|
خالد عزالدين: تحننوا الكافر...إهداء للصهاينة
|
تحننوا الكافر!! بكا شديد.. دموع في الأعمدة لحدي ما الواحد بكون محتاج ليهو منديل وهو بقرا في أعمدة الناس ديل.. عليكم الله خليكم معاي شوية في رسالة مكابرابي من الاسماعيلية: (المصري يتلاعب بالمريخ ويهزمه بالثلاثة.. مهاجم المصري راوغ كل الدفاع المريخي وانفرد بحافظ.. محمد كمال أنقذ هدفا محققاً.. مصعب تائه في الوسط.. وارغو يمارس الانانية المفرطة).. المحترفين ديل ما نافعين. طبعا مكابرابي ده من المؤلفة قلوبهم عشان كدا بكاهو ذاتو ما شديد جدا.. عايزين زول بكااااااااااي.. تعالوا معاي.. حسن بسبوسة: (آاااه النصيحة ليك يا الله .. المريخ مغلوب غلب شين والشينة منكورة.. آاااه سخن التدريبات يا مشكلة !!.. أوووو.. رادان عمل المباريات الودية بدري.. لييييييه تنوم يا حبشكا؟!!) حبشكا منو انا ما عارف ده عمود حسن محجوب بتكلم عن حبشي نائم.. لييه تنوم يا مشكلة؟.. طبعا مشكلة معروف لكن المشكلة في نومو ولا تدريبو ما معروفة!! بطل النوم يا ابوجريشة!! في بكا أكتر من كدا؟.. حسن محجوب ما عايز زول ينوم.. حرب ولا شنو يا ابو علي؟.. تعرف نحن ذاتنا هنا بقينا ما بنوم.. سهر حلو خلاص.. مرات مساهرين مع كابوندي ومرات مع سادومبا ومرات مع غسان.. بطل النوم يا فتح الله!! أجمل حاجة في شطب غسان إنو بله جابر موقوف ما بلعب أول كورة في دوري المجموعات وقلق الليلة في لجنة الانضباط وغسان مشطوب.. واللللليييييلا يا حسن محجوب!! حالة تحنن الكافر الما بختم بالشهادة.. تعالو شوية مع أبوشيبة: (قرأنا أمس أن دكتور سامي سيحضر بأول طائرة من الإمارات ليلحق باجتماع قلق يوم السبت!! ونقولها داوية لا دكتور سامي ولا صديقه الصحفي الأزرق يستطيع المساس بقلق فالحق أبلج ومن أراد أن يظلم فليفعل فالجبار القهار الكبير فوق كل ظالم) أحسن الله عزاءكم.. خليك حنين يا دكتور.. ابوشيبة دا صحتو بتهمنا برضو.. بكا شديد.. عايزين طارق التائب والتائب غائب.. عايزين سادومبا.. سادومبا بالجبنة.. عايزين ريتشارد.. ريتشارد إلا بي شداد!! وشداد عامل شداد.. أكلمو ليكم يا ابوشيبة؟!! عايزين حمص؟.. انتظروا المولد.. المولد بدون حمص.. ستة شهور وانكشف المستور.. المريخ بمن حضر يبحث عن ريتشارد وحمص وداريو والغريبة وما غريبة داريو ما دايرو!! يا فتح الله عليك الله عايزين قصيدة في شطب غسان دا.. شطبوني لييه لييه.. جابوني لييه.. عايزيني أعمل ايه هنا.. جنس جرسة.. يا خي الصفحة الاخيرة في سوبر كلها بكا.. الناس ديل فارشين من بدري خالص.. ابراهيم عبدالله بسأل من أوروبا: ناس الهلال حيعملوا شنو في الخانات المقفولة دي؟ حندخل الاتحاد الاوروبي يا هوما مش التأشيرة الواحدة بتفتح مع الخانات كلها أقصد البلاد كلها!! انتو الاعارة والتجنيس ديل للهلال بس؟.. ما تسجلوا في زول حماكم؟.. ما عندكم قروش؟.. بسيطة ممكن تشوفوا الشركة الهندية!! ولا اقول ليكم شوفوا ليكم سكر أصلو السكر غالي ورمضان جاي.. ما عايزين سكر ما مشكلة شوفوا الجماعة الفي كوبر.. كملتوا قروشكم في المظلة وقعدتو برة!! يا اسماعيل حسن يا بكاي.. قلت لي هزيمة المصري زي السم؟.. الحمد لله غسان ده الله مرقو من سمكم.. يا تقالة دمكم!!..
|
|
|
|
|
|