مبارك التقي البشير في السودان والخلاف اشتعل في التجمع بسبب الميرغني

هتراشتنا الغالية شيري

لحدى هسع انا ما عارف شيرى دى مرجعها شنو لانه زمان قبال يلدوك الاسم ده كان خترى وما بتقال بالساهل لكن اهو الدنيا بقت كل زول لاقى هواه والكل بيضرى فى عيشه
اقطع ضراعى اكان فهمتى حاجة من كلامى ده زى ما انا ما فاهم ليه الزعيم العربى الكبير حسنى مبارك تنازل من عليائه وعلى حين غرة جاء متلصصا الى السودان وسط حماية امنية لم يرها السودان قبلا ولا حتى لما جاء عبد الناصر مهزوما مدحورا والكل شمتان ويتريق عليه بعد هزيمة الايام الست
الله يلعنها ايام ديك والله لا جاب طاريها..

ما قلتى لى بقى يعنى الجماعة الرسلوه كانوا عايزين شنو ماهم بقوا يهشوا هنا وهنا والعالم ده بقى حقهم ياخى انا زماااااان ما قلت ليكم تعالوا نعمل العالم ده كله دولة واحدة اسمها الولايات المتحدة ونتنازل من اسم دولة لى اسم ولاية تكون ولاية السودان يحكمها بوش ويعين فيها اى زول ان شاء الله كولن باول اصله بشبهنا ونحن راضين بيه يا زولة المهم يخلونا فى امان وسلام ..

ولا رايك شنو يا السمحة ؟؟؟ اصلو باقى الزمن ده الشورة شورة النسوان ما شايفه (قنقليزا) على رايك لافحه توبها وهاك يا سفر سبب بلا سبب تدى رايها وشورتها ويا ويلوا الما بسمع شورتها..

لك تحياتى وودى

واقعدى عافية وابعدى من الكلام البجيب ليك الهواء بس