|
Re: بســم الله والله اكــبر ((( صور ))) (Re: عبدالوهاب علي الحاج)
|
Quote: انتو ناس الخرتوم ديل ترفعوا في بكاسيكم دي من طرف..النعجة من الخروف يا كافي البلا ما بتفرزوها |
النعجة دي عندها قصة
في اتنين من اولاد الحلة قالو مهتمين بالكم وليس الكيف
والنعجة طبعاكبيرة ولحمها كتير وسعرها نص سعر الخروف
الجماعة اشتروها واعتبروا دا انتصار والنعجة مالها يعني
ما كلو ضان هسه انتو لمن تمشوا الجزارة بيفرز الخروف من النعجة ياخ ما تلفوا كدا
الليلة من الصباح ضبحوها وسلخوها لما فتحوا بطنها لقوها حامل طبعا رموها وجو اتلحوني انا
| |
|
|
|
|
|
|
Re: بســم الله والله اكــبر ((( صور ))) (Re: عبدالوهاب علي الحاج)
|
اوع بس تقول بتاكل المرارة النية بالدكوة والشطة الخدرا .. شكلك كدا قاعد تدوسا وإحتمال تكون عينة البقلعوا الكبدة من بطن الخروف قبل ما يموت وما بعيد تكاوش علي الكلوتين الاتنين والعهدة علي الراوي قال لي وهبة دا شربوتو بايت ليهو عشرة يوم في برميل بتاع بلاستيك ..
| |
|
|
|
|
|
|
Re: بســم الله والله اكــبر ((( صور ))) (Re: طلحة عبدالله)
|
طلوح ياحبيب
كل سنة وانت طيب
والله لا المرارة ولا الكبدة ما باكلهم
Quote: قال لي وهبة دا شربوتو بايت ليهو عشرة يوم في برميل بتاع بلاستيك .. |
لكن دا فتحتو امبارح لقيتو ليك نفخ جضومو
والليلة حاضن الجك وراقد والزيارات الا بكرة
غايتو الجك الواحد بعمل ليك شرارة خفيفة كدا والجك التاني يالطيف ....
| |
|
|
|
|
|
|
Re: بســم الله والله اكــبر ((( صور ))) (Re: سيف النصر محي الدين محمد أحمد)
|
Quote: اكان كدي يا خوي في السودان الجديد بيضيفوا ليك العدة إلى جانب الكمونية |
سيف النصر
تعرف موضوع العدة دا ذكرني قصة حصلت لواحد اخونا في القضارف قال في القضارف لقى جمعية للرجال المضفورين من قبل نسوانهم وقال ليهم داير اشترك معاكم قالوا ليهو حبابك لكن بعد ان تجتاز الاختبارات والانترفيو وكدا وافق . دخلوهو مكتب وبدوا يسالوا فيهو : اها من ما تقوم الصباح بتعمل شنو ؟ قال : بغسل العدة الرئيس قال ليهو ياخ قوم اطلع برة ياخ العدة كمان ببيتوها
| |
|
|
|
|
|
|
Re: بســم الله والله اكــبر ((( صور ))) (Re: عبدالوهاب علي الحاج)
|
Quote: وهبة كل عام وانت واسرتك الكبيرة والصغيرة بالف خير وصحة وينعاد عليكم والسودان ينعم بالحرية والديمقراطية والشعب السوداني بالف خير . |
ابوالشفيع النقابي الجميل
كل سنة انت واسرتك بالف خير
وسوداننا فوق يناطح النجوم حرية وديموقراطية وسلام
واعفا مننا لله والرسول ياراجل ياطيب
| |
|
|
|
|
|
|
Re: بســم الله والله اكــبر ((( صور ))) (Re: عبدالوهاب علي الحاج)
|
وهبه يا صديق العزيز كل سنه انت و جميع افراد اسرتك و اصدقائك و جيرانك بالف خير وربنا يحقق لينا كل الامانى الضائعه و يرجع لينا مراسى الشوق
Quote: شربت كباية واحدة بس
والباقي منتظر بيهو فتوى من شيخ متفهم |
اكان من اليوم التانى منتظر الشيوخ > فى اليوم التالت مبالغه بس كتر التلج واكشح فى اليوم الرابع مبااااالغه محلبيه عديييييل . ونحن مشتاقين عدييييييييييييل كده
قصدى لمراسى الشوق وما تفهمونا غلط يا ناس
| |
|
|
|
|
|
|
Re: بســم الله والله اكــبر ((( صور ))) (Re: عبدالوهاب علي الحاج)
|
العزيز طارق الكوتش
كل سنة وانت طيب
Quote: اكان من اليوم التانى منتظر الشيوخ > فى اليوم التالت مبالغه بس كتر التلج واكشح فى اليوم الرابع مبااااالغه محلبيه عديييييل . |
اهي دي الفتاوي البفتش ليها اناوتشكر عليها ياكوتش
ولا نامت اعين ناس النظام العام
Quote: ونحن مشتاقين عدييييييييييييل كده
قصدى لمراسى الشوق وما تفهمونا غلط يا ناس |
ما فهمناك غلط ياكوتش
لكن وضح لينا مراسي دي جمع شنو عشان نفهم صاح
| |
|
|
|
|
|
|
Re: بســم الله والله اكــبر ((( صور ))) (Re: عبدالوهاب علي الحاج)
|
شنو ياعمك خاشي فينا كدة
اول حاجة وين نمرة الشاسي بتاع الخروف الكرت الصحي للضباح اشتريتو كيف ديرين خلو طرف من الضرائب
ازيك ياوهبة وكل سنة وانت والابطال والعروسات وامهم بالف خيروربنا يديم عليكم الصحة والعافية
انا عرف المرارة بكون فقشها كبيدة . . تنفعو
| |
|
|
|
|
|
|
Re: بســم الله والله اكــبر ((( صور ))) (Re: خالد سند)
|
سندة يالذيذ
Quote: وكل سنة وانت والابطال والعروسات وامهم بالف خيروربنا يديم عليكم الصحة والعافية |
وانت وعيالك بالف خير يارب
نمرة الشاسي ما ظاهرة فوق للمربع الاحمر بتاعك دا طوالي
والمرارة قاعدة زي ما هي انا طبعا ما باكلها وكبيدة مشى الحج السنة دي
__________________________ بتصل بيك ان شاء الله
| |
|
|
|
|
|
|
Re: بســم الله والله اكــبر ((( صور ))) (Re: فرح)
|
كل سنة انت واسرتك الكبيرة والصغيره بخير ياهيبة
امس دخلت اعيد عليك ومرافىء جات من اوضتها وشافت الخروف المطبوح
ياخ دى دخلت فى حالة نفسية
كيف وكيف تضبحوا الخروف اللطيف ده؟
أأأوه ماى قوت اير إزت آرم ياماما{يالهى انه مسكين ياماما}
شفت ياهيبة يا ود امى تجيب ليك جنا ماتعرف تلقى القواسم المشتركة بين تجاربك وتجاربهم
يعنى نحنا آكلى اللحوم والمرارات وشاربى الشربوت والشطوط وصعوط هيبة الكارب داك وناس الجاتوه والخروف اللطيف والذى منو...
لكن بينى وبينك شكل دم الخروف انا ذاتى اثار فينى كتير من الشفقه وهكذا وضمن خططى المستقبلية اتحول الى نباتية 100%
| |
|
|
|
|
|
|
Re: بســم الله والله اكــبر ((( صور ))) (Re: على تاج الدين على)
|
Quote: العيد مبارك عليكم وكل عام وانتم بخير وبتمام الصحة والعافية ...وربنا حقق الامنيات ...وانتهز المناسبة لاعرب عن عظيم تمنياتى بالخير والصحة والبركات لكل الاخوة والاخوات اعضاء المنبر |
حفظك الله اخي علي تاج الدين
وكل عام وانت بالف خير واعاده الله على الامة الاسلامية باليمن والخير والبركات
| |
|
|
|
|
|
|
Re: بســم الله والله اكــبر ((( صور ))) (Re: Ishraga Mustafa)
|
الغالية د.اشراقة
كل سنة انت وواصل ومرافي من حسن لاحسن وطيب الله ايامكم وحفظكم من كل شر
اعتذري لي عليك الله لمرافئ وسلمي لي عليها شديد وقولي ليها غلطان الخروف هو الجرح نفسو
Quote: لكن بينى وبينك شكل دم الخروف انا ذاتى اثار فينى كتير من الشفقه وهكذا وضمن خططى المستقبلية اتحول الى نباتية 100% |
ياحليلك يا اشراقة يا اختي خلاص بقيتي حنكوشة ياختي نباتية شنو يعني تبقى زي الارانب جزر وخس وكدا والله بالغتي عديل كدا
عليك الله يا اشراقة الواحد كان ما عض ونتش اللحم دا وبعد كدا تفتش ليك قشة تنخس سنونك وتحبس بكباية شاي حبر زي بتاعة خالتي عشة ديك فايدة الاكل شنو بالله شوف دي قال نباتية قال
| |
|
|
|
|
|
|
Re: بســم الله والله اكــبر ((( صور ))) (Re: عبدالوهاب علي الحاج)
|
مبروك يا هيبهالعيد
اولا الحندكه مافي ليها داعي
لانو هنا لو طلبت خروف بيجبهو ليك مجمد وانا قاعد اسميوهو ابفانله لانومغطي بطبقه ثلجيه ويتحول الي بلاستيك بعد الطبخ.. المهم انا قلت لعماد الضحيه بتاعتي في سوق الناقه لامن اجي الخرطوم..
دي صور البيت يا هيبه؟؟
ورينه العنوان زي الحنكون مقيلين كدا معاكم
......
اشوفك قريب
ابراهيم
| |
|
|
|
|
|
|
Re: بســم الله والله اكــبر ((( صور ))) (Re: ibrahim kojan)
|
الدكاترة ابراهيم كوجان
مرورك اسعدني كثيرا وكل سنة وانت طيب
Quote: هنا لو طلبت خروف بيجبهو ليك مجمد وانا قاعد اسميوهو ابفانله لانومغطي بطبقه ثلجيه ويتحول الي بلاستيك بعد الطبخ.. المهم انا قلت لعماد الضحيه بتاعتي في سوق الناقه لامن اجي الخرطوم.. |
ياسيدي مرحب بيك وانا وعماد حنكون في لقاك طبعا عماد ليوم الليلة ما لاقيتو على الهواء مباشرة ولو انو من قبيل بحاول اتصل بيهو عشان ازورو تلفونو مقفول و بالمناسبة هو برضو سكن ما بعيد مننا في بحري شمبات وعدلت البرنامج وبعد شوية كدا حا امشي اقضي باقي اليوم مع خالتك عشة حامد (والدة اشراقة) ونجوى
Quote: دي صور البيت يا هيبه؟؟ |
دا البيت ياكوجان ليهو سبعة سنين مع طن الاسمنت البقى بمليون جنيه دا ما قادر ابيضو لكن الحمد لله الامور ماشة لانفراج ولمن تجي تلقاهو مية مية ان شاء الله
Quote: ورينه العنوان زي الحنكون مقيلين كدا معاكم |
بحري الشعبية جنوب المستشفى الدولى وشرق سوق المرغنية ...... باذن الله وفي انتظارك
| |
|
|
|
|
|
|
Re: بســم الله والله اكــبر ((( صور ))) (Re: عبدالوهاب علي الحاج)
|
. .
الأخ الحبيب عبد الوهاب
تقبل الله منك هذه الأضحية ، واعاد عليك هذه المناسبة المباركة اعواماً عديدة وأزمنة مديدة بحق المصطفى والمرتضى والزهراء سيدة النساء والحسنين سبطي الهدى صلوات الله عليهم أجمعين .
الكاركاتير أدناه نشر بصحيفة سعودية وهو يسخر من جيل شباب اليوم
** الهريفي = الخروف الصغير (حمل)
قال شوف العيون وشوف الصوف ناعم كيف
. .
. .
| |
|
|
|
|
|
|
Re: بســم الله والله اكــبر ((( صور ))) (Re: عبدالوهاب علي الحاج)
|
Quote: تقبل الله منك هذه الأضحية ، واعاد عليك هذه المناسبة المباركة اعواماً عديدة وأزمنة مديدة بحق المصطفى والمرتضى والزهراء سيدة النساء والحسنين سبطي الهدى صلوات الله عليهم أجمعين . |
اخونا وحبيبنا الازهرى
شكرا لوجودك هنا وسعدت جدا باتصالك واتمنى ان يمتد التواصل حقيقى انت رجل جدير بالمعرفة والصحبة ولك الود كيمان كيمان
| |
|
|
|
|
|
|
Re: بســم الله والله اكــبر ((( صور ))) (Re: اسامة سعد)
|
اسامة سعد كل سنة وانت طيب
البوستات ذوات الصفحات المتعددة كلها واجهت مشاكل زي دي ورجعت تاني . البوست لحدي امبارح الظهر كان موجود ورفعو عزالدين وبعد كدا اختفى ولو ما ظهر لحدي المسا بفتح بوست مطالبة . الحاج حمد مشغول بزواج بت اخوهو وما اظنو فاضي للبورد وغالبا يرجع على جدة في خلال اليوم . تحياتي
| |
|
|
|
|
|
|
|