# حكاية مشاتر ود حربوية .. الحكاية الثانية .. # نايب شمولــي

حكايات مشاتر ود حربوية
الحكاية الثانية

" نايب شمولـــــــــــي "

الليل يجابد نفسو
واقف فوق وجعنا
لفّ حالنا
وحال بلدنا
والضلام اصبح عبايه
الجوع مجرّح
بالغبينه
القوت بليله
عيش
تبقبق في اللّدايه
كلباً نبح
في الحله
انصاص الليالي
والجمل بارك
تحت لالوبه
كرهان نفسو
من حال السعايا
الناس تطنطن
- لسه لا شفخانه
قامت
لا مدارس
الخريف رضرض
عضام الحله
بدّر بالنهايه
كلو شهرين
او تلاته
يجينا مندوب
الحكومة
يقول اصبروا
الصبر طيب
ويوم قريِّب
ينصلح حالكم
يخدّر
عود قصبكم
ترجع الروح
للولايه
حاج مشاتر
لسه نايب
ولسه حربويه
ويغيِّر جلدو
زي جنس الدبايب
والحله مانست
الحصل
يوم السمايه
ود محمد
صوتو يصرخ
في اضين قطيه
زعلان
-ما بنصدق
حاج مشاتر
وتاني ما بنمرق
نقابل زول حكومه
حبل الكضب
يا ناس قصير
اصلو شن
اخر الحكايه
الحمي تهرس
في مبارك
بالقشاريا
الصوت يهضرب
- انتو يا ناس
راكوبه بسغت
في الحصيره
وتمساح ملفّح
بي عبايه
شوفتو قادل
في الدميره
وحبوبه عاشه
صوتا مقروش
بالغبينه
- لسه راجين
الكهارب ؟!
ماله يا ناس
الرتينه ؟!
لسه راجين
الحيكومه
وحاج مشاتر ؟
ياهلنا هوي
ادونا خاتر
خلونا
من جنّو وغباهو
خلونا من كرشو
السمينه
وبدوي يصرخ
- وحسه
شن نفر الحكومه
الناس تقرقش
في عضامها
الناس ترقّع
في هدومها
الناس تكابس
للسخينه
جدي حامد
جلدو كرمش
وعمرو ميه
كلو يوم يبسق
ويبرطم
- حسه
ما خبر المفتش
من مشاتر
انقليزي
ولونو اح ح مر
الا بفقدنا
ويجينا
دوغري فقري
تطبط الساعة
ف دخلتو
وقلبك يضرب
من قَدِلْتو
وحاج مصدق
صوتو يرطن
- كلو مظبوط
يا جنابو
كلو موجود
- يا مفتش
جاز ... و ... عيش
لقيط ... و .. خيش
ظبطيه ... ديش
لحمه ... وخضار
سكر ... فحم
كراس .... قلم
................
ود محمد
صوتو انحّرق
نضم
- الا أ خ خ خ
يا حاج مصدّق
نرضي كيف
بس بالعلم ؟!
وده الاهم
الضهبه ما بتصبح
عجينه
ما بنبيع ديّنا
وأرضنا
بس عشان
جمر العبينه
..............
الليل ملفّح
بي عبايتو
الجوع مصبّر
بالسخينه
من بيت مشاتر
دوبا دوباي
بي حليفتو
شقّ توب
سدر السكينه
- وحاة ابوي
سيدي الكبير
وطلاق تلاته
انا الشوك
المشربك في الحلق
انا الصاقعه
السبق صوتا
البرق
انا النايب الجعيص
المابتقيسو
وبتلحقّ
انا الغيظ البياكل
في قليب
المابي سيدي
وبتحرق
وانا ......
والحلة ولّع
غيظها فيها
وحاج مشاتر
اصلو كان
داير يناقر
برطم الناس
في العناقريب
والحصاير
وفتش الناس
للعكاكيز
كلو زولاً
جنو صنقع
وكلو عرقاً
دمو فاير
........
كورك مبارك
بي مغستو
رجف الصريف
واتهز بابور
السواقي
الصوت مكرّب
بالوجع
كهرب فروع
شدر البوادي
- يا ناس خلاص
الليله بس
آخر الحقاره
مافي تاني
خلاص بصاره
الليله بس
عكازي سيد
دقنوس مشاتر .
خلوهو لي
انا التار
البيجبر للخواتر
وانا الموت
الما بصِّبح روحو
باكر
وبعد اعقروا
بمشي للظبطيه
اْسلّم روحي
الا بلدنا
ترتاح من مشاتر
ومن هوان
جنس المساخر
................
حاج مصدق
هاج وماج
وقال طلاق
وكمان تلاته
لا مبارك
ولاّ غيرو
بصل مشاتر
انتو يا ناس
ماكو عاقلين
ولاّ غافلين
نحنا ما الناس
البنكتل
في درب
محن السياسه
والجرح ما هيلنا
بس
كل البلد
بجروحا حاسّه
امس انتخبنا
الحاج مشاتر
ود وجعنا
الا زولنا
عديل ضبحنا
الا زولنا
عديل فجعنا
واتكتلنا
فانسلخنا
وانقسمنا
بكره ننتخب
البحس حالنا
ومغسنا
يسقط مشاتر
شان خذلنا
يسقط مشاتر
شان قسمنا
يسقط مشاتر
شان فجعنا
.............
هلل الناس
لي مصدق
كلو زولاً
هش اشرق
فجأة برقاً
من صعيد الحله
صفق
المطر بي تقلو
دقانا اتغسلنا
اذن الاذان
وكبّر
للفَجُر
صلينا في الجامع
فرَضنا
مرَقنا لبيوتنا
وهجدنا
نمنا
- الا زي كل الليالي -
اصلو ما حلمنا وفرحنا
وجا الصباح
بي هجمه
ما دخلت فكرنا
دقّت المزيقه
في الرادي
اتخلعنا
صوت مشاتر
جانا يهتف
للعساكر
اتلخمنا
حاج مشاتر
جلدو اصبح
لونو كاكي
وانكتمنا
حاج مشاتر
صوتو اصبح
حد سوانكي
وانطعنا
.............
يا مشاتر
يوم عبايه
ويوم طبنجه ؟!
...............
حاج مشاتر
جانا لابس بدله
قال سموها شيتاً
غايتو اسماً ما بعرفو
كحليه بزرارا
وجديده
وعربيه هنتر
وسواقو عسكر
والجنيهات بالرزم
والحله في جيبها
انعدم
اسم القرش
حتي الحديده
...........
الله يجازي
محنك يا مشاتر
قلع العبايه
ودس ام جكو
ولبس شيتاً مشاتر
وجانا راكب
للهناتر
...........
انتو الزول ده
في دولابو كم لبسه
وبطاقه ؟!
- اظن تلاته
- لالا... اربعه
- في ظني خمسه
- يا ربي دسته ؟!
..................
- ونحنا لمتين
ديمه نتلفت
تقول ( سيد الغُريبة )
بين عبايه
بين جناح ام جكو
بين كاكي وطبنجه
وناس مصالح ؟!
- حسه كيف
حال سيدي
في بلد الضرايح
- قالوا فزّ
- يا زول افو
تف كامك
من خشيمك
- يا ناس كمان
سيدي
بيفز ؟
- ما سمعت انت
الرادي
قالوا مطلوب للعدالة
- مالو سارق ؟!
- وشن عداله
جبنا هو بي ايدنا
انتخبنا
- لا يوم قرالنا
بياناً اول
لا دقت المزيقه
في الرادي اتخلعنا
- شوف كمان
جنس المساخر
- انطعن في ضهرو
بس بالزي مشاتر
.....................
جاتنا عربيه
حيكومه
وصوت يلعلع
قال تعالوا الليله
للمبدان
عشان الحاج مشاتر
داير يقول
للحله خطبه
ود محمد قام يكورك
- هو الحاج مشاتر
جن وحاوي
في كلو حُكماً
عندو قبه ؟!
والله ما نمشي
ونقيف
زي التلاميذ
نسمع الحربويه
نتمغّس نقاسي
- قالوا جايين
- في الدرب
ناس الحريقه
............
كورك سليمان
واتخلع
- في نار في الحله
قامت ؟!
لالا .... جايبن
قالوا للميدان يرشو
- واللواري الليله
جابت للكراسي
-وكمان عشان
الناس يجو
في العصر
لي كلو حله
دايرين يرسلو
للبكاسي
..........
مبارك اتخج وضحك
- قالوا الثلج
بي خمسيه
وعارفين مشاتر
بشتريهو
بس بميه
- نان الثلح
من متين
كان فيهو راجع ؟!
- حاج مشاتر
لسنه بلغف
شوفو يا ناس
الفواجع
..............
شيتاً عجيب
بالليل حصل
حاج مشاتر
كن بيخطب
بي عزيمتو
عن الفساد
في الطائفيه
عن عذاب
الناس
وعن نار القضيه
عن جرايم الساده
والزمن الغباش
عن الزمان الجانا
حسه
والبشاير والدعاش
كان مشاتر
صوتو متفرعن
بطولي
..............
الا بس كل الكراس
الالف فاضيه
ونايمه
في العصر الشمولي

شعر :هاشم صديق