كما تدينُ تدان - بس ما تزعل كويس... - Salah Abdulla

Quote: ياعلاء والله من ناحية إنو صلاح حقر بيك دى أنا معاك فيها ومن ناحية إنو إستصغرك والله ماليهو حق . وياصلاح بعد الردحى القالوا فيك علاء ده كلو تجى تعتذر بالسرعه دى ؟

Quote: قد قمت بإنزال موضوع عن صديقي و حبيبي علاء تمبس و قد تكون له مدلولات بيني و بينه يعرفها و أعرفها

طوالي عملت (كما كنت) ومعاها (خلفاً دور) .. خلاص الزول طلع صاحب صاحبك ، ونيتو سليمة ، يعني طلع ولدنا .. بيبقى بعد داك تكون شجاع ، وتعتذر ، وتشرح أسباب هجومك ، وإعلان الحرب المن طرف واحد دي ليه..
ولو ما طلع ولدنا ، والله كان تشوف غبارنا معلق في السماء شهرين ونص (قابلة للزيادة)
أنا المزعلني علاء ده ما جاب بوست كوريا ليه (عيبو شنو) جايب لي بوست من سنة حفروا البحر ..

عصام جبرالله ياخوي إنت عارف أخوك ما بتاع كوّش ، لكن علاء ده جاني متنكر ، وفتح نيران على ولدنا ، أها قلنا نسوقو الخلا هناك ، لا حجّاز ولا باركوها يا جماعة .. المهم اتضح في الآخر أنو نيرانو صديقة..

تامبا:

Quote: تمبس في عمل خارجي .. خارج عن حدود المألوف

في شنو يا تامبا ؟ ان شاء الله خير ؟ مداخلة فيه تيران بُيُض ، وأمريكا ولندن وخميس مشيط !! وعمل خارجي .. في شنو؟ الشبكة كيف هناك؟ ان شاء الله (التغطية) كويسة.
قلت لي عمل خارجي ؟؟ ذكرتني زمان زمن (الجكّيس) يكونوا الفارات متكاسرين في الجكسوية ، وهي سادرة في تيها ودلالا .. نحن نتكاسر بي جاي وإنت عامل لي إبن بطوطة ، لافي زي الماكوك .. الرياض دي أصلوما نترجع ليها؟ وبعدين وينو معتصم ده ، مش مفروض يقوم مقامك حين غيابك (والعكس) والا (الخطيبة) بدت تمارس في سلطاتها من هسه

أبوساندرا ،، الفيك انعرفت ،،

Quote: أردمه.

أنا يردموني ؟؟ عمرك شفت ليك زول ردمني ؟؟ تاني رجعت لى موضوع صاحبك ؟ ما قلنا ليك عماد عبدالله وخالو كانوا هم أصحاب ( الونسة ) وبعدين تذكر الطرب يا أخو مع الدوام البتطلع منو عشان ترجع ليهو ده؟؟ الله يعيد أيامنا الجميلة (وياليتو يعود الكان ولّى)..

العمدة،،
زمان أمي الزلال الله يرحمها كانت بتقول لي جنس حالتك دي ( سعد حماس الطار ) .. اتفاجأت بي ردي الفوق داك ..صاح ؟؟ كنا مفتكرينها نيران عدو ، اتضح انها نيران صديقة ..
إزيّك ياخي .. مشتاقين والله..

وآخر كلامنا .. إنتو كلكم فارات ،، وأجمل حاجة في البوست ده أنو جاب لينا نادية عثمان ..
نادية إزيّك .