بعد تعادل المريخ أمام الاهلي اليوم...المريخ يطوي ملف الممتاز

Quote: تذكرت هذه الاغنية والربيع يتسرب لنا في (الخريف) ونعتمده رسميا في (المطر)..وجمال الوالي يقول انهم لن يجعلوا مباراة الاهلي مدني والمريخ تمر مرور الكرام. * كمان يا جمال الوالي عاوزين تشتكوا (المطرة). * انتوا الشكوي عرفتوا تكتبوها في سادومبا عشان تكتبوها في المطرة. * بتقولوا شنو عليكم الله؟ ...بتقولوا كرت (الطين) ما وصل...والا بتقولوا (اعارة) النسمات ما صحيحة. * وقفلي علي كل المواضيع .قفل ..قفل ..قفل. * حكاية قفل لي علي كل المواضيع دي بتذكرني بي جمال الوالي الذي كلما خرج من بطولة قال نحن قفلنا ملفها. * انت يا اخوي بتقفل ساي. * بعدين تعال هنا يا همد ...انت مطرة الخرطوم عملت لينا فيها شنو؟..عشان تشتكي من مطرة مدني. * الخرطوم كلها بقت طين ...الشوارع مقفولة والباعوضة ما بتديك الدرب. * شنو يعني لو جات مطرة في مدني. * خلاص مطرة مدني دي بقت عليكم حارة. * الحاجة المحيراني في ناس المريخ ديل انهم ليهم اكثر من شهر بكتبوا عن (الشكوي) والاعارة الما صحيحة. * 30 يوم بنشروا في المستندات، 30 يوم بهددوا في الهلال. * 30 يوم فالقننا بي كلام خارم بارم. * وقت جات ساعة الجد ...طلعوا ما بعرفوا يكتبوا الشكوي. * انتوا وقت ما بتعرفوا تكتبوها بتتفاصحوا علي شنو؟. * قلنا ليكم انتوا ضلنا ما صدقتونا ..قعدتوا تغالطوا ...جارين بس لي اعارة ناس الهلال ..وشكوتهم ما بعرفوا يكتبوها. * يا جماعة انتوا الفصاحة في شنو؟. * كدي اول حاجة اعرفوا قدموا الشكوي ، عالم عجيب. * نحن خلونا ..انتوا بتقنعوا في ناس الهلال ليه؟. * اكتبوا شكوتكم صاح وقدموها ..ولو قبلوها شكلا ساكت ...مبروك عليكم. * لو دي غلبتكم ...انتظروا شهر سبتمبر في مباراة قمة تانية والهلال ان شاءالله سوف يشرك سادومبا وكابوندي. * اديناكم فرصة تانية عشان تعرفوا تكتبوا الشكوي صاح وتقدموها. * يلا امشوا ذاكروا كويس..وادربوا علي كتابة الشكوي. * سا سا سا سا سادومبا. * وكا كا كا كا كابوندي ، صعبة دي. * عماد الطيب قال ليكم تعالوا اتلمذوا عندنا ..قعدتوا تكوركوا. * فتحنا فصول تقوية في (الشكاوي) وتقديمها. * شداد دا ساعة ونص بشرح في العملية دي. * الجماعة تاني قالوا الاعارة ما صحيحة. * انتوا ناس الكاف ديل قلبوا (قدر ظروفك) ..امشوا ليهم احكوا ليهم القصة ...لو اعطوكم الثلاثة نقاط مبروكة عليكم. * عالم ما بتعرف تكتب الشكوي وبتفاصحوا. * كدي اتعلموا اكتبوها اول حاجة. * انتوا عارفين شكوي يرفضوها شكلا دي يعني شنو؟. * دي يعني فضيحة ..اكبر من فضيحة التاكسي. * ناس الهلال مفروض الموضوع دا ما يشتغلوا بيه. * الموضوع دا ما بأثر مع ناس الهلال في حاجة ..الفريق ماشي زي الطلقة ..اخذ ليه نقطة من ملعب الحكومة في بطولة الاندية الافريقية للابطال وفي الممتاز الفارق بين الهلال والوصيف بقي 6 نقاط ، 6 نقاط دي فيها كم (اعارة). * يعني الاثارة دي كويسة معانا ..بضرر منها المريخ ...خلوهم ينشغلوا بي الحكاية دي وانتوا واصلوا عملكم الجاد للفوز بالخماسية. * الخماسية دي طبعا بتبدأ بالممتاز ثم كأس السودان ثم البطولة الافريقية ثم بطولة كاس العالم للاندية ثم بطولة السوبر الافريقي. * ان شاءالله الترتيب يكون صاح ..وما يرفضوه لينا (شكليا). * انتوا عارفين (شكلا) دي يعني شنو؟. * شكلا دي يعني تصب مطرة في جوبا. * ناس اسوان تقوم بيوت الجالوص عندهم (تتنحنح). * يعني زول يمشي يحلق ليه في صالون ...صاحبو يلاقيه في شارع ضيق يقول ليه: شكلك مالو اتغير كدا. * الحاجة الغريبة كانت في تصريحات جمال الوالي التي اكد فيها ان الوقت غير مناسب لاقالة رادان. * يعني بس منتظرين الوقت المناسب ..عشان يقيلوا رادان. * يا رادان الجماعة ديل (لابدين) ليك. * عارف الزول البلبد ليك بي شيتن كتر. * اكيد ما عارف ...الحاجات دي في كرواتيا ما عندكم. * عاد شن خبرك بي (اللبدان) ، لبدان في عينك. * الحاجة البتحير ان الاتحاد العام وعلي لسان الدكتور كمال شداد خص المريخ باستثناءات لا اول ولا اخر لها. * الاتحاد العام يستاهل خرب طبع المريخ ..كل مرة يستثني ليه في حاجة. * كمال شداد قال اول استثناء للمريخ كان عندما سجل صلاح الامين في المريخ استثناء حينما كانت اللوائح تمنع تسجيلو. * لكنهم مع ذلك استثني للمريخ وسمح له بتسجيل صلاح الامين. * الاستثناء الثاني كان في الحارس شيكوزي. * الغريبة بعد ذلك شيكوزي مشي يلعب في نيجيريا وكرتو قاعد في الخرطوم. * الحاجة دي زول اتكلم عنها ما في. * ناس الهلال ما بشتغلوا بالفارغات. * الاستثناء الثالث كان عندما سمح للمريخ شطب ابوبكر كوني بحجة وجع القلب. * زولكم لا طلع عندو وجع قلب ..لا وجع رأس...لا وجع ضرس. * وجع ضرس في عينك ، الهلالاب برضو ما اشتغلوا بالموضوع. * لاعبكم وبي طريقتكم ..جبتوا ليه (وجع القلب)...نحن نعمل شنو؟..ندخل في ضفورنا. * ضفورنا ذاتها فترت. * انتوا هسع يا مريخاب بتتكلموا عن الفريق الذي سيلعب له دي سوزا ..وبتتحدثوا عن دي سوزا بعد ما اعاره الهلال. * انتوا هسع في زول اتحدث ليكم عن ابوبكر كوني الذي شطب بسبب وجع القلب وذهب يلعب في احدي الاندية المغربية. * في زول قال ليكم ابوبكر كوني دا كيف لعب في المغرب بعد ما طلعتوا شهادة مرضية تؤكد اصابته بعلة في القلب لا تسمح له باللعب. * في زول قال ليكم الزول دا لعب كيف في المغرب. * العجيب في الامر ..ابوبكر كوني الي الان بيلعب ...وما في زول في الهلال قال الشهادة المرضية لابوبكر كوني كانت مزورة. * كانت ما صحيحة ، عارفين الهلالاب ديل ما اشتغلوا بالموضوع دا ليه؟. * عشان موضوع لا بودي ولا بجيب ...تحصيل حاصل ساكت. * الهلالاب ما بشتغلوا بالفارغة والمقدودة. * بعد ابوبكر كوني جاء الاتحاد العام واستثني للمريخ تسجيل لاعب الهلال السابق ريتشارد. * القانون ما بسمح بذلك ..والدليل علي هذا ان ريتشارد قدم (استرحام) ..رغم ان جمال الوالي صرح بان المريخ سوف يسجله بالقانون وليس بتطويع القانون. * القانون انتوا بتعرفوا ليه شنو؟...شكوي ما قادرين تكتبوها. * دا انت طلعت اي كلام يا همد. * اها (الاسترحام) دا كيف يا جمال الوالي ...دا ما تطويع ...دا استرحام عديل. * هي حصلت يا مريخاب. * التسجيل في المريخ اصبح محتاج الي كتابة (استرحام)، استرحام في عينك. * علي العموم نحن لا يعنينا هذا الاسترحام كثيرا بل نتمني للاعب الهلال السابق ريتشارد التوفيق مع المريخ. * جماهير الهلال لا بد لها ان تقدر موقف لاعبها ريتشارد الذي رفضه الهلال وانتظر اللاعب حتي مضت نصف فترة التسجيلات وعندما وجد ريتشارد الهلال ما شغال بيه مشي المريخ. * ريتشارد ما عندو اي ذنب يا هلالاب ..ويجب كمان ان يجد الدعم منكم وهو يلعب في المريخ.لقد اعطى ولم يستبق شيئا. * ما يهم ان يأخذ الهلال حقه بالقانون وليس بالاستثناء اوالاسترحام. * غريبة (استرحام) في البرد دا، الاسترحام عيشتو تطير. * نحن حقنا بنشيلو عديل. * حاجة بدينا ليها القانون ..اهلا وسهلا بيها ...وحاجة بشيلها مننا القانون ما بنزعل عليها. * يا عالم ..يا ناس الحلة ..عوووووك ..الجماعة بعد الفصاحة وطولة اللسان طلعوا ما بعرفوا يكتبوا شكاوي. * طلعوا بتاعين كلام ساكت ، الاتحاد الافريقي قال ليهم (اعد). * اعد في عينك ، دي اول مرة تحصل لينا في الاتحاد الافريقي. * احرجتونا...خليتونا نضاير زي الطالب الما حافظ القصيدة والاستاذ بسمع فيها للطلاب بالدور. * الشكوي خلوها ...الجماعة ديل تصوروا بعد التهديدات والمستندات والكافات والفيفات ..كتبوا (استرحام). * الاسترحام دا ما بنخلي ليكم ..ح نكرهم بيه زي البصمة. * بصم ما بصم.. بصم ما بصم. * همد قالوا في الولاية بقي يقول : صبت ما صبت... صبت ما صبت ..صبت ما صبت. * الزوبعة التي اثارها المريخاب في اعارة دي سوزا وامولادي وانتهت بان رفض الاتحاد الافريقي شكوي المريخ شكلا. * تنعكس مراحلها عبر تدرج قانوني عجيب في الهلال. * انظروا للقضية التي اثارها الهلال عن اعارة طمبل. * شوفوا التقاضي القانوني الذي يتبعه الهلال الان...نحن الشغل عندنا بي نظام. * الهلال اشتكي عند لجنة اللاعبين غير الهواة ..وعندما حكمت هذه اللجنة باحقية المريخ باللاعب اتجه الهلال الي لجنة الاستئنافات والهلال ينتظر الان قرار اللجنة ليذهب الي المحكمة الرياضية في لوزان ان جاء قرار لجنة الاستئنافات ليس في صالحه. * هذا هو الهلال بعيدا عن تطاولات اعلامه ..وبعيدا عن عنترياته يبحث عن حقه بالقانون. * اما المريخاب فهم يكتفون بي (الولولة) علي صفحات الصحف. * علي الهلالاب ان يتعاملوا مع الامر بهدوء وألا ينشغلوا كثيرا بالموضوع ..هم معنيون باعداد فريقهم وتجهيزه. * انتبهوا للبطولات التي تشاركون فيها. * الهلالاب فريقهم في السليم وادارتهم واعية وعارفة هي بتعمل في شنو؟. * انتبهوا فقط لفريقكم لتساندوه وتدعموه ...اما المريخاب فان ما يثيرونه ينعكس عليهم. * فقدوا املهم في الممتاز ..وان استمروا علي منوالهم هذا فسوف يفقدون قريبا املهم في التأهل لنصف النهائي في البطولة الافريقية. * ملحوظة: والدنيا ربيع. هوامش * صيحات جماهير الهلال وتجاوبها مع امبيلي جعل اللاعب يحتفظ كثيرا بالكرة وهذا خصم علي الهلال. * الشوط الثاني في الهلال اصبح امره يحير. * ليس منطقيا ان نقارن بين كامبوس وسانتوس ..لأن كامبوس لعب تنافسيا حتي الان 3 مباريات فقط. * اصبروا علي كامبوس ولن تندموا، كامبوس بعد في الفريق كله ولا يعد في 11 لاعبا. * احمد الفاضل في تقدم مستمر ، عودة فييرا حاجة تفرح. * بالمناسبة ريتشارد شطب من اجل ان يسجل احمد الفاضل. * المريخ اذا كان هذا هو حاله ..سوف يقفل ملف البطولة الافريقية قريبا. * خليك جاهز يا جمال الوالي. * بقيت علي رأس كل اسبوع تقفل ليك ملف ، تخصص قفل ملفات. * انت همد دا بدل ما يقعد يصرح ساكت ...ما تشغلو معاك في قفل الملفات دي. * خلوه يقفل ..بدل ما يقعد كدا ، التصريحات دي ما بتبقيك رئيس المريخ. * اعلام المريخ ...كمل الكتابة عن (الطابق التاني). * وكمل الكتابة عن (النفرات) ، وكمل الكتابة عن طمبل وكلتشي والورغنة. * في الكورة ما عندهم اي حاجة يكتبوها ...عشان كدا ..اتجهوا علي اعارة دي سوزا وامولادي. * في المريخ ما في حاجة يكتبوا عنها ...(الورغنة) طلعت مقلب. * الكلتشة طلعت كلام جرايد، الايامات دي الهوبنة تبث علي ذبذبة (قمر) سات. * الهوبنة جابت ليها مطر. * خلاص يا الهلالاب عاوزين تفكوا (البرد) وتمسكوا في المطر. * الاتحاد السوداني لكرة القدم طلب كرت سادومبا من جنوب افريقيا. * اتحاد جنوب افريقيا رد علي الاتحاد العام السوداني وقال ليه : الكرت دا نحن ما عندنا ، المشكلة شنو؟. * في زول اتهم اتحاد جنوب افريقيا بالتزوير. * هسع يعني شنو لو اتحاد بوليفيا طلب كرت دي سوزا ورد الاتحاد العام لكرة القدم السوداني وقال كرت دي سوزا عند الاتحاد النيجيري. * المشكلة شنو بس؟. * هسع الكلام دا فيه (تزوير). * بل ان طلب اتحاد بوليفيا لي كرت دي سوزا تأكيد علي ان دي سوزا مطلوب من عدة اتحادات والهلال لو عاوز يتخارج منو؟..ما في مشكلة في هذا الامر. * اضحك مع كرت سادومبا. * خبر عاجل: كرت ما كرتك جر فيه الشوك. هذا ماكتبه الرائع محمد عبدالماجد اليوم في صحيفة قوون وهذا هو العمودكاملا * اعلام المريخ ...كمل الكتابة عن (الطابق التاني). * وكمل الكتابة عن (النفرات) ، وكمل الكتابة عن طمبل وكلتشي والورغنة. * في الكورة ما عندهم اي حاجة يكتبوها ...عشان كدا ..اتجهوا علي اعارة دي سوزا وامولادي. * في المريخ ما في حاجة يكتبوا عنها ...(الورغنة) طلعت مقلب. * الكلتشة طلعت كلام جرايد، الايامات دي الهوبنة تبث علي ذبذبة (قمر) سات. * الهوبنة جابت ليها مطر. * خلاص يا الهلالاب عاوزين تفكوا (البرد) وتمسكوا في المطر. * الاتحاد السوداني لكرة القدم طلب كرت سادومبا من جنوب افريقيا. * اتحاد جنوب افريقيا رد علي الاتحاد العام السوداني وقال ليه : الكرت دا نحن ما عندنا ، المشكلة شنو؟. * في زول اتهم اتحاد جنوب افريقيا بالتزوير. * هسع يعني شنو لو اتحاد بوليفيا طلب كرت دي سوزا ورد الاتحاد العام لكرة القدم السوداني وقال كرت دي سوزا عند الاتحاد النيجيري. * المشكلة شنو بس؟. * هسع الكلام دا فيه (تزوير). * بل ان طلب اتحاد بوليفيا لي كرت دي سوزا تأكيد علي ان دي سوزا مطلوب من عدة اتحادات والهلال لو عاوز يتخارج منو؟..ما في مشكلة في هذا الامر. * اضحك مع كرت سادومبا. * خبر عاجل: كرت ما كرتك جر فيه الشوك.