|
حليلك يا مشروع يا حضاري ..حليلك...!!!
|
من اكثر الايام التصاقا بالذاكرة في تلكم الفترة التي كان فيها الخطاب الكيزاني كورته عاليا وعجاجتها حد السماء هي رحلة صباحية برفقة مهندس قاهر يمتلك شنبا يمكن للصقور الحائمة في سماء ضاحيةكنانة الزراعية ان ترك فيهو بكل ارتياح... رحلة صباحية تضرب قبل السادسة بقليل صوبب تخوم جبل (ام جديان) وذلك التوقيت يجعلها تصادف اليونسيات واليونسيات كما نعلم هي خطب نارية صباحية شهيرة كان كل الشعب السوداني يكاجر يومه بالاستمتاع اليها ليري ماذا يحمل العسكر الجدد وهم يصطحبون معهم الدقون...في تحالف وصف ساعتها بانها رحلة الدولة الرسالية... ونعود الي مشاهد من هنا ومن هناك...وسيرة المشروع الحضاري الذي اصبح كقماري حلتنا التي يقال اليها يا حليلها..
|
|
|
|
|
|
|
|
Re: حليلك يا مشروع يا حضاري ..حليلك...!!! (Re: عبدالكريم الامين احمد)
|
مشهد تاني.. في احدي المناطق النائية كان عضو اللجنة الشعبية الذي يعمل استاذ في مرحلة الاساس هو الناهي والامر في كل قضايا تلك السكنة العمالية الملانة بالافندية المساخيت... وسلطات هذا الاستاذ السياسية البوليسية جعلت منه يتلصص علي كل الاشياء ... سطوته جعلته يوظف بعض صغار العسس للتلصص علي ميوزات الافندية ليلا وللاعتقاده بانهم ثورة مضادة وطابور خامس (دبر لهم تهمة حيازة قزاز من العرقي بالثابتة)... احدي الافندية المتهمين جورا وبهتانا بهذه التهمة اخد علي اللباد جلادته في امام القاضي.... ولكن في اليم التالي ليلا كان هو من يضرب علي باب بيت الاستاذ وهو ثمل ثمالة حقيقية... وليدور الحوار التالي.. تلصق فينا تهمة سكر بالكضب..؟؟ اوكي انا سكران ودي قزازتين عرقي انا شربت واحدة واقف لط والثانية ح اكبها ليك قدام خشم بابك ده.. اق
| |
|
|
|
|
|
|
Re: حليلك يا مشروع يا حضاري ..حليلك...!!! (Re: عبدالكريم الامين احمد)
|
ليل بهيم وقعدة افندية بقياة ضابط النقطة ومهندس الموية وبعض السابلة من مرتادي تلك الليالي ومحبي (الكعو)وكان منزل ضابط الشرطة المطرف من تلك الربوع هو مسرح الاحداث وبينما كانت الكاسات تتطاقش يمينا ويسار زكر الراوي بان ابنص عربة قاضي النظام العام الذي يزور تلك المناطق في دوريته المفاجئه هو من طل...وكان ابنص مميز اتفق الضابط في تردداته مع العسكري الذي يقود العربة عندما كان كان القاضي السابق يداهمهم ليلا دون سابق انذار... ولكن هذه المرة وعقب دخول القاضي الجديد الي المنزل بعد ان تضاير افراد الجلسة ما بين الحمام وكراكير البيت صاح القاضي يا جنابو خلي الناس المدسين ديل يطلعوا وانا زاااتي كب لي من الصنف العجيب ده
| |
|
|
|
|
|
|
Re: حليلك يا مشروع يا حضاري ..حليلك...!!! (Re: عبدالكريم الامين احمد)
|
سلام يا كيكى،
طبعـا العبد لله لم يسمـع ولا واحـدة من تلك الخطب..
لكن أســأل: وعرفنـا أنو الروادى ما كانت فيها مفاتيح يقفلوها بيها، طيب برضو ما كان ممكن يطلعوا منها حجارة البطارية؟ هل طليع الحجارة من الرادى يحتاج لمهندس كهرباء؟
هل ممكن نقول السـودانيون شعب سـادى يحب تعذيب ذاته ثم يلوم الخطباء؟
| |
|
|
|
|
|
|
Re: حليلك يا مشروع يا حضاري ..حليلك...!!! (Re: عبدالكريم الامين احمد)
|
دونكي المجالي.. دونكي ومصدر للمياه انتظر القوم طويلا حتي تنبع مياه التي اخذت كغير العادة ايام طويلة حتي ظهرت مياهه للسطح ولكن بكل اسف انبتت الارض ماء عالي المساخة وليس به رحيق الماء البعرفوها الناس هناك فهجره الجميع وصار دونكي سي الصيت رغم ندرة المياه... ولكن العامة لم يتركوه في حاله فخلوده في اشيائهم السياسية البسيطة فكانوا يرددون في مجالسهم السرية
المجالي ولا الترابي
| |
|
|
|
|
|
|
Re: حليلك يا مشروع يا حضاري ..حليلك...!!! (Re: عبدالكريم الامين احمد)
|
Quote: طبعـا العبد لله لم يسمـع ولا واحـدة من تلك الخطب..
لكن أســأل: وعرفنـا أنو الروادى ما كانت فيها مفاتيح يقفلوها بيها، طيب برضو ما كان ممكن يطلعوا منها حجارة البطارية؟ هل طليع الحجارة من الرادى يحتاج لمهندس كهرباء؟
هل ممكن نقول السـودانيون شعب سـادى يحب تعذيب ذاته ثم يلوم الخطباء؟ |
هلا يا ابو الريش والناس كانت حريصة تسمع النضمي الصباحي ده لانها مهجومة وعاوزين يعرفوا البلد دي ماشة لوين... وخطب يونس محمود ديك كانت عجيبة جدا... نبذ من صباح الرحمن وبمسك ليك الامة دي كلها بالصف واي زول بديهو الفيها النصيب الطلاب المعارضة الملك فهد امريكا حسني مبارك المهم بتاول من طرف وبشوت ضفاري شديد..
الشعب يا ابو الريش حتي لو كان الزول منهم ماعندو رادي بمشي بجيب رادي عشان يسمع هيك خطب عجيبة
| |
|
|
|
|
|
|
Re: حليلك يا مشروع يا حضاري ..حليلك...!!! (Re: عبدالكريم الامين احمد)
|
Quote: وخطب يونس محمود ديك كانت عجيبة جدا... نبذ من صباح الرحمن وبمسك ليك الامة دي كلها بالصف واي زول بديهو الفيها النصيب |
هلا يا هندسه.... خطب يونس محمود وبرنامج فى ساحات الفداء وما لدنيا قد عملنا وقرف شديد حيث توهموا أنه التمكين وجيشوا معظم الناس بداية باللجنة الشعبية مروراَ بالدفاع الشعبى والمجاهدين والدبابين ثم الكضابين .... مشروع ظلامى الخروج منه يحتاج إلى عملية جراحيه لإستئصاله من جسد الشعب السودانى .
كل الود محمد كابيلا
| |
|
|
|
|
|
|
Re: حليلك يا مشروع يا حضاري ..حليلك...!!! (Re: حامد محمد حامد)
|
Quote: وما زالت ظلال تلك الايام والتى تلتها غائرة حائرة فى النفوس طمست الكثير من الدواخل ,و جعلت الانسان السودانى قلقا لا يهدأ له بال وخوف من شى ما؟
كن بخير واوع من الهكر |
ديك ايام ياحامد الله لا عادها ياخي ملانة بس وعنجهية وكانت فعلا محيرة وزرعت في الناس قلق وتوجس صعب التخلص منه ولو بعد سنين
والهكر ياخي شال مني بوست من ذهب وصعب بتلقي ليهو المزاج والنفس واللحظة
ولكن الله في
وكن بالف خير يا صديقي
| |
|
|
|
|
|
|
Re: (Re: Isa)
|
اعتقد ان صديقي كيكي يقصد بهذا كيف تم التحايل علي قبضة الانقاذ في ذلك
الزمن عملا بالمثل البقول (الما بخاف من الله خافو)
عمك جبريل سائق تانكر جاز في موسسة الري
بقوم اعمل (كرباوي ) ويبيع الجاز
يوم قبضوهو ناس الامن الاقتصادي وسالوهو دها يا زول
قام قال ليهم دها زاد المجاهد
| |
|
|
|
|
|
|
Re: (Re: Isa)
|
Quote: إن الإنقاذ ما جاءت إلا للقضاء على الشيوعية والحزبية! ،، شفت المشروع دا وصل وين؟؟ تحياتي.. |
هلا يا كابيلا وحبابك ياخي والمشروع الحضاري خلاص وادي شاااااااالا ولسع يا محمد انه الطوفان الاكبر ...وستصحو الخرطوم ذات يوموهي خالية من الطفابيع
| |
|
|
|
|
|
|
Re: (Re: عبدالكريم الامين احمد)
|
Quote: اعتقد ان صديقي كيكي يقصد بهذا كيف تم التحايل علي قبضة الانقاذ في ذلك
الزمن عملا بالمثل البقول (الما بخاف من الله خافو)
|
هلا وانت بالضبط مسكت البوست من لقاليقو وفي انتظارك
| |
|
|
|
|
|
|
Re: (Re: عبدالكريم الامين احمد)
|
جمال ود العطا له قريبه متنفذ مع ناس الانقاذ
والراجل عين القرية كلها بوظائف مع ناس الحكومة
المهم جمال عندو ولده عمره اربعة سنين وجابو الغداء
جمال قال لولده (يا ولد اكل كبار كبار عشان تكبر سريع وعصام يعينك في الحكومة
قبل يرفدوهو
| |
|
|
|
|
|
|
Re: (Re: khaleel)
|
شكيتو الجوكر للشيخ ودهاشم التور الضالع يفرتقو حتة حتة صواميل لباقي الهكر ما ينفع
| |
|
|
|
|
|
|
Re: (Re: عبدالكريم الامين احمد)
|
Quote: سلام يا كريم،، عندما رأيت نافع وبجواره قادة كل الأحزاب (الوطنية) في مؤتمر الحزب الشيوعي تذكرت خطب قادة الإنقلاب في أيامه بل في سنينه الأولى؛ كانوا يقولون بمناسبة ومن غير مناسبة: إن الإنقاذ ما جاءت إلا للقضاء على الشيوعية والحزبية! ،، شفت المشروع دا وصل وين؟؟ تحياتي.. |
هلا يا عيسي وحبابك وفعلا الشيوعية والالحاد كانت ليها شنة ورنة في خطاب بني كوز ونتذكر اللاء الشهيرة (لا شيوعية ولا الحاد) ولكن اهلنا عندهم مثل بقول ما بموت بريشو الا جداد الوادي والانقاذ ريشها اتنتف حتة حتة ولسع النتف الاكبر في الطريق
| |
|
|
|
|
|
|
Re: (Re: عبدالكريم الامين احمد)
|
سلامات يا كيكي وأحوالك ..
كان على يونس بسيط الكلام في الملائكة الكانت بتحمر البصلة ياخي دي مش دُل يالدلنج دي دُل لكردفان كلها ..
ودي ..
| |
|
|
|
|
|
|
Re: (Re: مجاهد عبدالله)
|
بالجد وين الزول دا!!! بالله سقط من ثقوب الذاكرة عديل كدا حلقوم حقيقي كان..انا ما كنت بسمعو يقول شنو وعرفت انك ممكن تسيطر على حاسة السمع سيطرتك على سائر الحركات الارادية العجيبة دائما بزرني في بص سوبا ما تعرف تعمل شنو من التكشم والخوف راجل FHB يفتكرني معجبة بالله كنت مفتكرة بعد الاندعارة ديك بعملو وزير الثقافة..
تحيات يا كيكي وخلي..
____________
FHB اختصار لرجل فاقد حنان بشدة.
| |
|
|
|
|
|
|
Re: (Re: د.نجاة محمود)
|
Quote: بالله كنت مفتكرة بعد الاندعارة ديك بعملو وزير الثقافة |
والله يا بيان اندعارة حلقوم وراحت في الفاضي ساكت اخر مرنا سمعنا بيهو كان شنو كده ماعارف في كلية القادة والاركان ثم انزوي الان في فيضان تشابك التيارات الاسلامية..
كامل تضامني مع يونس محمود
| |
|
|
|
|
|
|
Re: (Re: مجاهد عبدالله)
|
يونس ده ياكيكي الله يغفر ليهو
لما الطيب صالح كتب متسائلا `من اين اتى هؤلا الناس`
شتمه قائلا `ونقول لمضاجع مدن الضباب نحن جئنا ` من وين كده ماعارف
وهاهي حكومته الرسالية تكرم الطيب ...
ياخي ده قال للملك الراحل فهد اعور
| |
|
|
|
|
|
|
Re: (Re: حيدر حسن ميرغني)
|
Quote: في الايام تلك كانت النغمة السائدة و سط الجميع هي فلان رفدوا علان اعتقلوا ومين مين داك امس فكو لكن تاني قبضوا واقسي الاخبار هي من تفيد بان فلان الفلاني قتلوا ومات لكي يسجل البلاغ ضد الملاريا او حمي الانهار |
أي والله يا كيكي,
دي حكومـة أطلت على الناس في بلدنا بالتعذيب في كل شئ,
وكأنه الناس كانوا أصلاً ناقصين عذاب,
عذبت زي ما عايزة ورفدت زي ما قدرت وجبت الاموال كما لم تكون الجباية يوماً, واغلظت للناس الحديث كما لم يسمعوا بهذا مطلقاً,
نسأل الله أن يعوض السودانيين خيراً
أحمد الشايقي
| |
|
|
|
|
|
|
Re: (Re: حيدر حسن ميرغني)
|
Quote: لما الطيب صالح كتب متسائلا `من اين اتى هؤلا الناس`
شتمه قائلا `ونقول لمضاجع مدن الضباب نحن جئنا ` من وين كده ماعارف
|
الزول داك ياخي كان ماعندو قشة مرة وبقوم من الصباااح بمسك من طرف وبشوووت ضفاري الطيب صالح الملك فهد جون قرنق الميرغني طلاب الجامعة اصحاب الموائد الخضرا حسني مبارك كان خامج السوق خمج يا حيدر الرائد يونس ده
| |
|
|
|
|
|
|
Re: (Re: مجاهد عبدالله)
|
Quote: كان على يونس بسيط الكلام في الملائكة الكانت بتحمر البصلة ياخي دي مش دُل يالدلنج دي دُل لكردفان كلها ..
|
هلا يا مجاهد واحوالك ياخي يونس ياخي خطبو كلها كانت علي شاكلة ان الذئب الذي اكل سيدنا يوسف كان ذئبا شرسا ويسمي هزبرا
| |
|
|
|
|
|
|
Re: (Re: عبدالكريم الامين احمد)
|
Quote: أي والله يا كيكي,
دي حكومـة أطلت على الناس في بلدنا بالتعذيب في كل شئ,
وكأنه الناس كانوا أصلاً ناقصين عذاب,
عذبت زي ما عايزة ورفدت زي ما قدرت وجبت الاموال كما لم تكون الجباية يوماً, واغلظت للناس الحديث كما لم يسمعوا بهذا مطلقاً,
نسأل الله أن يعوض السودانيين خيراً
|
بالتاكيد يااحمد ولذا يجب علينا ان لانسي ابدا ويجب علي الذاكرة ان تكون متقدة وحية وحاضرة لان ذلك العذاب كان خصما علي وطن علي ابنائه علي ثرواته وعلي كل اشيائه..
| |
|
|
|
|
|
|
Re: (Re: ود محجوب)
|
كيكي ياأخو صلاح ازيك
تعرف
المشروع العمروا 20 سنه دا لسع مشروع
المشاريع القامت من الوقت داك حسع بيعملوا ليها اعادة تأهيل
| |
|
|
|
|
|
|
Re: (Re: ود محجوب)
|
Quote: مالك يا اخوى ؟؟عندك فيه حواشة.؟ |
هلا ياود محجوب عليك الله يا ود محجوب قول عندي حواشة 14 فدان في المشروع الحضاري.. اول شي القي ليها موية وين مع الطلمبات الخربوها دي والقي ليها بترول للتراكتور عشان يحرتها وين مع ناس عوض الجاز ديل وكدي قول الحواشة جابت عيش ود احمد زينة وعجبني اخليهو للطير ولا اخليهو اسبير ولا اديهو للزبير
ود محجوب عندي حواشة لكن اهديتها ليك اتصرف فيها انت غايتو حلال عليك
| |
|
|
|
|
|
|
Re: (Re: عبدالكريم الامين احمد)
|
Quote: كيكي ياأخو صلاح ازيك
تعرف
المشروع العمروا 20 سنه دا لسع مشروع
المشاريع القامت من الوقت داك حسع بيعملوا ليها اعادة تأهيل
|
هلا يا سهيلي ووينك يارجل مختفي كده.. وفعلا بيني وبينك 20 سنة توضب مشاريع وتعيد تاهيلها وتنزل زي مليون من الاستاف الاشتغل في المشروع المعاش.. ولكن احنا مشورع ناسنا ديل هم زااتهم ماعارفنو ماشي وين وجاي من وين,, وياخي والله الزول حاسدكم عديل كده علي محاضرة دالي دي http://www.sacdo.com/Video57/012409_AhmedDali/Dali_7.asp
| |
|
|
|
|
|
|
Re: (Re: Shazaly Magzoub)
|
يا شااااااذلي ياخ السماح والعفو شديد ياخي وماعارف يمكن تشابه الاسامي اوكما بداء لي بالاضافة الي سيرة صلاح الامين فطوالي مشيت للسهيلي طراه الله بالخير.. ومن الصدف وانا بقراء في مداخلتك الاولي كنت بشاهد في فيديو ندوة كنت متوقع سهيلي يكون من الحضور كوني التقيت به السنة الماضية في بلدهم العجيب داك.. كل الود والاعتذار يا الشاذلي وحبابك شديد ياخي
| |
|
|
|
|
|
|
Re: (Re: عبدالكريم الامين احمد)
|
Quote: ود محجوب عندي حواشة لكن اهديتها ليك اتصرف فيها انت غايتو حلال عليك |
هديتك مقبولة يا كيكى . وانا من جانبى اتبرعت بيها لدعم المشروع الحضارى ارسل اورقها لأهل الشان اكان لقيت واحد.
ـــــــــــــــــــــــــــــــــ
فى احد قرانا فى الشمال ومع بداية فورة الانقاذ واللجان الشعبية وما تبعها
عزف الناس من المشاركة فى اللجان الشعبية لود ربطهم بالاحزاب ((البائدة).
ولما لم يجدوا احد تكونت اللجنة من ثلاثة اشخاص من افقر اهل القرية ((ومهمشيها)) كانوا لا يشاركوا فى اى من نشاكات القرية ولا يفتقدهم أحد. والثلاثة هم ود الغصين وكان يبيع الخضار فى سوق الاحد وود قفتين عامل يومية والزين فراش المدرسة. ولم يمر وقت طويل حتى ظهرت عليهم علامات النعمة ومظاهر التدين وصاروا من اهل اليسار.
ود قفتين استثمر امواله وعمل طاحونة.
ود الغصين عمل افخم صالون فى القرية. اما الزين بجانب اعمله صار مؤذن الجامع وهو الذى كان لا يرى فى المسجد الا لماما.
فقال ظريف القرية غجائب الدنيا زادت ثلاثة
اذان الزين وصالون ود الغصين وطاحونة ود قفتين.
| |
|
|
|
|
|
|
|