|
الدكتـــورة....\ حوا الطقـطـاقة
|
لقيتها قاعدة فوق بنبرها....في ضل الضحى قدام خشم باب بيتها.....تنضم وتهرج.... تهرج وتقبل علي جيهة ايدها الشمال وتبصق...تهرج وتبصق.....سلمت عليها.... ردت علي بلا نفس....وطنشتني مسافة وانا واقف... حتين بعدين هببتو لي... سجيمان كيفنك؟ .....شفت البقت؟ البقت شنو يا حوا؟..... ناس جامعة الخرتوم....عزلو وردي من دون الفنانين ديل...وادوهو... شهادة الدكترة.....قلت لها لكن يا حوا وردي ما بيستاهل... راجلا مو هين... قالت لي... انا الليلة من صباح الله ومشيت الجامعة...دي دخلتي منها..... عاد يا سجيمان يا اخوي اسكت ساكت...... العميان شايل المكسر.. لقيت لك مكتب المدير جنس زحمة....قدر ما في فنان.... مشى وقال ...تف...علا يدوهو شهادة الدكترة...وزعلانين... اصلو بن البادية داك سوى البدع.... وحات سيدي اب دلوكة... البي يمدغ اللبانة ويلوكا. والجنبو تكورك الكوكا.. يا صلاح حتى من البكى جبت شي.... قال لهم انا استاهل... انا استاهل......ما دام انا واخوي الفاضل سعيد.. عشان نرفع اسم السودان عالي وسط الامم.... تلاتة شهور.. تلاتة شهور في مصر..حايمين بي مايوهاتنا..ونصور في فليم....والجري الجريناهو داك لي حسي جايب لنا... القطايع....اسكت اسكت يا سجيمان... بادي والقيقم.... قالو كان ما اديتونا شهادات الدكتره... وكملن.. ادونا شهادات تمرجية ساكت.....بنقبلها....والقيقم.وقت ما لقى شي..زعل ولما ليك الطلبة ديل....وقال لهم علي بالطلاق... اسمع لي واحد فيكم ساكت يغني قطار الشوق حتى لو في سرو علا عكازي دا يا باهو.....وجاك زيدان داخل...من خشم الباب يسكل... ومتحزم لو بي عمة....وقابل مدير الجامعة عينو في عين المدير... وبي طول حسو.... يغني........
في الليلة ديك... في الليلة ديك
جيت اوريك.... واماغسك
جيت اقول...... يخسي عليك
يا كوم.......... الحسادة
يا الاحميتني... الشهادة
ان شاء الله...... باكر ...........تتقلب..........عليك ..... الراجل يا سجيمان ... يغني ويبكي ويتمخت.....لمن حنيت عليهو....ما سكتو عديل..اسمع جوطة في الاول كنت قايلاها مظاهرة.....الا كان اشوف لك عوض الكريم عبد الله.... جاي بالكورس ويغنو................
ندعي عليه.....ولاّ دكتور
الغتاتة ليه...وا شماري انا
اربعين.... سنة
وا شماري انا
خبرة في الغنا
واشماري انا
غاية..... المنا
ابقى دكتور .... انا...
ندعي عليه...و..لاّ دكتور
..................قلت لها اها يا حوا..... انتي نعل ما زعلتي.؟ قالت لي منو دي؟....انا اختك يا عبدو تي.......انا هوووووي والله زي ديل ولا هامني...... بكار اقطع لي تزكرة بالطيارة.....وامشي فرنسا... بي دلوكتي ... وشيالاتي..... ونزلت الطيارة في باريس..... ادق الدلوكة...... واغني لهم الشحم دا واللحم دا..... ايتيمنت.... من مطاري يتلافوني لك الفرنسين.... ويقعدوني في اجعص فندق...وتاني يوم من الصباح... يجيبو لي شهادتي حقت الدكترة.... ممضية ومختومة من جامعة السربون...... علا يا سجيمان اخوي كدي النسعالك.....وردي ...دا بعد الشهادة دي بيخلي الغنا...ويمشي يفتح لو عيادة؟
|
|
|
|
|
|
|
العنوان |
الكاتب |
Date |
الدكتـــورة....\ حوا الطقـطـاقة | سجيمان | 09-07-03, 07:04 AM |
Re: الدكتـــورة....\ حوا الطقـطـاقة | HOPELESS | 09-07-03, 07:12 AM |
Re: الدكتـــورة....\ حوا الطقـطـاقة | HAMZA SULIMAN | 09-07-03, 01:33 PM |
Re: الدكتـــورة....\ حوا الطقـطـاقة | سجيمان | 09-08-03, 04:17 AM |
Re: الدكتـــورة....\ حوا الطقـطـاقة | سجيمان | 09-08-03, 03:31 AM |
Re: الدكتـــورة....\ حوا الطقـطـاقة | Teeta | 09-07-03, 07:13 PM |
Re: الدكتـــورة....\ حوا الطقـطـاقة | haneena | 09-07-03, 07:44 PM |
Re: الدكتـــورة....\ حوا الطقـطـاقة | سجيمان | 09-08-03, 01:45 PM |
Re: الدكتـــورة....\ حوا الطقـطـاقة | سجيمان | 09-08-03, 07:28 AM |
Re: الدكتـــورة....\ حوا الطقـطـاقة | ALazhary2 | 09-08-03, 03:42 AM |
Re: الدكتـــورة....\ حوا الطقـطـاقة | خالد | 09-08-03, 02:02 PM |
Re: الدكتـــورة....\ حوا الطقـطـاقة | سجيمان | 09-08-03, 02:33 PM |
Re: الدكتـــورة....\ حوا الطقـطـاقة | Maged | 09-09-03, 06:21 AM |
Re: الدكتـــورة....\ حوا الطقـطـاقة | سجيمان | 09-09-03, 08:17 AM |
Re: الدكتـــورة....\ حوا الطقـطـاقة | Teeta | 09-21-03, 07:53 AM |
Re: الدكتـــورة....\ حوا الطقـطـاقة | abuguta | 09-21-03, 06:20 PM |
|
|
|