|
***الليل مهما طوّل***
|
يا رب العالمين شل التفكير من الصباح في حق الملاح وتمن الطحين في الواقفين طابور للمدرسة ماشين في التلاميذ كمان راجعين بسبب خمسمية الدرس مطرودين في الماشي الجامعة ومصاريف التسجيل ولا الشهر العدى فات ..ودفتر الكنتين والخوف كل الخوف ..من الداساه الظروف من البحصل والبجي قدام وقوائم المعاش والصالح العام ونار الصمت الأحر من الكلام في كل ثانية تزيد أضطرام تسبح للكريم عايز السلام ما المستشفى أم المصائب والاجزخانة ذكرها يحماك المنام.. تسبح للواحد طالب الستر ما دنياك حالا ما بتعجب تسر تفتش وين تلقاه الصبر وعقلاً يفسر هادي الأمور ناساً كروشا تزيد بتكبر عرباتاً بالموديل تلف تدور.. وعماراتاً كل ثانية يدوها دور.. وناساً مهمومه للبطن تصر مكتوله بالغلب الطاغي الكبير مشدوه في دواء الصغير ورأسك مشغول يدور.. وكمان يدور لامن يقيف تدبرها كيف تلقى المصاريف ؟! عشان ضناك الذكي الحصيف ما يتشرد في الشوارع يتلقاه الرصيف ما هو أملك الوحيد ما هو سحابتك في عز الصيف.. والحالة كيف ؟ في أمك المريضة والأنين وأنة الوجع اليغالب في الحنين والملاريا الأبت تفارق من سنين الواقفة في بابك زي بوليس السواري آه.. يا زمان الاندحار والحراري زمان الهيصة والنباح الفي الروادي عن الثورة والبعث الحضاري والهتاف الأجوف والنفاق والتباري آه.. يا زمان الهوس المدجج بالسلاح والطواري ونهب ثرواتنا باسم معتقدنا الغالي آه..وآه.. يا زمان الزيف والدجل النفاق كيف.. زوجتم سكان الدنيا بحسان الحواري ؟!! يا من دفنتم براءة اطفالنا تحت ركام الكباري يا زمان القبح والخلق المشين الصالحون مشردون.. مطاردون.. والمنافقون .. على المنابر يثرثرون بالدعاء للحاكم المبجل الأمين بطول العمر وتراكم السنين والنصر على الأعداء المأجورين !! وعينهم على البنوك ودفاتر البنكنوت والعمارات الكل يوم تطول تزيد ورضاء السلطان والاطراء والتجديد ما همهم.. مادام راضي عنهم القائد العام وحساباتهم تكبر كل ثانية بالمال الحرام فليذهب الجميع الى الجحيم فما لهم والافتاء في الحرام والتحريم وغضب السلطان والأوحد الزعيم لكن كمان ربك كريم.. الحاله دي ما بتمشي بتدوم كل دورة بتبتدي راجيها يوم يوم لازم فيهو تزهر هذي الحروف والشعب يهدر يهب راصي الصفوف والنيل يفيض وحنان يطوف على الشباب الشابك الكفوف على الكفوف وعزة الحرة زغروتتا تعلو تهدر بالدفوف نلقى الظلم عن دارنا انهزم انزاح بي جيوشو بي كلابو وانفاق الأشباح دا الليل مهما طول لابد يأتينا الصباح ...
مسقط 10مارس 2003
|
|
|
|
|
|
|
|
|