اعتدنا أن نتابع كتابات شيري كل يوم من خلال البورد ، وقد عودتنا شيري على المشاركة الفعالة والنشاط الدؤوب ، لكن شيري لم تطل علينا في يوم الجمعة 11-7-2003 م ، وعند لحظة افتقادي لها طرأت في ذهني إحدى عاداتنا الجميلة والتي ظللنا نحافظ عليها حتى في منافينا ، ألا وهي ظاهرة احتضان العائلات السودانية للعزاب الذين يمتون إليها بصلة ما ، وتصورت أن عزابة الجمعية انقسموا على أكثر من بيت ومن ضمنها بيت ابو شيري ، وأن شيري اضطرت أن تنصاع لأصالتها وأصالة أسرتها وأن تقوم بواجب الضيافة نحو هؤلاء العزاب ، فمنهم ابن العم وابن الخال وابن الجيران في البلد وربما أصحابهم الذين لا يعرفهم أبو شيري ، وقلت أكيد الراجل جهز اللحم السواكني المقطع كبار كبار وجاب البامية والشمار ، ودقق القمح في الطاحونة لزوم القراصة ، وقامت أم شيري من النوم في الصباح الباكر لتجهز ما لذ وطاب لأولاد إخوانها وأخواتها ، وطبعا صحّت شيري من النوم ، وشيري أبت تقوم في الأول ، لكن أمها أدتها نهرة كدة ، فقامت وهي فزعة ، وبعد أن أعدت حالها دخلت المطبخ مع أمها واستمعت لتوجيهاتها ونفذتها حرفيا ، وبعد صلاة الجمعة بدأ الجرس يرن كل شوية يأتي فوج والمكيفات نهدر ، وريحة اللحم تملأ أرجاء الشقة رغما عن بخور التيمان المنطلق بصورة مستمرة لمكافحة ريحة اللحم والتوم والبصل . المهم الجماعة ضربوا الغدوة الفاخرة ، واتونسوا ونضموا في كل المواضيع ، وقاموا صلوا العصر ثم بدءوا بالانسحاب إلى قواعدهم سالمين ، بينما عكفت شيري على تجفيف العدة التي غسلتها الشغالة السيريلانكية وإعادتها إلى الدواليب . ثم جلست أمام التلفزيون وتناولت كباية شاي ، لكنها لم تجد لديها مقدرة أو مزاجا لملامسة الكي بورد ، وكانت في داخلها تقول شكيتكم على الله يا عزابة الجمعية .
الضيوف ، عموما واستثناء هذه الجمعة اللي هي مرت امس ، لم يعطلوني عن دخول البورد مع انهم كل جمعة وهذا مايحدث على الدوام اذ اعيش انا وصديقتي ام مازن ، حينما يزنقونا الضيوف في زنقة لا يعلم بها الا الله وكمش تروح وكمش تعدي من فوق رؤسنا ودعوات ماحقات ساحقات طيبات تصيبني انا وام مازن ومن مية قلوبنا .. نكتم في انفسنا ونعدي الموضوع عادي يا لهوي من يوم الجمعة وياخرابي من اللي بحصل معاي يوم الجمعة ومع ذلك نادرا ما اتخلى عن كي بوردي حتى في الايام الحالكات مثل هذه انهم لا يسمحون لي بالاقتراب من الطبيخ لكني بالتاكيد اعمل مساعدة لمساعدة يعني مساعدة صغيرونه تقطيع البصل ، تقشير التوم مراقبة البصل حتى لا يروح في ستين داهية رغم هذه الشغلانه فشلت فيها كثيرا لكن اهو ، لا احد غيري فاضي يمسكونه هذه الشغلانه هل تدري انني صنعت يوما سلقت الباطس ثم عجنتها بالبيض ثم لم ارى اي نفاج يخارجني منها فوضعتها على الفرن واضفت اليها التونه تخيل ، انا لم اكلها لاني اعرف انها عك في عك غافلت امي ووضعتها في المائدة في ذاك اليوم الزحمه دون ان تدري امي انني عكيت وصنعت هذا الطبق الذي لا اعرف اصلا كيف يؤكل .. وبما انني لم ابالي في الذي سوف يصيرون اليه .. عليه توكلت الحي القيوم ودسيته في الصينيه .. كنت اتوقع النتيجه غير ومقصدي منها غير وتحصل الجميع على نتيجه غير لن تصدق انهم حتى اليوم يسالون عن هذا لطبق امي لم تشاهده ولم تراني اعمله وهم لم يصدقوا ان ذاك الطبق كان من صنع يدي وحيات عيني وامي ايضا لم تراني اصنعه وبالطبع لم تكن لتراني اضعه خلسه على الصفره فالبتالي ، لا احد يعرف وصفته بالضبط فهم يتحدثون عن شيء قالوا انه لذيذ جدا لا يعرفون طعمه بالضبط حتى يخمنوا مكوناته وقلت لهم انني صنعته ، لكنهم لم يصدقونني لان المكونات التي ذكرتها لا تمت الى ما تذوقونه بصله ، وساعة ان قلت لهم دعوني اعمله مرة اخرى مع انني لا اعرف كيف اضبطه لان طريقته كانت مجنونه وكانت عشوائية وهم لا يمكن ان يثقوا فيني ويعطوني هذه الفرصه فضااعت حقوقي وضاعت هذه الاكله شفت كيف انا مظلومه
07-12-2003, 03:45 PM
shiry shiry
تاريخ التسجيل: 07-05-2002
مجموع المشاركات: 3511
كنت متأكدا أن شيري ستزين هذا البوست بهترشتها الجميلة ، لكني أرغب حقيقة في أن ينحى الآخرون إلى نقد الظاهرة وتحليلها على أنها ظاهرة اجتماعية سودانية ، وغير موجودة عند الشعوب الأخرى ماهي إيجابيات وسلبيات هذه الظاهرة ؟ ما هي نتاجاتهاالأدبية ، الفكاهية ، الفنية ؟ ما هي نتاجاتها الاجتماعية ؟ هل تؤدي دائما إلى مزيد من التقارب ؟ هل يحدث منها نوع من النفور ؟ هل لذة وطعامة طبخ الأم يسهم في سرعة خطوبة بناتها ؟ أو أخواتها ؟ هل تؤثر على دخل العوائل سلبا وعلى دخل العزاب إيجابا؟ هليحسبها العزاب ضمن ميزانيتهم ؟ عندما يتحول العازب إلى أسرة هل يعتبر ذلك دينا في رقبته ؟ والكثير من الأسئلة آمل من الزملاء المشاركة خاصة في المنطقة الغربية من المملكة العربية السعودية يلا يا عمدتنا قرشو
07-12-2003, 04:52 PM
Shinteer Shinteer
تاريخ التسجيل: 09-04-2002
مجموع المشاركات: 2525
الزميل ود قاسم صباح/مساء البروليتاريا المتخشبة في بِرْكة الانتظار. ده لزوم الهترشة أسئلتك متعددة ومتشعبة وتحتاج لعالِم اجتماع للإجابة عليها (في عالِم زي ده). أما اللّمّة والهيصة والعلاقات الاجتماعية التي اشتهر بها السودانيون دون غيرهم .. فلها إيجابياتها .. وفي حقبةٍ ما من تاريخ السودان كانت كلها إيجابيات .. والآن مع ظهور جيل شيري ظهرت سلبيات هذه العادة لأن الزمن اختلف زي ما بيقولوا. وفي تقديري سيكتشف جيل "الزمن اختلف" مقدار الامن الذي توفره هذه العادة
كتب استاذنا محمد هاشم عوض عن دائرة المهدي بإيجابية لا تروق لأبناء "الزمن المختلف". وقد "تونست" مع استاذي محمد هاشم عوض ذات يوم وسألته عن مدي إيمانه بإيجابيات مؤسسات مثل دائرة المهدي؟؟؟؟؟؟؟ فكان تركيزه على عنصر الأمن الجماعي "مش الاجتماعي" مدخلاً لإيجابيات هذه المؤسسات .. واعتقد أن "اللمّات" التي اشتهر بها السوانيون ما هي إلا توْق وبحث عن الأمن الجماعي. مذهب الفردانية يا زميلي ود قاسم مذهب فيه الكثير من الوهم .. ولا يطمئن له إلا من أمن صروف الدهر وذل الحاجة. والدنيا أرنب أيها الزميل ابن قاسم .. تسكها تمرق منك جري .. تلبد ليها تقوم تنوم فتنقض عليها من اضيناتها .. لكن تاني ستفلت من بين يديك. أرجع لاستاذي محمد هاشم. لقد نفى لي نفياً باتاً ما يثيره البعض ممن لا يرون أدوات تحليل غير الأدوات الماركسية (يا زميل) .. ويتجاهلون واقع الماضي وكل معطياته. وبخبرته العملية .. وتجربته الحياتية وجد أن عنصر الأمن الجماعي الذي وفرته مؤسسات كدائرة المهدي سوف لن تحققه اية مؤسسة "حداثية"ه ياخي أنا نعست وما عارف ح أكتب شنو. المهم اللّمّة بتاعتنا لو انقرضت نحن انقرضنا
الزميل شانتير لك التحية والله هترشتك بصراحة حلوة ولذيذة وذكرتني أيام الزملاء ، وقتلهم المواضيع التي تقع في يدهم ، بس الإنفرادية لدى كثير من الشعوب تولد الإبداع العلمي ، لكن السودانيين دائما يتولد إبداعهم من الجماعية وأعتقد أن النفير الذي اشتهر في أوساط القرويين السودانيين ودرسه علماء الاجتماع هو فلسفة سودانية بحتة وقد نتجت عنه ابداعات فنية وأدبية عديدة لكن ما الذي جعل البروفيسور محمد هاشم عوض ينتهج المنهج الأنثروبولوجي لتقديم مرئياته حول دائرة المهدي ، أليست هي شكل من أشكال الجماعية الاقتصادية ، وقد حكى لي أحد أجدادي أن جد السلطان علي دينار عربي ينتمي إلى بنو هلال ، وقد قدم إلى دارفور وسكن في أطراف الفاشر ، وكان السكان يعملون في النشاط الزراعي بصورة جماعية ويحصدون ويجمعون الحصاد في مخازن السلطان ، ثم يأخذون منها على قدر حاجتهم ، ويظلون فترة طويلة من اليوم أو من السنة دون عمل ، ونظرا لعدم حاجتهم تركوا بعض المساحات بورا ، فقال لهم العربي الهلالي لماذا تفعلون ذلك ، قالوا نكتفي بزراعة أرض السلطان وسعة مخازنه . قال لهم أملأوا مخازن السلطان من عملكم وقت الضحى وأملأوا مخازنكم من عملكم في العصرية ، ففعلوا ، فامتلأت مخازنهم ، فلم يحتاجوا للأخذ من مخازن السلطان ، فظنهم السلطان غير راضين عن سياسته ، فاسنتدعاهم وسألهم ، فأخبروه بخبر الرجل ، فقال أئتوني به ، فلما جاءه ناقشه في أفكاره فأعجبته ، فعينه وزيرا له ومستشارا وزوجه ابنته وكانت هي جدة السلطان علي دينار
أيه رأيك أنا كمان هتراش مش كده انها صورة من الجماعية سأواصل
07-13-2003, 01:24 PM
ودقاسم ودقاسم
تاريخ التسجيل: 07-07-2003
مجموع المشاركات: 11146
أحد الجوانب السلبية في غداء العزابة يوم الجمعة هو نظرة العزابة للمسألة من جانب واحد ،أي انهم لا ينظرون إلى جانب الأسرة التي يزورونها ، ما هي ظروفها ، قد تتقبلهم الأسرة ولكن قد تكون هناك اشياء عديدة لا يراها الزائر ، يعني مثلا ممكن تكون ست البيت تعبانة ، وتعبانة دي مش لازم تكون عيانة وممكن تكون زهجانة ، وممكن تكون قرفانة ، أو زعلانة من أبو الأولاد ، وممكن يكون ابو الأولاد مافي في جيبوا غير حق البنزين ، وممكن يكون مرهق وما قادر على الونسة والجلسة الطويلة، وممكن الأولاد يكون عندهم مذاكرة ، أو واحد منهم تعبان شوية ومحتاج من الأسرة اهتمام زيادة والعزابة بيفكروا فقط انهم يحلوا مشكلتهم ناس المنطقة الغربية بالسعودية شاركونا الرأي والتجربة
ومن طبايعنا نحنا السودانيين الواحد يقول ليك نحنا نمشي ليهم من غير مواعيد عشان من يخسروا لينا يعني ناكل اكل البيت وفي اغلب الاحيان ما يلاقوهم يكونوا معزومين او حتي في المستشفي وتجي راجع البيت وتلقي الكتابة علي الباب حضرنا ولم نجدكم ويكونوا اكلوا مقلب.. وايضاً كما قال الاخ ود قاسم احتمال ناس البيت اليوم دا ما عنهم مزاج يتغدوا او حتي عايزيت يتغدوا بي ملاح بايت او سندويتشات .. انا شخصياً حصلت معاي مثل هذه المواقف وكنت مفلس الجيب ولا قرش ما فيهو اها بديت اتحكحك ومشيت للمرا وقلت ليها كدي شوفي لي حاجة من القروش القاعدة تسرقيهم مني خلينا نجيب لينا غدا من برة الناس بكشفوا حالنا .. اها في الاول نكرت وتحلفت اخربني وحات الرسول ما عندي ... لكن في النهاية قالت لي ديل قروش جارتي ممسكاهن لي وطبعاً عملت فيها اني صدقتها..... وهذه الاشياء تكاد انها بتحدث اسبوعيا في بلاد الغربة وخاصة غربة جدة المخرومة خرم ما بتسدا
07-13-2003, 04:02 PM
ودقاسم ودقاسم
تاريخ التسجيل: 07-07-2003
مجموع المشاركات: 11146
العزابة بيفتكروا أنو ليهم حق مقدس لا يمكن المساس به ، ومن يقصر فسيتعرض لطول لسانهم ، وطبعا عارفين أي واحدة بتعرف تطبخ وللا لا ، وطبعا في بعضهم عزابي بصورة مستمرة ، عاصر بعض النسوان وهن عائس وانتظر عزابي لحد ما شابن وبناتهن عرسن أريد أن أسمع رأي عزابي مخضرم
07-13-2003, 04:27 PM
shiry shiry
تاريخ التسجيل: 07-05-2002
مجموع المشاركات: 3511
شايفاكم ماخليتوا لينا حاجة نتكلم فيها لقيتنوا مشغولة بي هناك
بس عارف يوم الجمعة لا يمكن ابدا ان تتخيل كم هو مهلك ومتعب بالنسبة للمراة وانا شخصيا لا استثني اي اسرة سودانيه من متاعب يوم الجمعة فالتجربة عندي في هذه اليوم بالذات فتقريبا كثير من الاسر السودانيه تجاورنا ، والكلام مرات بجيب الكلام والونسه بجيب الونسه ونعرف في كل مرة ان ناس فلان اليوم كان متغديين معاهم ضيوف وناس فلان برضو وناس فلان برضو ومع ذلك انا احب جدا لمة الناس على الاقل تكسر الروتين الذي صلبنا انفسنا فيه طوال ايام الاسبوع رغم كل التعب الذي نضوقه في هذا اليوم الا انه من يظل من احلى الايام لانه فقط يوم مميز بالضيوف
07-13-2003, 09:22 PM
ودقاسم ودقاسم
تاريخ التسجيل: 07-07-2003
مجموع المشاركات: 11146
ولكن هل للعزابة حق مطلق في إشغال الأسر يوم الجمع ، أو في الويك إند عموما ، عشان ندخل معانا اخوانا في أمريكا وأوروبا ، وهل هم يمارسون نفس العادات التي يمارسها السودانيون في جدة
زمان عندي قريبي مدرس كان معار في سلطن عمان ، الكلام دا في بداية السبعينات ، رجع في إجازة وحكى لينا أنو سافر مع شلة عزابة لأكثر من ثلاثمائة كيلو عشان ياكلوا كمونية من عمل إمرأة
07-14-2003, 03:50 AM
abuguta abuguta
تاريخ التسجيل: 04-20-2003
مجموع المشاركات: 8276
الاخ ود قاسم تحياتى هترشتك ظريفة وحلوة عشان انا الايام دى متظلم من الاسر ما عرفت الحكاية دى لكن قبل يومبن قعدت لى فى راسى اصلى ياسيد امى ليك انا وسط العذابة لابس نمرة 10 يعنى خريج وجائى الخليج ومهندس شغال فى شركة انترنت لما جيت ايامى الاولى كل يوم معزوم فى حتة والاسر تتشاكل فى وانا اتعزز ومرات اكون مداوم يوم الجمعة والعذابة بكونو معزومين اجى الساعة خمسة القى العمود قاعد مصنقر اتغدى فى امان الله واخاد لى نومة واسالهم دا اكل منو السمح دا يردوا على اكل ام فلانة مثلا(ام شيرى) عشان انا الطالع فى الكفر ,وعيونى فى القمر, ولابس الرقم الخطر ,وكنت مروق وعائش على هذه النقمة 3 سنوات بس السنة الماضية زرت واحدة من خالاتى من احدى مدن المملكة الاخرى وعينى وقعدت على بنتهاوهى على طول عملت لعيونى زغللة وشاع الخبر باننى خاطب بت فلانة ومن يومها مافى اسرة عزمتنى وكلهن قريباتى لما يعزمو العذابة الا ان اكون موجود صدفة لكن لا عمود ولا زاوية بس الجمعة الامس دى عرفت السبب اتصلت على بيت خالتى ام الامورة عشان اسلم عليهم لقيتهم عازمين عذابة بلدهم,قالت لى ياريت لو كنت معاهم ...وقلت فى نفسى وجدتها وجدتها لو كنت عارف كدا كنت عملت الخطوبة سرية. وتسلم ياود قاسم
07-14-2003, 08:22 AM
shiry shiry
تاريخ التسجيل: 07-05-2002
مجموع المشاركات: 3511
ماتخاف ياسيدي تعال لينا في جدة ونحن بنعزمك بس المشكلة بعد كده موش فيك انت المشكلة في اهل خطيبتك وخطيبتك مع اني البت الوحيده وسط غابة من الاولاد لكن برضو ما بتسلم الجره وفعلا هذه الظاهرة الجديده تستدعي الانتباهة ، لانها طفت على السطح قريب جدا فالمعروف ان الغالبية العظمي من العائلات السودانيه التي استقرت هنا في الخليج ، بدات التفريـــخ هناك في منتصف السبعينيات وبصورة اكثر تفريخيه في بداية الثمانينيات وبنظرة سريعة نجد ان هذه الاسر ، اصبحت تحترف الغربة اي ، ان معظم هذه العائلات انقطعت زياراتها للسودان وفيما بعد اي في التسعينات بعد ان اصبح عمر الاولاد على وش جامعات فكان لابد ان يرجعوا للدراسه على العموم كان لابد ان يعودوا اخيرا الى مستقرهم هنا في بلد المنافي التي اصبحت هي الوطن ، واصبح الوطن هو المنافي وفرخت الاسر ، كميااات من البنات وفرخ السودان كميات من الاولاد فيرسل الى هنا الاولاد ، يجمعوا قروش العرس ، ثم يرجعوا لتزوجوا من هناك وهنا في الخليج نسبة الى ان مسالة (التشاوف) صعبة شوية كان لابد ان تضيق فرص البنات اللي على وش زواج ايـــن الحــــل ؟؟ فكان لابد ان تلجأ الامهات الى هذا التكنيك الجديد وهو (التنمير )على عاذب ، ثم الانقضاض عليه على حين غفلة منه ، ثم على بيت العدل هل تدري انك فعلا ضربت على الوتر الحساس يا ابو قوته هذه الظاهرة جديده لنج ، لحظتها انا وام مازن ولم نكن نعرف انها ظاهره ، لكن نحن نساء ونعرف بالفطره كيف تفكر الانثي ، او كما تقول امي شـغل نــــسوان
07-14-2003, 09:06 AM
benyya benyya
تاريخ التسجيل: 03-09-2003
مجموع المشاركات: 774
الكثير من الشعوب العربية وغيرها تعتبر العزابة شر لا بد من الابتعاد عنه ولا يصح قيام علاقات ود بينهم وبين الأسر ، ناهيك عن اتفضلوا وتعالوا اتغدوا معانا ، أو يلا ياشباب هاكم العمود ده ، فلماذا نحن السودانيون نطبطب على أكتاف عزابنا ، ونخطب ودهم ونوفر لهم هذه الخدمة المجانية ، هل نحن الشعب الوحيد الذي يستحق عزابه أن يتم معهم تبادل الثقة ، هل نفوسنا نحن السودانيون نقية ولا تشوبها شائبة ؟ ما هو الإحساس الذي يحسه العزابي حينما يلج إلى بيت الأسرة فتقابله عند الباب رائحة العطور التي ارتبطت عندنا بالمرأة المتزوجة ؟ الدلكة ، البخور ، الدخان ، كل هذه الأشياء تثير مكامننا نحن السودانيون إذا كنا نساء أو رجالا ، متزوجين أم عزاب ، لكننا ننظر إلى أنفسنا أننا متجردون عن إثارة المكامن هذه ، وندعي أننا محل ثقة ، وقد نكون أفضل من غيرنا ، لكننا بشر ، وكثيرا ما يقع المحظور أما بناتنا اللائي لا يجدن طريقهن إلى الخطاب لأنهن محبوسات في داخل الشقق فلن تنفعهن زيارات العزاب لنا . وأعتقد أن نسبة ليست كبيرة تتزوج من بنات الاغتراب وغالبية الأولاد العزاب يلجأون إلى الزواج من بنات عشن وتربين في السودان باعتبار أنهن أكثر تجربة وانجح لإدارة البيت ، كما أنهن لسن بمدللات كبنات المغتربين وبالرغم من أن الأمهات ربما يسعين لإيجاد الخطيب المغترب لبناتهن إلا أن بحر المغتربين عموما لا يوجد فيه صيد ثمين سأواصل
07-14-2003, 11:49 PM
الليندي الليندي
تاريخ التسجيل: 05-27-2002
مجموع المشاركات: 1188
ودقاسم، بقيةالشباب ، شيرى بالمناسبة كنت بقرأ الهترشات وبضحك لحدى ما لمستو الوتر الحساس موضوع التنمير ده وبحكم تواجدي في جدة والحمد لله جيتها قبل ثلاثة سنين فقط رغم أنو اهلى ليهم 15 سنة يعنى انا تربية حبوبات والحاجة الملاحظة فعلاً قضية التنمير دي فبحكم العادة السودانية نلقى الام السودانية قلقة جداً على بناتها عايزها تدخلهم بيت العدل عشان تحس أنها اتمت دورهاونسبة لعدم التشاوف زي ما قالت شيري عندنا هنا في السعودية بتلجاء لحيل وخصوصاأنو الشباب السودانيين عندهم راي في السودانية المتربية هنا بأنها مدلعة وثقافتها ضحلة لكن كمان الشباب لاهنا بعانوا من فقد الانثى والنساء فهموا الحاجة يعني ممكن الواحد يقع لمجرد حوجتوا لعلاقة وتركب في راسو ويتزوج ويمشوا حالوعموما نحن لينا مواقف كتيرة من النوع ده شيء تلميحات ولمن تتداغل يقولوك بتي بتسال منك وتعال اشرح ليها ووحدات يختوها ليك عديل لمن تقرب تجرى برجلينك والموضوع ده ظاهرة افرزتها الحالة الاقتصادية السيئة اذا في السودان ولا في السعودية ويبدو لي ده حق مشروع للنساء خوفهم من بورة البنات وبالنسبة لغداء الجمعة والعذابة فبرضوا نحن الشباب متضررين منو بالمناسبة انا برضو ود واحد وسط غابة من البنات فشيء مراسيل للدكان وشيء فرش الصفرة وشيل الصحانه والحاجة الصعبة كب الشاى طبعاً يجيبوا ليك الشاي براهو واللبن براهو والسكر براهو وتقعد تسأل كم ملعقة سكر وكم ملعقة لبن والجماعة يتكيفوا ويرد ليك بعد تفكير ملعقة لا خليها ملعقتين وده كلو كوم ولازم تقعد مع الضيوف كوم وطبعاً ما بتكون في مواضيع مشتركة وتلقى الكلام كلو فارغ عن الشغل وصعوبتو وعن الكفيل ومشاكلو ولو في واحد شغال مع امير بتخيل نفسو امير ويقعد يختلق ليك في بطولا ت وهميةوغايتو وانت ما عندك حل غير تتحمل وتتحمل ومتين نتفك منك يا غربة
07-15-2003, 10:59 AM
ودقاسم ودقاسم
تاريخ التسجيل: 07-07-2003
مجموع المشاركات: 11146
وبعدين العزابة عايزين يختتموا الجلسة بالسلام على أم العيال ( وطبعا بناتها ) وأم العيال تكون متضايقة جدا من هذا السلام لأنها لابسة قميص بيت وريحة البصل واللحم فائحة والشعر منكوش والحال كلو ما بيسر ، والبنيات لو ما جو سلموا الجماعة ما بيسيبوهم يسألوا منهم وين فلانة ، مزنوقة في المذاكرة وللا شنو ، وبعدين طبعا في تعليقات والله بتكم دي بتشبه عماتها شبه شديد خالص ، هسح دي ما قطعة من عمتهافاطنة ،وبعدين في شلة من العزابة ما عندهم عربية ويقوم المضيف بتوصيلهم ويتوقع أنهم كلهم ماشين بيت العزابة لكن يتضح أن بعضهم يريد أن يقوم بزيارات أخرى أو أن يذهب للسوق أو أي مشوار آخر
07-15-2003, 06:26 PM
abuguta abuguta
تاريخ التسجيل: 04-20-2003
مجموع المشاركات: 8276
وبعدين فى رمضان فى عادات تانية كل اسرة لازم تحجز يوم للعذابة من بداية رمضان اذكر رمضان الفات من اول يوم فى رمضان اتحجزت الجمع الخميسات عندنا وبعدها الاربعات وجدولنا يقفل من اول اسبوع ونحن بعد كدا نعمل جدول العشاء وبس,ونرجع المساء عشان نقيم الفطور ..لكن دائما صاحبت الفطور الكارب معروفة من بدرى مش عشان بتها. لا دا تقيم غريب شوية..لما الواحد تكون زوجته من خارج المنطقة دى هى صاحبة الفطور الكارب عشان تظهر بمظهر حسن امام اهل زوجها لكن فى واحدات بس عاوزات اليوم يتعدى وبس... وتسلم ياشفيف
يا جماعة هوووووي راس السوط وصلنا ونحنا زاتو في بلد كلنا عذابة نعزم عذابة ولا عذابة يعزمونا ثم تانياً اللحم البتقولوا عليهو ده إلا بنشوفوا في المتحف بتاع البقالات الكبيرة
قبل فترة نزل بوست منقول من جريدة عن أب سوداني معلن نيتو في تزويج كريماتو وعلى كل من يرسو عليه المزاد نقل البضاعة خلال اربعة وعشرين ساعة , إستنكرنا وشجبنا وإدنّا تصرف وسلوك الأب البفتش في السترة لي بناتو , اها لامن الموضوع بقى بي دبلوماسية الشية وشر البصل قبل ما يبوظ قلتوا برضو عاداتنا وقدّر ظروفنا ؟ نعمل شنو ؟ الجماعي كورة وبورة البصل وما حصل الجرايد الا نحل الكلمات المتقاطعة ونفط الإجتماعيات تعال بالعندك نلقى قائمة الطلبات اكتر من الشالا هانز بليكس لي صدام نعمل شنو؟ في زول عازمنا غدا قريب؟ ولو بالإنترنيت ؟ لاااااع ؟ ولا اقول ليكم داير أقرا
أبنوسي بي نكهة التبلدي
07-16-2003, 08:11 AM
ودقاسم ودقاسم
تاريخ التسجيل: 07-07-2003
مجموع المشاركات: 11146
يا أخوي سلام عليك دي ياتو بلدالمافيها لحم دي وانت الوداك ليها شنو ، أنا ماممكن يمر يوم ما آكل فيهو لحم ، والله لو ما أكلت في الغداء لازم آكل في العشاء ، أعوذ بالله من حالك ، وكمان قال لكهم عزابة ، يا أخي انتو وين عايشين ، قول ما في بنات سودانيات ، طيب ما تتزوجوا من ناس البلد ، ولا قاعدين تلقوا عوازيم ببلاش يا مستهبلين ؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ودقاسم
shiry
Shinteer
abuguta
benyya
الليندي
فيس بوك
تويتر
انستقرام
يوتيوب
بنتيريست