|
|
 ياشباب والله حاجة ماتتخيلوها ..... ادخلوا كدي
|
المشهد الاول
المكان: حي المريشين
الزمان: الثامنه والربع صباحا
استيقظت فرخه ذات صباح على صوت ديك الجيران الشجي وذلك بعد حفل صاخب بمزرعة دواجن شيدت خصيصا لاقامة حفلات زواج بنات الدجاج البيطري ,وذلك على طرف نائي من ازعاج المدينه,تململت على السرير وتقلبت لفتره ... سمعت صوت امها وهي تصيح باختها الصغرى بالنهوض , فاليوم ستحضر إحدى نسابتها, وكما هي العادة لابد من النظافه وترتيب البيت وعمل كلما بوسعه ابراز جماليات منزلهم الفخم الاثاث وذلك لتثبت لتلك المرأه القليصه انهم من عائله دجاجيه أرستقراطية محترمه.0
تذمرت فرخه لمفارقتها الفراش خاصة وانها على موعد بيوم شاق في محاضرات الجامعه أشاحت مقضبة جبينها لتسلط جام غضبها على الشغاله البدويه او (جدادة الخلا) كما تسميها اختها فروجه وأمرتها بإحضار كوب القهوة المعتاد ريثما تدخل الحمام وتمتع وتصحصح بمياه الدش الدافئه لفت فرخه ريشها الناعم المبلل بالروب ولفت تاج راسها ببشكير مزهر صغير ,,, تأملت وجهها على المرآة مبتسمه ومغروره بجمالها ولون ريشها الاخاذ, تناولت بعض الكريمات والدهانات من على الرف المليئ بكل انواع الكريمات والعطور ,, مسحت فرخه على خديها النديين واخذت تغني بصوت عذب باغنية بسحروك يالفرخه لو شافو الخدود ولا شافو الاعين المكحوله سود
جلست على الباحه الخلفيه للمنزل المطله على الحديقة الغناء وكانت ساعتها الشغاله (جدادة الخلا) قد جهزت لها قهوتها الفرنسيه المحببه مطعمة بنصف معلقه سكر وبعض اللبن الخالي من الدسم وقطعة واحده من الجاتوه وذلك لاتباعها سياسة رجيم صارمه ,,, وبينما كانت فرخه ترتشف في قهوتها استرجعت ذاكرتها شريط سهرة الامس الصاخبه التي كانت بمناسبه زواج احدى صديقاتها بالجامعه حيث دار بينها وبين (فرخانه) وهي اعز صديقاتها هذا الحوار
فرخانه: شنو يا فرووخه جايه متاخره كده !!!... والله فاتك جنس شمار وطعميه
فرخه : سوري والله انتي عارفه ده كلو من من فروجه اختي حلفت بي دينا الا تمشي بارتي ماجي اها الحصل شنو ياحلوه ابدي لي بالطعميه ول ثم اتبعيه بالشمار الحار
فرخانه :كدي هسه خليك من الشمار.. قولي لي ايه رايك في فستان العروس !!!! قالوا جايبنو من لندن
فرخه: بسسس اريتو فستان السواد والرماد .. الرقبه مفتوحه والسوسته ظاهره بي برا والفستان الكلوش منفوش نفشت عدوك بالله البت رقبتها بقت مسلوله زي النعامه
فرخانه: امها قالت لي العريس اشتراو من لندن
فرخه: جابو من وين يا دي!! لندن !!! ورب الكعبه يشلني لو الفستان ده ما اشترو من دكان عوض كوجونقو بتاع سعد قشره .. قال لندن قال .. لا العزوزاب .. على منو الكلام ده يا مرسي
فرخانه: وبعدين ده كلو كوم والمكياج بتاع البت السنيحه القبيحه (شوربه) اخت العروس وبعدين البت جنس خفه عليها ودين النبي محمد البت تتلفت الحفله كلها تقول سايقه ركشه كوم تاني عاد انا في حياتي ما شفت جنس اللخبطه والجلبطه دي وبعدين شفتيها عامله شنو في روحها ... البت نتفت ريشها الفوق الركبه المفعوصه المابتخجل واتبرجت وكشفت للجداد المستوي والجداد اللسه ماستاوش لحم وراكينا
فرخه: اااي وحات الله غايتو جنس بشتنه...كيفن ما رقشه هي عاد المدردمه القصيره يمين شوربه دي من قصرها ان فقست وهي واقفه على حيلا البيضه ماتنكسر... والعجب قصت فستانها الاخضر... المطرطشه قايله روحها جنيفر لوبز .. غايتو ابدا الرجال ماخاتين لما عرسوا اخواتا الصغار كلهم وخلوها حايره وبايره.... شنا وبشتنا يا دي (سكتت برهه )انتي تعالي هنا ماجي وين ما جات الحفلة ؟؟ امانه البت دي ما اتلومت مع صاحبتا
فرخانه: اتلومت هي وللا العروس الاتلومت معاها ... سمع اضاني دي قالوا العريس كان خاطب سوسيوه .. وجب جب سحبو مني... وزاد وجدي
فرخه: وووب علي سجمي يعني ختفتو منها.. ا ريتا يا يمه عروس التابا واليابا... هسع لامن تختف تقوم تختف لي العريس العامل زي فراخ الجمعيه ده شحتحتحتحتا ربي عليها
فرخانه : ااي صدقتي يا دي هسه لو كانت عملت ياااااع بي(محمر) اخو العريس ما كان اخير ليها من سجم الطير ده والله صدق المثل البقول (البباري الجداد بوديو الكوشه)0
فرخه: اسمعي هنا يا فرخه انا ما بسمح ليك ابدا تتكلمي عن ديك الجن كده ... فيها شنو لو جاي من اسره غير ارستقراطيه؟؟
افرخانه : يا فرخه انتي عايزه الجد وللا حاجه غيرو ... الود ديك الجن ده عينو طايره بي صراحه ان شوفتو اكثر من مره محنك مع البرالمه بتاعين اقتصاد وهاك يالضحك والانبساط 24 قيراط معاهن ,,,, وامبارح القريبه دي شفتو خالط لهو واحده ومدسي بها ورا كافترية علوم ,,, اها طبعا من عيني وقعت عليهم قام لبت وصنه زي الديك الصبت فيهو المطره .. واختك زي ما اتني فاهمه اساساسيه في المواضيع الزي دي فطوالي قمت مشيت ليك وسلمت عليهم واتحكرت في نصهم قام الخبيث حول الموضوع طوالي وشبكنا ليك النضال الطلابي والصادق والترابي وما ادراكا
فرخه: اصلو ما بصدق ,,,, معقول ديك الجن يكون خاين للدرجه دي؟؟
فرخانه: واكتر كمان ,,, بس والله انا ما عايزا افتو ليك اكتر من كده 0
ما ذالت فرخه تعيد شريط ليلة الامس الى ان توقفت عند قول فرخانه (دعيك عنه هذا الديك المغفل.. هناك آلاف الديوك الذين يتمنوننك) ولكن كوني حذره في المره القادمه فالديوك ليس لهم امان وخاصة الديوك البلديه ..بعدين ديل ناس متخلفين وما مطعمين ضد السعال الديكي والديوكسين... بالمناسبه ما رأيك ب(كوكواوا) فهوديك مريش ونافش ريشو صاح بالاضافه الى انو هجين حليو تربى بالخارج ولا يعرف الخساسه والشواكيش فهو ديك رومي من جهة الام
وبعدين هو بصراحة كده مدشدش فيك وبموت في دبابديبك لاكين ما قادر يقول ليك حاجه لانو شايفك مع ديك الجن طالعه نازله
فرخه: مدشدش فيني انا ... يدشدش ضلعه وهو قايلني انا زي البنات الطراطير بالخاميه بقروشو ديل وللا شنو .... قول لي شنو العند اهلوا واحنا ما عندنا يا دي؟؟ فشر!!!!
فرخانه: لا يافرخه عليك الله ما تفهميني غلط ,,, انا ما قصدي هو عايز يخلطك زي الجدادات المابستمر في العلاقه معاهم اكتر من شهر شهرين ديل,,,, انا قصدي انو هو بالجد جد كده مكسر فيك وخاتيك كزوجه ليو في المستقبل وانتي عارفه انو انا الوحيده البشاركني ادق تفاصيل حياتو بحكم انو صاحب اخوي الكبير
قطع تفكير فرخه صوت جرس الباب ,,, يبدو انها نسيبتنا القليصه(همست لنفسها) ارتشفت ماتبقى ما من قهوتها واسرعت لغرفتها نزعت عنها الروب ولبست فستان وردي بهي بحمالات ومن تحته بلوزه بيضاء بدت عليه فرخه كالطاؤوس ,,, دخلت بهو الصاله لاستقبال نسيبتهم ,,,,, وجدتها وامها جالستين على مقاعد الصاله الوثيره سلمت عليها عليها في خديها ثم بعد ذلك شابكت يدها...... بسم الله ماشاء الله الحلا دي ياناس السكر ده العسل ده وحات سيدي لو عندي ولد تاني كان هسه قريت الفاتحه مع امك (قالتها النسيبه وهي ضاحكه).. جلست فرخه مع ضيفتهم وتجاذبت معها اطراف الحديث ثم ودعتهم بتقبيلهم واستأذنتهم الذهاب الى الجامعه حيث كان السائق في انتظارها. 0
ناس البورد الحلوين
الموضوع دا جاني عن طريق الايميل وقلتة لازم تشاركوني فيه
|
|
 
|
|
|
|
ودالعباسية
doma
فيس بوك
تويتر
انستقرام
يوتيوب
بنتيريست