كما تدينُ تدان - بس ما تزعل كويس... - Salah Abdulla

Quote: والله ما عندي معاهو شغلة لكن زعلني ردو بايخ و مستهتر و مستخِف و مزدري و متعالي و ثقيل و حِشري و متطفِّل دة الحسيتو في ردو ووريتو حدو

Quote: يعني إستصغار و كِدة

حاشا لله ..

Quote: هسة بكون وصلو الفهم ولا لِسة؟

ياتو فهم يا اللخو ؟؟
وبعدين يا علاء أخوي ، كونك تتعب نفسك وتفتش لي حاجة عشان ، تجيبها هنا ، وتقوم ( تفلفلها) عشان ترد علي ، دي كتيرة منك والله ، يا خي أنا ما بستحق التعب ده كلو ..
يعني هسي ما لقيت (حاجة) ترد لي بيها ، قلت أحسن أجيب الكلام القديم ده ، وارد عليهو
هسي ده يسموه شنو بالله ؟ وضيوفك (ناس أساسي) ديل يقولوا شنو؟؟

Quote: يعني الصوت حيكون جاي من وين بس

قطع شك ما ح يكون جايي من (مشوار)

Quote: الراجل في النهاية قال ليك ما تزعل يعني في حسن نية

والله غباشي صدق ، أنا حسن النية ياخي

Quote: فقمت أنا زِعلت لأنو شكل ردك كان تهكُّم واضح

حاشا لله أن أتهكم يا ولدنا ، وبعدين أنا كررتها ليك مرتين ، تقوم تجي تزعل ؟؟
أها نفكك يا علاء ، على أمل أن نلتقي ..
أساسي :

Quote: ياخي دا اخو البطل زاتو تقوم تشاكله

إنت خلاص ملاسي عاداك واللا شنو ، أنا رئيس الخيانة .. قال أخو البطل قال ..
إنت يا عماد ما شايف كلام أساسي ده ، استخفاف ، وإزراء ، وإستهتار ، وتهميش كمان ، ما ترد عليهو ، واللا فلاحتك فيني أنا المسكين ده؟؟
والله يا أساسي ما فضل ليك الا تقول (عماد وأخوه) وبعد داك نسميك ( ملساسي) ..
الخارجك إنو (بري) دي فيها أهل بناتي ، والله غير كده الشافني لابد ليك (تحت العمود) ما كضب.
عماد عبدالله :

Quote: Quote: فالرجل اكبر منك سنا .. حولاااا .. ( كيفتني دي يا معاوية ياخ .. الله يريحك ) .

هسي يا عماد عبدالله ، يا هو ده الكيّفك في الهيصة دي كلها؟؟
وبعدين تعال هنا يا معاوية ، أنا أكبر من منو ؟؟ من (عمو) علاء ده ، واللا من خالك عماد؟؟
المشكلة إنو الشنب ده غاشي العالم دي ، أحلقو يعني أنا ، ويقولوا علي (... شقي ومجنون) ؟

Quote: أخوك برضو لا بأس به في العود - الفلوت - الطمبور - الأورغ

طيب يا علاء ياخ ما إنت كويس ياخ .. لكن عجيتني قصة ( الطمبور) دي خالص.

Quote: يعني شرّامي قديم

من شرامة وين يا اللخو؟؟
...................................

يا علاء ، أتمنى أنك تكون عرفت السبب الخلاني أقول كلامي في بوستك داك..
وأرجو أن يتسع صدرك لمثل هذه الردود ، وكن على ثقة من أنك ستواجه العديد من مثل هذه الردود ، وفي مواقف كثيرة..
أخيراً ، ما تزعل من كلامي الفوق ده .. شيل البينفع معاك ، والباقي أرميه البحر ، ولو رميتو كلو ، تكون ما قصرت.

أها .. العفو والعافية ..