|
|
 يوميات راكب حافله مع الموبايل
|
المكان الخرطوم والزمان الساعة العاشرة مساء وحافلة بحرى امدرمان تعبر كبرى النيل الازرق وهنا كل الركاب فى استماع موسيقى بوب سودانى رهيبه صادره من احد الجيوب وشكرا للموبايل احترمنا وقدر ظروفنا ونفخ جيوبنا فقديما عرفت الجيوب بملاذ للقروش وغدر الزمان وتغير الكان وتعددت الجيوب لتشمل الانوف او الجيوب الانفيه التى اصبحت داء العصر ينتشر بين الطبقة المسحوقه والاسباب معروفه دخان الركشات والغبار الاسفلتى السودانى المنشأ وردميات المحليات ودخان الاقشى وللذين لا يعرفونه هو عبارة عن لحمة راس معطنه فى توابل حتى النخاع والاقاشى دخيل على الخرطوم عرفته الاقاليم وفرضته الظروف
نرجع لموضوعنا الاساسى حكايات موبايلات فى الحافلات وما اكثرها اول الحكى كان بحافلة بحرى وبعد الرد الغير رقمى بسبب الصياح نبدا فى نقل الحوار
ايوه معاك حمدان وحسه انا راكب حافلة امدرمان
يا زول انا ما سامعك كويس طيب انت منو
اهليييييييييييييييييييييين ابو حميد العيال تمام الصحة انشاء الله تكون بم
شوف يا معلم انا الموضوع بتاع الطلاق ده حرم مافيه رجعة
المره ده منحوسه من يوم ما عرفتها امورى بقت اب سايد تاون
ماداير زول يتدخل بالله عليك الله انسى وعيش يتجى غيرها
كده خلينا اخبارك كيف لسه مع الترطيبة انشاء حالنه
بالله اها ههها هووووو والله قطعت مصارينى
الحمد الله اهو مع الخرطوم حرم لو فرشته تراب تلقى زبائن
خليك من ناس المحليه ديل حرم خمس جنيه تخليك تفرش وبعين قويه
وىوه وى وههههههههههههههههههها ده كلام انتو بتاعين شمارات ساكت
تعرف لو شفته حرم تجيك عطشه فى عز البرد
والله كده خلينى اكلم الحاج اصلو الجلك ده طولته منه لو جنبك
ابوى حالكم كيفن انشاء الرصيد يكون وصلكم
لا يا حاج اليومين ده ناس الكشة مزنقين علينا حبه والله الفطور بقى مقابضة
لا بجيكم فى العيد الكبير لكن ابشر الرصيد معاكم على طول
يا كمسارى اقيف لى قبلك هنا
لا يا حمدان بمشى البيت وبدق ليك
انته يا سجم ما قلنا نازلين تنزل بطنك
لا انا مع الكمسارى عامل ما سامع وانا قلته ليه نازل
انته يا زول خلى الحقاره ده والله لو نزلته معاى اوريك نجوم الليل فى النهار
حمدان انا بتكلم مع الكمسارى ما معاك كده خليك معاى
ويزداد الضيجيج وضرب الحديد ولعن الكمسارى وهو متحرك نحو الباب وما تنسوا التلفون مفتوح والضحكات متواصلة حتى النزول وهنا تنتهى قصتنا الاولى
نواصل
|
|
 
|
|
|
|
|
|
|
|
Re: يوميات راكب حافله مع الموبايل (Re: SHIBKA)
|
موبايلات...... حافلات...... اكد انا راكب غلط..... ياخي ده زمن غير زمنا.... نحن ناس ابورجليه ساكت...... ياخي واصل واهي دي قعده....
يا لذيذ يارايق هو براهو من اهل العوض قطع شك الكمساري والسواق والحافله وكل الراكبين والماشين وحتي المحليه معاه
....... وش ضاحك ومبسوط بيك
| |
|
|
|
|
|
|
|
|
|
Re: يوميات راكب حافله مع الموبايل (Re: بلدى يا حبوب)
|
موبايل نرجسى
عند الغروب مشيت اسال عليهم وما تمشوا بعيد ده مدخل ليوميات موبايل بس بصراحة عملته بالمثل البيقول
اضان الحامل طرشه وعلشان ما ينط زول يسالنى عن معناه يعلم الله ما بعرفه وده فرصة لو فى حبوبة او حبوب يفلفله لينا المهم الحافله كانت عند مدخل شاع المورده وموسيقى فرفوريه اضافت بهجه على المكان وكل الركاب هس وسمع ساكت بس العبد الله كان ثالث جار من الامام وعلى الشباك والجاره كمان نبدأ الحكى طبعا ذى ماعارفين كلام بالموبايل وعلشان ناس الخليج ما يزعلزا بقول بالجوال ........
اهلن منين معايىىىىىىىىىىىىىى
لو سمحته ارفع صوتك حبه (تنهيده على الحاء ونوم عديل على الباء وهمسه على الهاء )
ما عرفتك ما افتكرتك امكن تكون ضارب بالخطأ
سجمى انا ما عملته مس كول وعمرى ما مسكلته لزول
وكمان بتقول جاك بلتوث
يا ود الناس ما تكمل رصيدك ساكت
واىىىىىىىىىىى ده انت بتاع البلوتث
ما كنته داير تدمر موبايلى برسالة البلتوث
لا والله انا ماشى ناس صاحبتى نونه اصلو عندهم عيد ميلاده
طيب النمرة ما عندك وليك يومين لو كنته داير نتقابل
خليه مرة تانية
والله ما بقدر واه وووووووووواى
والله انت عينك قوية بس حاقول ليهم انت منو
هاااااااااااااااااااا ضحكتنى برضو لا
اتفقنا بعد المحاضرات اصلو انا يوم الاتنين شغاله اليوم كله
اى ايو اه (وحاجات ممنوعه من التداول فى المركبات العامه كتيره)
اسمى شوف يا انته روق المنقه
لا انا والله منقه عديل
وكمان فى شجرته وعلشان اريحك منقه هندية
ما تخليه لمن نتقابل اخليك تخمن
اى له برضو المثل بيقول اختك كان بقت عسل ما تلحسها كلها
وبعدها تدخل الحساد ناس زين وود عمها خليك سودانى وبت خالتها ام تى ان المهم الرصيد كمل وبصراحة كانت دقائق خارج الشبكة على الاقل خففت على زحمة كبرى الانقاذ .
نواصل
| |
|
|
|
|
|
|
|
|
|
Re: يوميات راكب حافله مع الموبايل (Re: SHIBKA)
|
ثقافه بالموبايل
بس الدور ده لزوم التغير ركوب حافلة شرق النيل والحاج يوسف عديل والجو سخن والناس عايشن زهج انفراج فى الرجال وانحسار فى النساء واخونا وليد الجنوب فى ابهى والتلفون ضرب واطلالة موسيقى البوب ويتدخل صاحبنا لوقف الحفلة الموسيقة وكما يعلم اهل السودان انتشار الموبيلات الصينية ذات السماعات ثلاثية الابعاد وافتكر الصينيون استفادوا من خبرة سماعات اجهزة الراديو والمسجلات الصغيرة بتشغيلها فى الموبايلات يعنى متى رن تلفون صينى سارع بالرد رأفة بالجماهير والمشكلة لو كانت النغمة اغنية ما حفلة عديل ناقصة بوليس .
اول الحكى الزول رد
يس انت منو
اوو ما قير فرند انت كويس
امبارح قالوا موسيقى للصباح
بالله جيمس كان موجود
ده زول ما تمام كنت معا وعمل لى شتات
طبعا انت كنت زعلان ما زول بتاعك مافى
انت حسه وين
شوف انزل فى سوق سته انا بجى
تايم لسه بدرى والليل طويل ما تخاف
ناس بتاع منو ديل انا ما عندى مشكلة معاهم
تخجل لى انا اصلوا داير نعمل معاك شنو
زمن ده سودان جديد وكل زول براحتوا
قلت ما بتقدر طيب انت ماشى وين
عرس بتاع بيتر ياها داير يعرس فرده بتاعه داك
نحنا متين نعمل ذى بتاع بيتر ده
ايوه بقر فى بس انت موافق
ليه 13 بقره ننا فى البلد عرس بضأن يعنى 26 ضأن
اهاها ما يعمل حاجة لو انت موافق
والله انا ماعارف ناس جو الخرطوم وما اتغير شىء
بقر وضأن د ه فى بلد
زول ده جون كلمه احسن يعمل حسابو منى
لا اول امبارح شايفوا مع الحنان بتاعوا
خلاص انت حاول انزل واتفاق بجىء
خلاص نشوفك وين بكره
حديقة سلام اوكى بس يا فرده تعال تمام
اوكى قوود نايد
شوف كلم جيمس انا زعلان منو كتير
بس انا بجىء لو عرفته عمل حاجه معاك فى حفله بنيات بشتقل
خلاص باي باى نشوفك بكره
وانتهت المحادثه على رائحة حظائر كوبر المميزه بس نقول شنو ديل ناس اللبن الاصلى
نواصل
| |
|
|
|
|
|
|
|
|
|
Re: يوميات راكب حافله مع الموبايل (Re: بلدى يا حبوب)
|
شحده بالموبايل
الدنيا اخر شهر وطبع الكلام ده بينطبق على ناس الما هيه وبصراحة حتى التجار الكانوا زمان شطار سقطوا فى مدرسة الانقاذ الاقتصادية لقفل الجيوب وربط البطون وكانت النتيجة لمدة 19 عاما لم ينجح احد بل كثرت ظاهرة نجاح التوالى لنفس الاشخاص وقالوا عليه التوالى الاقتصادى الانقاذى يعتمد على تعميم المشاريع وبسط ايادى القروض وعند الامتحان نظريتهم يهان المرء مهما كان الا من كان وهذا موضوع كبير نعودالى موضوعنا الاساسى بالموبايل الذى سادت لغته وتأثرنا بها جمعيا فمن اراد ان يجكس او يواعد او او فما عليه التخاطب بلغته حتى الشحده دخلت فى موسوعته ونجد ذلك فى حافلة الكلاكلات صباح الاحد بينما كنت ذهاب الى زيارة صديق بعافيه شويه الزول الجارالفى الحافلة اخرج موبايله ودق النمرة وسريعا قفلها وتكرر الامر مرتين وفى الثالثة هاكل يا دق دق دق وتعابير وجه تفضحه وتقول عليك ياالله فى الاول معتمدين عليك والباقى على اخونا صاحب النمره فلقد كان متورم الخدين مدلل الشفاه بفعل سفة من النوع الساموطى ..
معاك عثمان انشاء الله كويسين الاولاد والعيال وكل ناس البيت
والله الحمد الله كويسين بس الظروف مديانه عنقرته
فعلا البحصل ده التقول مكتوب علينا لكن اهو ربك كريم
تعرف المعاش الدور ده المره عملت فينا مقلب دولى مشت المعاشات وشالت ليها تلاجه بالاقساط حرم اللقيته كله ما فايت حق المواصلات بس نعمل شنو اهو الحصل حصل يا ابراهيم اخوى
لا والله بس قلته لو ظروفك كويسة تشوف لى سلفة لمن القى لى بيعة عربية واسددها ليك
والله يا ابراهومة انا ذاتى قلته كده لكن قالوا الرايح بفتش خشم البقره
هاها ها مالو لو بقرة اكل برضو ما بتخلى من اللبن
خلاص انا حسه فى البيت ونتقابل فى ميدان ابو جنزير البقى ذى الصيقه
يا زول قالوا ليك الجماعة ابوجنزير ده غلبهم عديل لا قادرين يشيلوه ولا يحولوه حرم الراجل طلع ارجل ممنا كلنا رغم موته الله يرحمه
ما اكتر عليك امكن تكون ماشى على الشغل والله اقول ليك بجى افطر معاك بدل ابوجنزير
طيب فتك بعافيه سلملى على الاولاد كتير الله يرزقك من خيره
الله يسلمك
نواصل
| |
|
|
|
|
|
|
|
|
 Re: يوميات راكب حافله مع الموبايل (Re: بلدى يا حبوب)
|
0ا معاي منو,, ماسامع ارفع صوتك
اهليييييييييين خالد كيف اخبارك وشباب الدوحه
الحمدلله تمام والله,
تصور لحدي اسع ما مشيت البلد
لالالا.. تاني يوم طوالي مشيت ليك للحرامي دامك لقيتو قاعد في ش الجمهورية وعامل فيها جاي من الخليج و قاشر بي حقنا
اول ماشافني نطط عيون وجراني بي جبه وقعد يتحلف لي وقال شنو لقى ابوه عيان عشان انشغل معاهو وما اتصل بي ناس بيتنا عشان يديهم الامانا
: كدي يا زول انت رصيدك كيف,, ممكن اتصل بيك انا لو كرتك كمل
كان كدي العربي الوهم خلي الفاتوره تجيهو مليون ريال,, اصلك ح تحول كفالتك منو.
امسع ما قلت ليك,,مشيت ليك لي بت اهلك,بالمناسبة انت دقيت عليها؟
طيب لانو انا قلت ليها ح اتصل عليك, وادتني رقم البت المرشحاها ليك.. اكتب عند 09156282..وقالت ليك الوقت المناسب بعد الساعه 9م
علي صوتك,,لا لا في هواء شويه كده وانا راكب كريز جاي من السوق السعبي
لالا يا خي مشيت للزول بتاع التقاوي عشان اشيلها معاي البلد
اها: وسالتو من تقاوي الاسود(بازنجان) قال راقد وعندهم واحد مصري احسن نوعية موجوده في السوق
ايوه طبعا سالتو من السعر, قال العلبه بي 0000
لا يا خي ماكتيرة
اسمع الشباب لسع قاعدين يجيكم يوم الخميس؟ومدورين ويست ولا حريق
انا عارفو زول جبان طوالي هو ما صرف
والله انت عوير تاني دينتو
خلاص اقفل انا بتصل بيك
وصاحبنا وحاتكم لحدي ما انا نزلت ما هببو ليهو
المحيرني في الموضوع وبي صوره عامه, يا خي اتكلم وانبح في التلفون زي ما عايز بس في اشياء يجب مراعاتها زي ارقام الناس وترديدها بصوت عالي
يعني انا لو كان عندي رصيد كنت حيرت ليهو صاحبو في مرشحة الرئاسة
عندي ليكم حكاوي كثيرة ,, راجع ليكم
| |
|
|
|
|
|
|
|
|
|
Re: يوميات راكب حافله مع الموبايل (Re: ابو مهند)
|
كل الدراما دي وانت راخي اضانك ؟ :D
غايتو قصص تحير في المواصلات . شي طلاقات وشي مشاكل جكس وشي تاني حاميني
طبعا في ناس بسترقوا السمع عن عمد . وفي ناس مجبورين
البحيرك الواحد جرسو يرن يرفع السماعه بعد ساعه بعد يسمعنا النغمه العاجباهو كلها
وبدل بلطف يعتذر من المتصل ويقول ليهو معليش انا في المواصلات اتصل بي بعد شويه
تلقاهو يكورك بطول حسو ... ارفع صوتك .. ايوه ايوه كده انا سامعك
السواق مرات يخفض صوت المسجل عشان صاحب التلفون يسمع .. وكل الحافله برضو تسمع
اللهم طولك يا رووووح
كدي وآصل خلينا نسمع قصص الحفالات الما ركبنا فيها
| |
|
|
|
|
|
|
|
|
|
Re: يوميات راكب حافله مع الموبايل (Re: بلدى يا حبوب)
|
هلو نوفل انا ماسامعك انشاء الصحة تمام
لا قلت ليك انا راكب المواصلات
يا زول اعمل شنو الواحد فى المثل قالوا يمد كراعه قدر لحافه
والله صدقت هو ذاتو مع ناس االمحاميد ديل بقوا يفصلوا اللحاف قدر الزول
والله حاجةعجيبة قلت لى عمرك ما ركبته حافله
طبعا انت مو اهل الساس والراس والكندشة ورفع القزاز
والله يا رجاله مع الحافلات تشوف حاجات تخليك تضحك وتبكى
لا كده انت جرب اركب ليك حافله والله اقول ليك خليها هايس على الاقل لمن تدرب شويه
طيب اخليك برجع ليك تانى اصلو سواق الحافلة مع ازعاج المسجل موبايله برن وخايف من بتاع الحركه
بس اوصل وبدق ليك مع السلامه
تحياتى
| |
|
|
|
|
|
|
|
|
|
Re: يوميات راكب حافله مع الموبايل (Re: بلدى يا حبوب)
|
قمة كروية بالموبايل
عالم المستديرة فى السودان ياخذ حيز كبير فى المنتديات الشعبية وعلشان ما ينط واحد لمعرفة معنى منتديات شعبية وهى جلسات النهار تحت اشجار النيم والمساء جوار حيط الجيران زمان كنا بنقعد مع الحلاق اليوم الحلاقة بقت فى البيت وعند الطلب وحتى الجلوس مع الترزى اصبح ضرب من الخيال بعد ظهور صنع فى الصين من طاقية الراس وحتى المغطى المداس واضيف كل حاجة ب 10 جنيه للرجال و7 جنيه للستات ومن الظواهر الجديده فى الخرطوم تكدس الاحذية القديمة امام البائعين وكمان الملابس الداخلية فى الحمامات وده حكايتها عجيبة اصبحت مشهورة باسماء وعلى سبيل المثال لا الحصر حمامات الامم المتحده – حماما ت شركة الايمان بالسكة حديد – حمامات مدرسة الشيخ مصطفى الامين بوسط السوق العربى –حمامات المسجد الكبير ده كله معقول بس بعض الشركات اضافت يوجد حمام للنساء بالدش....
ده موضوع كبير داير ليه بوست نرجع الى اليوميات
ذى ما بقول اخونا الرشيد بدوى هو والقون هو والقون قوووووووووووووووووووون على منواله التلفون دقه والنغمه بتاعت نجاد قرزة وكمان معاه الربع يعنى حافلة عديل ناقصة اولاد التشى شرتات وبنات الجنزيات المهم كل ركاب الحافله تابعوا الفليم صورة وصوت والسبب صاحبنا بتاع الموبايل ضارب سماعة اضان ومشغل الميكرفون ولزوم كنبة الجكس بتاعت الطلبة زولنا عمل نور طويل للنغمه وبعدها فتح ذى مكنة النيسان
اهلن كيفك يا زعيم طبعا ضارب لى علشان كرة امبارح بتاعت الجماعه
لا لا يا زول حرم سيدا ما قصر بس اعمل شنو مع كلتشى البايعه ليكم
ما تغالط ساى كده اقرا سيد البلد بتلقى الفيلم بطله الوالى
بالله خلينا شنو يعنى لو غلبتونا على الاقل افرحوا شوية بعد خمس سنوات
اه بالله يالله يا بتاعين الحكام
انت لو كلامك ده قلته قدامى حسه حرم كنته اوريك ليه
بالله امشى يا بتاعين الوالى بس كده استنوا شوية ياما واى واى تكتر
تعرف تلفونه مافيه سماعه اضان وكلامك ده كله الركاب سامعنه
ما اصلكم مفضوحين والديل استادكم البقى ذى النادى الكاثلويكى
يا اخى شوف ليك حاجة تانية بلاش فضائح وكمان جابين لينا المواسير بتاعتكم
والله مواسير وامبارح فى جريدة حكايات فى الكراكتير راسمين مغلق وفيه مواسير مكتوب على الافته ب مصنع النجمه للمواسير
طبعا ما بصدقنى لكن خلينى اصل البيت واجيب ليك الجريده
يعنى شنو كلتشى ده ما اصلو باع وشبهكم
يا زول الجايات اكتر وياما نشوف واى واى يا حكم الزمن لسه
هنا انتهت المتابعة الحيه بوصولى الى محطتى والشوط الثانى مستمر داخل الحافلة
| |
|
|
|
|
|
|
| |
بلدى يا حبوب
SHIBKA
willeim andrea
نوفل عبد الرحيم حسن
فيس بوك
تويتر
انستقرام
يوتيوب
بنتيريست