|
Re: الشاعره بت خير مقاشي وصور لأبنائها (Re: عمر عثمان)
|
الأخ عمر عثمان
لك التحية
لأيوب يرجع الفضل للتعريف بحبوبته فاطمة بت أد خير. وأيوب رجل فنان وشاعر وهو نفسه يحتاج لمن يوثق له. بالله لو قابلتو بلغو تحياتي العطرة وقولو أهو شفنا صورتك بعد أن بلغت من الكبر عتيا. كانت لنا ذكريات خلال سني الدراسة بالقرير الوسطى ومروي الثانوية ومصلحة الضرايب
مامان
| |
|
|
|
|
|
|
Re: الشاعره بت خير مقاشي وصور لأبنائها (Re: jini)
|
السلام عليكم ...... ياها ذاتا آ جني وشكراً للمعلومات (السياسية) المفيدة وشكراً للقصيدة المشهورة التي يغنيها محمد كرم الله طبعاَ الشاعر الفذ اسماعيل حسن رد على القصيدة على لسان نعيم بالقصيدة المشهورة
.......
في درب البنات يا يُمّه أنا اتبشتنت .. واتبهدلت واتغربت دابي
أنا اتوكّرتَ في بلدا بناتا بلا الخيول الجامحي فوق الريح تشابي
وجوهن يُمّه .... كان شفتي القَمَرْ .. لَجْلَجْ يضاحك في الرّوابي
عيونن يُمّه .... زي بحر المحيط والموج يولول .. والعِرِقْ لافِحنى فايت وا خرابي
سنيناتِن يمه .... بلا شُخُب الحليب الصافي يرهج في الكبابي
ريقِنْ يُمّه .... زي خمر التمور المِنْ زمان طامْرِنو في جوف الخوابي
رقيباتن يمه ... وين رقاب الريل .. على الحَدَب البعيد شَرَفَنْ علي هِوهيو كلابي
العرجون يصارع في السبيط .. مِندلّي في قَلْب الجريدْ هتّان ينقّط في العسل يا ريت شرابي
ولونِن يُمّه.... زي لون القمِحْ ضَرّوه ... شوف ضراني كيف ..الله يضاريكَ يا الضَرْضَرْ صَوابي
دريباتِن عُقاب التِّيه .. وما في خبير يشق التِّيه على بلد الدوابي
مهورِن غاليْ ما بقدر عليهن .. وحاتك ضمه.. ما بقدر عليهن
كمان شوفي المصيبه نفيستي فيهن
منو البقدر يمد ايديهو لي كيس المرابي
دحين يايمه راجع لي دريبك أنا الغرقان وفي الموجات أشابي
أصارع في الهلاك يايمه قاسي ..
بعد قربت لي قيف الشرق تلفحني شيمه كاسحي مغربا بي
مشاكل الدنيا من ما فتّ منّك ..
إلى هادا الوَكِتْ وأيضا كذلك إلى ما بعدو ضدي مبشتنابي
قعدتَ الليله زي فاقداً مزوزو أجرجر في التراب .. ودّرْ حجابي
وان كان للقروش إن شا الله طايري
معلّم الله لي حولين اسم فرطاقه ما دخلت جرابي
أنا لا مالاً لقيتو عشان أشوفك ..
أجيك أقدل مع الجنيات تجيكي العافي بس فضل شبابي
والخبر المهم ما قلتو ليك يا يمه قبّال أنسى في آخر جوابي
دا شيتاً أصلو ما فكّرتَ فيهو .. وحاتِك ضُمّه ما كان في حسابي
إرادة المولى مو خافي عليكن .. وكان دسّيتا لابدْ من تجيكن
خبيري مع البنات والليل يهوّد .. أهزْ ضرعاتي وارفع في حجابي
أنا بقيت غناي ألعلع في البنادر .. مِتِل ناس ود صليليح .. طنبرابي ..... ويقال أن بتد خير غضبت من اسماعيل حسن زمناً طويلاً بسبب هذه القصيدة وردت عليه بقصيدة لم استطع سماعها .... تحياتي
......
| |
|
|
|
|
|
|
Re: الشاعره بت خير مقاشي وصور لأبنائها (Re: الزوول)
|
رحم الله العملاق سماعين ود حد الزين وهاك دى يا الزول قصديدة لود بادى العكودابى لامه بت الخير انظر الى تشابه الالقاب وقوة الشعر وجزالة اللفظ وتدفق الحنية فى قصيدة فاطمة الخير واسماعين حسن ودكتور بادى وكانها كلها خرجت من رحم ااو مشاكاة او ناموس واحد!
بت الخير يجيك الخير وصل جوايك الكاتباهو للولد الحتالي وكان الظن ترسلي ليه هين هينين من البركاوي داك الطعمو حالي ولو بالقل شخاليب دوم وهنا والله ني ومسيخ وغالي سؤالك يمة عن احوالي كان شفتيها تغنيك عن سؤالي انا اتوكرت في قلب البنادر زي غريب شرقان مدلدل في الدوالي جات شايلاني حرّة جوف انا اتحديت مجالا مومجالي مصايب الجامعة اكبر من جميع الشفتو ولا سمعتو في ايام الخوالي قعاد الكرسي كان شفتيهو ورم ساقي زي سيد الزلالي اقلب في الدفاتر من صباحا بدري لامن تمسي ما بنسي انشغالي اسوق الليل تحت ضوء الكهارب وديمة هارب من فراشي وهادو حالي ده كلو عشان اجيب نمرا انافس بيها واستر بيها حالي والله عاد حالة ما بتسر البال ومن يوم ما هديت ما انسر بالي سلاطين العلم يايمة ينسوا العشرة في فد يوم يدفروك بره زي دفر الطبالي وخايف من اجيك مرفود وهادي الفكرة من ما جيت معشعشه في خيالي واخير افتح اضانك قبل ما تلقي فوق اضني ملويات حبالي وكان حصل القدر يايمة لا تلوموني لومي علي البنادر نورا اقوي من احتمالي بناتا فيها رويانات جسومن بالدهون تلصف بلا جلود السحالي سبيبن ديمة بالحزم الكبار مبهول مردم فوق قفاهن..وا حلالي صدورن طامحة زي موية الدميري الهايجي تكشح في العوالي عيونن واسعة تبلع مية زي ولدك تشرك للموحد والضلالي وحاتك ضُمّه ما بقدر عليهن ساعة اقيف قدامن انكس راسي بي قدري وجلالي مشيهن سوا زي سرب الغزال لكن نفورن مو غزالي عدادن مابخبرو الا وين ما امشي الاقاهن قبالي وقصاصن ينقّر بي عصاتو ومايفرّق دربهن من بين دريبات القماري بخورن في سماء البندر يدوخ متل مسك العشاري رقيصن ينهزنو بلا الفلو الّلماتو غابن منو في ضل الضهاري يجمّع في قفاهو وينطرح يتمطّى تتحتحت مفاصلو وده ياهو الفاك جباري دلالكين تجيب الضلّ علي متاهات الضهاري غناين اصلو ما سمعنابو كنت بقول ليكي الا هسع ما ني طاري وطنبورن مبرقع وحسو فاقع لا في كنتر لا ودع فوقو بيراري عشوقن في الرقيص يتلوي متل سيد المغص يوم يبقي في حالة طوارئ والمداين ديمة فايري زي وحوشا في البراري والمـآسي كتيرة حاصلة والمكضب يلاقي بوليس السواري عاد دي حالتا بقدر اتستر معاها خلاف احاكي الناس واجاري؟ وانتو راجيني يوم اجيكم بشهادتي وينبسط ضهري وكباري وبرضو خايفين من اجيكم بي غربية وفي خجل قايد صغاري والقدر بي غادي كاتب ليه شيتا لاني حاري ولا ني طاري
حاجة واحدة تكون في علمك اني جايي وتاني راجع لي دياري وياني حمّيد القديم الا بس فاقد حجابي وراح سواري يمة كتري من رضاكي وسلميلي علي المعاكي وقولي لي حبوبة زيك نحن شبنا وماك براكي سلميلي علي جروفنا وحتى وزينا البكاكي سلميلي علي بناتنا وقولي ليهن ماني ناسي طاري شلاخا مواسي زي شقوق بيتاً سداسي طاري نقشا فوق خدودن بين ضفايرو وشوفو قاسي جسمي في البندر ممدد الا بينكم بي حواسي سلميلي علي البكادن والبشتت في التقاوي في الكرد محراتو قالع وصوتو فوق تيرانو عاوي ماحزم بقجة ثيابو وقام فجر لاحق اللواري اخيرو يحفر في جروفو مالو مال حفر المجاري سلميلي علي الضرايح والفضل من الخلاوي والفقير الفوق حصبرو يكتب البخرة ويداوي مع السلامة ودعتك الله ولي وصيتك ماني ناسي لي شفقتك مافي داعي وابقي عشرة الراعي واعي في بحور اهل البنادر من زمن طالق شراعي كان نحجت بجيك غانم وكان فشلت بجيك ضراعي جنى
| |
|
|
|
|
|
|
Re: الشاعره بت خير مقاشي وصور لأبنائها (Re: الزوول)
|
Quote: رسلت السلام يغريك يالزين السلام ليك وللمعاك فى الغربة قاعدين السلام من عين شمس لاحد فلسطين عاد انا ما بوصفك آ صباحى بخاف من العين من عين الخلوق مودعاك جبرين انت بالعافى التخصك فى المصارين تبقالك هدم سروال ونعلين دايرى اشكيلو العذر صمد النمرتين وانت آ سيد الجزيرى التكاكى وزين يا سيد الشال تقيل فدع العراجين انت في تلات سنين ما بدوك سبوعين وما بترسل لى جوابا فيه سطرين وما بتقول لى نعيم صباح أمو اشتغل وين أنت ماك عارف قليبا لى مجينين وماك عارف جواب الخير يجينى وازيد لى شبرين انبسط لى انبساطى زايدى على القوانين فولة من قبل الملمات مانا فايقين منطبقات على تلاتة واثنين وختى ربع جنيه وبعضا ثلاثين وقالوا ما بنقبل عذر قضونا فى الحين أ كان لى المقد ماجابلو مدين والعيشريف مبوص ما مرق هين أصلوا لاتمرا مرق لانا سايقين طلبتك بالله رسل لى جنيهين |
ياها ذاتا آ جني وشكراً للمعلومات (السياسية) المفيدة وشكراً للقصيدة المشهورة التي يغنيها محمد كرم الله طبعاَ الشاعر الفذ اسماعيل حسن رد على القصيدة على لسان نعيم بالقصيدة المشهورة
.......
Quote: في درب البنات يا يُمّه أنا اتبشتنت .. واتبهدلت واتغربت دابي
أنا اتوكّرتَ في بلدا بناتا بلا الخيول الجامحي فوق الريح تشابي
وجوهن يُمّه .... كان شفتي القَمَرْ .. لَجْلَجْ يضاحك في الرّوابي
عيونن يُمّه .... زي بحر المحيط والموج يولول .. والعِرِقْ لافِحنى فايت وا خرابي
سنيناتِن يمه .... بلا شُخُب الحليب الصافي يرهج في الكبابي
ريقِنْ يُمّه .... زي خمر التمور المِنْ زمان طامْرِنو في جوف الخوابي
رقيباتن يمه ... وين رقاب الريل .. على الحَدَب البعيد شَرَفَنْ علي هِوهيو كلابي
العرجون يصارع في السبيط .. مِندلّي في قَلْب الجريدْ هتّان ينقّط في العسل يا ريت شرابي
ولونِن يُمّه.... زي لون القمِحْ ضَرّوه ... شوف ضراني كيف ..الله يضاريكَ يا الضَرْضَرْ صَوابي
دريباتِن عُقاب التِّيه .. وما في خبير يشق التِّيه على بلد الدوابي
مهورِن غاليْ ما بقدر عليهن .. وحاتك ضمه.. ما بقدر عليهن
كمان شوفي المصيبه نفيستي فيهن
منو البقدر يمد ايديهو لي كيس المرابي
دحين يايمه راجع لي دريبك أنا الغرقان وفي الموجات أشابي
أصارع في الهلاك يايمه قاسي ..
بعد قربت لي قيف الشرق تلفحني شيمه كاسحي مغربا بي
مشاكل الدنيا من ما فتّ منّك ..
إلى هادا الوَكِتْ وأيضا كذلك إلى ما بعدو ضدي مبشتنابي
قعدتَ الليله زي فاقداً مزوزو أجرجر في التراب .. ودّرْ حجابي
وان كان للقروش إن شا الله طايري
معلّم الله لي حولين اسم فرطاقه ما دخلت جرابي
أنا لا مالاً لقيتو عشان أشوفك ..
أجيك أقدل مع الجنيات تجيكي العافي بس فضل شبابي
والخبر المهم ما قلتو ليك يا يمه قبّال أنسى في آخر جوابي
دا شيتاً أصلو ما فكّرتَ فيهو .. وحاتِك ضُمّه ما كان في حسابي
إرادة المولى مو خافي عليكن .. وكان دسّيتا لابدْ من تجيكن
خبيري مع البنات والليل يهوّد .. أهزْ ضرعاتي وارفع في حجابي
أنا بقيت غناي ألعلع في البنادر .. مِتِل ناس ود صليليح .. طنبرابي ..... ويقال أن بتد خير غضبت من اسماعيل حسن زمناً طويلاً بسبب هذه القصيدة وردت عليه بقصيدة لم استطع سماعها .... تحياتي |
لو لي مراد..أسافر اسه دي لأرض الشماليه التي انجبت ومازالت تنجب مثلهم!
الرحمه علي روح الشاعره بت خير مقاشي وروح الشاعر اسماعيل حسن..
شكرا يا عمر عثمان وشكرا يا جني ويالزول ولكل من مر وسيمر.. بوست روعه عن ناس جد ما هم هينين..
| |
|
|
|
|
|
|
Re: الشاعره بت خير مقاشي وصور لأبنائها (Re: Siham Elmugammar)
|
الأخ عمر عثمان
سلامات
بتد خير شاعرة عظيمة لها التحية وفعلا تستحق أن يوثق لها ... إمرأة كريمة وتعرف الواجب .. في قصيدة لها وفي إحدى مناسبات أبنائها قالت شفقت لما الخلق دخلت البيت وخافت أنه الأكل المجهز للمناسبة لا يكفي الضيوف فكتبت قصيدتها المشهورة التي تخاطب فيها نفسها ومطلعها :
أركزي يا أم نعيم ساعة العرض جات
والكلام ستر العرض مالا الريالات
تستر عرضها أمام ضيوفها أهم عندها من كنز الريالات زمن الريال أبوعشرة ....
وتأمل في قصيدتها التي تسير فيها أبنها سيد أحمد :
شكرو مو غلات جدو شيخ جالات ينحر الشايلات رضوة للبنات
التحية لبتد خير ولك أخي عمر والتحية عبرك للأخ والصديق أيوب محمد الحاج ..
أبو قصي
| |
|
|
|
|
|
|
Re: الشاعره بت خير مقاشي وصور لأبنائها (Re: ABU QUSAI)
|
تلبية لرغبة الأخت سهام ، هذه قصيدة بت أد خير التي ردت فيها على الشاعر الكبير اسماعيل حسن
اسماعين حسن ثابتات عقولو سألت المولى ينفض لى شرورو اسماعين انا كت قادرى أخود بحورو ورجعت براى قلت كدى الألومو وها الأشورو سأل من بيتو قالوا لى ساكن فى قصورو وقاللى ا حاجى ادخلى شوفى السور ونورو قتلو انا الحردانى السور كيف دخولو ؟ ما شفنا الزول عديل يسغر بى زولو يلبس ولدي هدما ماهو هولو يقول اسم فرطاقا ما وفرها لا حولو وفى درب البنات خارش طنبورو وعاد كمان ناس ود صليلييح شن ببقولو ! أنا ولدى الظابط الصاغ بى دبورو ودا زمنو الكان معاى بوريك دورو دا بى بقرو الحمر وسع مسورو وقش مراحو ورضع ليى عجولو وكت العيش انعدم وغلقن سعورو مرق العيش مهرش فى مطمورو ووكت جوهو التجار يتحابسولو وقالوا نادولنا الصمد دايرين حضورو دفعولو الألف والفضل هولو دا قايم بى بغر ما سرحولو ونحنا جبنالو الكبار ينجودولو وقال علي يمشى الديش هناك ويدخل طابورو وهمل ليى بوابيرو وشتولو وعاد وكت روح مصر وطالن دهورو وكلامى ليى الجنيهن بالهظار ساكت بقولو اسماعين حسن وقعلو فى عرضو وفى طولو وبأمو حد الزين وبى جدو البزورو يقلب الرد يوصلو بى أصولو
| |
|
|
|
|
|
|
Re: الشاعره بت خير مقاشي وصور لأبنائها (Re: Siham Elmugammar)
|
تحيه لكل الذين شاركوا والقادمين فاطنه بت خير الشاعره المجيده هي من نفس القريه التى انجبت فنان السودان العظيم عثمان حسين ولا اشك مطلقا ان لها بصمات كان لها الاثر في تكوين عثمان حسين النفسى والوجداني تلك هي مقاشي القريه السودانيه التى انجبت قامات سودانيه كان لها القدح المعلى في تكوين المزاج السوداني المتمدن
فاطمه بت خير لها من الاخوة والاخوات حمد خير محمد صالح مريم زينب
انجب حمد الاستاذ عثمان حمد خريج الاقتصاد جامعه الخرطوم ونائب محافظ بنك السودان مريم انجبت شمعون واخوانه محمد صالح انجب شاديه واخواتها زينب انجبت الاستاذ المشهور في الزومه حسن مجوب تجم وعثمان تجم المساعد الطبي المشهور واخيهم على تجم
| |
|
|
|
|
|
|
|