|
|
 الصادق عبدالله وتداعياته مع كتابات اخلاص مهدي لاشراقة مصطفي
|
سلامات
الاحباب
كنت اتصفح في سودانيل ووجدت مقالين احدهما لاخلاص مهدي والثاني للاخ الحبيب الصادق عبدالله يرد لها بعد ان اثارت كتابات استاذتنا لواعج الشجن في نفسه واليكم المقالين
الأخت العزيزه الرائعه
اخلاص
اقسم بالذى ركز الارض معبد ابكيتينى وها انا اسطر لك الاحرف هذه ووالله العظيم
الدموع على خدى فقد عزفت فينا عبر كتابتك فى سودانايل الما طالما تناسيناه وهربنا منه عبثا وهو خلفنا يلهث حالفا الا يدعنا حتى نغوص فى العذاب لاخمص اقدامنا نحن فعلا ننزف دماع وشوقا وحنينا ودولارا لاهلنا هناك عسى ان يستريحوا قليلا من عناء دهرا جاءهم فيه بلاء عظيم....ماعسانا ان نفعل قولى لى ونحن فى ميزان التشرد متشردين ليس المتشردين الذين ينامون فى محطة السكه حديد فى كوستى وهم يستنشقون البنزين فقط نحن منهم لكن نستنشق الحرمان من الوطن والسفر البعيد
بلا عوده...
خبرينى من اتعس منا فى هذا الكون ونحن نغنى مع مصطفى سيد احمد..
ادينى احساس بالامل فى كل رحلة شوق تطول
وادى الخطاوى الراجعه ليك فى سكتك عشم الوصول
ما الدنيا كلها انتظار والارتحال قدر الفصول
الموجه تحلم بالضفاف والغيمه تحلم بالهطول
ها نحن قدرنا الارتحال ما عدنا نحلم بالضفاف ولا بالهطول وصرنا نحن فصولا
مرتحلين فى هذه البسيطه...
لا اطيل عليك فقد كتبت ما نعانيه
الرواكيب القديمه
امى امنه وناس حليمه
خالتى ريا وناس نعيمه
والدروب الفيها كنا
نبنى احلامنا الجديده
من رمال نبنى القصور
اختى اوضه
خالتى اوضه
وامى دور
ااااااااااااااه من هذا الزمان
ياحلتنا عذبنى هواك
لانى القادر اوصل اجيكى
لانى الصابرعلى فرقاك
وحبل الصبر الكان ممدود
وكان فى الاربعه لينا حدود
إتراخا خلاس
ما اصلو الحمل عليهو تقيل
لا ضل حيطه لا ضل شجره
لا كوز مويه من اى سبيل
انا انساك
انتى الجوه عيونى خميله
وردة فل بتفتح يومى
اللون الابيض كاسى ضميرا
وفوح العطر المارق منها
ياما بيهو فاشى سريره
جوه القلب بيسكن حبك
ومين فى لدنيا بفتش بعدك
ومين فى الدنيا الما بهواك
يا حلتنا بدور الرجعه
وتحت النيمه بكوس الهجعه
وقصة وجعه
تسكن جوف الخاطر هسى
شوق لى ناسك
فى عينيا باين واضح ما بدس
وهسع كايس ليهو لماك
حلقة ابونا الشيخ عبدالله
عم على وود البله
ناس مرضيه
خالتك ريا
ناس احسان
ناس العازه
وبرضو صفيه
كل الناس البسكنو قلبى
وقلبى عليهم فى ليلاتن والصبحيه
والعجب البيت الفيهو كبرنا
وفيهو تفتح باقى زهرنا
وابدا زمنا ماجافانا
ودايما كنا
ابد ابدا
راضيين بالقسمه
وبرضو قدرنا
ونحن معاك حليل ناس يمه
اميره الطيبه وروضه محنه
نسو قمرنا
بكرى اخويا
وعبدو الدره
شتات فى الدنيا اصابو عمرنا
علا العشم الساكن فينا
بحلم نرجع ليكم تانى
ونجمع تانى شتات العيله
وتبقى الجمعه لينا مقيله
.....
حتى
اقيفى عديل سيبيها الغمه
طال ما النيل قدامك بجرى
ضاميك بى حنان زمان من بدرى
نحن برنجع غايتو قريب
بى كرعينا
او لو تسمعى مره نحيب
لمن مره يجيك خبرنا
اعرفى حبيبك راجع برضو
يسكن ارضك
بس من تحتك
وتحتك وفوقك كلو قريب
اختى اسهبت لكن والله غصب عنى سالت الحروف شكرا لزمنك الممنوح وتحياتى لكم
وانتم تموتون فى اصقاع لدنيا مثلنا ...
ودمت
الصادق عبدالله
قطر
|
|
 
|
|
|
|
|
| العنوان |
الكاتب |
Date |
| الصادق عبدالله وتداعياته مع كتابات اخلاص مهدي لاشراقة مصطفي | ودرملية | 09-22-03, 11:24 PM |
| Re: الصادق عبدالله وتداعياته مع كتابات اخلاص مهدي لاشراقة مصطفي | ودرملية | 09-22-03, 11:29 PM |
| Re: الصادق عبدالله وتداعياته مع كتابات اخلاص مهدي لاشراقة مصطفي | السمندل | 09-23-03, 09:47 AM |
 Re: الصادق عبدالله وتداعياته مع كتابات اخلاص مهدي لاشراقة مصطفي | lana mahdi | 09-23-03, 09:54 AM |
| Re: الصادق عبدالله وتداعياته مع كتابات اخلاص مهدي لاشراقة مصطفي | ahmad almalik | 09-23-03, 09:48 PM |
| Re: الصادق عبدالله وتداعياته مع كتابات اخلاص مهدي لاشراقة مصطفي | Ishraga Mustafa | 09-23-03, 11:09 PM |
| Re: الصادق عبدالله وتداعياته مع كتابات اخلاص مهدي لاشراقة مصطفي | Ishraga Mustafa | 09-23-03, 11:11 PM |
| Re: الصادق عبدالله وتداعياته مع كتابات اخلاص مهدي لاشراقة مصطفي | ودرملية | 09-24-03, 00:50 AM |
| Re: الصادق عبدالله وتداعياته مع كتابات اخلاص مهدي لاشراقة مصطفي | aba | 09-24-03, 01:16 PM |
| Re: الصادق عبدالله وتداعياته مع كتابات اخلاص مهدي لاشراقة مصطفي | ودرملية | 09-24-03, 04:08 PM |
| Re: الصادق عبدالله وتداعياته مع كتابات اخلاص مهدي لاشراقة مصطفي | ودرملية | 09-25-03, 11:18 PM |
|
| |
ودرملية
فيس بوك
تويتر
انستقرام
يوتيوب
بنتيريست