|
لقاء بورداب الخرطوم الاول
|
الاعزاء جميعا : قد تقرر اقامه اللقاء الاول لبورداب الخرطوم يوم الخميس المقبل الساعه السادسه في حدائق منتزه الرياض العالمي وفي انتظار جميع البورداب اها الحاضر يرفع ايدو والحاضر يبلغ الغايب عايزو يكون احلى لقاء في العالم مع احلى ناس
|
|
|
|
|
|
|
|
Re: لقاء بورداب الخرطوم الاول (Re: ود عقاب)
|
الاحبة بورداب الخرطوم كل التحايا والاشواق احييكم من السوق العربي واتمني لقياكم التقيت بعض الاصدقاء الاعزاء وكانت اللقيا اجمل في الحقيقة من انتظار صحيتو في نفسي الوجود ورجعتو لي عيوني النهار الخميس القادم موعد احلي لقاء بي احلي ناس الخميس 31/7/2003
| |
|
|
|
|
|
|
Re: لقاء بورداب الخرطوم الاول (Re: Mayada)
|
آآي up واي حاجة بس ما لقيتو غير يوم نبطشيتي تتلمو فيهو . واقع انا من قعر القفة مع ميادة
ما قصرتي يا غدي ومنتظنك بالشمار بس خططوا لا جتماع تاني ما يكون يوم خميس عشان كمان نحن نلم فيكم
| |
|
|
|
|
|
|
Re: لقاء بورداب الخرطوم الاول (Re: جدو)
|
سلام يا بورداب البلد
وتحية للاخت / غدى وهى تنادى بجمع جامع بكل الاخوان والاخوات المتواجدون داخل ارض الوطن الحبيب وفى حضرة العائدين وتحلو الجلسة ويزدان السمر بوجود كل بورداب الخرطوم ونتمنى تلبيه الدعوة ولكم الشكر جميعا
وايدى فى ايدكم
| |
|
|
|
|
|
|
Re: لقاء بورداب الخرطوم الاول (Re: safwan13)
|
غدى والبقيه سلام
وليه منتزه الرياض ... امعانا فى البرجوازيه ولا شنو
ولا عشان قريبه لى ناس كده
وطيب الناس الجايين من ام بده والكرتون كسلا وسوق النقه وجبل اولياء يجو كيف ...؟؟؟
حدايق الشعب ... مايو ...ابريل...هى هسى اسمها شنو عليكم الله
مالها عيبوها لى ...ما كويسه وكمان ناس الانقاذ عملوا فيها
حديقة حيوان ..اها يعنى بامسيكا ممكن يحب يتصور مع الشيته مثلا
ليه تحرموه ؟؟؟
عموما انا شخصيا مقاطع التجمع ده وماجاى مش على كيفى ؟؟
هوى يا ديك تجى من وين ؟ انته جنيت ولا شنو؟
يازول هوى ... ناس الرياض ديل زاتهم نحنا مابينفعوا معانا كلهم سدنه نميرى ...0
ولا اقول ليكم انا مالى ومالكم
والله دى حساده منى بس ...واتمنيت لو كنت معاكم
ديكو
| |
|
|
|
|
|
|
Re: لقاء بورداب الخرطوم الاول (Re: غدى)
|
منتزه الرياض ؟؟؟
انا عازمكم في حوش الجالوص في الكدرو
بيت ماهل
اوضتين وبرندة ونيمة مديدة ويا تلقو موية يا ما تلقو
لكن عندناوقهوة حبشية من انيسة وهبمريب ينسيكم غربتكم
| |
|
|
|
|
|
|
Re: لقاء بورداب الخرطوم الاول (Re: ود عقاب)
|
الاخوات والاخوان الاعزاء والله الفكرة اكتر من جميلة اعتذر عن الحضور يوم الخميس، اصلي مسافر للوالدة بمدني وانشاء الله نتقابل في فرصة تانية قريبة تلفوني: 476287 جمال
| |
|
|
|
|
|
|
Re: لقاء بورداب الخرطوم الاول (Re: غدى)
|
ده الكلام ... بالمناسبه قلتو وين غايتو دي يطرشي ... يعني انا حدي من جنية السيد علي وانته ماشي الريفيرا , المورده , المقرن . حدايق مايوو, جنينة النزهه وكده لكن القلتيها دي يا استاذه الا اسال منها ناس السياحه... بس بيني وبينك لو اجلتوا الاجتماع اسبوع اسبوعين او قول اسبوعين غايتو بحصلكم وهنئا لكم اللقاء وانشاء الله عامر ودمتم احبتي .....
| |
|
|
|
|
|
|
Re: لقاء بورداب الخرطوم الاول (Re: Bakhaf)
|
ود رمليه ود عقاب زيكو بخاف سمينتال حنين صفوان ملهم فيصل جمال صفوان
مساء الخير احساس جميل جدا لما اكون الواحد بين وطنه وناسه ويلاقى ناس المنبر احساس جميل جدا دريمز شكلها زى ما اتوقعت تماماوكمان بامسيكا احتمال لانه شفناه فى صورته النزله فى المنبر وزيكو شويه مختلف لكن ده كله كوم ودكين كوم تانى ... طبعا كنت ماخذه عنه انطباع تانى وراسمه ليه شكل مختلف تمامازول شكال وشرس لكن طلع مختلف تماما والغريبه مبتسم دائما ...... والباقين لسه الواحد ماشافهم بعد يوم الخميس بنديكم انطباعنا عنهم
جدو خساره الواحد ما يلاقك لكن اكيد فى اجتماع تانى
هوازن كيفك وحمد الله على السلامه وبنت الاحفاد وصلت وله لا
بنتمنى يا استاذ الموصلى لو كنت معانا
وجن منتظره تلفون منك
تحياتى غدى
| |
|
|
|
|
|
|
Re: لقاء بورداب الخرطوم الاول (Re: غدى)
|
خلونى من البتقولو فيه دا كلو قولى لى العضه كيف يا شباب منتزه الرياض يخربه مافيه حاجه تفتح النفس سندوشات ما معانا عايزين كم صوانى بيتزا وباسطه وفطاير ومارتدلا واسكلوبانيه وحاجات كتيره حاميانى ما تكون الونسه كحيتى كده كدى أنا بشوف ياعلى البيتزا يا الفطائر انتويلا شوفوا غيره الى الملتقى أحبتى
| |
|
|
|
|
|
|
Re: لقاء بورداب الخرطوم الاول (Re: وجن)
|
حظكم يا ريت لو كنت في السودان، التعارف جميل وخاصة مع شباب سوداني زيكم، يا شباب اجتمعوا بغض نظر عن الانتماءات السودانية، سوف تكتشفون ان السوداني هو سوداني وحلو كمان، بالجد حظكم.
| |
|
|
|
|
|
|
Re: لقاء بورداب الخرطوم الاول (Re: bamseka)
|
العفو يا الحنين با مسكا والله انا كنته حريص كل الحرص علي الحضور لكن شميت لي ريحه كيزان عشان كدا غيرته راي ونحن الكيزان ديل لو لاقونا في الجنه بنخليها ليهم.. لكن عشانكم وعشان الحلوين الجايين حانكون معاكم انشاالله
| |
|
|
|
|
|
|
Re: لقاء بورداب الخرطوم الاول (Re: bamseka)
|
العفو يا الحنين با مسكا والله انا كنته حريص كل الحرص علي الحضور لكن شميت لي ريحه كيزان عشان كدا غيرته راي ونحن الكيزان ديل لو لاقونا في الجنه بنخليها ليهم.. لكن عشانكم وعشان الحلوين الجايين حانكون معاكم انشاالله
| |
|
|
|
|
|
|
Re: لقاء بورداب الخرطوم الاول (Re: بكرى ابوبكر)
|
الحبيب بكرى هاك يا عظيم ولينا الشرف كونو نسمع صوتك يا زعيم
012912863
يانادر انشاء الله بورداب الخرطوم تانى فى كل اول شهر ح تكون عندهم جلسة وفى اول 9 هنالك جلسة اكيد يا عظيم معانا وفيها مع خالص تحياتى
| |
|
|
|
|
|
|
Re: لقاء بورداب الخرطوم الاول (Re: غدى)
|
سلام ياشباب بورداب الخرطوم فقد تمت عودتنا إلي ضفاف النيل الخالد في أبريل الماضي ولم نلتق بأحد منكم بعد نظرا لإزدحامنا بالعمل الإبداعي بالصحف والمنتديات الثقافية منذ الإسبوع الأول لوصولنا للبلاد قادما من دوحة العرب عموماُ كنت أتمني إختيار أي يوم في منتصف الإسبوع نظرا لزحمة البرامج في الويك إند دائما علي أية حال تحياتي إلي أن نلتقي بكم في سانحة أخري أخوكم الأكبر صلاح الباشا الملف الإبداعي لأخبار اليوم السودانية - عدد السبت من كل إسبوع وقريبا مفاجأة موبايل 012672762 تحياتي وإلي اللقاء
| |
|
|
|
|
|
|
Re: لقاء بورداب الخرطوم الاول (Re: غدى)
|
العزيز بامسيكا .. عندي اقتراح مرتين في الشهر علشان الواحد يحضر معاكم واحد علي الاقل يعني قول كده اول الشهر ونص الشهر رايك شنو في وسط اغسطس غايتو انته عليك الباقي ودمتم احبتي
| |
|
|
|
|
|
|
Re: لقاء بورداب الخرطوم الاول (Re: willeim andrea)
|
العزيز استاذ صلاح الباشا الف مرحب بيك يا عظيم
اخى الحبيب وليم لك التحية والتجل والاقتراح جميل والله وانشاء الله نحاول نرتب على نفس المقترح مع انو الخرطوم الان بها كثيرين من الاخوه بسودانيز اون لاين وانشاء الله يجتمعو بوجودك كل الاخوان البورداب يا وليم تحياتى
| |
|
|
|
|
|
|
Re: لقاء بورداب الخرطوم الاول (Re: غدى)
|
الف مرحب بالاعزاء والخرطوم منوره هذه الايام بهذه البدور المطله انا اسفه لمداخلتى لكم مؤخرا وذلك لظروف اجتماعيه اسريه قاهره المهم نحن واقصد بكلمة نحن دى اننا اكتر من واحد المهم نحن معاكم وهنالك مفاجئه فى انتظاركم بعدين ما دام فيها بيتزا وحركات انا على البارد لكم تحياتى وفى الانتظار على نار
ام الاء
| |
|
|
|
|
|
|
Re: لقاء بورداب الخرطوم الاول (Re: mekki)
|
سلامات تحيايا لكل الاشباب الفكرة جميلة خالص وانا حاضر بس عندى سوأل للزعيم بكرى وين مشت فكرة لقاء كل البورداب فى السودان فى بداية السنة 2004 فى شكل احتفال كبير والسنةباقى عليها اربعة شهور فقط
| |
|
|
|
|
|
|
Re: لقاء بورداب الخرطوم الاول (Re: غدى)
|
الاعزاء البورداب شنو يا جماعه عشان نحنا ما موجودين في السودان خلاص السنه الجايه نحنا حنعمله الفكره رائعه يا غدي بس ورورنا لو ناس الامن حيكونو في ولا لا
| |
|
|
|
|
|
|
Re: لقاء بورداب الخرطوم الاول (Re: beko)
|
الاخوه الاعزاء تحياتي
والله كان نفسي اكون معاكم واتعرف عليكم .وانا متاكد اليوم حايكون جميل لكن ... جاتني ظروف زي القون الذهبي الجابته تركيا في السنغال
ولكم العتبي احبائي
| |
|
|
|
|
|
|
Re: لقاء بورداب الخرطوم الاول (Re: غدى)
|
يا الله يا ناس الخرطوم
و الله نفسي أكون وسطكم
إذكروني فإن الذكرى ناقوس يدق في عالم النسيان ( دي العبارة الكنا زمان بنلقاها في أدراج و حيط المدرسة (
و الله بالجد كان نفسي أكون معاكم لكن لمتكم أكيد حلوة و ربنا يلمكم في الأفراح دائما يا رب
| |
|
|
|
|
|
|
Re: لقاء بورداب الخرطوم الاول (Re: غدى)
|
لقد شاهدتهم اجمعين بورداب الشتات في الخرطوم وبورداب الخرطوم في الخرطوم كان حضورا طيبا وجميلا خاتين عضة مجهولة التمويل... انا لم اشارك في الدفع من هو بن العز الذي انزل تلك المائدة؟؟
بشاشة غدي ودريمز اورثني احساس الظالمين من الواضح اني اجرمت في حق الطيبات في حوش بكري بطولة لساني ..احسست نفسي مجرما بينهم ..
عزيزتي وجن طبق البيتزا من المؤكد انك لم تحشري يدك فيه فقد خرج رائعا طيب المذاق سلمت يدا والدتك..
امدرمانية(الهام) حضورك عالي والتزامك بالمواعيد اخجلنا..القعدة الجاية في مضاربكم وتحت اشرافك المباشر..
حنين رسلت لينا اختها السمحة السغيره بهية الطلعة ملبساها ازرق ومشيلاها كتب الكلية الاكبر من التورتة الجايباها .. رايتها فقلت الليلة احددا مع السماحة دي لكن الشيماء اصرت علي الحضور و كانت بالجوار تراقب الجمع وتراقب ما تظن انها حركات مني خارج المعهود ..
اساسي بن الذين اتصل مشكورا واكبرت عليه ان يتصل من جدة للتحية ..واعجبني حديثة وفي نص ونستي وحين اندمجت معه معاهو قال لي الجنبك دي منو؟؟
طبعا كان في حضور من الشباب عالي ولانهم لم يفارقو المائدة لم استطيع الجلوس معهم.. طرحهم كان واضح انو طرح عضات وبارد ... الدور الجاي يا امدرمانية بلاي ما تجيبو تورتات عشان نشوف البحصل شنو ووين بقبلو..
اسراء من طبعا هنا الكلام ما بخص البورداب الكلام دقداق واسراء ليست بوردابية ...
اسراء العسولة ونستنا ما تمنيناها ما تجي نتمها جنب الاكزام هول..بس ما تجيبي لي سيرة ابو الدال .. بعوقك انتي واختك
لمزيد من التفسير الجغرافي عن المكان عندك العزيزة جنبك اساليها عن الاكزام ده وين ..
لكم جميعا الذين لم يجلسوا مع بورداب الخرطوم عند ذلك المساء تحت ذلك الخريف من المؤكد ان اعمارهم تكاد تذهب سااااااااااي لقد احببتهم
هم دون شك اصدقاء بلا شروط..
| |
|
|
|
|
|
|
Re: لقاء بورداب الخرطوم الاول (Re: DKEEN)
|
»DKEEN »dreams
شفت يا دكين
ما قلت ليك انت طوالى قاعد فى راسى ..حكايتك شنو؟
مع انك جبت لينا المطر
لكن وشك ده اكيد ما حقك
جبت من وين الابتسامة والبشاشة ديل
طبعا سوء حظك خلاك تجئ متاخر لكن المرة الجاية بنقعد ليك بمزاج
تسلم
| |
|
|
|
|
|
|
Re: لقاء بورداب الخرطوم الاول (Re: dreams)
|
سلامات وعوافي تستاهلوا ياحلوين والله شكلكم اتبسطوا للاخر المهم اخخخخخخخخخخخخخ علي العضة الفاتتني دي النعم انوا بورداب الدوحة هنا ممتعننا بالعضة خصوصا العضة العند ناس نادوس وابنوسة ولو اني فاقدا اليومين ديل عشان طولنا ماعملنا جلسة رايكم شنو ياجماعة تعملوا جلسة في عيد رمضان عشان نحضرا معاكم وتكون كدا بعداليوم الرابع في العيد عشان نعيد في بيوتنا في رفاعة ونجيكم اخخخخخخخخخخ اخري من تلكم العضة التي فاتتني اقول لكم هنيئا مريئا بالعضة وبي اللمة يادكين انا قايلك في السعودية تتخيل دريمز المرة الجاية انتي وام الأء وغدي ركزو لينا علي السفاسف النادرة الما مألوفة الاساميها الا الواحد يكتبا في ورقة تسلموا ووالله لقد حسدتكم حتي انتفخت جوعا اخخخخخخخخ بعد الااااااخ الاخري سلمتم
| |
|
|
|
|
|
|
Re: لقاء بورداب الخرطوم الاول (Re: ودرملية)
|
يا سعدي لقد كنت بينهم اسعدني القدر بان كنت احد حضور الليلة الخريفية السعيدة كان الحضور بامسيكا فيصل 44 جدو ودعقاب دكين الذي حضر متاخرا ولم يلفت انتباهه الا العضة والجكس ام درمانية دريمز حنين بت الاحفاد ابنوسة وجن غدي وكان حضورا معنا بالهاتف تمبس واساسي لكن هنالك تلفون او قل تلفونات لم استطع ادراك كنهها كانت تتم بعيدا عن الجمع والكلام ليك يا المنطط عينيك ثم كان الضيوف
وكان الهمبريب ثم زخات المطر والطيبات من ماكل وشرب بتزا وجن وبسبوسة دريمز التي نالت اعجاب جدو وبالرغم من اننا تاسفنا لمن لم يحضر خصوصا هوزي وبخاف الذي تم تبكير موعد هذا اللقاء لاجله عموما كنت اكثرهم سعادة بالصحبة وكنت اكثرهم سعادة بالوجبة وكنت اكثرهم سعادة بالاريل الخطير ودي طبعا العارفنها اتنين بس اتمني ان يلتقي جميع البورداب في ربوع الوطن
| |
|
|
|
|
|
|
Re: لقاء بورداب الخرطوم الاول (Re: غدى)
|
سلام شباب اتصال من جدو يقول انه داخله المنتزه وما لاقى زول واقول له انى قريب منك ثم نقابل والدهشه تاخذ حيذ اكثر من الطبيعى واتصال اخر من حنين والتقى ثلاثتنا ونحن حيرى اتصلنا على وجن هى فى الطريق ثم العزيز زكو ايضا فى الطريق حتىالان لم اقابل لا اثينين جدو وحنين وحيرى تدب على مكان اتى احدالمصورين ودون مقدمات انتو ناس سودانيز اون لاين ايوه قالها ثلاثتنا فى وقت واحد فى واحده فتشت لمنا تعبت انا قعدها بى هناك امشوة ليه لحظه رائعه التعرف على ابنوسه المهجومه اتى اليه وفد مكون من عده اشخاص وسولنا انتو ايوه انصرف بقيه الوفد بعد شكره وفضلت حضرت الناظر الامدرمانيه اسم على مسمى وبعد جهدا اعترفت لنا بت الاحفادفكل واحد قال تلاته خيرات وكلها غلط جاء اختراح من الامدرمانيه بعمل لافتع ونكتب عليها سودانيز اون لاين لكن لم نجد ورقه ولا قلم انا فى الجهه الغربيه انت وين انا هنا انت الزول السمين دا ايوه وصل الاخ زيكو بامسيكا فيصل44 ودريمز وجلسنا وبدات بودادر المطر تلوح وهب علينا نسيم او قل دعاش وتوالى الحضور وجن وغدى اصحاب الدعوه اخر من يحضر لكن لهم الشكر وهم الذين حركو فيناصدق المشاعر بالاخوه الصادقه بدات التعارف مع زيكو اخد كل الوقت بعدا لم اسمع تعارف شخص اخر فكل مره يقطع الحديث اتصال من احد الاصدقاء يازول كان اول المتصلين معتز وتمبس احلى ناس واساسى روعه الدهشه حسن الختام اود ان اقول اخر الحضور دكين ومقلب حضر الناظر الامدرمانه عند دخول سلم عليها انت منو اجاب ودون تردد تماضر شيخ الدين حقا كانت جلسه من اروع الجلسات ونتمى تكرارها وتسلمو يا برداب اظرف حاجه عند اتصال تمبس سال عن اتصال الريس وتسلمو جعيا
| |
|
|
|
|
|
|
Re: لقاء بورداب الخرطوم الاول (Re: غدى)
|
فعلا مالينا فى الطيبين نصيب
ماتتصورو انا ممغوصة كيف
حرمتنا الملاريا من لقياكم
وماحدش سأل عننا
نحن لمتين جداد ياجماعة ومافى زول عارفنا
جداد دى من جديد
نتمنى نلقاكم فى وقت تانى
ويكون قريب
| |
|
|
|
|
|
|
Re: لقاء بورداب الخرطوم الاول (Re: ملكة سبأ)
|
حنين رسلت لينا اختها السمحة السغيره بهية الطلعة ملبساها ازرق ومشيلاها كتب الكلية الاكبر من التورتة الجايباها .. رايتها فقلت الليلة احددا مع السماحة دي لكن الشيماء اصرت علي الحضور و كانت بالجوار تراقب الجمع وتراقب ما تظن انها حركات مني خارج المعهود ..
يا دكين شكيتك على الله ياخى بت الناس مالك عليها سحرتها ياخى قالو من يوما داك عيانة ماشافت عافية انت الزول الشيماء دى كلها ما ملت عينك غايتو سمعنا شمارات تحت تحت قالو قالت لى امها ماشه لى لقاء بورداب الداخل التانى قالت لها والله كراعك ماتشيليها قالت لها يا امى لكن كولو يوم ناس وجن بضربو لى امها قلت ليها مافى مشى يعنى مافى مشى لو ضربتلك وجن والله ضربلك غازى سليمان طبعا قايلا بورداب الداخل جزء من نشاطات معارضة الداخل شفت كيف يا دكين حرمت الجماعه من زوله عسولة وبرضو لو لقيت طريقا ارسل البوست دا لى شيماء عشان تانى ماتسحر بنات الناس بعدين مسعول من الخير دافـــــى صاحبك مشى ويين اوعك تقولى لسه زعلان من بكورى
| |
|
|
|
|
|
|
|