الفاتح جبرا .. في ذمة الله
نعى اليم ...... سودانيز اون لاين دوت كم تحتسب د. الفاتح يوسف جبرا فى رحمه الله
|
ربك ستر
|
همك كتر
راسك فتر
طق العرق ربك ستر
شالوك كِتاف ودوك هناك
قالوا العلاج طوّف شتر
مكسور عضم ساقك ظهر
جواه جوف والجوع نتر
فتحو العروق كان يلقو دم
مافيش عدم
عيشة الندم
مصت حقوق قلب انصدم
حتى الطبيب محتار وقف
كيفنو عايش ما انهدم !!
وعيونو من كتر الألم
عميانة تنزف فيه دم
اصلو الحكاية بدت زمان
يا حليل زمان
قبل الهوان
يدخل يشيل كل الأمان
كان الضراع بطرح يفيض
والخير بزيد دافق كمان
قبل المصايب الواقفة صف
تهجم عليو من كل مكان
قبل الفقر سجم القروش
وينا القروش
الفي الكروش ؟
راحت خلاص عند الوحوش
جاري وتكوس حقـاً شرد
كان كستا ليو راسك بدوش
ودا كلو كوم والباقي كوم
كترت عليك امراض تحوش
تمت عمر محسوب صفر
ربك غفر
هماً دفر
قصرت عليك اوجاع سفر
جاك البياخد كل روح
تعبت خلاص كايسة المفر
غمض عيونك واستريح
راجيك مكان مافيو نفر
داخلين عليو من كل نوع
تعبان قنوع
شبعان خلوع
ظالم اخد حقك نزوع
كان فاكر العمر القصير
ممدود طويل مافيو رجوع
خليو بيعرف كم ظلم
يوم الحساب الفيو بجوع
وانت الكريم
ربك عظيم
قادر عليم جبار رحيم
|
|
|
|
|
|
|
|
Re: ربك ستر (Re: مازن الجمّال)
|
Quote: يا حليل زمان
قبل الهوان
يدخل يشيل كل الأمان
كان الضراع بطرح يفيض
والخير بزيد دافق كمان
قبل المصايب الواقفة صف
تهجم عليو من كل مكان
قبل الفقر سجم القروش
وينا القروش
الفي الكروش ؟
راحت خلاص عند الوحوش |
الله موجود يا مازن اخوي فعلاً والله يا حليل زمان !!
كلمات صادقة ومعبرة وقوية شكراً جميلاً يا جميل .
| |
|
|
|
|
|
|
Re: ربك ستر (Re: مازن الجمّال)
|
يا حليل زمان ... حالك يسر عجلات تمر جيئة وذهاب فوق الرصيف
قول يا لطيف ...
تمن الرغيف ... والانتظار عيشة الندم ... والانكسار غمض عيونك واستريح
امسك همومك ما تلين نلقاك زين تشرق صباحات شوقنا روح حقن تقاعلو ما بروح
قول يا لطيف........
| |
|
|
|
|
|
|
Re: ربك ستر (Re: مازن الجمّال)
|
ــــــــــــــــ جميل يا مازن ... ولك التحايا بطعم الالم
الله ليك رب ساتر ياوطن
وكتين الضغينة تطلع بالدرب
ونار القبيلة تعمي كالقلب
والفاتحة مبتدا باب النصب
الواطة شاكية وجع الطلق
مجروحة بي مطرالجفاءوالتعب
وجهك عظام الضلوع مسلوب
ودمعك حارق و حامض مصلوّب
والرغيف مواثيق (الإنقاق)كِذب
نعقر ناقة هود حتي العصب
والدم قدرالموية وزايد نصاب
هواك في الجوف مكتف شِعب
والحراميةالقامو وكتين النعاس
انتشر فوق عيون الخلق والصحاب
ملونافقر والدم نافورة كتاب
شدّة كراعي إنقدت ونط يا أرنب
الدين رحمة ما غضب ولا موية رهاب
تبت يداكم وتب قرّب يومكم لهب
نار القهر شبت في الفؤاد جب
الناس تطفي وإنتو تزيدو الحطب
الله ليك ياوطن وكتين طفح الطحلب
مازن يا فنان يا أخي شكراً ليك فقد ألهبت أنفاسي
تحياتي
| |
|
|
|
|
|
|
Re: ربك ستر (Re: مازن الجمّال)
|
Quote: الله موجود يا مازن اخوي فعلاً والله يا حليل زمان !!
|
الشاعر الجميل / هاشم
دايما في انتظار حضورك الراقي
كل المودة والحب
| |
|
|
|
|
|
|
Re: ربك ستر (Re: مازن الجمّال)
|
Quote: ربك عظيم .. ينصر يشيل عبدو الضعيف |
ربك ستر
حظ انستر
في اللحظة خوفك انكسر
هماً اخد كل العمر
ودّر عليك فرحاً خسر
ربك ستر
جوعا نتر
نشّف عروقك يبسم
جوفك عطش ينبوع قِدِم
قطرات عرق ما بتنقسم
ربك ستر
شافك عطف
اداك حصاد قلب انخطف
شال الحزن الكان سكن
واداك حنان شالك لطف
______________
الزول الراقي جدا عثمان عبد الله
انت زول ما هين وجميل وحنين
مودتي وحبي يا جميل
وفي انتظار طلتك دايما
| |
|
|
|
|
|
|
Re: ربك ستر (Re: مازن الجمّال)
|
قول يا لطيف ..
من البوادر والقري المليانة زيف...
وانا ما بقيف ...
عديها سكة دوزنة وانتظر زمنك يجيك .. وطنك يفيق... ماديلك زراعو ولهفتو من لوعتو ... نسي روعتو وسنين هواك روعة لقاك ... ريحة نداك... يا مبتدى ويا منتهى..
يا مشتهبك... لازم اجيك...
المحطات القديمة و البويتات الحزينة اتمايلت وسط النزيف
قول يا لطيف..
| |
|
|
|
|
|
|
Re: ربك ستر (Re: osman abdala)
|
Quote: اخوك عثمان من ناس مدني يامازن درست في الاهلية (ب) |
عثمان
انت زول مبدع وانا فخور بيك شديد انك من مدني وقريت في ( ب ) كمان
وانا برضو على فكرة قريت في ( ب )
وباقي النضم بكملو معاك في الخاص
وجودك في البوست مهم جدا
اوعك تمشي بعيد
مودتي يا جميل
| |
|
|
|
|
|
|
Re: ربك ستر (Re: osman abdala)
|
تسجيل حضور ومتابعة
ــــــــــــــــــــــــــــــــــــــــــــ
زامن يامعك الجمعة الجايه معزوم غدا في حلتكم
| |
|
|
|
|
|
|
Re: ربك ستر (Re: ممدوح أبارو)
|
ممدوح والغداء دة نحنا ما معزومين ....
دحين ناس مدني يا ممدوح بقولوا فريق ما حلة ولا انا غلطان
تخريمة: سنا ادوني من سدني مرمر حي الثورة
| |
|
|
|
|
|
|
Re: ربك ستر (Re: osman abdala)
|
اوووو الشفاته اولاد الثورة أول من ساق الركشة في مدني
عثمان كيفك يا ود سنترا
Quote: دحين ناس مدني يا ممدوح بقولوا فريق ما حلة ولا انا غلطان |
أقول ليك سر؟ والله في البداية كتبتها ذي ناس مدني وتاني عدلتها يمكن عشان أتعرف بي زول جميل زيك
| |
|
|
|
|
|
|
Re: ربك ستر (Re: ممدوح أبارو)
|
تعرف يا ممدوح انا مشتاق لي مدني شوق شدييييييييد وانشاء الله يوم 9-6 انا في مدني ... لي منها سنة ونص
تخريمة: بي مناسبة الشوق لي مدني خليك متابع اسي جاتني فكرة نص
| |
|
|
|
|
|
|
Re: ربك ستر (Re: ممدوح أبارو)
|
ات عارف يا ممدوح
جيتي السودان الجاية انشاالله ختت كراعي في الواطة اول زول ح افتش ليو وألاقيو هو انت ياسكر
| |
|
|
|
|
|
|
Re: ربك ستر (Re: هند محمد)
|
هند الشاعرة الحالمة والمبدعة الجميلة
حضورك مهم
ويا ريت كان لو امطرتينا بالقليل انشاالله من ابداعك
| |
|
|
|
|
|
|
Re: ربك ستر (Re: osman abdala)
|
عثمان معذرة..بالنسبة اسمك الحقيقى هوابداعك القريت منه ده
Quote: انا ما بقيف ما بين طموحك و مشتهاي... لا بايدي ولا بايدك سر هوانك وسر غناى
وانا ما براي اخترتك الوطن الملاذ عم جمعة وخالتي روضة وناس مجوك وبتي نشوة هاتوك وطن حلموك جواز... يا ضلنا .. المرسوم علي رمل السنين يا محسنين... يا سكة الدرب الودار يا نسمة الريح الدعاش يا انتعاش... لا بايدي ولا بايدك سر هوانك وسر غناى |
يسلم احساسك الجميل
| |
|
|
|
|
|
|
Re: ربك ستر (Re: مازن الجمّال)
|
يديك العافية يا هندوية...
لي زمن ما كتبتا احتمال سنيييييين...
لكن مقطع اخونا مازن محفز للكتابة ....
تخريمة: اعتقد يا هند مرة قريت ليك قطعة نثرية تدعو للسلام والمحبة
| |
|
|
|
|
|
|
Re: ربك ستر (Re: osman abdala)
|
صحيح ..اعتقد القريتها اسمها( من أنا) قصة من وحى الحمامة برغم انو ليك سنين ماكتبت لكن كتابتك جميلة فواصل كتابة انا بكتب هنا من فترة ولى مجموعة من القصائد يجوز مالحظتها لانك غائب او غير متابع بشكل يومى.. مشكور على المساحة الطيبة
معليش يامازن لو اتغير مسار البوست لك التحية
| |
|
|
|
|
|
|
Re: ربك ستر (Re: مازن الجمّال)
|
اه يا بلد
ساكن معاي في كل شبر وانا منتظر لحظة لقاك ساعات تجي وساعات تمر وانا متكي شايل الصبر
اه يا بلد
عديت معاك سفر الجفا فوق تضاريس الزمن وانا من زمن محتار معاك ما بين صدودي والفتك انا من زمن مادد مداين شوقى ليك انا من زمن ما بين سكوني ولوعتك صامت بكلم روعتك انا من زمن نايم بغازل مهجتك يا بختنا ويا روعتك
| |
|
|
|
|
|
|
Re: ربك ستر (Re: مازن الجمّال)
|
مفتونة بيك كل المداين والقري بتنادي فيك كل القصايد والغني يا روعة حد الاندهاش نسمة دعاش
قول للبنية الخايفة ديك النسمة بتجيب السمح و الرملة بتعانق الشمس ما بين غروبها و طلعتها تديها نيران لوعتها شان تستبين وانا ما بلين هداني ساساق الدروب الموحشة وانا مندهش كيف الصباح يمرق يسيب الليل غنا يمسك نهارات شوقو كيف يرجع يفوت ضوء الشمش وانا ما بمش فوق الحروف المحزنة
انا ما بمش النسمة بتجيب السمح
و الرملة بتعانق الشمس
| |
|
|
|
|
|
|
Re: ربك ستر (Re: مازن الجمّال)
|
هتفت معاي اشواقي بالبوح والغنا من كم سنة وانا والغنا ماشين علي جمر الرصيف الشوارع هي ذاتها والجرح زايد نزيف ساعتين بنمشي وساعتين نقيف قول يا لطيف قلمك يتاوق للوجع يبكي وينوح كلماتو تتناثر دمع بتداوي اثار الجرح جرحاً نزف وتراًعزف اخر ترانيم الرجوع هل من رجوع ؟
هل من رجوع؟
| |
|
|
|
|
|
|
Re: ربك ستر (Re: عزاز شامي)
|
الله .. الله ..
ممتع .. بعيد من الخصومة القرعاء .. قريب من نبض الناس .
....... عثمان .. يا زول إنت و مازن شعراء شعراء .. أصلو ما تقيفو .
| |
|
|
|
|
|
|
Re: ربك ستر (Re: مازن الجمّال)
|
ربك يزيد يكفينا شر خلقو .... الديون... كتر السؤال... سهر العيون ...
والانتظار
يا مؤمنين زيدو الدعا خلو السؤال سيبو الجدل اصلوا الخجل من ربنا اول طريق المشتهي والمنتهي... لوكوا الصبر ما هو البأخر دعوتو حتماً تجي ساعة الفرج والمنعرج يبقالن ضوء يفتح مواعين الامل يملاه بالشوق والغنا تصدح زغاريد المني
يا مؤمنين يكفينا شر خلقو .... الديون... كتر السؤال... سهر العيون ...
| |
|
|
|
|
|
|
Re: ربك ستر (Re: مازن الجمّال)
|
Quote: ساكن معاي في كل شبر وانا منتظر لحظة لقاك ساعات تجي وساعات تمر وانا متكي شايل الصبر
اه يا بلد
|
آه يا بلد بلد المبدعين زى الجماعة الفوق ديل انا ده شعرا ما عندى ليهو رقبة { بفتح الشين وكسرها كمان } لكن عاد شدو حيلكم والله اى بيت شعر يعجبنى طوالى انزلو هنا وبى مزأأأأأج كمان اها شن قولكم
التحايا آلاف ام وضاح
| |
|
|
|
|
|
|
Re: ربك ستر (Re: مازن الجمّال)
|
عثمان عبد الله الزول السمح والله متلومة ولكن انت الكبير والمسامح تحياتى لكل الناس الرايعين المعاك
طبعا ما تضحكوا فينى انا من الليله قررت ما احكم على اى بوست من عنوانه انا شايفة ربك ستر ومتردده ادخل قايلاهوا خليل جا وخليل قيضوه وزل ضربوه وربك ستر الما مات وطبعا انا البوستات الزى دى خلاص عملت لى احباط من عدم المصداقيه الفيها وهربت منها الا ربك ستر . وناوية اسكن هنا مكان الطمأنينة والجمال .
اهديك انت ومازن وزواركم بعض من ابيات عجبتنى شديد للدكتورة سامية عبد اللطيف بابوظبى ةاتمنى انها تكون طبعت الديوان بتاعها ولها التحايا عبركم .
شوق لاهلى للاوطان بلدنا الغالى للسودان لمنظر نيلنا حين ينساب سعيد طربان لسمرة بديعة الاشراق وناس تلقاك بالاحضان وشجرة النيمة والهجليج وجداول الموية والخيران نسمات حلوة نص الليل ونومة عميقة فى الحيشان ورش الساحة كذا مرات تلطيف جو على الحران موائد فى وسط شارع مشاركة لفطور رمضان وصوت المدفع المغرب فى توقيت مع الاذان ناس تقرع طبول ليلا فى توقيت مع الاذان
وراجعة للتكملة ان شاء الله تعجبكم عموما شوق مغترب
ام وضاح
| |
|
|
|
|
|
|
Re: ربك ستر (Re: مازن الجمّال)
|
ربك ستر
ما كان حصل
خوفا سكن نخر العضم
ولسان جبان مبتور قنع
محروم بيهمس بالنضم
وعيون مقدقدة بالسكوت
شافت حقوقاً تنهضم
سرحت بعيد
والحيلة ايد
مقصوصة بي خوفاً وعيد
لكنو ما كان البخاف
كان الوقف بقلب حديد
قلبا ملان حب الوطن
كان حلمو في وعدا جديد
يغشاو يزيل هماً عنيد
يغشاو يجيب وعدا بعيد
وعدا مسك بجناح امل
من غير امل
سفراً ممل
__________________
عثمان يا زول يا جميل
معليش المشاغل بس البعدتني عن البوست في اليومين الفاتو
لكن بجيك برواقة
وعليك الله واصل معاي يا زول يا كتّاب يا ممتع
_____________
والشكر اجزله لكل من عبر واسعد قلبي بالتواجد
وبجيكم واحد واحد
تحياتي ومودتي للجميع
| |
|
|
|
|
|
|
Re: ربك ستر (Re: مازن الجمّال)
|
Quote: مسكين بلد
كم بالإهانات إنجلد !!
|
كم بالمصايب اتهرد
بالفقر والجوع الفرد
ايديه في جسمو البرد
اصبح مخدّر ما بيحس
بالوجعة كاتم الصوت بدس
آلامو في قلبو اليبس
آه يا بلد
ظلمك ولد
طماع أكل حقك جلد
جسمك شرب دمك فتح
جرحك وفات
ما عبرّك
ما حنسك
خلاك براك
في ظلمتك
لو موت غشاك
في راحتك
اداك مناك
وانت العظيم بي بسمتك
صبرك كتر
راسك فتر
ربك عظيم خلاك ستر
هانت عليك انا بدعي ليك
فرجاً قريباً جاك نتر
________________
الجميلة نادية
حضور جميل وابداع كالعادة
كامل المودة لك
| |
|
|
|
|
|
|
Re: ربك ستر (Re: مازن الجمّال)
|
Quote: ملونافقر والدم نافورة كتاب |
الدم نشف
عِرق الارض جف ويبس
سوس الفقر اكل الزرع
والموية سيل مكبوس كبس
بس كان حرام
ممنوع همس
عينك عليو
من غير لمس
تفاحة ادم للبمس
شبراً أرض مطموس طمس
والويل حصاد زرع الجروف
قسمة عدوك والليك غمس
قول يا لطيف
كان من امس
_________________
عماد يا جميل
حضور وابداع
مودتي يا عزيز
| |
|
|
|
|
|
|
Re: ربك ستر (Re: مازن الجمّال)
|
نتابع القصيدة
نشاط يوم وقفة العيدين نظافة السقف والحيطان صباحات جمعة كالاعياد تنور بالفرح تزدان شموع فوق حنة تتراقص عريس يتوسط الشبان زفاف اتنين فى شارع الحى سهرة وحفلة بالفنان وشم اخضر على الشفة شلوخ كم ميزت خدان حنة تزين اليدين وعطرا فاح مع الدخان وعمة على الروؤس كالتاج وعزة نفس لكل انسان كلمات تسعد الخاطر يردد فيها كل لسان
باقى القصيدة جاييكم بعد شوية تحياتى ام وضاح
| |
|
|
|
|
|
|
Re: ربك ستر (Re: مازن الجمّال)
|
سوس الفقر اكل الزرع نشف لقف لبن الضرع
فتر اغاني الوجعة والحزن الطويل
ما مستحيل علي الله يهدينا السبيل
نتلافي شر الانقسام الانحسار والدرردة نتعافي نحنا من الخنوع و الانكسار
ما مستحيل علي الله يهدينا السبيل نقطع صراطو المستقيم من قبل يرتد الطرف ما مستحيل
| |
|
|
|
|
|
|
Re: ربك ستر (Re: osman abdala)
|
"لا بايدي ولا بايدك سر هوانك وسر غناي"
ثمة ضوء شاحب يغري الروح بالتسكع , أشياء اخري ليست بيدك يا صديق...النهر الذي يجري دون ان يلوي علي شيء, وجه امك ساعات الضيق التي تعقبها ساعات الضيق, حائطكم او حائطنا المائل, والخيبة أيضاً !!
| |
|
|
|
|
|
|
Re: ربك ستر (Re: osman abdala)
|
Quote: تعبان قنوع
شبعان خلوع
ظالم اخد حقك نزوع
كان فاكر العمر القصير
ممدود طويل مافيو رجوع
خليو بيعرف كم ظلم
يوم الحساب الفيو بجوع
وانت الكريم
|
مازن ليك وحشه ياصديق
،،،،أبوقصى،،،،
| |
|
|
|
|
|
|
|