|
Re: رسالة الى الشعب السودانى - محجوب شريف (Re: abuarafa)
|
الاخ/ احمد بابكر تحياتى للك وهذا نص حديثك
اريد ان اصحح لك معلومه فالحزب الاتحادي الديمقراطي لم يصالح مايو ولا اي انقلاب عسكري اخر سابق او لاحق وسيظل كذلك ديدنه الي ان يرث الله الارض بما عليها. فلا تلوث من ناضل بمن (انبطح)للمفسدين وايدهم
وساندهم
ولكن انااقول لك فى عام 1976 وصل الصدام بين حكومة مايو و المعارضة مداه فى المحاولة التى تمت داخل الخرطوم للاستيلاء على السلطة بدعم خارجى من ليبيا ووقفت مصر علنا تساند حليفها نميرى و تمادت بان وقعت معه اتفاقية الدفاع المشترك و الاتفاقيات الاقتصادية و خلافه و بعد فشل المحاولة السابق ذكرها تصالح الصادق المهدى رئيس الجبهة الوطنية حينها مع نميرى و عاد الى السودان و لحق به حسن الترابى مبررين رجوعهم بمختلف الحجج و ادوا قسمك الولاة للثورة التى حملوا السلاح ضدها و تطور التعاون تالى ابعد من ذلك حيث اصبح حسن الترابى نائبا عاما منفذا لنفس القوانين التى وقف ضدها بالسلاح و انضم الى الركب صراحة السيد احمد الميرغنى كعضو فى المكتب السياسى للاتحاد الاشتراكى و اعتقد ان احمد الميرغنى كان يمثل نفسه لانه فى الديمقراطية الثالثة كان رئيسا لمجلس راس الدولة ممثلا للحزب الاتحادى الديمقراطى و ليس شخصه و انتقل الصراع الى داخل الاتحاد الاشتراكى و داخل اروقته بين الحرسم القديم و المتصالحين من جماعة الصادق و الترابى و الميرغنى ملحوظة: لا احبذ استعمال كلمات مثل انبطح ووووو الخ و العتبى للك حتى ترضى ومعها رائعة محجوب شريف رسالة الى مريم محمود ياوالدة يا مريم ... يا عامرة حنية
أنا عندي زيك كم ... يا طيبة النية
بشتاق وما بندم ... اتصبري شوية
يا والدة يا مريم
ما ني الوليد العاق ... لا خنتّ لا سراق
والعسكري الفراق ... بين قلبك الساساق
وبيني هو البندم ... والدايرو ما بنتم
يا والدة يا مريم
عارف حنانك ليّ راجيك تلوليني
دايماً تقيليني وفى العين تشيليني
ألقاه عز الليل قلبك يدفيني
ضلك عليَّ مشرور قيلت فى سنيني
أنا لو تعرفيني لو تعرفي الفيني
أنا كم بحبك كم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم
طول النهار والليل فى عيني شايلك شيل
لكني شادّي الحيل لا خوف عليَّ لا هم
هاك قلبي ليك منديل الدمعة لما تسيل
قشيها يا مريم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم
ما بركب السرجين وما ني زولاً شين
يا والدة دينك كم دين الوطن كمين
ما شفتي ود الزين الكان وحيد أمه
ماليلا كان العين قالولو ناسك كم
ورينا ناسك وين .. ورينا شان تسلم
العودو خاتي الشق ما قال وحاتك طق
تب ما وقف بين بين لى موتو اتقدم
قال أنا ما بجيب الشين أنا ما بجيب الشين
أنا لو سقوني الدم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم
كم من حبيباً ليَّ كان مالي بينا دروب
ما ودع الحبان ما وسدوه الطوب
حي قولي ما حي ووب
حي قولي ما حي ووب
ما خلى ساعة الموت يمه السرج مقلوب
اتشتت الرصاص فى جسمو واتقسم
لاقاهو يتبسم والحولو حيله وكان
ريحة صباه تتشم
زي التقول يومداك يوم العرس يادوب
قال أنا ما بجيب الشين أنا لو سقوني الدم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم
يمه السجن مليان رجالة ما بتنداس
الختو قبلي الساس والشالو هم الناس
والفات وليدن ليهو ما مسكو الكراس
ما سمعو يتكلم ما نحن عود الفاس
فرسان حمى وحراس فى الحارة نتحزم
عشم القدر ما كاس ما لاقى بيت يتلم
عشم الطواه الجوع المتعب المعدم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم
ما تقولي شن سويت ما تبكي شن سويت
غير البطمن ناس بى همهم ساويت
فارس مع الفرسان حارس بلدنا البيت
أخواني علو السور أنا طوبة ما ختيت
ديل من زمن تاتيت لامن كتبتَّ قريت
عرقنا ياما يدر يمه اللبن والزيت
الكسرة والكراس لى قشة الكبريت
تقولي جيداً جيت راجع مع الفرسان
فايت الحدود واسيت
وتغني يا مريم لينا وتجري النم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم
|
|
![Edit](https://sudaneseonline.com/db/blank.gif)
|
|
|
|
|
العنوان |
الكاتب |
Date |
رسالة الى الشعب السودانى - محجوب شريف | abuarafa | 09-21-03, 07:44 PM |
Re: رسالة الى الشعب السودانى - محجوب شريف | خضر حسين | 09-21-03, 09:42 PM |
Re: رسالة الى الشعب السودانى - محجوب شريف | abuarafa | 09-22-03, 02:54 PM |
Re: رسالة الى الشعب السودانى - محجوب شريف | ابو جهينة | 09-22-03, 04:38 PM |
Re: رسالة الى الشعب السودانى - محجوب شريف | cantona_1 | 09-23-03, 00:13 AM |
Re: رسالة الى الشعب السودانى - محجوب شريف | elsawi | 09-23-03, 04:47 AM |
Re: رسالة الى الشعب السودانى - محجوب شريف | ahmed babikir | 09-23-03, 07:22 AM |
Re: رسالة الى الشعب السودانى - محجوب شريف | قلقو | 09-23-03, 10:47 AM |
Re: رسالة الى الشعب السودانى - محجوب شريف | abuarafa | 09-23-03, 12:41 PM |
Re: رسالة الى الشعب السودانى - محجوب شريف | abuarafa | 09-23-03, 05:12 PM |
Re: رسالة الى الشعب السودانى - محجوب شريف | ahmed babikir | 09-23-03, 05:27 PM |
Re: رسالة الى الشعب السودانى - محجوب شريف | sultan | 09-23-03, 06:09 PM |
Re: رسالة الى الشعب السودانى - محجوب شريف | cantona_1 | 09-25-03, 01:42 AM |
Re: رسالة الى الشعب السودانى - محجوب شريف | قلقو | 09-25-03, 08:32 AM |
Re: رسالة الى الشعب السودانى - محجوب شريف | abuarafa | 09-25-03, 06:53 PM |
Re: رسالة الى الشعب السودانى - محجوب شريف | abuarafa | 09-26-03, 07:18 PM |
Re: رسالة الى الشعب السودانى - محجوب شريف | abuarafa | 09-27-03, 06:00 PM |
|
|
|