|
|
 لاعبون من ورق في شعار هلال السودان
|
اول الحكي
من قمت من بيتنا ومشيت
بطاقتي صورة مصغرة
شايل معاي شنطه صفيح
حزمة هموم
ولدا متين بقى للسفر
والاغتراب والدردره
الغناء لعقد الجلاد
___________________________
على الذين راهنوا بسلامة تفكير اللاعب السوداني وحسن موهبته ان يقبلوا بالخساره وينطموا خالص . وعلى الذين قالوا ان ماحدث في قاهرة المعز وفي طنطا كان نوع من سؤ الحظ ومقادير ظروف الملعب التي تحدث لكل فريق وان ماحدث كان مجرد كبوة .. ففرنسا خسرت امام ماعارفه ايه في كاس العالم ، وريال مدريد انهزم في عقر داره من العباسيه .. ثم قالوا الم تروا ياجماعة كيف حول الامل عطبره هزيمته من مانشتر يونايتد الى نصر مؤزر .
خوطونا هؤلاء المطبلاتيه .. فقعوا مرارتنا بسؤ نضميهم وتنظيرهم ، وتفاؤلهم الذي لم يكن في محله وكنا نعرف انه من الاستحاله ان تنفخ في القرب المقطوعة .
ان الاوان ان يهبط مثلما تقول حبوبتي كل سوداني يشجع الرياضه في مواعينه وان يتركوا هذه اللعبة التي تسمي كرة القدم دون رجعة ، فهذه الكرة لم تخترع لشعب يحمل ذاكرة مصفاة لا يتعلم من الدروس ولا يعتبر بالهزائم التي نزلته على رأسه مثل المطر ، وفوق ذلك يتمتع شبابه بكسل عجيب غريب يفقع مرارة من لا مرارة له .. وان يتجه الشعب السوداني بدلا من ذلك ، اذا لم يجدوا شيئا نافعا يفعلونه الى لعبة (الدسوسيه) عسى ان يندسى الوزراء ومن شايعهم في حتة تقع فيها حيطتها ونرتاح منهم .او تهزر معنا الانقاذ في احدى دسياتها التي سوف تكثر في حتة تكون مناطق زلازل وبس انتو تموا الباقي . انا لست دعاية . فالدنيا سدايه ورضايا .
كنت مدمنة ولازلت مايسمي بافلام الكرتون ، ومن ضمن ما كنت اشاهده كابتن ماجد .. في مرة من المرات مسك باسم الكرة وحاول التنقل بها من ملعبه الى ملعب فريق كابتن ماجد ، استدعت نقل هذه الكرة خمسة حلقات كاملات لتطلع الكرة بعدها اوت سايد لعبة قون وسط دهشة الجمور وانا اولهم . .
وهذا ماحدث ليلة امس ، اذا وانا مشغولة بسوي الشاي ياشيري وجيبي الزفت والعصابة تشاهد في هذه التي تسمى مجازا كرة قدم ، رأيت احدهم يلبس فانيلة زرقاء في كراعه الكوره يتكعوج بها ويتكعوج وزهجت منه وتركته لادخل المطبخ ونقنقت كل ماتشوفوني سوي يازفت الشاي ، جيبي الشاي ، جيبي موية يازفت انا اصلي اتقطع .. انشاء الله تطير عيشتي ذاتها .. وانا انقنق وولعت البوتوجاز ، ونقنقت بذات نقتي التي لا تخلص ، ورصيت الكاسات على الصينيه ونقنقت واحضرت السكريه وملأتها بالسكر ، ونقنقت ، وحملت الصينيه ونقنقت الف نقنقه ، ووضعتها امامهم ونقنقت وانا اصب لكل فرد من افراد العصابة شاييه و نقتي تزادد طنطنه .. ورفعت رأسي لاجده نفس اللاعب يتكعوج بالكورة ذاتها التي لا تغباني وحينما فتح الله عليه بخط النهاية وقع هو وردروووب والكورة طلعت اوت سايد لعبة قون .
اتحدى من شاهد هذه المبارة التي لم اشاهد فيها غير تلك اللقطات التي كنت مجبرة على مشاهدتها بعامل سواة الشاي وجيب الموية .. ان يقنعني ان تلك المبارة التي جرت على استاد يتبع دولة تسمي السودان ، وعلى مرأي شعب يسمي شعب السودان ، وتحت رعاية حكومة تسمي الانقاذ ، ان يقنعني ان تلك المباراة كانت تندرج تحت مباريات كرة القدم لانسان القرن التاسع عشر حتى ، ناهيك عن هذا القرن ، وان يقنعني انها ليست فلم كرتون للاعبين غير حقيقين يتحركون بكسل عجيب ، وشعور غريب لعدم المسئولية يحملونه ..
فهذه الحكومة الكاذبة التي تكيل بمكيالين ، لماذا سمحت بهذه المهزلة ان يخون اللاعب وطنه من اجل فريق تتحكم فيه عصابة . لماذا لم تحاكم اللاعبين الذين اعلنوا العصيان على الفريق الوطني وداسوا على شعاره ليلحقوا بفريق يسمي الهلال .
مازلت عندي رأي ان اللاعبين الذين ظهروا ليلة امس في استاد الهلال بشعار الازرق الهلالي لا يعدو ن عن كونهم ورق غير مقوي .. خانوا ، الوطن قبل كل شيء وهم يهربون من معسكر فريقهم القومي من اجل حفنه من المال ، ويا ليتهم عملوا حاجة لكان اهون على الناس اهو كلها شعارات للوطن .. لكنهم لم يكونوا الا اشباح تتحرك دون روح ، ودون هدف ، وفوق هذا وكله كسل شديد وروح ميتانه .
|
|
 
|
|
|
|
|
|
|
|
Re: لاعبون من ورق في شعار هلال السودان (Re: shiry)
|
بسم الله الرحمن الرحيم
الحمد لله ياشيري الما حضرتي المبارة كلها كنتي قديتينا بي صفحتين ولا تلاتة
ناس الهلال عسكروا في (غزل) النسيج السوداني قايلين المبارة مع غزل المحلة فلوا كانوا عارفين المبارة مع (بلدية) المحلة كان عسكروا في مكاتب الإتحاد العام شارع (البلدية) عشان يتعودوا على الطقس
| |
|
|
|
|
|
|
|
|
|
Re: لاعبون من ورق في شعار هلال السودان (Re: بدرالدين شنا)
|
سلام مربع
بدر الدين
بالله اسم الفريق كدا
اول مره اعرف ، وحات نظري قايلاهو الزمالك
موش برضو الزمالك شكلهم زي كده
دي معلومه جديده
اها كانت كده معطياتي كلها اتغيرت
ادوني فرصه ..
اعيد قراءة ماكتبت على ضوء هذه المعطيات الجديده
ربما تغيرت الصفحات وتوصل تقرير الى سقف الخمسة صفحات
كاملات في عين العدو
وصلوا على النبي
ياشباب
يعني الهلال بفصاحتو دي كلها
غلبوهو ناس بلديه المحله
ناس البلديه ديل مرتبات ماعندهم
وواقفين في الاشارات بشحدوا
وكان مغالطني تعالوا اسأل بلديه جدة
اخدوا رواتبهم ولا لع؟
| |
|
|
|
|
|
|
|
|
 Re: لاعبون من ورق في شعار هلال السودان (Re: shiry)
|
ولمزيد من المعلومات
معظم لاعبي بلديه المحله
من الهنود والبنغاله
وجو المباره بعد عناء يوم عمل مضني
مع لم القمامات المتراميه الاطراف وخاصه تلك التي تقبع خارج وداخل نادي الهلال
يلا ورينا شطارتك
| |
|
|
|
|
|
|
|
|
|
Re: لاعبون من ورق في شعار هلال السودان (Re: كوليل)
|
سلام مربع
هوبليس
ياساتر ياربع
وعروسك دي خير مالها
شمارها شنو؟
كوليل
كان تحصلوهم توقفوهم وتشيلوا معاهم
الفاتحه مقدما
وتقولوا ليهم معليش ياشباب
اقبلوا فاتحتنا دي عشان بعدين ماح نلقى طريقه نشيل معاكم الفاتحه
احكي ليك النكته دي
جد جد
حصلت
قالوا في واحد كان جاي هنا السعودية
وبعدين عندهم حبوبتهم راقده مستشفي ليها اكتر من شهر
وكل يوم يشيل وياخر في سفروا كلما لاقوهو الدكتور وسألوا
الدكتور يقول ليهو والله انا ماضامن التفت كده القاها اتلحست
صاحبك لمن اياموا ضايقن
ربط عفشوا وجاء المشتشفي ويقالد زول زول
الفاتحه ياجماعة والله ياجماعة انا بلدي بعيده
مابقدر تاني اجيكم راجع
دحين اقبلوا فاتحتي في حبوبتكم دي مقدما
| |
|
|
|
|
|
|
|
|
 Re: لاعبون من ورق في شعار هلال السودان (Re: shiry)
|
العزيزه شيري
من كثرة المهازل في الكوره السودانيه
بطلتا اتفرج علي كورة السودان
لكن عودتا تاني يوم امس ويا ريتني ما عودتا
اتفرجتا البهدله اقصد الكوره
يا ريت بس ادارات الكوره في السودان يوصلو لي قناعه
ان الكوره ما دافوري الكوره اصبحت علم
ونحنا ما زلنا نعتمد علي موهبة اللاعب واجتهاده الشخصي
معقوله
لاكوره!!!!!!
لا اقتصاد!!!!!!!
لا تعليم!!!!!
لا صحه!!!!!!!!
**********************************
يا الله هووووووووي تعب اللسان من الشكيه
| |
|
|
|
|
|
|
|
|
|
Re: لاعبون من ورق في شعار هلال السودان (Re: shiry)
|
ياشيري
الزول البكون مهزوم نفسيا مابنتصر علي الاخرين
ولو الحكومه عاقبت ديل منو البعاقب المتسبب الاساسي
اي حكومتنا
تتذكري انو في زمن الديموقراطيه انو المريخ شال كاس افريقيا والهلال وصل النهائي
وطبعا الانقاذ جات خاشه بالعرض ولقت الموضوع جاهز في اخر مراحله
وقبل مجئ نميري في 1969 كانت التحضيرات جاريه لكاس افريقيا علي قدم وساق وبلغت كرة القدم شاوا رفيعا
وجاء انقلاب نميري خم الفائدة بان فاز السودان بكاس افريقيا سنة سبعين اها عليك الله السبب ما واضح
| |
|
|
|
|
|
|
|
|
|
Re: لاعبون من ورق في شعار هلال السودان (Re: Elmosley)
|
ٍسلام مربع
هوبليس
ديل عرسان من معهد سكينه لذو الاحتياجات الخاصة ولا شنو ؟؟
هاههاااااا
غلبووووووكم
بيكو
عارف موش الادارات براها ..
حتى اللاعبين ..
بالله شفت اللاعب البرازيلي دا ؟؟
وحات نظري قايلاهو من ام دوم ولا من حلة حمد .. قالوا لي هوي يا الغبيانه دا لاعب برازيلي
قت ليهم سجمي .. برازيلي شنو . ؟؟
دا اظنوا برازيلي تقليد ؟؟ اظن المشكلة فينا نحن ذاتها
مادام البرازيلي لمن يجي يلعب معانا بكون مننا وفينا ..؟
يعني بقينا زي اهل العوض اللي علم الانجليزي العربي .
استاذ الموصلي
ناس الحكومة ديل ماقصتهم براها يا استاذنا .. ديل زي مابتقول
حبوبتي مصيبتهم كبيره
بس برضوا نحن ما نتحجج بالهزائم النفسيه ، ولا الامكانيات .. لانو الفريق دا قالوا ماعندو التكتح في مصر
والشي البعرفوا انا البرازيلي البلعب في الهلال دا ، بياخد مرتب اعلى من مرتب وزير الشباب والرياضة
اذن المشكلة فينا ذاتنا .. في عدم تقديرنا للاسم الذي نلعب تحت شعاره ..
الحكومة الايام دي خلوها في نارها البتقلي فيها دي
اريتها بالنيران التعدمها اسم الوزير
النقده ياشباب لو ماقلتو ا
اميييييين
| |
|
|
|
|
|
|
|
|
|
Re: لاعبون من ورق في شعار هلال السودان (Re: shiry)
|
شيري يا رائعة
سلامات محملة باشواق الوطن
افتقدنا كلامك السمح لاننا كنا في هناك جوار الجماعة ، الكورة يا اختي في السودان دخلت حوش الخصخصة وبيع الذمم ما شفتي بيع العضوية في دار السلام وكراتين العشش والناس الغلابة ، الفوز بادارة الفرق بقى مشروع تجاري وعضوية الفرق ما بتعرف الفرق بين الهلال والقمر يعني صلاح ادريس عمل زعيم باصوات ناس السلام الما شافوا كورة الا كورة الشراب في ازقة الحارةبين ارجل الاطفال لذا عادي ينغلب الهلال والمريخ والسودان الكبير طالما ان الادارة جات بالرشوة والخصخصة بقت في الذمم، البرازيلي زول ساكت وذي ما قلتي ناس العوض علموه الدافوري
لك سلام مربع من السودان الطيب وكتاحته الباقية لينا قبل ما يبيعوها ويريحونا
اقول ليك:
احسن ما تشوفي حاجة اسمها كورة خالص لسلامة قلبك
| |
|
|
|
|
|
|
|
|
|
Re: لاعبون من ورق في شعار هلال السودان (Re: kabashi)
|
سلام مربع
كباشي
انت يارائع وصلت لاصل الوجع وختيت يدك فيهو
المشكلة دائما وابدا هي
الادارات
اعطني ادارة عظيمة اعطيك اعظم
انتاج
في كل شيء
هكذا علمونا
وهكذا قرأنا
انا لا اعرف صلاح ادريس
واول مرة اعرف ان صلاح ادريس وصل الى الهلال
لم اكن اعرف هذا الشمار
ولا اعرف شيئا عنه غير الاساطير التي
تتابعه مثل ظله
ومن الشمارات التي وصلتنا من هذه الاساطير العجيبة
انه فعلا يجب هذه الهالة الكضابه
وهو الذي سوق لهذه الاساطير
ودفع دم قلبه تحت يخلق لنفسه عالم
يتحدث عنه كل السودان
ومع ذلك اذ لم يكن صافي النيه
في اخراج بلدنا فعلا من هذه الهوه بفلوسه
فليذهب الى الججيم
ويبقى السودان وشعبه
نحن ماناقصين بلاوي
نلاقيها من الانقاذ ولا من التراب
ولا من ثوار دارفور
ولا من ثوار الجنوب
ولا من ثوار الشرق
ولا من ناس الكورة
سلمت ياسيدي
| |
|
|
|
|
|
|
|
|
|
Re: لاعبون من ورق في شعار هلال السودان (Re: shiry)
|
تصدقي يوم الكورة كان عندنا فراش في الجمعية الجماعة زاغومن الفراش مشوا يحضرو الكروة جاء واحد لقاهم قال ليهم يا جماعة ما تقوموا تعصروا الفراش ده الجماعة ناس العزاء ديل اقعدين براهم
واحد نطه قال ليهو وده البعصروا منوا
والله فعلا مهزلة بالجد
قال الهلال قال
وين الهلال
| |
|
|
|
|
|
|
| |
shiry
بدرالدين شنا
beko
Elmosley
kabashi
albagir altahir
Tumadir
مريم بنت الحسين
فيس بوك
تويتر
انستقرام
يوتيوب
بنتيريست