|
Re: نضافة البيوت يوم الوقفة ! (Re: محمد الجزولي)
|
كل سنة وانت وأسرتك بألف خير يا خالد..
نضافة العيد دي عنها احساس براه..يعني القضية مش النضافه بس..لانه الناس البيتها نصيف علي الناس التانيه بينضفوا.. عارف احساس مختلف.. فيه الناس بتعكس فرحتها بالعيد وبتحب تعيش احساس مختلف..احساس جديد ما روتيني..
يعني زمان تلقي تغيير أماكن الأثاث وربما تجديده وكل زول بقدرته..ستاير جديده أو هي ذاتها يغسلوهاوبكوها حتي لو كانت نضيفه.. وبعدين يا خالد ما تنسي الطربيزات فوق البلاط ولا المشمع ولا السراميك أو حتي التراب بس..شكلها وشكل المفارش عليهم مع أطباق الحلاوه والنعناع..
وبعدين الملايات الشكلها مختلف..جديده ولا ما استعملوها كتير ولا حتي استعملوها كتير وغسلوها وكووها.. انت بتكون عارف شكل الاستعادات دي في حد ذاتها مفرح كيف!
عارف انا كنت بغسل الشجر في الشارع قدام البيت..بحب أشوف موية الخرطوش بتغسله استعداد للعيد زي البيت.. والصباح بدري كنت بقوم مع أخواتي افرش السراير..وما أكره في الدنبا دي الا الزول البيقوم من السرير ويسيب الملايه ملخبطه.. انتو ليه الرجال بيلخبطوا الملايات كده؟؟!
شوفت أسه في لندن دي..بنحاول نعمل حركات السودان..صحي ما كلها لكن أكثرها.. بس مشكلتنا حاجه واحده في محاولة الخلق دي.. انه الجزار بيضبح ليناالحروف عنده..وبعدين لما يجبيب الخرفان للزياين بيكون الليل جه.. يعني بكره أول يوم مع ماما جاره ناكل خروفها بالمساء..امكن الصباح ناكل اي حاجه.. وبكره خروف أختي الكبيره ومعاها ماجده ومنال.. وتالت يوم أنا ومحمد أخوي ومعانا آيه.. وكلها دي خرفان مضبوحه من أول يوم وقاعده في التلاجه!
وبرضه بنفرش مفارش وناكل حلاوه وأولادنا بيلبسوا ملابس العيد..بس ما بيرموا ورق حلاوه علي الأرض
عيد سعيد لك ولزوارك.. وما تنسي تنضف أركان الحيطه كويس..وتساعد في عمل الشيه والسلطه..
|
|
|
|
|
|
|
العنوان |
الكاتب |
Date |
نضافة البيوت يوم الوقفة ! | خالد العبيد | 12-07-08, 00:53 AM |
Re: نضافة البيوت يوم الوقفة ! | عادل عبدالعزيز عبد الرحيم | 12-07-08, 01:29 AM |
Re: نضافة البيوت يوم الوقفة ! | HAYDER GASIM | 12-07-08, 04:16 AM |
Re: نضافة البيوت يوم الوقفة ! | محمد سنى دفع الله | 12-07-08, 09:57 AM |
Re: نضافة البيوت يوم الوقفة ! | محمد الجزولي | 12-07-08, 03:03 PM |
Re: نضافة البيوت يوم الوقفة ! | طارق ميرغني | 12-07-08, 10:35 AM |
Re: نضافة البيوت يوم الوقفة ! | ALazhary2 | 12-07-08, 10:37 AM |
Re: نضافة البيوت يوم الوقفة ! | طارق ميرغني | 12-07-08, 02:42 PM |
Re: نضافة البيوت يوم الوقفة ! | محمد الجزولي | 12-07-08, 02:56 PM |
Re: نضافة البيوت يوم الوقفة ! | Muna Khugali | 12-07-08, 03:35 PM |
Re: نضافة البيوت يوم الوقفة ! | lana mahdi | 12-07-08, 03:56 PM |
Re: نضافة البيوت يوم الوقفة ! | خالد العبيد | 12-08-08, 10:48 AM |
Re: نضافة البيوت يوم الوقفة ! | Badreldin Ahmed Musa | 12-08-08, 11:12 AM |
|
|
|