الاخ العزيز الشريف
تعرف انا كان عندي راي في سياسة الجبهة الاعلامية من زمان والمشكلة اني ما لقيت لي زول اقنعه بيه، فقمت اقتنعت بيه براي
وهو ان سياسة الجبهة الاعلامية تعتمد على الادهاش (الاندهاش) شبيه بالخطة الحربية الامريكية الآخيرة (ياربي هل في علاقة بين الجماعة ديل؟؟؟)، بمعنى انهم كل مره يجو بتصريح غريب من احد قادتهم وما تمر ساعات او ايام الا وجاء زعيم من زعمائهم الآخرين بتصريح مناقض 100% لما صرح به الآخر وهكذا
ونقعد نحن ناس قريعتي راحت الزي ديل، نقعد نحسب ونضرب ونخمن وياربي الجماعة ديل قاصدين شنو؟ والحاصل شنو؟ ونقعد نباري الشمارات فلان قال وعلان عمل وهكذا لغاية ما يدهشونا بتصاريح أخرى متناقضة وهكذا دواليك
المشكلة وين انه نحن ح نقعد نباري الجماعة ديل قالوا كده ليه ولا سو كده ليه، لغاية ما نلقى القيامة قامت وهم ومازالوا حاكميننا
الشئ الما قدرت اتأكد منه ، هل هذه السياسة مقصودة ولا جات بالصدفة وه لقوها حلوه وخلوها ماشى؟
لأنه ما حصلت سمعت واحد فيهم اتراجع عن تصريحه او صحح تصريح اخوه، فهذه هي سياسة الجبهة الاعلامية عدم مواجه الحقيقة ومحاولة اخفائها في زمن اصبح من المستحيل ان تدس ابره مش خبر، ولأنهم عاجزين عن مواجهتها او حلها لذلك يلجأون لهذ السياسة، محاولة اخفاء الحقيقة عبر التصريحات المتناقضة
لك التحايا أخي