|
مرسال عازة
|
(أنا المستني زي مجنون شمس مرسال من الخرطوم.. وزول واصنو شان يحقن عروق الغربة بالفرحـة.. أنا المستني ريد مجهول أنـا.. ويموت حلمي وأعود اصحـا.. ) .. .. .. .. .. .. حليلك أنت يا الأسمر مستني مرسال عزة وبالأمل الجميل تكبر وشان الفرحة بيناتنا تناغم عيون السامر العمر جاييك مرسال من عازة يحمل بشارة زمن أخضر يوصيك.. شيل الوصية في العينين شان الوليد يكبر شان مراكب النيل تعانق الموج وما تفتر عشان حلم الصبا في عزة وشان عشقاً جميل أخضر تحمل سفر الغربة.. تحمل عذاب القلب الأتفطر وشان الحلم بيناتنا يتحقق ونزرع ربانا عشقاً بسواعد شعبك الأسمر وشان الجروح الغايرة تداوى وتعانق نخلة حلفا صنوبرة في نمولي تتندر وتعم العينة ديراتنا سحاباً عينه يتمطر ويشدو في بوادينا مزمار بعشقه يتسمر شيل همومنا في عينيك وزلل صعابنا بايديك وكان جيتنا في دارنا تلقانا بالفرحة باشين ندبح البكر والشايلة وكان ما عندنا التكتح نجيك بموياتنا نتسابق ديل نحنا القبيل ما بدلنا شقا السنين وما قلنا كـو وحاتك كن طلبونا للعينين أه فتناك.. أقعد عافية يا غالى وما تنسى هم الوطـن وأهلك الزينين *************************************************************** البكر والشايلة: البقرة التي ولدت لأول مرة ، وهي حلوب وهي من الأشياء الغالية. التكتح: دليل على الفقر وعدم وجود الشي كـو: لا
|
|
|
|
|
|
|
|
|