|
ساخر سبيل : 1 من 3
|
صجيفة الرأى العام عدد الأحد الموافق 11 يتاير 2009م _______________________________________________________________________________________________
لو فزت باللوترى ومفروض تمشى تشتغل فى أمريكا تعمل ايه؟ 1- توافق وإنت طائر من الفرح 2- ترفض وتقول (أمريكا قد دنا عذابها) 3- إنتو جيبو ليا اللوترى وبعدين أنا ح أوريكم !
تفتكر الحكومة عملت أيه فى موضوع المحالين للصالح العام ؟ 1- عملت لحمة بالفرن 2- عملت حواجبا 3- عملت نائمة
لو جاتك فرصة تجاهد ضد إسرائيل ح تجاهد مع مين؟ 1- ح تجاهد مع حماس 2- ح تجاهد مع فتح 3- كدى خليهم لما يتفقوا أول
الحزب الح يفوز فى الإنتخابات الجاية هو : 1- حزب المؤتمر الوطنى 2- حزب المؤتمر الوطنى 3- حزب المؤتمر الوطنى
الحكومة تعمل مع (الحركة الشريكة) من منطلق : 1- شاورها وخالفا 2- خالفها وشاورا 3- خالفها وخالفها
لن ينصلح حال (الكورة السودانية) ما دام القروش البتنصرف عليها : 1- مجهولة المصدر 2- مجهولة المنبع 3- وإنت مالك حاسد وإلا بغران ؟
المبلغ الطائل الذى تلقاهو (رئيس) أحد الأحزاب (الكانت معارضة) كان فى الحقيقة : 1- جبر ضرر 2- جبر كسر 3- كسر جبر
لو كنت (خريج) ولقيت ليك عقد (راعى) بأحدى دول الخليج : 1- العقد وين وحياة أبوك 2- راعى بتاع شنو؟ إنت جنيت 3- ح أمشى بس ما تكلم زول
ايه احتمال انك تكون (وزير) فى يوم من الأيام؟ 1- صفر فى المية 2- زيرو فى الميه 3- مفيش أى إحتمال
هل فى أى أمل نعيش فى (نغنغة) بعد ما صرنا دولة بترولية ؟ 1- ما ظنيتو 2- يعنى أيه (نغنغة) ؟ 3- يعنى أيه (امل)؟
هل ح يجى يوم يبقى (التعليم) يبقى مجانن ؟ 1- تعليم العروس ؟ 2- تعليم السواقه؟ 3- تقصد ياتو تعليم ؟
إنت عارف إنو المعاش (الشهرى) بيساوى (سبعه كيلو لحمة)؟ 1- ما عاش اليقول عليهو كده 2- لحمة ضأن؟ 3- مش كويس إنو بيدوكم معاش
صدق أن عائدات (المخدرات) تفوق عائدات (البترول) ؟ 1- أكيد بدون (لف) 2- قطع (شم) - أقصد قطع شك 3- عائدات شنو؟ هو كمان (عليها) جمارك؟ !
هل تعتقد أن (المظاهرات) و(المسيرات) سوف تحرر فلسطين ؟ 1- مليون المية 2- مش بعيد على ربنا 3- ليه لا ... بالرموت
تعتقد لماذا ترفض بعض الجهات الحكومية مراجعة حساباتها بواسطة ديوان المراجع العام : 1- بالله هو فى جهات بترفض؟ 2- عملا بالقول المأثور ( خلوها مستورة) ! 3- هو كمان فى حد بيحاسب الحكومة !
المعارضة السودانية ينطبق عليها المثل : 1- إتلما التعيس على خايب الرجا 2- إتلما الفطيس على خايب الرجا 3- إتلما الهردبيس على خايب الرجا !
ما هو الدليل فى نظرك على توحد (الجبهه الداخلية) ؟ 1- الناس كووولها بتفطر فول 2- الناس كووولها (بتستلف) بعد يوم 5 فى الشهر 3- الناس كووولها بتشجع هلال- مريخ
تتخيل الموظف الذى يبنى عمارة من ستة طوابق هو فى الأصل أيه؟ : 1- كان مغترب وموظف فى وكت واحد 2- أرزاق يا عم ... أرزاق 3- حرامى وإبن ستين الف حرامى
تفتكر لماذا تقطع الكهرباء فى فصبل الشتاء ؟ 1- عشان الناس ما محتاجه ليها 2- عشان الجماعه بيستعدو لفصل الصيف 3- أيه الاسئلة البايخة دى؟
تعتقد لماذا توقفت مشاريع (الزواج الجماعى)؟ 1- لأنو الناس كووولها عرست 2- لأنو (الحكومة) ما قادرة على (الشيلة) 3- لأنو العزوبية أرحم
هل ممكن يجى يوم ناكل مما نزرع؟ 1- مش ح يجى خالص 2- ومش ممكن ليه؟ 3- يعنى أيه ناكل ؟
فى رأئك كم تكلف عملية إستئصال الزائدة الدودية بمستشفى حكومى؟ 1- حوالى 750 جنيه ! 2- الشاش والحقن منهم ولا منى؟ 3- بالقديم ولا بالجديد؟
|
|
|
|
|
|
|
العنوان |
الكاتب |
Date |
ساخر سبيل : 1 من 3 | الفاتح يوسف جبرا | 01-10-09, 11:20 PM |
Re: ساخر سبيل : 1 من 3 | اسعد الريفى | 01-11-09, 07:56 AM |
Re: ساخر سبيل : 1 من 3 | ismeil abbas | 01-11-09, 09:27 AM |
Re: ساخر سبيل : 1 من 3 | الفاتح يوسف جبرا | 01-11-09, 04:41 PM |
Re: ساخر سبيل : 1 من 3 | Nasr | 01-11-09, 05:28 PM |
Re: ساخر سبيل : 1 من 3 | Shamael Elnoor | 01-12-09, 09:58 AM |
Re: ساخر سبيل : 1 من 3 | Osama Mohammed | 01-12-09, 12:06 PM |
Re: ساخر سبيل : 1 من 3 | الفاتح يوسف جبرا | 01-12-09, 07:26 PM |
Re: ساخر سبيل : 1 من 3 | عبدالله الامين صالح | 01-12-09, 07:43 PM |
Re: ساخر سبيل : 1 من 3 | اسعد الريفى | 01-17-09, 06:34 AM |
|
|
|