Post: #1
Title: البخيل و الغربة !
Author: ست البنات
Date: 03-02-2009, 05:14 PM
Parent: #0
لملم الهديمات من الدولاب , ودنقر تحت السرير ونفض السفنجة القديمة وشرابات كانت مركونة وراء باب الحمام , وهو يدندن ( طلعت القمرا متين يا عشاى تودينا لأهلنا ) .
هرول الى محل بيع بطاقات الهاتف , اعتدل فى جلسته وأدار رقم جوال شقيقه فى السودان : يا أمحدأحمد انا نعمان معاك نعمان من .... , قلت ليك انا قايم باكر والطيارة بتصل الخرطوم بعد بكرا الضهر ,
كلم مصطفى ود قسوم يلاقينى بالحافلة قدام باب المطار . أنا شايل شيل تقيل , شى هدوم وشى موبايلات . وعارف كمان بكون ما عندى فكة , ضرورى تستنونى هناك , الواحد نسى شوارع البلد كمان ما يقوم يروح فى الزحمة ديك . قلت لى الجو عندكم كيف ؟ أوعى الحر يلفحنا أول ما نوصل , الواحد رطب هنا فى الجو البارد دا والهمبريب !
عليك الله تكلم الحاجة قسوم تفرك لى أم رقيقة وكسرة رهيفة , ضربتنا جوعة شديدة من اكل الجاهز الغالى وما عندو طعم !
صوت أمحدأحمد ( ما كنت ترسل قروش نجيب بيها خروف نكرم ليك بيهو سلامة الوصول !
نعمان : يا اخى بالله خروف شنو ! سووا لى ام رقيقة ... أم رقيقة وكسرة وبس ! ( يطنطن ) جنكم قروش .. قروش ... ما عارفين الواحد اتهد بالمكانس هنا !
يواصل : اها يا امحدأحمد جبت ليك جوال , والآ عندك واحد ؟! ممكن تبيعو وتشترى البنطلون , انا والله القروش قصرت معاى . وقول للزهرة المرة الفاتت جبت ليها توب وهسع جايب ليها طرحة بس .
صوت أمحدأحمد : الزهرة أختك ؟ تعرف الزهرة للعيد ما جبنا ليها توب , قلنا ليها النعمان جايب ليك ! وعمر ولدى قال زمان طلب منك كومبيوتر صغير , اسمو لاب توب !
النعمان : يا أمحدأحمد انت قايل الشيل من هنا ساهل ! ما تكتروا علينا الشيل ! وكمان التذاكر زاتها ما ساهلة بخمة قروش ! الواحد داير يجى خفيف يشوفكم ساكت ويرجع !
النعمان يحدث نفسه ( خلى بالك الطلبات دى حتكتر ! واخير الواحد يعمل نفسه ما سامع ) يا أمحدأحمد ... ألو ... الله ! الخط قطع ! يضع سماعة التليفون ويواصل الدندنه ( متين يا عشاى تودينا لأهلنا )
يتذكر مواعيد الطائرة , يهب مفزوعا , يدير قرص الهاتف : ألو عبدالله يا اخى ان شاء الله تكون الليلة ما شغال عشان تجى تودينى المطار . عبدالله من الطرف الاخر : انا والله هسع فى الشغل لكن كدى شوف الحورى ,يمكن يكون ما شغال .
يتصل نعمان بالحورى : الحورى سلامات , انا بقيت قومة للسودان , ما تجى تودينى المطار ! الحورى فى سره ( يا اخى أنت بخلك دا ماب تخليهو ما تطلب تاكسى !)
الحورى يرد : يا اخى انت مندسى مننا ومكتم على سفرك وهسع تجى تقول ودونى المطار فى اخر لحظة ؟ والله غايتو الله يكون فى عون الماشى ليهم ديل ! خلاص يا اخى حاجيك , انت جاهز ؟
نعمان : انا عندى شنطة واحدة وجاهز !
وصلت الطائرة مطار الخرطوم , خرج النعما يحمل شنطته ويتلفت , رأى امحدأحمد ومصطفى ود قسوم فى انتظاره , ركب الحافلة واتجهوا الى أركويت .
قسوم تنتظر قدومهم خارج البيت , تمنى نفسها بهدايا ! حباب نعمان ولد اختى حمدالله على السلامة , يا مصطفى شيل منه الشنطة يمكن تقيلة هو براهو فتران من قعاد الطيارة !
نعمان يتشبث بالنشنطة : لا لا يا حاجة الشنطة خفيفة خليها !
قسوم تمصمص شفتيها : يا ربى تكون فاضية ؟ باقى السنة المضت ما جابلنا شى ! أسع اقوم واقع فوق الدوكة و وافرك فى ام رقيقة من الصباح وامرق ملوص ؟؟
اها يا نعمان يا وليد اختى : بلدكم ديك الدهب ماهو رخيس فيها ؟
النعمان : الدهب فى البلد ديك عيار 14 ساكت زى النحاس واخير عدمو !
وانا اصلى قررت السفر دا فجاة كدى ! عشان كدا قلت اخير اجيكم خفيف ! شوفتنا بالدنيا !
قسوم : اها وراجع متين ؟؟؟؟
ست البنات .
|
Post: #2
Title: Re: البخيل و الغربة !
Author: باسط المكي
Date: 03-02-2009, 06:15 PM
Quote: عليك الله تكلم الحاجة قسوم تفرك لى أم رقيقة وكسرة رهيفة , ضربتنا جوعة شديدة من اكل الجاهز الغالى وما عندو طعم !
صوت أمحدأحمد ( ما كنت ترسل قروش نجيب بيها خروف نكرم ليك بيهو سلامة الوصول !
نعمان : يا اخى بالله خروف شنو ! سووا لى ام رقيقة ... أم رقيقة وكسرة وبس ! ( يطنطن ) جنكم قروش .. قروش ... ما عارفين الواحد اتهد بالمكانس هنا |
ست البنات
حضور ومتابعة
|
Post: #3
Title: Re: البخيل و الغربة !
Author: خالد علي محجوب المنسي
Date: 03-02-2009, 06:22 PM
Parent: #2
| Quote: النعمان : الدهب فى البلد ديك عيار 14 ساكت زى النحاس واخير عدمو ! |
ست البنيات
كيفنك
دا تلفوني
0912296208
تحياتي ومودتي
|
Post: #4
Title: Re: البخيل و الغربة !
Author: ست البنات
Date: 03-02-2009, 07:12 PM
Parent: #3
قضى نعمان ليلته فى اركويت , وشد الرحال باكرا الى السوق الشعبى متسنجكا فى حافلة مصطفى ود قسوم . النعمان : انتو مافى برينسات تمشى الضهرة بدل الباصات البتتقلب دى ؟ وسرا يقول : التذكرة بى 30 الف ! دا خراب جيب ساكت ! وتانى من ودمدنى للحلة الواحد يمكن داير ليهو 20 الف ! يا جماعة الشقاوة دى شنو ؟ هناك من البيت للشغل بشيلها كدارى ساكت , لا من شاف لا من درى !
والجماعة شابكنى ليك : اشترى عربية يا النعمان احسن ليك من الباصات والترامات , قايلنى بضيع مليم فى اجرة ! ما عارفنى بدقها كدر كل يوم وبجى للشغل من الفجر عشان مافى زول يعرفنى جيت كيف !
يصل النعمان للحلة , ويشوف ليك الناس كاسرة على البرينسة و النعمان جاء ... النعمان جاء ....
الشفع الصغار البيلبس فى عراقى الدمورية فى الشارع , والجضيماتو ملايانات ملاح خدره , والحفيان و والرابط سفنجتو بى سير , والجارى وراء الترتاروالعريان شل و كل واحد مادى اديتو مجلبطة بالطين والملاح للسلام .
والنعمان قابض الشنطة بيد من حديد ويتلفت مهجوم من السيل الكاسر ناحيتو دا . مرحب ... مرحب الله يبارك فيكم , يا جماعة ما قصرتو وبصلكم فى بيوتكم نفر نفر ! بس دحين هسع خلونى الأنجم من تعب السفر .
ووصل النعمان بيتهم وبعد السلامات والتحيات وكل العيون موجهة ناحيته فى انتظار فتح الشنطة وكل يمنى نفسه بهدية , قام النعمان واتنحنح ورفع المخدة وحشر الشنطة تحتها وقال ليهم داير اخد لى نومة , والله نوم الطيارة زى نوم الديك فوق الحبل !
وفى الصباح صحى النعمان بحركة أرجل تصول فى دارهم , وشاف ليك عمو سعيد يسلخ فى الخروف والنسوان مشغولات بنيران الشية . وهنا أسقط فى يده : اسع عمى سعيد دا الضبيحة ليهو شنو ؟ داير يغرمنى جوال ولا جلابية ! يا ربى اقول ليهم أنا فى البلد ديك خليت اكل اللحمة وبقيت نباتى ؟ ولا أسكت اكل الشية الحارة دى واسردب زى المرة الفاتت وابيع جوالاتى وأعوض حق التذكرة ؟
جاهو صوت امه من الصالة : النعمان حسيت ؟ قوم تعال أشرب الشاى بزلابية خجيجة بت عمك سعيد دى !
النعمان فى سره ( يا الله خجيجة كمان دايرالها جوال ! ديل اتنين اتلحسو !
أمه تحمل الشاى وتدخل الأوضة , تجلس بجانبه , وتقول : النعمان ولدى ما تكون جايى تلومنا مع الناس زى المرة الفاتت , كدى أفتح الشنطة وأدى أخواتك واخوانك ووليداتهم وولاد عمك شيء ترضيهم بيهو , شوف عمك ما قصر معاك , ضبح ليك و وبنتو جابت الزلابية والشاى من صباح الرحمن . وكمان فاطنة بت الخير دابا مارقة من الحبس اديها قريشات طيب خاترا , وعلوية بت عمتك مدينة ولدها كاسر كراعو بدوروا يودوهو الخرتوم للعلاج , ونحنا مزيرتنا وقعت من الخريف الفات وقلت ليهم ولدى النعمان بيبنيها لى ! ودايرة لى طقم , باقى سنيناتى كلهن الحكيم قلعن لى جانى انتهاب شديد خلاس احمانى النوم , وانا وصيت امحدأحمد أخوك قتلو وكت النعمان اخوك يضرب التلفون كلمو ان بقت بلدهم ديك فيها طقوم سمحات يجيب لى معاهو واحد , عيلا قال الخت انقطع قبال ما يكلمك بوصيتى .
اتشجع النعمان ومرق برة الصالة وقال للناس والشية مدورة : انا يا جماعة الخير عندى ليكم خيبير : انا خليت اكل اللحم وبقيت نباتى , يعنى انا ودحشة جدى ماعوننا واحد !
وبطلت شراب الشاى , وكمان أقولكم شيء تانى : شوفوا لى البرينسة الجابتنى دى ترجعنى ! اجازتى انتهت .
ست البنات .
|
Post: #5
Title: Re: البخيل و الغربة !
Author: حبيب نورة
Date: 03-02-2009, 07:30 PM
Parent: #4
ست البنات كلهم
يا ستهم يا ستهم
وحشة ما بتعرف ظروفك
والله طولنا منك و مشتهنك ومشتهين البكانات الفراييحي
نعلك طيبة؟
ونعل مافي عوجة
شوقن كتيرن!
|
Post: #6
Title: Re: البخيل و الغربة !
Author: ست البنات
Date: 03-02-2009, 07:49 PM
Parent: #5
حبيب نورة , وحليل نورة !
والله انا كمان مشتاقة ليكم كتير ,
والبوكان دا باعدنى منو الشديد القوى ,
عيللى مافى عوجى تب و وتانى مانى فايتاكون ضوممة .
وانشاء الله انت طيب ونورة طيبى .
ست البنات .
|
|