الحل للسودان في انتفاضة جديدة .. دعوة للشعب السوداني

الحل للسودان في انتفاضة جديدة .. دعوة للشعب السوداني
انتفاضة بمعناها الشامل تبدأ بانتفاضة ضد الذات داخل كل شخص وضمير لمصلحة عافيتنا من كل اشكال المرض والعنصرية ......وايذاء الاخرين .. انتفاضة تفرض خياراتها علي الواقع .. انتفاضة شعبية .. وعشان اكون معاكم واضح في خلفية وسبب هذا البوست انا كنت بسمع في اغنية قبل اغنية مشهورة بتقول ضمن كلماتها : ما بتحير بين الفوق وبين الناس التحتانية الا مغير .. ول عقوق ول كفيف الانسانية الاغنية اسمها " طيبة " ثم فكرت في حال البلد الواقف ... طبعا الحاصل كلكم عارفنو وانا ما عندي جديد .. لا معلومات ولا افكار جديدة حول الوضع .. فالواضح جدا انو ازمة السودان ازمة شاملة .. وفي ناس ما معترفين بكدة لانهم مستفيدين من الوضع واخرين شايفين الامور من زاوية تاني .... ونظرتهم دي سبب البلاوي .. لانو اعترافهم بالازمة هو مدخل للعلاج ... باقي القصة مكررة ومعروفة .. المهم الان البلد في حال معسر جدا ... في الجنوب والغرب والشرق والشمال وفي الوسط .. والسبب السياسات الاقتصادية المعلومة لديكم .......... يعني في اي جهة من الجهات الاربعة دي ومعاها الوسط في ناس زيتهم طالع وناس زيتهم طالع شديييد ... ديل هم الناس التحتانية الشفتهم وانا بسمع مقطع الاغنية ( في المقاربة اعلاه ) و طبعا زي ما عافين في ناس تانين حالهم زين .. زين شدييد المهم فكرت في الاغنية و جاني سؤال الحل شنو ؟ الحل للناس التحتانية ؟ الناس بقت حبات سبح لا خيط بلمها ولا ترانيم العبادة ول شنو ؟ قلبتها شمال قلبتها وسط .. قلت والله الحل للسودان في انتفاضة جديدة .. جديدة في البرنامج والشكل انتفاضة لا يمكن ان تحدث بعمق لمصلحة الناس التحتانية الا اذا بدأت من داخلنا بمحاولة جادة لنبذ العنصرية والعنصرية المقابلة لها ... تبدأ برؤية مصلحة جميع الناس التحتانية ومخاطبيتهم حولها .. ونتذكر انو الشعب السوداني دة شعب له مميزاته كما له عيوبه .. ومن مميزاته ان له حلوله الخاصة في معالجة الامور لماذ نبني علي ما هو سلبي وما هو ناقص لماذا لا نبني علي ما هو ايجابي وملهم .. لماذ نضيق واسع ؟ هسة الحزن فينا جميعا حزن شدييييد فعلا وجرح البلد اوسع مما كان ... لكن لازم نشوف ونفكر .. ونتامل شنو الحاصل ؟ وشنو ال ح يحصل ؟ القبيلة دي انتماء كل شخص لمنبته .. و قيام تنظيمات علي اساس القبيلة ليس جريمة وليس عنصرية .. انما تطور ايجابي و طبيعي في اشكال التنظيمات الاجتماعية وعلاقاتها مع بعضها البعض ومع الاخرين وطيب ؟ بعدين ؟ انا افترض انو التطور الحاصل دا المفروض يكون معاهو تطور في الرؤية الشاملة المشتركة انا ما شايفها .. ممكن تكون في لكن ما واضحة .. بقصد بيها الرؤية الشاملة لماهو سر هذه التعاسة الوطنية ؟ طبعا زي ما قلت انا ما عندي الاجابات كلها بس شايف انو الحل في انتفاضة جديد ة و لست بواعظ سياسي او مرشد ولا انا كبر واحد هنا عشان اديكم دروس في اي شئ .. فهي و نسة عابرة ...... من زول عابر ... ما ح ازعل من اي رد .. و ح افرح كتير اذا كان سؤالي دة حرض علي نقاش مفتوح وليس سؤال وجواب ... ليه ما نفكر في موضوع تحالف قوي المهمشين واذا فكرنا فيهو - زي ما طرحوه واقترحوه ناس هنا كتيرين - ح نتحالف عشان نحن منو و ضد منو ؟ المركز دة فيهو برضو الناس التحتانية - شوفوا خريطة الخرطوم وتقسيماتها وين الطبقة الوسطي الزمااان ؟ ماهي اوضاع العمال والمزارعين في ريف الخرطوم ؟ النازحين ؟ المشردين ؟ ناس بيوت الطين ؟ المعلمين ؟ والمعلمين الله ؟ العاطلين والمعطلين ؟ وخلونا نشوف خرائط كل المدن ... والقري ... بنلقي فيها مهمشين ... في ناس هنا بعرفوا يشرحوا الامور دي اكتر اذا قعدوا في واطة ... وانا محتاج اسمع منهم اكتر .. المهم العاوز اقولوا انو الراسمال ما عندو دين وما عندو عرق او قبيلة .. دي ادواتو واشكالوا البيشتغل بيها والاغطية البتدثر بها اذا كنا بنفتش للحل .. الحل نستهدفو في عضمو .. سياساتو الاقتصادية والسياسية والثقافية ... ونفضح زيف ادعاءاتهم للدين والقبيلة ودا واجبنا ... شوفوا الناس ديل كانوا بس الاسلام كفاية لتغبيش الوعي هسة بقت معاها متاجرة باسم القبائل .. لكن مفهوم بالنسبة لي انو كل قبيلة فيها وفيها ... واصلو مافي مجموعة بشرية بتكون عبارة عن كتلة منسجمة في كل شئ ... صاااح ول انا غلطان .. لانو برضو بكون داخلها في علاقات اجتماعية /اقتصادية وصراعات بتعبر عن نفسها باشكال مختلفة ... المهم .. ما عارف الايام دي كلامي بقي كتير كدة ليه اعذروني ... الانتفاضة دي ممكن ول ما ممكن ؟ دا ما سؤال لاني ما بحب اسال ولا بحب يسالوني و اجاوب .. دة طرف خيط شفتو ولسه ما كملتو للاخر قلت ادعوكم امكن نباري الطرف دة ونصل وامكن لا ... ما مهم المهم نتأمل و نحاول شئ مختلف ونتشارك فيه ونتعلم منه و امكن نفهم شنو المطلوب لبكرة وبعد بكرة ... وابدا هي ليست دعوة للتوقف عن ما يفعله اي شخص ولكن التامل في يفعله ويستمر كل منا في عمله للوطن .. و ليعمل كل بطريقته فقط ارجو الا يفترض كمالها وصحتها المطلقة ابدا بل يسعي للتعلم من الاخرين وتعليمهم ما تعلم ..... وبهذا قد نغزل في نسيج الانتفاضة القادمة الجديدة .. ان الثورات تموت ... تموووت وتولد في الانسان .... ممكن ؟

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]