|
حتى لا تبور مواضيعي سأتبع طريقة الزميلة سارة منصور
|
كثيرا ما أتعب في إعداد وكتابة بعض مواضيعي التي أنشرها بالمنبر الحر ، خاصة بعض المواضيع الجادة ، والجدية عندي اقتصاد وسياسة وفكر ،، لكن كثيرا ما تسقط هذه المواضيع إلى القاع ، فأتناساها وأعود مرة أخرى لمواضيع الهيافة الاجتماعية أو الأدبية ،، وكثيرا ما أستحي عن رفع البوست بنفسي ، ولا أنكر انني أحيانا أمارسها وكلي غيظ من انصرافية زملاء المنبر ،، وقد لاحظت منذ فترة أن شيري تكتب بعض مواضيعها على دفعات ، لكن عدد دفعات شيري يتناسب مع حجم الموضوع وأهميته ، والناس عادة ينتظرون دفعات شيري بفارغ الصبر ،، عادة أكتب ببعض الإطالة وبعض الإسهاب ، لكني نادرا ما أتبع طريقة الدفعات ،، لعدة أسباب منها : 1- لا أرى أن مواضيعي شيقة لدرجة تجعل الناس ينتظرون الدفعات القادمة ،، 2- لا أكتب على النت مباشرة وإنما أتبع طريقة الكت آند بيست ،، 3- لدي اعتقاد أن تعدد البوستات فيه إهدار للباندويدث بتاع أخونا بكري ولذا أحاول عدم الإسراف ،، لكن لاحظت أخيرا أن مواضيع الزميلة سارة منصور تلاقي إقبالا كبيرا ، حيث أجد أن عدد القراء 20 وعدد المداخلات 12 ، أي أن أكثر من نصف القراء يدلون بمداخلات في مواضيع الزميلة سارة منصور ،، لكني عندما أفتح البوست أجد أن جميع المداخلات هي للزميلة سارة منصور نفسهادون تدخل من أي طرف آخر ،،، فقلت أن هذه تقنية تسويقية جديدة يجدر بي أن أتبعها في بوستاتي البائرة ،،، وجاكم بلا ،، ما فيش بوست من بوستاتي ينزل القاع .. وإلا سوف ترون والسلام ..
|
|
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: ahmed haneen)
|
كدى النستغل بوست ود قاسم ونقول لسارة الله يعوضك ...وانا يطرشنى
يا سارة الا الليلة.
نجى لود قاسم...يا اخوى عندك كم بوست كده كانوا بايرين والله انا
رفعتهم لما حيلى انهده اجارتك على الله ما قلتها لى...دحين ده
اخر بوست نرفعوا ليك..وبعدين هو بوست والا فراش بكاء...الداير
ترفعوا براك ده..الله يعينكم بورداب الرياض..والبكاء بحرروه اهله
اجارتنا على الله ..اها هيلاهوب هادى رفعة..وصدق الفنان القال
والبوست البقع بيناتنا بنسدوا..ورينى كتفك يا احمد حنين،،،
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: صديق الموج)
|
صديق الموج ما إنت لسة جديد ، اتعلم في بوستاتي أخير لك من تتعتر عند الناس الغرباء ، شيل الشيلة مع حنين ، وترهاقا ،، وبعدين منو القاليك سارة هاتشوف مواساتك ليها ، إنت لازم تدخل بوست هوبفل وتعمل المسألة دي هناك ،، يا صديق لا يقبل الحج في جدة ولا الزيارة في الرياض ،، فالإدانة راكباك ،، راكباك ،، مش تعمل يطرشني ، ويعميني ،، أمي بتقول : أضاني طرشا وعيني خرشا .. ونقول يمة والله سمعتي وشفتي ،، تقول : سمعت ،، سمعت ،، إنتو مالكن ومالي ،،
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: ودقاسم)
|
العزيز ود قاسم لك الود والله يا اخوى بوستاتك الواحد غصبا عنه بقراها حتى لو ما كان عنده تعليق عليها عشان الفايدة براها رحمة من الله . كثيرا ما قرأت لك وعرفت حاجات مفيدة جدا ما كنت عارفاها وكثيرا ما كتبت واستفسرت وشرحت حاجات مماثلة مرت بينا فى الغربة ولكن ؟؟؟ المهم فى النهاية الغاية الانت وصلت ليها وهى ان تفيد زملائك بما تعرفه ولا يعرفونه هم وهذا هو المطلوب من طرحك لاى موضوع . اذا قرأ لك خمسين ورد عليك عشرين فقط هذا افضل استفاد منك العشرين بالرد والاستفسار . خير من ان يقرأ لك الف شخص ولا يرد عليك واحد هذا يعنى انك تكتب كلام لا يفيد وعدد الزوار ما مقياس اخى ود قاسم ممكن الزائر يفتح البوست ويقفله فى نص ثانية ويزيد من عدد الزوار وما يكون استفاد من حرف كما نفعل نحن فى الاشياء البنلقاها خارم بارم ... لك التحايا ولاسرتك الكريمة ام وضاح
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: essam&amal)
|
الاخ ود قاسم انت لست فى حوجة لا ستخدام اي من تقنيات التسويق المستحدثة و المستجلبة, فقلمك كما اري يحمل كل القدرات على الصمود وعلى جلب الفائدة وعلى خلخلة الثوابت بل و الكثير من مواضيعك تحفز على اعمال العقل و من ثم ادارة حوار داخلى مع النفس عند التلقى يكون الحوار قد اكتمل مع النفس جين يشاركك العبض بانطباعاتهم حول موضوعاتك سواء اختلفوا معك فى الراي ام اتفقوا بدرجات حتما ستتفاوت.
وعشان اتتاكد بنفسك واشهد عليك المشاركين فى هذا الخيط ارجو الرجوع للوصلة ادناه
العبيط يفتح النار على نفسه ،، أمدرمان تلتهم الجيران
ده موضوع لود قاسم فيه اربعة مداخلات لم يرد الاخ ودقاسم على اي منها ففر الى الامام بفتح بوست جديد, و اعتقد ان بوستاته بائرة مما دفعه الى الاستفادة من الخبرات الساروية التى هو ليس فى حوجة لها.
لك احترامى فقط اكتب و جود ما تكتب ولا تابه الى من سيقرا.
بكري الجاك
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: essam&amal)
|
الاخ ودقاسم سلامي انا من اشد المعجبين والمواظبيين علي كتاباتك ولكني نادرا ما اشارك نسبة لانه كتاباتك شاملة وماقاعد تخلي لينا اي فرصة لاضافة المزيد
بالجد في ناس هنا في هذا البورد اللة يخليهم لينا لانه مفرقين علينا في الغربة الصعبة دي خاصة اذا كان الانسان كل فترة في بلد ومن هؤلاء انت وسيجمان ويازول يازول وتماضر وخالد الحاج ورجاء العباسي وبقية العقد الفريد.
تحياتي وتقديري
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: essam&amal)
|
العزيزة أم وضاح يعني شايفة معاي أنو المسألة بتاعة الأرقام دي ما مقياس ؟ ممكن نخلي وليداتنا يفتحوا بوستاتنا طول اليوم ونحقق ارقام قياسية ، لكن هل نحن نبني أم نهدم ، نفيد أم نعطل ؟ بس برضو يا أم وضاح أنا شايف إنو تقنية التسويق الجديدة دي فنانة بالجد ،، وسأطبقها ،، ما هي برضو طرح إنساني جدير بالتجربة والتعرف عليه ،، لك الشكر ..
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: ملكة سبأ)
|
الملكة وأنا لاقي أن تكون بنت أختي ملكة ،، أهلا بك ،، وأنا أيضا قارئ متابع لكل ما تكتبين ، لكن ليس لي في الشعر راي ، وأدع ذلك لأبناء أختي ، شتات ، معتصم ، المطر ، جورج ،، لكني أروج للطريقة التي تتبعها الزميلة سارة في تسويق مواضيعها ، وتكوين إحصائيات تجميعية ربما تنقل الكاتب إلى موسوعة جينيس ..
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: ودقاسم)
|
ود قاسم يا حبوب ممكن أشترك في المسابقة؟ لقد ظللنا ندخل في المواضيع و الناس بطريقة تووووووووش إلا مسابقة التلفزيون الوحيدة التي نستأذن للإشتراك فيها و هي أحق بتوووووش التوووووش ذاتو....نحن كنا بنقول شنو؟ آآي صاح البوستات بتاعة ود قاسم, بصراحة من يوم فوزية أدتك العين الحمرا و بقيت ما بتتكلم عن الزاج التاني نحن فتحنا ليك ياخي ليه؟ ما دام إنت عندك حق القول ما تفرح الكاضمين ديل بي كلمتين و ليك علي نرفع ليك من صفحة خمسين بس فك اللعب زي زمان.
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: ودقاسم)
|
صديقى ود قاسم امسك عندك تمانية انا بعد الملكة....
بالجد ياود قاسم انا نادرا ما اكون ما دخلت ليك موضوع...بس انا عادة يا اما فى الجامعة ما عندى عربى وانا باكره الكتابة بالانجليزى او اخرين/يات كتبوا/ن ما اود قوله...وانا عندى سكاتى ولا الكلام النى ومرات كتيرة باكتفى بالصمت عشان باكون ما عارفة اقول شنو لكن مجرد اسمك دعاية تسويقية لاى بوست غايتو انا عندى 15 زول/ة بادخل اى بوست يكتبوهو من غير تردد وما خاب ظنى الا قليلا وفى ناس لو كتبوا اسمهم بس.. ما باكون قادرة اقراهو
الله يعين
مودتى
هالة
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: خالد الحاج)
|
والله ياخال أنا جيت أقول الحكاية شنو .. لكن إنتو الفاتحة دي خاتنها وييييين .. ودي حكاية واحد بتاع مزاج أبوه مات .. وأيام العزاء كانت عصيبة عليه زي الزفت .. المهم آخر يوم لملم ليك عدة الفراش حتى باقي الأباريف وزعه لناس الحلة .. وخت كرسيه وست الحوش وبدأ يعدل في مزاجه .. جوه ليك جماعة يشيلوا معاه الفاتحة دقوا الباب سألهم عايزين شنو .. قالوا ليه عايزين نشيل الفاتحة .. وصاحبنا على حسب القرفة إتذكر ليك الفرش والمساند والكراسي ونسى أبوه الميت .. قام قال ليهم إنتو الفاتحة دي خاتنها وييييييييين ..
أكتب يا خال فنحن ننتظر منك الكثير ..
لك خالص مؤدتي ..
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: معتصم دفع الله)
|
ههههههه يا ود قاسم أرفع وربنا يعينك يا زول البورد دة عشان الناس تخش و تشاركك بوستاتك و طروحاتك لازم تكون
متبع سياسة تسويقية بحتة انت قايل انو الكتابات هنا لازم تكون هادفة عشان ما يلحقوها ليك بوستات طـه؟ لا كان كدة انت ما عارف حاجة يازول اهم حاجة تعمل دعاية ومسابقة وجوائز يعني ممكن تقول أقري بوستين و أحصل علي التالت مجاناً و كان لي زولتك سارة منصور والله مجتهدة و بتوصل حاجاتها ودة المهم لكن حجم الردود والقراء دة سيبو علي الله وربنا يعيييييينك يا حبيب
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: حبيب نورة)
|
ودقاسم ...
ود اهلى العزيز... حقيقة لما اشوف ليك موضوع فى الصفحة الاولى ...بتطمن...انه البورد بخير..وانه لسه بتيح للزول الخلاق ..او المناكف...او الحقانى..او الجرىء ...فيك انه يكتب...
ما بتحتاج لدعاية انتخابية ..ولا كوم ولا شلة ...انت كومك ...عملك وقلمك...ونحن ما عندنا خيار غير نقراك...
اكتب وخلى الباقى على " مشاهديا الاعزاء".....ههاهاهاهاها
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: Ashrinkale)
|
ودقاسم دعني هنا استعير مقولة للزميلة لنا مهدي في بوستك عن خالتي حوا وهي قالت اي لنا كرد لشكرك لها علي رفع البوست قالت بوستاتك براها شايلا حيلا وحقيقي انا من المتابعين ايضا لكتاباتك وربما قليل جدا اشارك فيها بالرد او السرد ..ولك لغة عالية ربما اسميها انا بمصطلح خاص جدا لغة تطريب بالاضافة لانها عميقة وانت لاتحتاج اطلاقا لمن يرفع بوستاتك او لان تكتب بوست بهذا العنوان والذي اظن انك لم توفق فيه حقيقة لغتك عالية جدا جدا واسلوبك شيق جدا جدا واظن ان الاخ ابوجهينة بنفس الطريقة له لغة عجيبة في سروداته التي يتحفنا بها هنا في البورد علي العموم اطرح انت افكارك وبي لغتك دي اظن وصولا سهل جدا وماتبقي متروك لفطنة القراء وبي المناسبة طرح فكرة ما اوقضية في هذا المنبر وكانت نتيجته استفادة لعضو واحد فقط اظنها محمدة كبيرة لانك في ختام الامر لن ترضي كل الاذواق فبالضرورة ان لاتخسرها كلها والحالة الاخيرة يمكن حسمها بدخول عضو واحد فقط لاغير فتكون حينها قد بلغت ماتصبو اليه ان كنت تبتغي الفائدة العامة القصة القصيرة اعجبتني جدا جدا قصة خالتي حوا وصراعها في اعتباراتي صراع مستديم بين علم وجهل الي ان تقوم الساعة وهي قد لامست فيَ عصب قضة مؤرقة تجاه مجتمعنا الصفوي او قول النخبوي والتي اراها ماثلة هنا في البورد لذلك اعجبتني ومازلت اتتبعها ومن هنا بقول ختنا في القائمة وتب ما عندك مشكلة بس انت اكتب انشاء الله تكتب وانت مخلوع من نطا ينط مفزوعا ودمت
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: ودرملية)
|
ودرملية أنت واحد من الذين سوقوا ( شبكة خالتي حوة ) وتسويق بي عقل ، مش أي كلام ،، أشكرك على المداخلة القيمة ، وأتقبل نقدك لفكرة العنوان ،، لكن العنوان لم يكن هدفا في حد ذاته ،، فقد قصدت من العنوان ومن البوست عموما أن أنبه إلى الطريقة التي تتبعها الزميلة سارة ، وأن أنبه إلى أن هذه الوسيلة ليست وسيلة سليمة وأنها مضيعة لوقت القاري وإرهاق لباندويدث بكري وأنها في النهاية لا تزيد شيئا من عدد القراء وعدد المتداخلين ،، بالرغم من أن غالبية المتداخلين لم يصلوا إلى الهدف الذي سعيت من أجله مما دفعني لاعتبار هذالبوست عملا سلبيا حين ظنه الكثيرين أنني اسوق لنفسي وأن بي حزن لأن بعض بوستاتي لا يقرأها عدد كاف ،، تسلم ود رملية ..
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: ودرملية)
|
ودرملية أنت واحد من الذين سوقوا ( شبكة خالتي حوة ) وتسويق بي عقل ، مش أي كلام ،، أشكرك على المداخلة القيمة ، وأتقبل نقدك لفكرة العنوان ،، لكن العنوان لم يكن هدفا في حد ذاته ،، فقد قصدت من العنوان ومن البوست عموما أن أنبه إلى الطريقة التي تتبعها الزميلة سارة ، وأن أنبه إلى أن هذه الوسيلة ليست وسيلة سليمة وأنها مضيعة لوقت القاري وإرهاق لباندويدث بكري وأنها في النهاية لا تزيد شيئا من عدد القراء وعدد المتداخلين ،، بالرغم من أن غالبية المتداخلين لم يصلوا إلى الهدف الذي سعيت من أجله مما دفعني لاعتبار هذالبوست عملا سلبيا حين ظنه الكثيرين أنني اسوق لنفسي وأن بي حزن لأن بعض بوستاتي لا يقرأها عدد كاف ،، تسلم ود رملية ..
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: Tumadir)
|
بت الخالة العزيزة والله أنا ما شايل هم ( مشاهديا الأعزاء ) لأني عارفهم أعزاء ، بس أنا أعتبر نفسي أول من تعرّف على هذه التقنية ، وأول من انتبه لها ، وأحاول تقييمها ، والاستفادة منها ،، بس شايف كل الناس نصحوني بعدم استخدامها ،، يا ربي يكونوا عارفين سلبياتها وما قادرين يقولوا ،،
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: معتصم دفع الله)
|
معتصم الفاتحة بقت تترسل عن طريق الإي ميل ، لا بشيلوها ولا بختوها ،، ويمكن تجيك ومعاها فيروس ، وهذه تقنية جديدة يا معتصم ،، بس تعرف التقنية التسويقية الجديدة للبوستات شايف الجماعة كلهم ما مقتنعين بيها ،، وهؤلاء يومنون ببعض الكتاب ويكفرون ببعض ،، لازم أي تقنية جديدة ناخد بيها كاملة ،، لك الود الصافي ،،
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: خالد الحاج)
|
خالد الحاج يا أكبر أبناء أختي قلت الدروشة بعد الكبر شينة ؟ المشكلة يا خالد في حاجات كتيرة تدفعنا إلى الدروشة ،، والكبر ضعف ، لم نعد نستطيع المقاومة ،، لكن لمّن نتب تبّتنا بتبقى شينة ،، عارفك عاجباك التقنية التسويقية الجديدة ، بس مستحي تستخدمها ،، يا أخي بلا عقد معاك ،،
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: ودقاسم)
|
أبو قاسم ...
لك التحية الصباحية يا صباح الخير ..
والله ما ليك حق تقول الكلام ده ،،،
أولاً نحن ما قاعدين بس قول عووووووووووك ، وزي ما قال ليك العزيز جداً ما ظاهر جداً أخونا الفنان المرهف ترهاقا عظيم النوبة ،،، جاهزين جاهزين (بس ما ألت الجماعة ديك).
وبعدين يا أخوي إنت شايل هم القراية ما لك ،،، طبعاً إنت ماك قديم ومن زمن القراية أم دق ،، هسع يا يابا القراية ما بقت (القراية أم كليك) ما كليكتين ماوس والعداد يديك قراية والموضوع يكون مكتوب على فقرات في ملف وورد وكلها كلكات وcopy ، و Paste ووكيك على Post والموضوع يمشي زي الحلاوة ويبقى البوست حقك فيه 99 قراية و33 مداخلة خلال ربع ساعة ويكون قاعد في القمة شامخ يقول يا غربتي ،،، ولا من شاف ولا من درى... وعم بكري بي طريقته مع الباندوث والبنتيوم 4 والهارديسك ،،، ويكورك زي ما عاوز ،، والأهم من ده كله تدي صورتك لي أخونا تمبس يعلها شوية رتوش على أيتها برنامج وينزلها ليك أهم حاجة بي خلفية صفراء زي لون حيط أبو غريب ودي مهمة جداً عشان تديها أبعاد غريبية وتكون لافتة للأنظار.
نحن يالحبيب في عصر التكنولولجي والعولمة وأي نقد يبقى حسد وعلى قول جيرانا المصاري بس بتصرف (لمعني يا جدع) طبعاً (بدل رقصني ياجدع)، والداير ارقيص الليرقص...
وبعد ده خلي أتخن تخين يفتح خشمه علي بالطلاق نقوم ليك عليه ونسويه ليك حاسد وبغران ومن نا الما بتلحقه جدعه ،، وشوفت نطلع محسود مقصود وأنه الدنيا والعالمين ديل بيتأمروا عليك ودايرين يجيبوا ليك الضغت والسكري ويفلقوق بالحجار،، وا شريري ليك يا ود قاسم .
والله يخلي عمتي أمريكا ..............
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: Al-Shaygi)
|
ودقاسم انت بتلعب علينا ولا شنو ....
شابكنا حاستعمل تقنية سارة منصور الجديدة وفي نفس الوقت انت بتجرب فينا تقنية خصوم سارة منصور الجديدة ...
يعني بس استعمال اسمها في العنوان دي تقنية جديدة ...
لكن د كلو كوم ياخوي وتقنية بشري سلييمان دي كوم غايتو لو وصلت بيك الدرجة للكوم التاني حاشن عليك حملة مقاطعة من الان ...
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: Abo Amna)
|
أبو أمنة من حقي أن أستفيد من كل التجربة الإنسانية ،، وهناك عدة تقاوى أقصد تقنيات عرضت من خلال هذا البوست ، وهناك ما يمكن أن يبتدعه الزملاء ، وأنت الآن نبهتني لتقنية إضافية ،، ولك أن تسجل هذا الاكتشاف باسمك ،، بكري لازم يعمل لينا تسجيل براءة داخلي لاكتشافاتنا ،، ويكون من حق العضو أن يبتدع هو بنفسه أو يكتشف من خلال متابعته نظرية جديدة لم ينتبه صاحبها لتسجيلها ،، والتجربة لابد منها يا أستاذ جعفر ، وإلا كيف يتم إثبات النظرية كنظرية ؟؟ تسلم ..
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: Al-Shaygi)
|
الشايقي العزيز كيفك ، ووينك ؟؟ تعرف في بعض الناس بيحبوا يسووا شغلتهم براهم ، وما بيدوا فرصة لأي زول يمد ليهم يد المساعدة ، وكمان ما بيقبلوا أي اعتراض أو نقد ،، الله يسلمك منهم ،، أنا ديل لو لقيتهم في البورد ما عندي شغلة بيهم ، بخليهم يعتلوا براهم ، وأبعد بعيد ، واقول ليهم الله يعينكم ،، وفعلا اللا يخلي لينا العمة أمريكا ،،
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: ودقاسم)
|
عزيزي ودفعتي ودقاسم السلام عليكم اكتب ذي ما انت عايز واتحفنا ونحن نقرا ونتمتع واهلنا قالوا المابيعرف الصقر يشويه فقلت أن هذه تقنية تسويقية جديدة يجدر بي أن أتبعها في بوستاتي البائرة ،،، بائر يبور فهي بائرة بوراً فللبائرات سوق في البورد (واحدة بائرة في البورد وصلحوا) احمد حنين وتمبس الدايات قالوا علي داية أحي انا ماقالوا علينا داية وووب علينا تمبس وودشندي ووووب علينا في الدايات علينا ماقالوا عليك حنين نان وين الحنيه الدايات في ام درمان ووووب علي الباشكاتب صديق الموج ( برافو )
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: ودقاسم)
|
ود قاسم...أولا: كثيرون يقرأون لك للأستفادة من المادة وهي في الغالب مفيدة كما عودتنا...أما مسألة الرد دي إنت ما تهتم بيها لأنو في الغالب الفائدة وصلت لمن يريدها تعرف يا أبا القاسم..أنا أقرأ لبعض الكتاب هنا بمنتهي الأنتظام..يعني ما ممكن يكون عندهم بوست ولا أقرأه...فأنا فعلا رغم سنواتي ال 49 لكني تعلمت الكثير من هذا المنبر..ولكن نادرا ما أكتب أي تعليق..فأنا لا أبحث عن الشهرة( او أنا هنا) ثانيا: مسالة رفع البوست فعلا مهمة..وأنا شايف لأصحابك وقراءك تعهدوا بها...إبقي دي مشكلة إتحلت ثالثا: لزيادة عدد القراء...أكتب تحت إسم مؤنث..و عينك ما تشوف إلا النور
تحياتي وأستمروا في إمتاعنا يا مبدعي البورد
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: Osama Mirghani)
|
ود قاسم الاسد الهصور كيفين مواضيعك قاعدة تبور انت طالق فيها البخور وبتهدى للزوار زهور انا قاعد اعبر ليك بحور وبنكت بوستاتك من اخر السطور عاوز تقلد سارة منصور البت العاملة الكجور وانا بها بقيت مسحور بس لو ما هبشت لى ذوات الخدور رجوية غزال العتمور وندى وراوية شبيهات البدور انا كتير بكون مسرور وسلامى ليكم فى اخر السطور
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: alsngaq)
|
السنجك مشتاقين هذا البوست لم يؤت أكله ، ولم يصادف هدفه ، آمل أن يقرأه بعض الزملاء قراءة جديدة ،، هل التقنية التي تحدث عنها البوست موجودة أم لا ؟ هل استخدامها مفيد أم لا ؟ هل هي تقنية تفيد منبرنا وتجلب لنا مزيدا من المتابعين أم أنها تقنية منفرة ؟ عارفك يا السنجك قلبك حار وما بترضى الشينة لأخوك ،، لكن أنا أيضا لم أقصد الجري وراء الشينة إنما قصدت أن أنبه الزميلة سارة ، وأنبه الاخوة الكرام لعدم اتباع مثل هذه الأساليب ،، لأنني أجد نفسي شخصيا أنفر من مثل هذه الطريقة ، وأجدها تضر باخونا بكري ،، لذا أردت أن أطرح المسألة هنا للحوار ليقول الناس رأيهم ،، لكنهم للأسف ظنوا أنني أريد أن أسوق لنفسي أو أن أهدم آخرين ،، أنا فقط أتحدث عن ظاهرة أرى أنها غير مرغوب بها وبيني وبينك تشاورت مع بعض الأصدقاء ووجدتهم متضايقين من استخدام هذه الطريقة ، فقلت أن المؤمن مرآة أخيه ، فلنفعل،،
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: Ahlalawad)
|
أبو قاسم العزيز
حكيم البورد كثير من القراء لا يعقبون على ما يقرأون من مواضيع وهذا لايعنى بواره ولو أنه يقصر من عمر البوست ولكن نؤكد لك ان كل مواضيعك تجد التفاعل والقبول والإستحسان من كل المتواجدين وانا على راسهم....... فقط قد يكون قلة هم من يضبطون تلميحاتك وإشاراتك الضمنية..........وهؤلاء لا أعرف إن كنت انا منهم أم لا .....
على العموم انا أشك فى بورداب الرياض ديل ..... ممكن بدعوا فى مقام سيدنا إبراهيم لبوستاتهم
دمت أخى ود قاسم
| |
|
|
|
|
|
|
Re: حتى لا تبور مواضيعي سأتبع طريقة الزميلة سارة منصور (Re: ابوحراز)
|
أبوحراز عليك توقيعك ده جبتو من وين ؟ قال نبقى أصدقاء قال .. أنا في فترة غيابك اشتغلت في العرس والطلاق والحب شغل صاح ،، وبيني وبينك أنا استغليت فرصة غيابك ، بس الجماعة ما جايبين خبر ،، وتلك الفترة كانت فترة تسويق دسمة لبوستاتي ،، بس أو ل ما رجعت إنت يا أبوحراز أنا زغت من الحتة دي ،، وبعدين خايف منك عديل كده يا ابوحراز لأنك ممكن توصل الشمار ،، قالوا لي إنت من ودربيعة ،، أما حكاية صحون الجرجير دي فهي ظريفة جدا ،، قلت لي قال تغيير قال ،، لك التحية والود..
| |
|
|
|
|
|
|
|