|
السودانيين المتزوجين خواجيات, شرق اسيويات,افريقيات,عربسات (خلايجة,شوام,بحر متوسطيات)هنديات حمر
|
صحبي الاسفيري سابقا والمختفي حاليا كان ان ادار معي حوار ماسنجري طويل وعريض , تلك الايام الغابرة كنت بصدد الزواج ومشاكل البحث عن عروس والتي يعرفها (العُزاب) من الدياسبورا السودانية في كافة الاصقاع عدا السودان بالتاكيد , الحوار وصل بنا الي اقتراحه اني اتزوج واحدة ما سودانية , و تجلي واقترح لي ان اتزوج من مكان اقامتي ( سعودية وبالعدم سعودية هاف كاست وارد غرب البحر الاحمر , شامية , مغربية , حبشية , فلبينية , يمينة او اي جنسية اخري ما ضروري سودانية ) لانه اشتكي من اني قديتو بالموضوع دا وداير يضع ليهو حد , اجابتي له كانت انه الكلام دا كله ما بينفع معاي , قال لي ليه؟ قلت ليهو لا يستقم الامر عندي , فانا الذي ظللت ومنذ الرهاق الاول احلم بزوجة تقدس الحياة الزوجية تؤمن بان الطلح والحنة من اساسيات بيت الزوجية كايمانها بحافلة العدة والتلاجة واهميتهم في بيتها , قال لي خلاص وديها السودان وخليها تخش ليها ترينق (كوربريت ) قلت ليهو ما بينفع برضو لانه ما حاجة اصيلة فيها , بالاضافة الي انه ما ممكن اعرس لي فلبينية مثلا عيونها عاملات كدا تتحنن بعد الطابق وتلبس ليها توب هزاز وامشي معاها في الشارع , عشان اكون فرجة وافوت جنينة الحيوانات في الجمهور , وواصلت كلامي بعدين ياخ دي ما المشكلة براها قال لي لو دي مشكلتك انا ما شايفها كبيرة وبتتحلا الحبش بشببهو نسوانا واضاف ياخ بشبهوهم شنو وحات الله اسمح منهن , قلت ليهو انا عندي مشكلة اساسية تانية وواصلت : يعني مثلا داير اكون في البيت شغال اصلح في اللمبة وتقوم تضربني الكهربا وتجي جارية من هناك وووب علي ووب علي وسجمي والكلام الحنين دا , ما داير لي واحدة تشبكني ليك اوووه ماي قوود , واسترسلت , داير نكون قاعدين كدا انا وهي او حصل اي موقف اقوم اضرب ليها مثل سوداني وتضحك طوالي او تتفاعل معاي ما اقعد اشرح ليها نص ساعة لحدي ما الموضوع يكون زاتو اتغير يعني اقول ليها الخيل تجقلب والشكر لي حماد ما تقعد تقهي فيني , قام قال لي ما تقول انت داير ليك واحدة من الجزيرة ساي قلت ليهو ما مشكلة من الجزيرة من الشمالية من الابيض من اي حتة في السودان بس يكون في لغة مشتركة لانه انا داير اعرس ما اشتغل مترجم , بعدين في حاجة مهمة اكتر من كدا , انا داير اجيب عيال ما عندهم مشكلة هوية وانتماء , لاني في النهاية الاغتراب دا مؤقت والعودة بتحصل الليلة او بكرة , بعدين ام تنسي انه ممكن نختلف انا وهي وتبقي عندنا مشكلة تاريخية في حالة رزقنا بالاطفال وكدا . المدخل الفوق دا كله اردت ب ادارة حوار لاصحاب التجارب المعايشة والمرئية لزيجات السودانين من غير السودانيات , هل دفوعاتي بتاعة الونسة دي كانت ذات اثر محسوس في تجارب معايشة او تجاربة مشاهدة؟ وهل هناك معاناة حقيقة في اختلاف اللغة والعادات وهل هناك افتقاد للعادات السودانية للرجال او النساء السودانين المتزوجين من غير سودانين ؟ طبعا المنبر دا في راي انسب مكان لطرح مثل هذه الاشكالية لانه يعمر بالدياسبورا السودانية في كافة بقاع الارض واعتقد ان هناك من لديه تجربة في ذلك بقي ان انوه لحالتي الشخصية تجنبا لمداخلات قد تاتي. في النهاية انا اتزوجت سودانية مية المية وشايقية وما فاضل ليها الا تكون مشلخة لا ورا , ولي ناس الشمار ما عندي الرغبة في خوض التجربة بس من باب الشمار والعلم بالشي ومعرفة اذا كان دفوعاتي تقوم علي سند مقنع ولا عنصرية سودانية مني ساكت .
|
|
|
|
|
|
|
|
Re: السودانيين المتزوجين خواجيات, شرق اسيويات,افريقيات,عربسات (خلايجة,شوام,بحر متوسطيات)هنديات (Re: Abd Alla Elhabib)
|
Quote: جكـس الزمن ده بتحاشى الكلمات دي خالص يا أساسى !! وكان قلت ليها مستدرجا : يا عسل الدخان ده رهـيب يأتيك الرد فـــــورا : يـــاى I will die !! ------------- تـحيات يازول |
الغالي عبد الله
اضحكتني بالمصطلحات
تعرف حضرتني النكتة بتاعة الشايقي المغترب ورجع من السعودية بشماغ وعقال وجلابية ابو لياقة وركب مع بتاع التاكسي وراجع للبيت اها في نص السكة شاف القاعة وساله ما هذا المبني قال ليهو التكاسي دي قاعة الصداقة تقام فيها الاحتفالات ..الخ قال ليه والله تطورتوا يا سودانين , مشو شوية لقي البرلمان او الجمعية التاسيسية وساله نفس السؤال ورد التكاسي دي مبني البرلمان وما تعرف الاحزاب ..الخ قال ليهو الشايقي والله تطورتو يا سودانين , اها لما وصل قال ليهو كم تريد علي هذا المشوار قام التكاسي قال ليهو مبلغ من عدة اصفار صاحبنا الشايقي في اللحظة ديك رجع لاصله وقال ليه : في المشيوير دا ؟؟
| |
|
|
|
|
|
|
Re: السودانيين المتزوجين خواجيات, شرق اسيويات,افريقيات,عربسات (خلايجة,شوام,بحر متوسطيات)هنديات (Re: خالد عبد الله محمود)
|
Quote: أقبض .. اساسي في حالة خوف أسفيري !!
أسه لو عرست فلبينية على الأقل كنت وفرت لي بكري الباندودث ( مش إسمو كده) !
* طبعاً أخوكـ عزابي عشان كده حأحترم نفسي و أتخارج |
خالد عبد الله وقت انت عزابي الدخلك البارتي دا شنو هاهاها
يا اخوي الفكرة في الايضاحات كانت حقيقة خوف اسفيري , بس ما الانت عنيته بمداخلتك الخبيثة الفكرة اني انزلت المعلومات الشخصية خوف انحراف البوست وكالعادة ليتم تجييره وعمل بحوثات عن شخصي , عشان الموضوع ما يتفسر غلط ويكون الفهم والتساؤل بعدين عن العملتو في نهاية الحوار دا , ولكن يبدو انه لا بد من ما ليس له بد في ان المسالة الشخصية لا محالة مطروقة باي شكل من الاشكال , الافضل انه كان امشي الموضوع بدون ايضاحات وكان اكتفيت بالرد فقط , علي العموم انا بنحك ان كان لك رغبة في الزواج ان يكون من سودانية مش قالوا اسال مجرب وما تسال مدرب دمت بعافية
| |
|
|
|
|
|
|
Re: السودانيين المتزوجين خواجيات, شرق اسيويات,افريقيات,عربسات (خلايجة,شوام,بحر متوسطيات)هنديات (Re: اساسي)
|
يا اساسي الموضوع ما بس الرجل السوداني تخيل؟ حتى الفتاة السودانية بتردد تعرس سوداني ولا تعرس من برة، و بره غالبا بيكون من جنسية البلد اللي هي عايشة فيهو أو شخص لمتهم الظروف الغربة ...
عموما اختيار شريك الحياة قرار دقيق جدا وكونو تكونوا بتتشاركو وجدان ثقافي معين سواء في مقايس الجمال أو العلاقة ما بين الرجل و المراة أو حتى المحنة زي (وووب علي سجمي راجلو مالو) مرورا بالشبال في الحفلات فده امر مقبول تماما و جميل انو الزول يكون مدرك ليهو و مستوعبوا وهو بيدرس خياراتو ....
خيار بنت البلد أو ود البلد ... أو شخص من خارج الإطار الثقافي، الخيارات كلها بتحمل معاها بذور حل و مشاكل ...
بت البلد ما منزهة ولا الزولة اللي من جنسية تانية ملاك
المهم توليفة العشرة و الطباع و النظرة المشتركة لاساسيات الحياة، والوجدان الثقافي جزء منها و أصيل
| |
|
|
|
|
|
|
Re: السودانيين المتزوجين خواجيات, شرق اسيويات,افريقيات,عربسات (خلايجة,شوام,بحر متوسطيات)هنديات (Re: طارق جبريل)
|
بفتكر الزوجة الاولى تكون سودانية والثانية عربية .....
ذكرتني موقف ونحن في حافلة الخرطوم بحري وركب جمنا واحد وقال نازل مقر الاتحاد النسائي شارع الجامعة لانوسمع انو في اوربيات من البوسنة اعلت الاتحاد النسائي عن وجود فرص زواج ليهم ... اها زولنا مرسلو اخوه من البلد قال كدي امشي شوف البنات ديل لانو ربنا ما وفقني مع السودانيات واهو انت شايف اني اتزوجت ثلاثة مرات وطلقتهم .....الراجل كان متحمس جدا لنجدة اخوه وان يختار ليه من مسلمات البوسنة .. فقلت ليه ياخ الاعلان دا كان قبل فترة وقد يكونو اتزوجو كلهم .. قال لي ياخ نمشي نشوف لاخوي ولو لقيناهم عرسوهم بالعدم بنلقى لينا فرنسية ...
| |
|
|
|
|
|
|
Re: السودانيين المتزوجين خواجيات, شرق اسيويات,افريقيات,عربسات (خلايجة,شوام,بحر متوسطيات)هنديات (Re: علاء الدين حيموره)
|
المكرم / أساسي ------------------------------------------------------------- جمعتك مباركة ومساءك زين
في الاخر كل شي قسمة ونصيب ونصيبك لابد يصيبك والزواج من جنسيتك من غيره من بلاد تركب الافيال وأحد
وفتك عافية ,,,
--------------------------------------------------------------------- *التعديل الكتير ده محاولات لتكحيل المداخلة لكين شكلي عميته
(عدل بواسطة عبد الناصر الخطيب on 05-22-2009, 09:16 AM) (عدل بواسطة عبد الناصر الخطيب on 05-22-2009, 09:28 AM) (عدل بواسطة عبد الناصر الخطيب on 05-22-2009, 06:01 PM) (عدل بواسطة عبد الناصر الخطيب on 05-22-2009, 06:02 PM) (عدل بواسطة عبد الناصر الخطيب on 05-22-2009, 06:16 PM) (عدل بواسطة عبد الناصر الخطيب on 05-22-2009, 06:46 PM) (عدل بواسطة عبد الناصر الخطيب on 05-23-2009, 07:24 AM)
| |
|
|
|
|
|
|
Re: السودانيين المتزوجين خواجيات, شرق اسيويات,افريقيات,عربسات (خلايجة,شوام,بحر متوسطيات)هنديات (Re: عبد الناصر الخطيب)
|
ههه ههه هههههههههها !
والله ياخالد محمود ختفت التعليق من خشمى ! عالم جبانات !! لوووووول .
لكن يا ساسنا ،، بيعجبنى غروركـ ..
Quote: سعودية وبالعدم سعودية هاف كاست وارد غرب البحر الاحمر , شامية , مغربية , حبشية , فلبينية , يمينة او اي جنسية اخري ما ضروري سودانية ) |
اها قووووول انت وافقت ! البقنعها هى شنو؟؟ ياخ قول فدائية فلسطينية .. قول مجاهدة افغانية .. قول انتحارية من الجبل .. او بتاعة زاد مجاهد عراقية .. متطوعة من شرق اوربا او ايران وكدا !!
ـــــــــــــ ساسنا ! بدووون لف ودوران انت داير تسالهم من شنو ؟؟ اسال اسال ...
| |
|
|
|
|
|
|
Re: السودانيين المتزوجين خواجيات, شرق اسيويات,افريقيات,عربسات (خلايجة,شوام,بحر متوسطيات)هنديات (Re: عزاز شامي)
|
Quote: يا اساسي الموضوع ما بس الرجل السوداني تخيل؟ حتى الفتاة السودانية بتردد تعرس سوداني ولا تعرس من برة، و بره غالبا بيكون من جنسية البلد اللي هي عايشة فيهو أو شخص لمتهم الظروف الغربة ...
عموما اختيار شريك الحياة قرار دقيق جدا وكونو تكونوا بتتشاركو وجدان ثقافي معين سواء في مقايس الجمال أو العلاقة ما بين الرجل و المراة أو حتى المحنة زي (وووب علي سجمي راجلو مالو) مرورا بالشبال في الحفلات فده امر مقبول تماما و جميل انو الزول يكون مدرك ليهو و مستوعبوا وهو بيدرس خياراتو ....
خيار بنت البلد أو ود البلد ... أو شخص من خارج الإطار الثقافي، الخيارات كلها بتحمل معاها بذور حل و مشاكل ...
بت البلد ما منزهة ولا الزولة اللي من جنسية تانية ملاك
المهم توليفة العشرة و الطباع و النظرة المشتركة لاساسيات الحياة، والوجدان الثقافي جزء منها و أصيل |
الاخت عزاز من الجميل انه الواحد يسمع راي موازي (بدون الهيمنة الذكورية علي الموضوع) طبعا متفقين جميعا انه الزواج في النهاية خيار شخصي واطرافه الاصيلة تظل تدور في فلك ضيق ما بين الافراد والاسرة , وفي النهاية لكل زواج ظروفه البتحتم نجاحه وفشله اي كانت الاطراف اذا كانت ذات خلفية ثقافية واحدة او مختلفة وفي داخل الخلفية الثقافية هناك في بلد مثل السودان تعدد تقافي كبير يقارب احيانا الزواج من اجبني او اجنبية مثل الاختلاف الاثني والعقدي وماشابه . الامر الداعي لفتح هذا الحوار هو ما شاب الزيجات من اجانب وسودانين من سمة التصقت به وهي الفشل في نهاية الامر لجزء كبير من تلك الزيجات حتي غلب الامر علي البعض في اطلاق احكام مسبقة بان مثل هذا الزواج محكوم عليه بالفشل مسبقا , من واقع الحال ان اي زواج مثل هذا يكون الدافع الاساسي له الحب ومثل ما يقال ان الحب اعمي لذا الانسان يغض الطرف عن الكثير من الاشياء التي قد تصبح معضلة قادم الايام وهي مشكلة الابناء والهوية ومشكلة المعايشة اليومية وبعد ان يهدأ الحب ويتحول الي العقلانية , وتظهر الفروقات الثقافية وغيرها , اردت بهذا الحوار ان افتح الباب لاصحاب التجارب لضحد المقولة التي تحكم علي مثل هذه الزيجات بالفشل المسبق او تثبيتها ان كانت صحيحة من واقع تجارب
| |
|
|
|
|
|
|
Re: السودانيين المتزوجين خواجيات, شرق اسيويات,افريقيات,عربسات (خلايجة,شوام,بحر متوسطيات)هنديات (Re: اساسي)
|
المكرم / أساسي ------------------------------ (البوست) ده امبارح ختاني في حته ضيقة تفاصيلة باختصار الصباح كتبته عن الموضوع بصورة رومانسية شديد جابت لى سخرية والمساء عدلتها لصورة حادة شديد جابت لى ( الزعل )
على أى حال بهدؤ وبعيد عن الحدّة أو الافراط في الرومانسية نبتدي نتكلم .. الزواج يا أساسي في الدنيا كلها قرار شخصي محض ممكن في السودان اجتماعي اكتر ماهو شخصي لكين في الأخر أي زول بتزوج لنفسوا وزين شين بتحمل مسئوليتوا وفي كل الأحوال ماظن في زول بسمح لزول تاني يناقش معه خياراتو الشخصية ويكون لى رأي ملزم فيها غير الرأي الاستشاري غير الملزم ويسمعوا من باب المجاملة وإظهار التقدير ... ما أكتر
حته الاختلافات الأتكلمته عنها دي ( تنظير ) يعني بينك وبين زوجتك مرات مرات حتي تذكروا حته أنو كل وأحد منكم من بلد دي بمناسبته وبس اما غير كده الحياة بينكم بتكون عادية وما حتكون ملاحظة بينكم ممكن غيركم يلاحظة بس بينكم بتتلاشا سريع ... مشاكل العيال والإنتماء والهوية أكيد بوعي الزوج والزوجة بيصلوا لحلول كويسة في الحته دي باعتبار إنها من البداية حتنشئهم حسب حاجات بلد والدهم وأكيد مع شوية من حاجات بلده
ده غير أنو حتكون مستفيدة من فترة غربته في محاولة إنها تعرف كتير عن البلد والثقافة الحتستقر فيها فيما بعد وما حتلقي أى معاناه لانو أكيد في تقاطعات في الثقافة والعادات كتيرة عدا شوية فروقات بتتصل بالاكل والملبس ووو ودي ما معضلة
في الأخر صعب الواحد يحكم على التجربة بالنجاح او بالفشل لانوا الجنسيات مختلفة وفي نفس الوقت زواجك من بت بلدك ما ضمان 100% أنو زواجك ناجح .. يعني الزواج ده مدمت فيهوا صعب تقيموا ولاتدي عنوا إفاده نهائية لانوا كل يوم بيجيب حاجاتوا ومافي زول عارف بكرة بحصل شنوا فمدام الناس ماشة في حياته تقرض على كده ويحافظوا على حياتهم وعلى سعادتهم ويفتشوا البلمهم اكتر من الإحتمال يفرقهم وفي الاخر كل شي قسمة ونصيب أتزوجته سودانية اتزوجته غيره الصورة ما حتختلف كتير ياهو ( الزواج ) وياها الحياة
**
Quote: لضحد المقولة التي تحكم علي مثل هذه الزيجات بالفشل المسبق |
المقولة دي ضاحدة نفسها بنفسها الله هو علام الغيوب والقلوب مافي زول يقدر يحكم في الحته دي
فتك عافية
| |
|
|
|
|
|
|
Re: السودانيين المتزوجين خواجيات, شرق اسيويات,افريقيات,عربسات (خلايجة,شوام,بحر متوسطيات)هنديات (Re: عمر الفاروق)
|
زواج الاجنبية.. محفزات ومنفرات رصد : سلمى سلامة .. تصوير: مبارك حتة
الزواج من الأجنبية.. حكاية عرس لم تنصب له صيوانات الفرح في شارع الحي الضيق أو ميدانه الفسيح ولم تخضب الايادي بنقش الحناء بل أنها زغرودة جفت في الحلق.. و «دلوكة» جافتها الأنامل حين إختار الفرح مكانه خارج الحدود بقصة حب كسرت حاجز اللغة والثقافة والدين أو قد يكون شيء أخر غير الحب ولكن في نهايته أفضى إلى الزواج.. إما تنازعته الحواجز التي كسرت أو أصبح نموذجاً لزيجة ناجحة.. كيف إلتقى هؤلاء وكيف تزوجوا وماذا بعد الزواج؟؟ المهندس محمد الصافي كان طالباً يدرس باحدى جامعات «الميجر» إلتقى «بتريزا».. كان يتجنب أن يحادثها لأنه ينظر إلى نفسه بانه شخصاً غريباً بلونه ولغته وديانته ليس هنالك رابطاً يجمعه بتلك الحسناء تريزا سوى دراسة الهندسة ولكنها وبجرأة «الخواجيات» إستطاعت أن تصل إلى قلب محمد الذي ظل على علاقة بها لفترة عام أو يزيد، محمد كان يخشى ربه فخاف على نفسه من أن يجرفه تيار الحب إلى الرذيلة.. ففكر في الزواج رغم خوفه من التجربة إلا أن حبه كان أقوى فتزوج تريزا في إحدى الكنائس وفي شقته الضيقة حاول أصدقائه العرب أن يقيموا له عرساً بتفاصيل غابت عنها السودانية الملامح. مر عاماً على زواج محمد وتريزا وصار الإثنان على مشارف التخرج تريزا إستعدت للرحيل للسودان وطن الزوج محمد الذي فاجأ أهله بزوجته «الخواجية» وهي ايضا تفاجأت بشمس السودان لذا لم تستطع أن «تستر نفسها بملابس محتشمة» ليدخل محمد في حرج مع أهله الذين أصبحوا يقولون له «غطي مرتك دي» الشمس والاكل واللغة كل شيء كان طارداً لتريزا فقررت العودة لوطنها رغم الجنين الذي بدأ يتحرك في احشائها. وبعد «22» عاماً عاد عمار محمد يبحث عن والده الذي لم يأخذ من ملامحه بشيء سوى شعره الخشن وأنفه الافريقي ليصبح الابن غريب عن والده ووطنه الذي لم يمكث فيه سوى أسابيع. صلاح جمعة قادته ظروف عمله لدورة تدريبية لبضعة شهور إلتقى خلالها «سيما» التي سحرته من أول نظرة فاتخذ قرار الزواج بسرعة خاصة وأن «سيما» قالت إنها مسلمة ولم تمانع من الإقامة مع صلاح في السودان.. صلاح يقول لم أعش يوما واحداً سعيداً مع تلك الهندية التي أنجبت لي ثلاثة أبناء.. إضافة إلى أن إسلامها لم يكن إلا مجرد شعار رفعته في الهند واخفته في السودان، إنتهي زواج صلاح من «سيما» بالطلاق بعدها غادرت السودان تاركة الابناء يبحثون عن حنان الأم الذي غادر الحدود.. صلاح رغم حمده وثناه على الابناء إلا أن ذلك لم يمنعه من أن يقلب كفيه ندماً على تلك الزيجة التي وصفها بأنها مجرد نزوة عابرة دفع ثمنها غالياً! زواج محمد وصلاح تخطى أكثر من حاجز عكس ما إتجه إليه يوسف صالح حين أختار ان تكون زوجته من دولة عربية ولكن ثمة إختلافات في العادات والتقاليد عاشها مع زوجته فاطمة جاسم حين ما كانا يقيمان في بلادهما وبرجوعه الى وطنه بدأت عطور مرحلة الانصهار في المجتمع فلبست الثوب السوداني الذي زادها جمالا فوق جمالها فصارت سودانية حين تخرج إلى الشارع ولكن بلسان آخر حين تتكلم.. على الرغم من أن فاطمة سكنت في أحد أحياء ام درمان النائية إلا أنها قالت أن جاذبية المجتمع السوداني جعلتها تقاوم شعور العودة إلى وطنها رغم الحنين. زواج من خارج الحدود فشل متوقع أم نجاح ينتظر على الرصيف بحثاً عن مراسي آمنة؟ الدكتور أشرف أدهم أستاذ علم الاجتماع السياسي والانتربيولوجي بجامعة النيلين يقول: إن الزواج الخارجي معروفاً لدي العديد من المجتمعات الانسانية خصوصاً القبلية وهو أن يتزوج الرجل إمرأة من خارج عشيرته وهذا النوع من الزواج يعرف في علم الاجتماع بالزواج الخارجي الذي يقابله الآن الزواج من خارج الوطن الذي تواجهه كثير من المشكلات حينما يتزوج السودانيين من نساء أوروبيات وقد لا تكون الفروق الثقافية والدينية سبب مباشر ولكن البيئة المناخية قد تتسبب إما بإنفصال هذا الزواج أو إضطرار الزوج للبقاء مع زوجته خارج السودان وفي حالة وجود أطفال تتضاعف المشكلة ولكن كثيراً ما يختلف الامر إذا تزوج السوداني من أفريقية او عربية وعليها يكون تهديد علاقة الزواج حسب الاختلافات الإقليمية حيث تضع النساء الاوروبيات في الدرجة الأولى ثم العربيات في الدرجة الثانية ثم الافريقيات في الدرجة الثالثة والاخيرات ربما إستطعن التأقلم مع ا لمناخ السوداني والتقاليد أسرع من الاخريات ولكن هذا لا ينفي وجود أوروبيات وعربيات يقمن داخل السودان ولا يستبدلن وجودهن فيه حتى بوطنهم الاصيل!!
http://www.rayaam.info/News_view.aspx?pid=529&id=39586
| |
|
|
|
|
|
|
|