|
Re: دايرة اونس نفسي براي في البوست دة لحدي ما الزهجة تفك... (Re: سارة علي)
|
سرورة ازيك
كل سنة وانت بخير عيد مبارك تاني وثالث طبعا الواحد لازم يتعود ويتاقلم مع المكان الجديد عشان يعيش مبسوط واليوم الي بروح ما بيرجع تاني فعشان كدا ما ضيعوه في الزهج والضيق صدقيني حتبقي زكريات حلوة بعد فترة قصيرة وذي مابقول المثل اسأل مجرب ما تسأل طبيب ودي نصيحة من زولة جربت وضعك ده وعاشتو
تحياتي
سالي
| |
|
|
|
|
|
|
Re: دايرة اونس نفسي براي في البوست دة لحدي ما الزهجة تفك... (Re: سارة علي)
|
سلامات الأخت ساره على ربنا يرد الغربه و يقصر أياما و يلمك مع كل حبايبك و يحفظهم ليك كلهم يا رب كل ما تزهجى كترى الدعوات و ما تنسينا معاك
ود البشرى سلام وين يا ملك كتاباتك بقت يفتشو ليها تفتيش تحياتى للاسره الكريمه و كل ناس الصحافه من الجهتين
أن شاء الله نكون خففنا زهجتك شويه وكل سنه و أنت طيبه تحياتى محمد على
| |
|
|
|
|
|
|
Re: دايرة اونس نفسي براي في البوست دة لحدي ما الزهجة تفك... (Re: سارة علي)
|
متذكرة يوم عزومة الغداء الاخير في شارع افريقيا؟ كنتي مبسوطة انك ماشة امريكا...خليتي العربية والوظيفة السمحة والدلع وعبور كبري امدرمان عند طرف المساء..
هسي ما حاقول ليكي ياخي بتتسهل وزهجة وبتروح وماعارف الحنك الضارب بتاع هنوية.. لابتروح ولاشتين ..وجودك هناك اختيارك براك ومافي زول معاك.. طرطشة بنات يعني..هسي يا كمان تبقى قدر غربتك دي يا كمان تبقي قدرها.. ماعندك غير تنجضي ..وتتركي عنك الاوهام بتاعة (ياسلااااام السودان) والكلام الني .. بعدين انتي قاعدة مع اهلك..يعني ماشة السودان تتغربي مع منو؟؟
ــــــــــــــــــــــــــــــــــــــــــــــ آمنة قالو اسلمت وحسن اسلامها وبارت الجوامع.. ويومالبنات سالوهاعندك خبر سارة: فتحوقلت وتعوذت بالرحمن الرحيممن شر شيطان يخرج للناس من (الايست كوست) والعهدة في رواية التعويذة والحوقلة على رضا.
| |
|
|
|
|
|
|
Re: دايرة اونس نفسي براي في البوست دة لحدي ما الزهجة تفك... (Re: سارة علي)
|
سارة .. قبل يومين نفس القرفه وشوق واشتياقات للاهل وخاصه والوالد والوالده ولكن .. دخلت معاي ناس الامتداد في قرفتي دي .. المهم كلو واحد جاء قال كلام .. وحالو بخارجو اخوك من وجعو الما في زول عارفو اللا هو .. وفي النهايه طلعته بي حاله لا هيه قرفه ولا ما قرفه .. بس طلعته من حالتي الاولي ..
Quote: دايرة اونس نفسي براي في البوست دة لحدي ما الزهجة تفك... |
عشان كدا عنوانك ده بضرك... وخليلك زي ما خلقك ربك.. وكل سنه وانتي طيبه ..
| |
|
|
|
|
|
|
Re: دايرة اونس نفسي براي في البوست دة لحدي ما الزهجة تفك... (Re: سارة علي)
|
يا الجيتوني بي جاي...
كتر خيركم وبارك الله فيكم.... وكل سنة وانتو طيبين..
يا دكين..
انا كنتا مبسوطة لبرنامج السفر لاني حاشوف جزء من اسرتي.. لكن مرات الواحد ما بيكون عندو خيار..الحمد لله لقيت شغل في نفسي مجالي..لكن مرات بصحي من النوم مخنوقة...عارف ليه؟؟؟لاني لمن اصحي(صاحية وحاسة بي نفسي صاحية) اقعد اخطط لبرنامج اليوم.. ازور ناس امنةصحبتي ومن الشغل ازوغ عشان اغشي اخوي اتغدي معاه..دة كلوو وانا في السرير ولمن اصحصح القي نفسي ما في بيتنا وفي شقة مقفلة(انا بكره الشقق)..الخنقة القلتها ليك طوالي تجيني وعبرة وحاجات تانية..وخلاص يومي يتعكر...
لاني ليه مصعبة الموضوع؟؟ ..ما اقطع تذكرة وارجع السودان...
| |
|
|
|
|
|
|
Re: دايرة اونس نفسي براي في البوست دة لحدي ما الزهجة تفك... (Re: سارة علي)
|
Quote: ثم ناس البلد دي اهتماماتم مختلفة تماما مني.. |
ماياهو ده البزهج زاتو.. وحاتك قمت من النوم متخيل زول يصحيني عشان يفرشوا الملايات والستاير لا حس اذان الجامع وقولة (الله اكبر ..الله اكبر لا اله الا الله الله اكبر ولله الحمد) لا زول يكورك فيك ...اطلع من الحمام وكت الصلاة جاء لا شاي باللبن التقيل داك لاخبيز عيد لا حس سكاكيين وصوت خروف جايك من الحوش البي وراء داك لا قطر الشباب علي الابواب وقوله (ناس جوة العيد مبارك عليكم) احيي ياسارة في داعي توجعي لي قلبي خليني في صوت الهاي واي دي وشراب قهوة 711 مالك علينا في الوجعه دي عموما كل سنه وانتي طيبه وربنا يرجعنا سالمين غانمين لي اهلنا الله في...
| |
|
|
|
|
|
|
Re: دايرة اونس نفسي براي في البوست دة لحدي ما الزهجة تفك... (Re: سارة علي)
|
قاعدة في الشغل وغالباني القعدة...
قمتا من الصباح عيدت علي ناس بيتنا القاعدين معاي هنا.... عيد هنا ما ااااااا زي حق هناك.. رغم انو دة ما اول لي عيد هنا...
الضحية الفاتت امي وابوي كانو معانا..كان برنامج حلو.. مفكرة هسه امشي ادسي لي في حتة من الناس المعاي ديل واتصل علي باقيني الهناك..والموضوع اكيد حيكون فيهو جرسة وبكاء..المشكلة في البلد دي لو في واحد شافك بتبكي حيطلعوك عندك نفسيات...
| |
|
|
|
|
|
|
Re: دايرة اونس نفسي براي في البوست دة لحدي ما الزهجة تفك... (Re: سارة علي)
|
من ما افتح باب شارعنا وانا داخلة علي البيت والقي الموية مجنبقة بحس انو العيد قرب...جنبقة الموية دي معناها انو امي بدات تمارس عادتا البتعملا مع كل عيد..ما بتكون خلت ليها شافع حايم ما مسكتو خرطوش وقبلتو علي الشبابيك عشان يغسلوهم...
ادخل شوية القي حبل الغسيل كلووو معلق اكياس مراتب وستاير..اشيل الهم طوالي ..معناها راجيني كتيرررررر من الشغل..
اصحي الصباح اسمع طق طق طق طرق..بعرفو خلاص جا وشرف..ما قاصدة العيد..قاصدة النجاد..افتح عيوني من النوم القي الدنيا دي كلها قطن قطن..انا ما عارفة لي يوم الليلةامي ليه بتصر انها تنجد المراتب مرتين في السنة؟؟ لمن افتح عيوني كووويس القي غرفتي خلا والبرندات الجنبها خلا..امي كومت العفش كلوو في كورنة واحدة...ياا الله ؟؟دة كلو حارجعو؟؟طوالي بفكر لي في قصة وزوغة..لاني الوحيدة البكون فضلتا في البيت لانهم كلهم زاغو..بي اخواني المفروض يضربو البلوش في العفش..لمن القي نفسي اتعصرتا شددديد طوالي بقول ليها هاكي..لانو قولة هاك بتنجي من الهلاك..(معناها بعصر ليها قروش)..طوالي تقبل علي الشفع البغسلو الشبابيك وتجندهم في رحلة بحث عن بنات يومية ..اصلا اي بت بتشتغل معانا بتخلي الشغل قبل العيد باسبوع..وطبعا امي السبب..عشان كدة انا اول يوم لي في اي عيد ما محسوب..لاني بكون مهدودة من البتعملو فينا امي ..
بتتخيلوا بعد الشكية دي كلها مشتاقة لي نكشة بيتنا القبل العيد بي اسبوعين دي؟؟
| |
|
|
|
|
|
|
Re: دايرة اونس نفسي براي في البوست دة لحدي ما الزهجة تفك... (Re: سارة علي)
|
((بتتخيلوا بعد الشكية دي كلها مشتاقة لي نكشة بيتنا القبل العيد بي اسبوعين دي؟؟)) كل سنة و إنتي طيبة يا سارة و العاقبة بالمسرات ياخية يا خي لو كنتي قريبة ما تجي تفطري معانا عليك الله ، سيدة البيت عازماك شية عيد، و أقلها نفك ليك شوقك لنكشة بيتكم أم أسابيع دي بواحدة بدأت هنا قبل ساعتين رغم أنوالعيد خلاص قرب ينتهي قبال ما نضبح. أها، فرجينيا قريبة؟ منتظرنك.
| |
|
|
|
|
|
|
Re: دايرة اونس نفسي براي في البوست دة لحدي ما الزهجة تفك... (Re: سارة علي)
|
ياسر طيفور..
ازيك وكيف عامل..؟؟
يا ياسر عندي اخوي طوالي في بالي.. اخوي دة من شدة ما حنين لمن بخاف عليه.. من شديد ما كريم لمن بحس بيه عوير.. بيحترمنا انحنا اخوانو بي صورة مبالغ فيه.. ما بيقول لي يا سارة في اثناء كلامنا..بيقول يا امي انا بسمع اي كلام بيقولو لي..لو قال لي اعملي اي شئ بسويهو بدون تردد.. انا لمن كنتا في السودان بنتصل في اليوم ممكن علي بعض اكتر من تلاتة مرات..دة غير غشواتي ليهو في البيت.. انا بريدك شدددددديد يا اخوي.. وفاقداك شدددددددددددددددديد..
ربنا يخلي ليك بنيتك ويحفظك من مصائب الدنيا ويديك راحة البال يا اخوي
| |
|
|
|
|
|
|
|