|
|
 هطرقة .. يا مبعثر .. محمد المجتبى
|
يا مبعثر .
لو بتقدر تمسح اللون من مسامك ..
وتبقى ابيض في إِدامك
ولا اصفر ذي مُدامك
أو مغبش ذي زمانك
يا مبعثر
لو نسيت ماضيك وآنك
والمطارات المنافي
والخطيوات الحوافي
للعيادات الصفوف
واللفافات والنزيف
والشكيه ويالطيف
والوطن والشوق ونارك
والوهن والجوع وحالك
لو نسيت إسمك ودارك
ما بتقدر يا مبعثر
تغسل الجن من حروفك
وهمسة الجن في شجونك
وحضرة الفن من جنونك
لما ينبهل الكلام
ذي تون مدوزن بي ظنونك
ولا يحترق الهتاف
في جوف مجرح بي همومك
لوحه بتجرد وجومك
بين مُسيَر وما مخَيَر يا مُوَدر
يا مبعثر ذي جرح
في يراع محموم وينتح
حمة التخيال ويشطح
لما يستفرغ جنونو على الورق
اوجاع ويشرح
تسكر الأحزان وتمرح
ينفجر وهم المظنه جنون
ويسرح
يا مبعثر
ذي نغم
في وتر موتور بِنَقِر في الألم
مشدود على عصب العشم
نشزْ غُناهُ وإنبهم
لا فرحه لا أسى لا عدم
يرقص جنونو على الوهم
وينطرب فيك الصمم
يا مبعثر
في إطار
لي فرشه بِتْجسد ودار
في لوحة الليل النهار
لما تنداح الهواجس في المدار
يمسي الفرح نقطه
وحَزَن المُعَنىَ سطور
ويبقى الصباح خطوه
وليل الظنون مشوار
يبتهج فيك التمزق
وينفرد بيك الدوار
ينبري الجن والتجني
ويهتف الحرف المغني
ويبدو في اللوحه اندياح
وتنحت الليل انشراح
يا مبعثر
في التمرد والتوحد والتجرد
لو بتقدر تغسل الجن من حروفك
بالتودد
يا مبعثر
في التأمل
في الروعه والطيش والتفرد
والدهشه والليل والتهجد
يا فكره مجنونه وتردد
لو بتقدر تبقى غيرك
وتنسى انك كنت انك
ينجلي القلق التوتر
وتعرف اللوحه التبختر
يا مبعثر
يا مبعثر
محمد المجتبى
http://www.sudaneseinoxford.com/topic.asp?TOPIC_ID=62
|
|
 
|
|
|
|
Nazar Yousif
فيس بوك
تويتر
انستقرام
يوتيوب
بنتيريست