|
|
 الى بت قضيم قبل ان تاخرك سودانير وتفوتي ابو دمام ورقصة القرد
|
سلام مربع
اول الحكي
بالله ياالطير قبل ماتشرب
تمر على بيت صغير
من بابو
من شباكو بيلمع الف نور
تلقى الحبيبه بتشتغل منديل حرير
لحبيب بعيد
تنزل لديها وتبوس يديها
وانقل وصايا ليها
وحب الاكيد
الكلام لصلاح احمد ابراهيم
الغناء وردي
______________________
وصايا واحده نفسها في ابو دمام
ينقصني الان ان اضع اصبعي على خشمي واطلقها . مدوية . تنوني وتنوني .. وليست مثل مناناة الباعوضة في ليلة سجمانه تشح فيها الكهرباء او تكاد تكون مافيشها خالص او مثل صفير حلة البريستو .
ومع كل هذه التفاسير التي ابت ان تفسر مقصدي .. اقول وبلاش فلسفه انني اردت ان ازغرد ايويوووي ..
فرحة جزلة بعرس بت خالتكم واقول في سري عقبالي يارب عسى ان ينفك عارضي واعرس ذاك المجنون .. لكني فجأة تذكرت انني حزينه .. وانتهرتني ..مستغربة
هي يا شيري السجم انت موش قلت حزينه ، لانو البدو جيرانكم لم يعملوا لك خاطر وطنشوا نداءاتك الانسانيه المتكررة ان لا يدخلوا الخرفان النيران بطولها .. لان ذلك يمنعنا من الاستمتاع بكرشتها وجميع ملاحقها الاخرى من الكرعين والجلد ابو دمام والمصران الاعور واللسان والراس .. والضنب ..
وحزني ليس لانني كنت عشمانه في شوية كمونيه انت نفسك بت قضيم تعرفين انني اكهرهها وانت زيي ايضا تكرهينها
شفتي الى اي مدى اوصلتني هترشتي ؟؟
قصدت من هترشتي انهم تجاهلوني ، وفعلوا بالخرفان ماخططوا له وجعلوها كبسه واستهلكوا مزرعة كامله من الارز لتنبطح فوقها اجساد تلك الخرفان المسكينه التي رأيتها تمشى الى حتوفها بارادتها .
اذ تاكد لي فعلا ان تلك النظرة السعيدة التي رمقتني بها وهي تستقبل سكينه الجزار الذي يخوف عديل كده
انها بالفعل كانت سعيدة ، حينما اشاحت بوشها هناك من مايا ومصطفى وبقية العيال وهم يتحلقون حولهم
وحينما توقف الجزار برهة لياخذ نفسه ويقول الله اكبر ..
رأيتها تستعجله وتستحثه ان يفعل ذلك بسراع بسراع .. وسمعتها وهي تفرفر برجولها
ياراجل ماتسرع سيب اللداحه دي خلينا نخلص ونفارق الوهم ديل!!
وهذا ما اراحني شويه .. وخفف من حزني ..
وفي الحقيقة انني لا ادعي حنيتي على الخرفان . لكن حزني كان سببه انهم ماانصاعوا الى نداءاتي المتكررة ان يجعلوننا نخمج في اللحم شويه ..ونتعلم في هذه الخرفان المسكينه شوية مهنة ربما تنفعنا مستقبلا في الزمن الاغبر هذا
جميل جدا منظر تلك الصواني الممتده في بيوتات المناسبات ، حيث انك ماضيه ياصديقتي ودعواتنا تصحبك ..
مفرح منظر هذه الصواني وهي تمتلئ باكوام من العضام واللحم . والحلل الكبيره وهي تدخل الرحمن في القلب والكوانين توازع ارض الحوش في حميميه وتواد وتالف مع الفحم وهو يتلهلب .. متناغمة اصوات النسوان مع اولاد بيت العرس وهم يجرجرون شوالات الخضار ..لا لا البطاطس دي جيبوها بي جاي .. العجور دا .. زحوهو كده من جنب النار..
الكوسه دي خلوها جمب ام الحسن ورقيه عشان يبدوا فيها (قرقير) للمحشي ..
هذا ماقصدته بت قضيم .. بيوت المناسبات .
فكل الذي قصدته بهذه المقدمه الهترشانه ان اقول يابختك يابت قضيم سوف تلمحي هذه المناظر الجميله
لمة البنوت وهن عاصبات رؤوسنهم وتحتها الرولات مقبره الى عنان السماء .. وجواطة اولاد الحله وهم يركبون صيوان الطباخين
وايييييييييك .. والضبان الذي ينوني والناموس الذي يصاحب الضبان في الهوا
والكلاب وهي ترقد مستكينه جمب الحيط وجوه موية الطين ..
_________
شكيتكم على الله يابوش وبلير وصدام
|
|
 
|
|
|
|
|
| العنوان |
الكاتب |
Date |
| الى بت قضيم قبل ان تاخرك سودانير وتفوتي ابو دمام ورقصة القرد | shiry | 04-26-03, 10:10 AM |
| Re: الى بت قضيم قبل ان تاخرك سودانير وتفوتي ابو دمام ورقصة القرد | shiry | 04-26-03, 10:12 AM |
| Re: الى بت قضيم قبل ان تاخرك سودانير وتفوتي ابو دمام ورقصة القرد | shiry | 04-26-03, 10:14 AM |
| Re: واحد قلبو محروق علي السودان | shiry | 04-26-03, 10:32 AM |
| Re: واحد قلبو محروق علي السودان | benyya | 04-27-03, 09:24 AM |
| Re: واحد قلبو محروق علي السودان | shiry | 04-28-03, 09:45 AM |
| Re: واحد قلبو محروق علي السودان | Habib_bldo | 04-28-03, 11:27 AM |
| Re: واحد قلبو محروق علي السودان | ba7ar | 04-28-03, 11:51 AM |
| Re | HAMZA SULIMAN | 04-28-03, 12:19 PM |
| Re: Re | shiry | 04-28-03, 03:41 PM |
| Re: Re | ba7ar | 04-29-03, 02:53 PM |
| Re: Re | shiry | 04-29-03, 03:36 PM |
| Re: Re | anwar abu gaidaa | 04-29-03, 06:19 PM |
| Re: Re | أبو أحمد | 05-21-03, 01:45 PM |
| Re: الى بت قضيم قبل ان تاخرك سودانير وتفوتي ابو دمام ورقصة القرد | بت قضيم | 05-22-03, 08:28 AM |
|
| |
shiry
فيس بوك
تويتر
انستقرام
يوتيوب
بنتيريست