الهلال يستغني عن مدربه البرازيلي ويفاوض طلحة عبد الله ..

Quote: عمر الفاروق...طلحة عبدالله مدرب إسفيرى ممتاز...وله خطط تغلب الجن ألأحمر عشان كده الفنلة الحمراء جابت الكاسات المحمولة جوآ

في فرق كبير بين التحليل الرياضي من صحفي وبين العمل كمدير فني (مدرب)
أي واحد ممكن ينظر لكن ما يقدر يشتغل مدرب..عندك الدكتور طه اسماعيل البكتب مقال اسبوعي في مجلة سوبر الاماراتية اسمها "تكتيك" أقرا كلامو كل اسبوع تقول الزول دا ولاااا منو!! لقبه "الموسوعة الرياضية" لكن تجي لحسن شحاتة ما يعرف يتكلم ولا يشرح لكن شغلو ظاهر في المنتخب المصري.
مثال تاني..الكابتن عبده صالح الوحش (رحمه الله) ، أحسن زول كان بحلل كورة في التلفزيون..دا اخترع للمحللين الجو بعديهو عبارات "العمق الدفاعي" والحاجات البارننا بيها دي..لكن فترتو في منتخب مصر كان افشل فترة.
وهنا في السودان عندك حسن المصري..ياخي دا زول نقتو كتيرة وعندو دكتوراة كمان..لكن كمدرب الزول دا تعبان شديد.

الصحافة الرياضية في السودان "بالذات الجرائد" بعيدة من الحاجات الفنية دي شديد. وشغلهم شغل "مغارز" (آسف على الكلمة لكن ياهو الحال" ، الهلالابي يكتب في المريخ عشان يغيظ الجمهور وبالعكس ، يعني انا بشفق والله على صحفي يكون من كترة ما طول في الكتابة الرياضية انو يفتكر نفسو يوم من الايام بفهم احسن من المدرب. ياخي التدريب دا علم براهو وبعداك في حاجة اسمها الخبرة وتاني حاجة اسمها الذكاء الكروي. عشان كدا معظم المدربين نلقاهم كانوا لعيبة كرة قدم محترفين زمان ، أما الصحفي الرياضي دا فزول عنقالي ساكت (بالذات السودانيين). وكامل احترامي للظريف الاستاذ طلحة والله بنحبك وفي الكورة مافي زعل مش كدا؟

عمر الفاروق.. عجبتني صياغتك للخبر المفبرك دا..محترف عديل والله. قلت لي بنود العقد؟

(عدل بواسطة محمد يوسف الزين on 03-22-2009, 11:31 AM)
(عدل بواسطة محمد يوسف الزين on 03-22-2009, 12:45 PM)