|
|
 قـــصـــــــدك إيـــــــــــــــــه
|
بس قولي لي
قصدك ايه ،
اني اتناسي الحكاية؟
والمواويل الجميلة
وقصة القمرة الرواية .
قصدك ايه؟
انى اتجاهل
حروف
صوتك المحفورة
في أحشاء دمايا
انت واهمة.!
اصلي في جواك كون
وارتعاشات عبقت نفس الخلايا
وانت في عمق التفاصيل
اهتزازات جوة في عصب الحنايا .
وانت عارفة
كيف بكون الليل بدونك
والنجوم الشايلة من ضوك مرايا
لو قسيتي
وافتكرتي انو لما يغيب صداك
برتحل طيف ازدهارك
وتنتهي فصول الحكايا,
وانت عارفة
لما تهمسي بحرير
ناعم العبير
والكلام ياخد مداه في البداية
باحتمل جواي غرام
و قلبي يفرح باجتياحك
ينفجر عرق الغنا
بي ترانيم كل مقامات
اللحون
ويشتهي اللوح الدوايا
وقصدك إيه؟
اني اتناسى المودة؟
وكل اهة
وكل نمة ؟
انت واهمة
نحن بيناتنا الهوى
ونحن بيناتنا الصفا
والعذاب الاغتراب
والانين الاستلاب
والقصيد الفيه بدفن في اسايا
قصدك ايه ؟
الشواطئ الشاربة من دفقات
حنينك
والجروف الشاربة من
من انداء هوايا
تشكي ليك
وترتجيك
بين مواعين السهر
والأماني البين مسامات السحر
والغموض الفي الزوايا,
انه في لحظة توجد تحكي ليها
عن مسافات الغياب
والظنون البين شعاعات السراب
وفي انتظارك
-كم بهيم انا في انتظارك-
انت حاسة
بي اشتياقي
وانت غارقة في اشتياقك .
كلميني قصدك ايه؟
-يا سنين البهجة
يا احلي من كل الصبايا –
وانت عارفة
انو في الاصل الحكاية
التقاءات الحروف
والمعاني
الحايمة
في أركان سمايا
وقولي لي
قصدك ايه؟
|
|
 
|
|
|
|
د.محمد حسن
فيس بوك
تويتر
انستقرام
يوتيوب
بنتيريست