|
|
 نوم الحيشان و نوم الكيعان
|
ذهبت لقسم الشرطة بعد أن سمعت أن إثنين من جيراني قد تشابكا بالألسن و الأيدي و أن الموضوع الآن ( بوليس كيس ).
هرولت إلى هناك ، فحمدت الله أن المتحري أعرفه جيدا ، فهو شقيق أحد تلاميذي.
قلت له هامسا : ممكن تديني خمسة دقايق إتفاهم مع الجماعة ديل ؟
قال : جدا ، خد وقتك.
شنو الحكاية يا جماعة ؟ مش عيب جيران يتشاتمو و يتضاربو و كمان يصلو للشرطة ؟
هنا لم أسمع شيئا ، فقد إنطلقت الكلمات من الطرفين كطلقات الرشاش تصم الأذنين.
المهم بعد جهد جهيد ، و شد و جذب ، و بوس ريسين ، جعلت كل واحد يبوس راس التاني و إنشطب البلاغ ، و رجعا و كل واحد ممسك بيد الثاني ، و كل واحد يحلف على التاني إنو الغدا عندو.
نعم هذه أخلاقنا.
و لكن ( شنو الجاب الكعة ؟ )
كل واحد راقد في حوشو في أمانة الله ، واحد سمع التاني بيتناقش مع مرتو ، شوية شوية النقاش إحتد ، شوية شوية المرة كوركت بعد أن أخدت ليها كفين من النوع النصيح ، أها صاحبنا دة من حوشو كورك لي جارو البيلبع في مرتو :
يا أخي بالله إنت راجل إنت ؟ أولا إنت غلطان ثم غلطان ، تانيا راجل يدق مرتو و كمان في الحوش دة ما راجل ، يا أخي إختشي يا أخي.
فرد عليه الآخر و هو يقترب من الحيطة الفاصلة :
إنت مالك يا حشري ؟ الدخلك شنو بيني و بين مرتي ؟
الدخلني كواريكم الصحت الشفع و ناس الحى.
المهم كلمة من هنا و كلمة من هناك ، فقال ( الذي كان يضرب زوجته للآخر ) :
لو راجل أمرق لي برة.
و مرق الآخر لأنه واثق من نفسو إنو راجل.
و حدث الإشتباك الذي لم يفضه إلا أبناء الإثنين ، و لكن ضارب زوجته تقدم بالشكوى ، و كما أسلفنا أنها إنتهت بعزومة.
كان تعليق الجيران متفاوتا بين التأييد لهذا و إنتقاد ذلك. فكانت التعليقات :
ما مفروض يتدخل.
الواحد لما يسمع واحدة نص الليل تكورك لازم يتدخل.
إنت مالك و مالها ، دة زوجها و هم الإتنين أحرار.
الزوجة مفروض كانت تسكت لغاية الصباح و تتم نقاشا معاهو.
الراجل غلطان ، كان يدخلها الأوضة و يتفاهم معاها.
الما بقدر يمسك خشمو ما يبيت في الحوش.
أها نان وين يبيت مع قطع الكهربا ؟
كل واحد ينوم في جهة ، الحوش عندو أربعة أركان.
حسع بكرة الراجل و مرتو المدقوقة يبقو سمن على عسل ، و تقول للحشري دة ( إنت ما خساك بي راجلي يدق علي كيفو ( يا داخل بين البصلة و قشرتها ما ينوبك إلا ريحتها ).
لذا فما رأى أصحاب الحيشان الثلاثة أو الواحد ، هل نتدخل بين البصلة و قشرتها ، أم دي بي طين و دي بي عجين ؟
دام فضلكم.
|
|
 
|
|
|
|
|
| |
ابو جهينة
فيس بوك
تويتر
انستقرام
يوتيوب
بنتيريست