا وكت الحمى زادت فوقي ، غبيت و ما عرفت أنا وين ، أها لما فتحت عويناتي ، أنا كنت قايلة روحي في الرياض ، مستشفى زينة ساكت و حلوة ، قلت يا ربي عطية دة جا و نقلني بالسرعة دي ؟ أها و الخلاني أشك إني فعلا في الرياض ، أشوف ليك ممرضة من أمات عيون الزى خطرات عربية ناس مصطفي جاركم دة ، عويناتا قايلات كدى لافوق أتقول مشدودات بي مشابك من نص راسا. جنس الممرضات ديل أنا ما قابلني علا هني في الرياض. قلت لها و أنا أستحث ذاكرتها و أستفز مخزونها : في جنس حفلات فاتنك يا حاجة ، حاجة تمام. قالت و هي تسرع لحوض الغسيل لتفرغ السفة و توابعها : أصبر. ثم عادت و قالت : الحفلات دي الشي الوحيد الكنت متأسفة لي عدم حضورن. إن شاء الله عندكم الشرايط. فوعدتها خيرا ، و خرجنا و نحن ندعو لها بالصحة و العافية.
08-25-2009, 04:08 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
قابلني إبنها في اليوم التالي ، و ما أن رأيته يضحك ، حتى عرفت أن في جعبته حكاية جديدة عن أمه ، و قبل أن أسأله قال : تصادف أن كان معها في الطائرة للخرطوم والد أحد زملاءنا بالعمل ، و هو مقيم مع إبنه بعد وفاة زوجته أم زميلنا ، كان ذاهبا لتعزية ، فأوصيته بوالدتي ، و أظنه بالغ في العناية التي لا تحبها . والدتي تتضايق من الإهتمام الزائد بها. و تصادف أن رجع الرجل معنا على نفس الطائرة التي رجعنا بها للرياض ، فقالت أمي و هي تئن من وجع المفاصل من شدة الحمى : الراجل دة زاد على المرض. أنا مكجناهو من يومي. يا يمة الكلام دة ما بيصح ، الراجل كان ماخد بالو منك لما جيتي للخرطوم براك. قالت و هي تئن : الراجل دة طمعان في أملاكي. قلت لها : أملاكك شنو يا يمة. ياهن الكم فدان و كم نخلة الفي البلد؟ قالت : يا الغبيان ياهن ، ديل الأملاك ، و المتلك ما بيعرف قيمتن ، لاكين هو المتل يد الفندق دة نجيض بيعرف ليهن. يعني أمال طمعان في شنو يتكبكب فيني كدي ؟ إنت شايف أمك دي ليلى علوي ولا شاكورا ؟ كلمو يغير محلو دة ، أنا بتلبش وكت أشوفو.
08-25-2009, 04:10 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
يقول : كان الموقف محرجا ، و الرجل يجلس قبالتنا ، و كلما سمع الوالدة تئن ، يسرع و يقف بالقرب منها عارضا خدماته ، فتصيح أمي و تقول : الليلة وووب ، الملاريا يا عطية. الكينين يا حشاى. الطيارة دي مالا أتقول واقفة في الإشارة. و يهرول الرجل مرة أخرى و يضع يده على جبهتها ، فتبعده بحركة عصبية و هي تقول من تحت أسنانها : أنا راسي زى ليمونة المخلل ، الراجل دة ما يلمسني يا عطية. يقول إبنها و هو يمسح دمعاته من الضحك : كنت في موقف لا يحسد عليه ، هل أضحك أم أغضب ، و الرجل لايفهم قصد أمي ، و يصر على خدماته. و يهرول إليها بحسن نية كلما تململت. و أنا أبرر تصرفات أمي له بأنها بسبب مخلفات الحمى الشديدة. يقول ، عندما أتت المضيفة بكوب ماء لأمي ، أمسكتها الوالدة من يدها و قالت لها : يا بتي ، درجة أولى مافيها كرسي فاضي ، ودوني هناك وبدفع ليكم الفرق.
08-25-2009, 04:11 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
طيب يا أم عطية ، النسوان كمان أقعدي معاهن شوية. قالت و هي تقطب ما بين حاجبيها : أنا البشتكي لى من وجع راسو ، أنا برضو بجيني زيو وجع راس ، و ديل ما عندهن غير الشكية من المرض يا كافي البلا. دي رطوبة في الركب، و ديك خمة نفس ، و ديك ما بتنوم الليل. أنا مالي و مال العيادة دي. . لاكين شوف الوشوش السمحة دي ، تذكرني بي شبابي الراح ، و يفتحن النفس ما شاء الله. تقول هذا و هي تجضم هذه و تضرب تلك على ظهرها. تمازحها إحدى الشابات : أم عطية صحي في راجل بيحبك ، مشى معاك السودان و رجع معاك الحجل بالرجل ؟ فإستشاطت أم عطية غضبا و قالت : حباهو برص إن شاء الله. و الله يا بتي أظن هو ذاتو بينقل الملاريا العامل زى إيد الفندق داك. أيام مرضي بالله واقف لي زى إبرة الدرب في الإيد ، كلما أشوفو الحمى تزيد على ، و لما ينضم ، وحاتكن كأنو البعوض قاعد ينوني فوق راسي.
08-25-2009, 11:41 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
تقول أخرى مستفزة إياها : لاكين قالوا أصلو ما شال إيدو من جبهتك من الخرطوم لغاية الرياض ، قالوا كان خايف عليك من الحمى. قالت و هي تعدل من جلستها : الحمى يا يابا اليجسوها بالمقص ، بالله إيدو زى حجر الطاحونة ، تقيلة جنس تقل . هو الجاب لى وجع الراس الكعب داك. و تتعالى ضحكات الفتيات ، فتناوشها أخرى : لاكين يا أم عطية إنت وكت ما دايراهو يقرب منك ، ليه ما قلت ليهو يزح من جنبك بعيد؟ فقالت أم عطية بلهجة مؤكدة : يا بتي كواريكي من شدة وجع الراس خلت الركاب القاعدين جنبي يزحوا من جنبي لي آخر الطيارة. لاكين بالله الغتيت دة لاصق فيني زى القراصة اللاصقة في قعر الدوكة الكعبة.
08-25-2009, 11:42 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
يقول إبنها كالعادة و هو يضحك : عندما أتينا بها من الخرطوم بعد مرضها بالملاريا ، أخذناها صباح اليوم التالي للمستشفى ، و في الطريق إستوقفتنا الشرطة في أكثر من محل للتفتيش كما هو الحاصل هذه الأيام ، فتضايقت من كثرة الوقوف و هي لا تزال تعاني من آثار الحمى و الصداع ، و تستعجلني متنرفزة للوصول للمستشفى، و عند إحدى نقاط التفتيش ، أخرجت رأسها من شباك العربية و نادت على العسكري السعودي بأعلى صوتها: هوى يا جنا ، البلد الحاصل فيها شنو ؟ لعل ما عندكم إنقلاب ؟ ثم أدخلت رأسها و قالت لإبنها : عطية ، الظاهر في إنقلاب ، الحمد لله يا ولدي ، كفيلك السجمان داك أريتو يموت في نص الجوطة دي، إن شاء الله تعفصو دبابة ولا يهرسو قندران الجيش. ثم تخرج رأسها مرة أخرى و تخاطب العسكري الواقف بين مندهش و حائر : إنقلابكم دة الفي نصة نهار دة بذكرني إنقلاب الشعوعيين علي نميري. أنتو تتجازوا يايابا ، أي حاجة تقلدونا فيها.
08-25-2009, 11:43 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
فقال العسكري : ويش قلت يا حجية ؟ إنت ويش تبغين ؟ فقالت و كأنها لم تسمع سؤاله : و الله إنقلابكم دة ما ينجح بي جنس تفتيشكم دة ، ظباطنا هناك ظباط السرور ، إنقلاباتم منجضة و مستفة يا يمة. بالله إنتو هيبة العساكر ما عندكم ، بالله هسع بي كروشكم الماكنة دي بتقدروا تسكوا ليكم زول كان قام جاري؟ أنا جاية من السودان و عندي ملاريا و حمى ، كلم العساكر ديل يزحوا لينا عشان نصل بي سرعة يا عشاى قبال ما تسووا حظر التجول. يقول عطية ، و هو يغالب ضحكه ،: تملكني خوف و ذعر شديدين ، فالوقت لا يسمح بهذا حتى على سبيل المزاح ، طلبت منها السكوت و أنا أتصبب عرقا و متوقعا أن يطلبوا منا النزول من السيارة في أي لحظة.، و لكنها واصلت كلامها مع العسكري بطريقة يبدو أن آثار الحمى ما زالت تتحكم فيها، و لحسن الحظ لم يفهم منها العسكري كلمة واحدة و هو ينظر إليها بإستغراب . قال لي العسكري : ويش فيها الحجية ؟ معليش يا طويل العمر، أصل الوالدة تعبانة شوية و موديها الدكتور.
08-25-2009, 11:44 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
قلت لعطية : أظنك طول اليوم تضحك من عمايل الوالدة في البيت و برة البيت. قال : الغريبة لما تكون معي لا أستطيع الضحك ، فأنا أراقبها و هي تتصرف أحيانا بحكمة و أحيانا ببراءة و أحيانا أخرى بطيش شباب ، و لكن عندما أقابلك و أحكي لك ، أضحك و أنا أسترجع حكاويها. زولنا الذي ذهب معها للسودان و رجع معها بالصدفة ، تسميه أم عطية ( نص متر ) و أحيانا يد الفندق ،. فاجأ الجميع بأن حضر و معه كمية من شوكولاتة إسنكرز التي تعشقها أم عطية و معها علبة حلاوة ماكنتوش ضخمة و كمية من الآيس كريم. يقول إبنها و هو يهتز من الضحك : ما أن دخل الرجل و سلم عليها حتى طنطنت أمي و قالت من بين أسنانها : سيد الملاريا جانا ، يا سيد الحسن أبو جلابية . و ما أن علمت أنه أتى بأشياء محببة إليها ، حتى أخذتها بين يديها و هرولت إليه و هو بالصالون ، و قالت وسط دهشتي و دهشة زوجتي : إنت يا راجل ماتقول لي إنت داير شنو ؟ بس بالأول قول لي ، منو القال ليك أنا بحب جنس الحاجات دي ؟ و الله كان ما قلت لي ما أخليك. يقول عطية : حاولت تهدئتها و لكنها كانت في حالة من الهياج جعلتني ألوذ بالصمت. فقال الرجل و هو يغوص في الكرسي : إنتي بتحبي الحاجات ، و أنا عارف و الناس كلها عارفة. قالت أم عطية و هي تضع حاجياته أمامه : تصدق و تآمن بالله ، أنا من الليلة بغير الصنف. و زول يعرف تاني مافي. خسوسا إنت. و قالت و هي تخرج كالعاصفة : حركات عجايز آخر الزمن.
08-25-2009, 11:47 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
أم عطية ، بالرغم من أنني أناكفها كثيرا ، إلا أنها لا تستغنى عن ونستي. فأنا أثير فيها دائما شجون قديمة ، تحب هي أن تعلق عليها بروحها اللانمطية. فهي كما قلت من قبل ، لها عقلية عصرية ، تخلطها بتجربة سنواتها و حياتها الماضية. ذهبت إليها ، فوجدتها ، ما شاء الله ، قد إستردت عافيتها تماما و توردت خدودها و ظهرت شلوخها جلية واضحة. و دائما هي متسلحة في جيبها اليمين بحقة الصعوط و في الآخر أصابع من الإسنكرز ، عشقها الأزلي و حولها كالعادة شابات تتوسطهن أم عطية. بادرتني أم عطية : هوى يا جنا ، سمعتو ولا جابوه ليك ؟ مالك قاطعتني ؟ قلت لها و أنا أعانقها بحرارة : هو أنا أقدر أقاطعك ؟ طيب يا جنا أنا ما رسلت ليك عطية ؟ و كلمت ليك مرتك في التلفون ؟ دة تقل ولا شنو ؟ لا و الله يا أم عطية ، الشغل كتير ، و الناس بقوا كتار و مشتتين هنا و هناك. و بعد أخذ و عطاء ، و كعادتها ، أنهت الملامة بضحكة مشوبة بكحة و هي تخبيء سفة ماكنة في فمها و هي تقول : الحمد لله الجيت ، تعال فكني من البنوت ديل. فسحبت كرسيا و جلست بقربها. قلت لها : خير إن شاء الله.
08-25-2009, 11:48 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
قالت شابة : أم عطية قولي لينا يوم شلخوكي شنو كان شعورك ؟ قالت و هي تستعدل في جلستها : أنا غبيانة من يومي ، أتاري يدلعوا فيني و يطبطبن لي في جضيماتي قبال أسبوع من يوم الشلخ ، زى البهيمة الدايرين يسمنوها قبال الضبح. أها اليوم داك إتلمن النسوان الماكنات الفي الحلة ، ، و كت مسكني ، بالله غير رموش عيني ما قدرت أحركن. مكلبات فوقي و خديجة أم نفسين واقعة جزر في جضيماتي. قلت لها و أنا أضحك : إسمها خديجة أم نفسين ؟ قالت و هي تضحك ضحكتها المحببة : سموها أم نفسين عشان ما بتفتر تب ، ما شاء الله كانت تسوي ألف شغلة في وكت واحد ، عشان كدي سموها أم نفسين . قلت لها : تفتكري الفنانات الفي التلفزيون ديل ، لو شلخوهن ، شكلهن كان حيكون أحلى و لا لا ؟ قالت : في واحدة كدي تبارك الله وشها يملا العين ، الشلوخ كانت حتكون فيها زينة ساكت. وشها كان حيشيل أربعة شلخات من جنس شلخاتي في كل جضم ، و لو شلخات شوايقة كان الجضم بيشيلو أربعة ولا خمسة. منو دي يا أم عطية ؟ فقالت شابة : تقصد ميادة الحناوى. فضجت البنات بالضحك ، فقالت أخرى : طيب دق الشلوفة كان حينفع مع منو ؟ فقالت أم عطية : البنية البتغني في القهوة ديك وسط الرجال إسمها منو ؟ فقالت إبنة إبنها : تقصدي نانسي عجرم ؟ فقالت أم عطية : بس ياها ، شلاليفا يستاهلن الدق و الله.
08-25-2009, 11:49 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
فتصايحت البنات ضاحكات و هي تجاريهن في الضحك الصاخب. نظرت إليها ، و قلت في نفسي : سبحان الله ، لديها مقدرة لا يستهان بها في الترويح عن نفسها و إلهاؤها عن آلامها. قالت شابة : أم عطية قولي الجد رأيك شنو في الفنانات في التلفزيون ؟ قالت أم عطية : أنا شايفة لي بنوت بيتراقصن و يتلولون بالله الواحدة زى صباع المعجون ، محل ما تميل جسمها يتزاوغ معاها ، ما زى نسوان زمان الواحدة زى الوتد المغزوز في المراح ، يدقوهو واقف و يمرقوهو واقف. تتعالى أصوات البنات بالضحك و هن يطلبن منها الإسترسال ، فتقول : بري .. بري .. يا بنات ، زمان القميص كان نص كم ، حسع القميص ذاتو بقى نص قميص ، بالله لحدي الصرة و بس ، و البنطلون ما تعرفيهو ناصل ولا أصلو كدي .
08-25-2009, 11:50 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
ثم ، صمتت صمتا مفاجئا ، و كست وجهها بوادر حزن و قلق. قلت لها : مالك ، زى الفي حاجة شاغلاكي ؟ قالت بصوت خفيض و نبرة حزن مفاجئة تكلل كل نبرات صوتها : يا ولدي ، قعاد الشقق دة جاب لى وجع الركب. و متل ما إنت عارف ، أنا هني لى خمسة سنين ، أختي ماتت و ما حضرتها ، و أخوى مات و ما حضرتو ، و أهلنا كتار ماتو و أنا بي جاي أبكيهم بين الأربعة حيطان. و أنا بيني و بينك دايرة أموت و أندفن في تراب حلتي و وسط أهلي و ناسي ، و يشيلو عنقريبي رجال حلتي العاشو معاي و مع أبو عطية ، ما دايرة أموت هني و يختوني في تلاجة و أندفن هني في بكانا ما تعرفوه تاني يوم لو عاوزين تزورو قبري.. ثم إنفجرت باكية في نحيب إبتدأ مكتوما ، ثم إنقلب إلى نحيب متشنج ، و أنا دائما ضعيف أمام دموع الناس ، لا أستطيع أن أتحمل بكاء رجل مظلوم أو إمرأة عجوز ، و خاصة إن كانت في ظروف أم عطية ، فهي لن تجد من يرعاها بالسودان لو عادت، لذا فهي بين سندان الغربة القسرية و مطرقة البلد الذي لا وجيع لها فيه.
08-25-2009, 11:52 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
بكت أم عطية بكاءا إنفطر له قلبي ، بكاءا تحس فيه نبرة الشخص الضعيف الذي لا حول له ولا قوة ، نبرة تمتزج بإحساس الشخص الذي لا أمل له في العودة قريبا ليملي عينيه بشوفة الأهل و موية النيل و ريحة الدعاش و مشية الحلة التي تعفر أصابع الأرجل بتراب البلد..........، و لم تنفع توسلاتي و تصبيري لها بحالات مشابهة لحالتها في إسكاتها ، و هي تضع رأسها على كتفي كطفل صغير ، و بللت دمعاتي توبها الذي أشتم فيه رائحة أهلي العزاز بالبلد. و خرجت من عندها مسرعا حتى لا ترى ضعفي. فلا هي نادتني للرجوع و لا أنا إلتفت ناحيتها. قاتل الله الغربة و قاتل الله الظروف. لم تفارقني صورة أم عطية و هي تبكي ، صوت نحيبها و بكاءها ظل يؤرقني طوال الليل ، و كأن صوتها و هي تبكي بتلك الحرقة قد إختزلت كل الألم الذي تخبؤه كل الطيور المهاجرة في دواخلها و لكنه ألم مكبوت ينفجر في لحظة ضعف
08-25-2009, 11:53 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
رن جرس التلفون ، و جاءني صوت زوجة عطية : أم عطية عاوزاك. أيوة يا حجة. أسمع يا ولدي ، عليك الله ما تقول لولدي عطية الكلام القلتو ليك أمبارح ، خصمتك بالنبي كان تقول ليهو .... ليه يا حجة ؟ فقالت و مشروع بكاء في نبرة صوتها : ما دايرة أنكد عليه يا ولدي ، هو عارف أنا بحس بي شنو ، لكن شن يسوي يا حشاى ، لا يقدر يخليني أمشي براى ، و لا يقدر يسيب رزقو هني و يبراني للبلد. شحتفة يا ولدي. بهدلة يا ود أمي في آخر العمر ، ....الحمد لله على كل حال. و لم تستطع أن تكمل ، فقد إحتبس صوتها بغصة أعرفها إن أرادت أن تبكي. زادت ألمي على الألم الفائت الذي لم تندمل جراحاته بعد. ها هو رذاذ الغربة يطال حتى من كنا نظنه أنه بمنأى عن إفتراش الألم و إجترار شريط الماضي.
08-25-2009, 11:55 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
الإجازة الصيفية تلفظ آخر أنفاسها مُمنياً نفسي بونسة أو ونستين معها قبل زحمة المدارس ، إلا أنها فاجأتني قائلة : خسمتك بالنبي يا حشاى كان ما مشيت معانا. و الله و نستك ما بستغنى عنها ، الله يرضى عليك تريدني أن أصحبها في سفرها لأداء العمرة ، و ( أفرفر ) ذاكرتها بمناكفتي لها، بعكس إبنها الذي يضحك من تصرفاتها و ينتقدها كلما ( لبخت ) أو خرجتْ عن المألوف. أم عطية عندما تصر على شيء و تلح عليه ، لا يسعك إلا أن ترضخ ، فبالرغم من (عمايل) الزمن في وجهها الصبوح ، إلا أن تقاطيعه تجبرك على الإستجابة لطلباتها ، فعلى محياها ترتسم طيبة لا نهائية و كمية من الحنان و الشفقة تجبر أي كان على الإستجابة لتوسلاتها التي تتبعها بدعوات تجعلك تردد دون وعى : آمين يا رب العالمين ... فما بالكم أنها تطلب مني مرافقتها لجدة نظرا لمشغولية إبنها، حيث ينتظرها حفيدها هناك لمرافقتها لأداء مناسك العمرة.
08-25-2009, 11:56 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
ليلة السفر ، إجتمعت الأسرة و الأقارب و الجيران ، و كعادتها ، تتوسط حلبة الونسة بروح معنوية عالية ، و هي تلتهم عشقها الأزلي الإسنكرز بنهم. قلت لها ممازحا : ما تنسي تشيلي معاكي كمية يا حاجة عشان السكة فقالت و هي تضحك ضحكتها المبحوحة : أكان نسيت البظبورت ما بنسى الشكولاتة ، إن شاء الله عاد السووها لينا يخدر إيديهم و يكتر حليبهم قلت لها : أحسن الشكولاتة ولا السفة ؟ قالت بتأكيد : السفة بتعدل النافوخ ، و الشكولاتة بتلولي روحي زى لولاى الأم لي جناها ، بعد آكل لى صباع صباعين ، أغمض عويناتي و إتذكر أيام كنا صغار لما ناكل الحمبك و الدفيق و نتكيف
08-25-2009, 11:57 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
يبدو أن الشكولاتة تدغدغ أحاسيسها الدفينة و تعود بالطفل الغائص في وجدانها ، فتتشبث بها تماما كصورة تذكارية تتراقص ذكريات صاحبها أمامك أو كطعم قديم تذوقته فيعاودك الحنين إليه بطعم جديد يتغلغل في مسام لسانك ليوقظ ذكرى ذلكم الطعم القديم أم عطية لسبب أو آخر ، أصرت على الذهاب بالبر على حافلات النقل الجماعي ، و لم تنفع توسلاتي لها بالذهاب جوا ، و قالت و هي تدس سفة ماكنة في فمها و تضرب كفا بكف لتنظيف يدها : السفر بالبر فيه أجر كتير ، عليك الله كان ما قبلت بالسفر بالبر
08-25-2009, 11:58 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
تحركنا بحمد الله ليلة الخميس ، قبل منتصف الليل ، جلست أم عطية أولا على الكرسي بالقرب من الممر و جلست أنا بالقرب من الشباك . و بعد أن غاص كل منا في متاهاته الخاصة ، إنتبهت إليها و قلت لها : أم عطية ، عاوز أسألك سؤال ممكن ؟ قالت : أسعل يا حشاى ، أنا كان ما جاوبتك أجاوب على منو ؟ قلت لها : حسع بالذمة ، مرات كدي بتتذكري أبو عطية ؟ قالت بعد تنهيدة قصيرة و هي تسرح ببصرها بعيدا عبر النافذة : بتذكرو في حاجات كدي بس. يعني حاجات كدي زى شنو ؟ قالت : يا جنا ما تزرزرني كدي ، قول بسم الله قلت بإلحاح : يعني حاجات زى شنو ؟ مادام ما عندك ونسة غير الموضوع دة ، أها أنقول ليك ، بتذكرو لما ولدت أول بت ، و الله جا فرحان ، و الزمن داك البيجيبو ليهو بت ، بالله زى الجابو ليهو خبر جنازة ، لاكين هو و الله يشهد ، فرح فرحة شديدة و ضبح ليها السماية خروفين زيها زى الصبيان. أها و بتذكرو أيام عرس البنات و عرس عطية و يوم ما بقيت أنا حبوبة و هو جد. أها حاجات زى دي يا ولدي.
08-25-2009, 11:59 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
نظرت إليها ، فوجدت مشروع دمعات على مآقيها ، فغيرت مجرى الحديث قبل أن تتحول رحلتنا إلى تراجيديا ، و قلت لها : أيام عرسك ما بتتذكريها ؟ قالت و هي تلكزني بكوعها : إنت الموضوع دة كان ما جبت سيرتو ما بتترتاح. ها يا يابا أيام عرسنا هي بقولو عليها أيام عرس ؟ حليلنا نحن الما شفنا الشيلة أم الدست و الربط. عليك أمان الله جابو لينا شنطة اللت حديد مصدية فيها توب و فركة و حتتين قماش و فتيلين اللات ريحة واحدة بت السودان و التانية فرير دمور و شبشب أبو سيرين و سفنجة القمر بوبا. يا ها دي الشيلة ، و جونا شايلنها فوق حمار. قالت و هي تضحك : و العجب و كت وصل الحمار ، النسوان زغردن ، تزغردن فوق شنو يا السجمانات الرمدانات ؟ أمال لو الشيلة كانت جاتكن من جدة و بي بوكسي لي خشم الباب كنتن حتسون شنو ؟
08-26-2009, 00:00 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
ثم واصلت و هي تدفن بقايا سفة في منديل ورقي : حليلنا نحن من قعاد الكوشة و فستان الزفاف. أنا ما زعلانة علا على عدم لبسي لفستان الزفاف و قعدة الكوشة. زينة ساكت ، ما شاء الله و تبارك الله العروس تجيك تقدل زى الملايكة النبي فوقا ، أبيض في أبيض ، و الوشي يلالي زى قمر أربعطاشر قلت لها : طيب يا أم عطية برضو إنتو زمان بيسوو ليكن الدلكة و الزيت و برضو العروس يعني كانو بيدلعوها و يلمعوها قالت تقاطعني : ها يا يابا ، شن الفايدة ، الواحدة يقعدوا يفركوا فيها شهر في بطن البيت ، برضو ما بتحصل عروس الزمن دة. زمان رجولنا من القشف و كترة الخدمة زى ضهر التمساح ، الواحدة يغطسو رجولا في الزيت ضحوية كاملة ، برضو الرجلين تلقاهن يابسات
08-26-2009, 00:02 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
ثم قالت فجأة : تعال بي هني يا جنا ، خليني أتفرج شوية من الشباك قلت لها هامسا : مافي حاجة يتفرجوا عليها يا حاجة و قامت من كرسيها و كأنها لم تسمع كلامي ، فقمت لها و جلست هي في مكاني ، ثم قالت بصوت عال قطع الصمت المطبق على ركاب الحافلة : بسم الله ، بالله البلد كلها خلا ، شدرة خدرا مافيها. ناشفة زى ناسا فلكزتها حتى لا تفتح علينا فتحة و الحافلة نصفها سعوديين من الرياض ، فقالت : بتلكزني مالك ؟ كلامي غلط ، بالله البلد حجارة و أسفلت يا كافي البلا. حليل بلدنا الطيبة ، تتفرج من كل الجهات على الجناين و الشدر و البيوت و الناس يأشروا ليك كأنهم بعرفوك. بري يايابا. صحي يا جنا البلد دي الرسول ما زارا عشان كعوبية ناسا؟
08-26-2009, 00:03 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
أحرجت إحراجا شديدا. فأمامها مباشرة فتاة سعودية و أمامي و خلفي عوائل سعودية و لا بد أن من بينهم من يكون من أهل الرياض. و إنتظرت بدء معركة كلامية في أي وقت. و بالفعل ، إلتفتت إليها الفتاة التي أمامها ، و قالت لأم عطية : يا حجية ، لو بلدك حلوة ليه خليتيها و جيتي عندنا ؟ فقالت أم عطية بتحفز : وحاة اللمانا في الباظ دة من غير ميعاد يا بنية ، لو ما مكة و المدينة زول يقبل عليكم مافي و يبدو أن الحكاية جاطت و هاصت.
08-26-2009, 00:04 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
قالت الفتاة و يبدو لحسن الحظ أنها متعلمة و تريد فقط مناكفة أم عطية : إنتي ما شفتي جدة ؟ حلوة جدا ، أحلى من الخرطوم بتاعتكم قالت أم عطية و هي تستجيب للمشاكسة : هووووووى ، الخرطوم دي لو ما بهدلوها ناس السياسة ، كانت حسع زى أمريكا. إنتي ما سمعتي الناس زمان بيقولوا شن معدوم في سوق الخرتوم ؟ كفاية النيل و الشجر ، و الخريف السمح. أنا فاتني الخريف السنة دي ، قالوا الهمبريب بي هناك يرد الروح
08-26-2009, 00:05 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
قالت الفتاة و هي تداري ضحكة : إيش الهمبريب ؟ فقالت أم عطية و يبدو عليها أنها إرتاحت لها : ما بتعرفيهو ، الهمبريب دة بشبه الهوا البمرق من المكيف. طلبت منها الفتاة أن تأتي و تجلس بقربها و كأنها حصلت على كنز ، فقام شقيقها المرافق لها و جلس بقربي و إنتقلت أم عطية بقرب الفتاة ، ، فأسندت جبهتي على الكرسي الذي أمامي حتى لا تفوتني شاردة أو واردة من حديثهما
08-26-2009, 00:07 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
ظلت الفتاة السعودية تقوم بخدمتها و هي مسرورة كأنها تعرفها منذ زمن بعيد ، بالرغم من أن أم عطية كانت طوال الرحلة تنتقد كل شيء أمامها و تسخر منه .
إنه سحر أم عطية التي تعيش عصرا كانت تتمنى أن تكون فيه في بدايات شبابها ، لذا إنغمستْ في محاولة للتعايش مع إيقاع الزمن و الذي إستطاعت لحد ما أن تضبط خطواتها البطيئة مع إيقاعه الأسرع ...
يحكي حفيدها الذي رافقها ذات مرة للعمرة ، أنها رأت موريتانية في سوق مكة ترتدي ثوبا بطريقة سودانية و ملامحها سودانية ، فهرعت إليها أم عطية و عانقتها و إنهالت عليها بالتحايا السودانية بسيل لا ينقطع من الأسئلة : كيفنك ؟ الجيتي منهن ؟ لعلك طيبة ؟ عمرة مقبولة ؟ جيتي بالبحر و لا بالطيارة ؟ خريفكم قالو زينة ساكت السنة دي و المسكينة مذعورة تتململ و لا تستطيع الفكاك من قبضة أم عطية ، و عندما إنتهت أم عطية من سلامها المكثف ، برطمت الموريتانية بلهجتها التي لم تفهمها أم عطية ، فقالت أم عطية : سجمي إنتي ما بتعرفي عربي ؟ إنت من وين يا بنيتي؟ فقال حفيدها : حبوبة دي موريتانية قالت و هي محرجة : القبيلة دي ساكنة وين في السودان يا جنا ؟ غرب ولا شرق ولا شمالية ؟ بري من السودان دة ، قبايلو ما عندها حد ، في قبايل لسع ما عرفناها لي حسع ، اليعيش ياما يشوف
08-26-2009, 00:13 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
و يحكي حفيدها أيضا، أنها رأت سودانيا يلبس عراقيا و سروالا طويلا و طاقية و يجلس على الرصيف ، فإقتربت منه و قالت له : يا جنا إنت قايل روحك في حواشة أبوك ؟ وكت ما جاي عمرة ، ليش ما لبست ليك جلابية و لفيت ليك عمة متل رجالنا المحترمين ؟ يقول حفيدها ، حاولت أن أشدها من يدها ، و هي تسترسل في إنتقاد الرجل ، فوقف الرجل و قال لها و وجهه محمر من شدة الغضب : يا حاجة إحترمي نفسك و روحي من قدامي أنا أحترم نفسي يا المبهدل ؟ دة منظر واحد قاعد برة بلدو ؟ و وين ؟ في مكة ؟ كمان زهجان ؟ فإلتف السودانيون حولهم ، و حاولوا تهدئة أم عطية ، فقالت و حفيدها يشدها من يدها : بالله العراقي ما عندو لون من شدة الوسخ ، يقولوا علينا شنو الناس ؟
08-26-2009, 00:17 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22514
إنتهى هذه شذرات من معين أم عطية و هي مواقف من عشرات المواقف التي كانت تجبرني على ملاحقتها أينما كانت أو الإستماع إلى إبنها و أهلها ليحكوا لي ما فاتني من طرافتها نقلتها هنا في ذكرى رحيلها فلترقدي بسلام تتغشاك رحمة المولى عز و جل
08-26-2009, 09:26 AM
سيف بخيت موسي سيف بخيت موسي
تاريخ التسجيل: 06-06-2008
مجموع المشاركات: 2034
Quote: عليك أمان الله ، بعد خمستاشر يوم جاني و أنا خاتة دلكتي و كركاري و قال لي : قومي رضعي العجل داك البكورك من صباحة ربنا. بالله العجل دة أتقول أنا الوالداهو
عزيزي أبو جهينة
إستمتاع بأم عطية حد التخمة
وسعدنا بعودتك للرياض
سلام مجمر ، وكل عام وأنت بخير
08-26-2009, 01:30 PM
Yousif A Abusinina Yousif A Abusinina
تاريخ التسجيل: 11-12-2008
مجموع المشاركات: 2003
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ابو جهينة
rosemen osman
سيف بخيت موسي
Yousif A Abusinina
د.محمد حسن
فيس بوك
تويتر
انستقرام
يوتيوب
بنتيريست