|
المغترب دة ... يا رب يطلع من نفْسك
|
هناك أغنية نوبية قديمة لا أعرف شاعرها و لكنها متداولة في قراناو أمصارنا النوبية.. تقول مطلع الأغنية :
إقدونقا نسووو سابلا سابل صفين نوقلا Egedoonga Nassoa Sabila Sabil Safiyyan Noagila
الترجمة : شفتو الخروف بتاعنا في طرف الحِلة الشمالي ؟ و في الطرف الشمالي في بيت صفية ؟
و لا أدري ما الذي يذهب بخروف الشاعر أو الشاعرة إلى طرف الحِلَّة الشمالي و بالتحديد في بيت صفية. و لكن حسب إعتقادي بأن الداخل في بيت صفية : ( مفقودٌ مفقودٌ يا ولدي .. ) ... أو ربما كان زوج صفية جزاراً غير قانوني ( بدون رخصة ) و يقوم بذبح أي خروف سائب يدخل في حدوده الإقليمية و المرسومة .. فيختفي في ظروف غامضة (حتى الجلد ما بتلقاهو )
و على منوال الأغنية أعلاه ... فإن صاحبنا المشلهت في الخرطوم .. و على سوء حظه المقيم .. عشق فتاة غير مقيمة في الخرتوم ... بل مغتربة مع ذويها في جدة .. و ينافسه في حبها زول مغترب .. أحواله متيسرة ... نازل و طالع معاها في إجازاتها الصيفية ... ( روزنامتو بنفس إيقاع روزنامتا ) .. و ظابط أمورو مع كفيلو
فقال صاحبنا المتمرغ بكتاحتنا ... الغارق في الفلس ... الغاطس في الهيام حتى أذنيه:
يا مَلْمَلة ... يا ست الناس و ست الحلا إنتي بي جدة .. سادرة و غافِلة و أنا بي هنا متوكر عايْش القلْقلة و كلُّ ال تشوفِك بسْألا : Brootoakka Nassoa Jeddela Jeddel Bab Shareefin Soogila
( مِسْ كولاتك ) .. كيفن بهْمِلا إنعل أبو الرصيد ما يا هو بيت القصيد كلو مكمَّل فيك .. يا سبب كل البهدلة Jennag Naintan , Nay Toari Irbaintan Eegila Nai Nowwarin Noorka moanoasa , jo teegi Aisila
ال إسمو أمجد دة ... سبب مغستي .. و سبب كل البلا ... يخمو البلا ... شَبَه رَخَم الخلا .. Menniyle Aygo Ikkon Jamman Irkila Jamma Toara , Jamman Fala Tar Amjadta Eddin Jerka Tera, Taron Iylinna Fala تصدقي ... من كتر حبي فكرتَ كيف تكون الحلْحلة دعيت ربي يوم العيد .. أبوك و الكفيل تقع بيناتُم مشكلة و تجونا بي هنا و البيت لصق البيت و هات يا صهْللة Ikka min Ajbee Tar Wildila? Taron Inna Aakkokkan, Habbaikkoan koffimo ideen Soogila Taron Iylinna Fala
شن قلتِ يا ملْمَلة ؟
****
ترجمة فورية لكلام الزول الممغوس دة :
يا مَلْمَلة ... يا ست الناس و ست الحلا إنتي بي جدة .. سادرة و غافِلة و أنا بي هنا متوكر عايْش القلْقلة و كلُّ ال تشوفِك بسْألا : Brootoakka Nassoa Jeddela Jeddel Bab Shareefin Soogila
شفتو البنية في جدة ؟ و في جدة في سوق باب شريف؟
Jennag Naintan , Nay Toari Irbaintan Eegila Nai Nowwarin Noorka moanoasa , jo teegi Aisila
منو ال بشوف الجنة و يرمي نفسو في النار بكامل قواه العقلية؟ منو ال بيابى ضل المقيل و يروح يقعد في الهجير ؟
Menniyle Aygo Ikkon Jamman Irkila Jamma Toara , Jamman Fala Tar Amjadta Eddin Jerka Tera, Taron Iylinna Fala
بتمنى أنا و إنت هناك في البلد مع بعض ندخل و نمرق سوا و أمجد دة ترميهو ورا ضهرك إن شاء الله يمرق من نفسك
Ikka min Ajbee Tar Wildila Taron Inna Aakkokkan, Habbaikkoan koffimo Ideen Soogila Taron Iylinna Fala
شنو ال عاجبك في أمجد دة؟ لو كان ما مغترب : كان ما بسوى قرش في سوق الرجال إن شاء الله يمرق من نفسك
***
و لا يهمك يا زول ... ال بيبيعك بيعو
(عدل بواسطة ابو جهينة on 06-14-2008, 11:49 AM) (عدل بواسطة ابو جهينة on 06-14-2008, 12:25 PM) (عدل بواسطة ابو جهينة on 06-17-2008, 12:27 PM)
|
|
|
|
|
|
|
|
Re: المغترب دة ... يا رب يطلع من نفْسك (Re: ابو جهينة)
|
إزيك يا ريس والله مشتاقين كتير انتا عارف موضوعك ده ذكرني شنو ؟؟ اغنية البنات الزمان ديك البتقول
الشايب ده الله بيني وبينو الشايب ده التسل ود عيونو
Quote: المغترب دة ... يا رب يطلع من نفْسك |
حليل زمن الإغتراب والمغتربين كان زمان وجبر
| |
|
|
|
|
|
|
Re: المغترب دة ... يا رب يطلع من نفْسك (Re: هاشم أحمد خلف الله)
|
سلام يا هاشم
تعرف يا أب شنب .. الإغتراب لو حسبناه في حساب الربح و الخسارة .. فهي خسارة بلا شك .. ما جايبة همها.
و لكن ... معظم فتياتنا في الإغتراب لا زلن يتشعلقن بأهداب الإغتراب دون وضع العودة في الحسبان و ذلك موضوع ذو شجون سنتعرض له بعد الأرشفة
و كل أرشفة و إنت بخير
| |
|
|
|
|
|
|
Re: المغترب دة ... يا رب يطلع من نفْسك (Re: ابو جهينة)
|
الريس الوجيه أبو جهينة
مشتاقين يا ريس ... والشوق مطر ...
Quote: يا مَلْمَلة ... يا ست الناس و ست الحلا إنتي بي جدة .. سادرة و غافِلة و أنا بي هنا متوكر عايْش القلْقلة و كلُّ ال تشوفِك بسْألا : |
بصراحة ياريس الاغنية جميلة جداً ومعبرة لأبعد الحدود ،، والمغترب عامل لناس الداخل ديك هلوسة عديييل كده رغم الظروف الخائبة اليّ هو فيها وقايلين القبة تحتها فكي .
مودتي
عماد محمود
تسديدة : ياريس مراعاة لشعور معتصم / تمبس / عمر الفاروق الرجاء عدم الكتابة باللون الأحمر .
| |
|
|
|
|
|
|
Re: المغترب دة ... يا رب يطلع من نفْسك (Re: ابو جهينة)
|
هو المغترب دة كمان يحبو فيهو شنو؟؟ زولا فاقد المواطنة ومكفول زي مضاميين السجن والقريشات اليسويها يشيلوها ناس السجن "مساهمة" وكان الكفيل ما عجبو الحال يعمل ليهو ديبورتيشن فوري .. بلا مغترب بلا نيلة ...
| |
|
|
|
|
|
|
Re: المغترب دة ... يا رب يطلع من نفْسك (Re: abubakr)
|
قريبي أبو بكر تحياتي
Quote: هو المغترب دة كمان يحبو فيهو شنو؟؟ |
تعرف في واحد قريبنا قال لي واحد ( صديق مناكف و مغترب ) : تعرف أحسن حاجة في إغترابك دة شنو ؟ إن الجماعة ال بيكرهوك بيكونوا مبسوطين لأنك بعيد منهم 11 شهر في السنة ..
دي حالة المغترب حسع .. إنتهى بريقه و فقد لمعانه و تساقطت أوراق أشجاره
| |
|
|
|
|
|
|
Re: المغترب دة ... يا رب يطلع من نفْسك (Re: ابو جهينة)
|
Quote: إقدونقا نسووو سابلا سابل صفين نوقلا Egedoonga Nassoa Sabila Sabil Safiyyan Noagila
الترجمة : شفتو الخروف بتاعنا في طرف الحِلة الشمالي ؟ و في الطرف الشمالي في بيت صفية ؟
|
تعظيم سلام يا ريّس
التراث ما جاه زول؛ الله يديك العافية.
وبعدين تعال ياريّس انت مالك
داير تتزاوغ من الموضوع؛
خروف شنو؟
هي إما تكون نعجة عديل
ويمكن كمان النعاج التسعة والتسعين؛
والواحدة اللي خطفوها؛
خروف شنو اللي المغتربين ممكن يشيلو همّو.
وبعدين منّا من ساب وييرّي لا منّي خروف فآوي.
نقي منّا برو تنّينقا ألقي.
الكلام دا هظار ما تأخدو جد؛ سمح!
| |
|
|
|
|
|
|
Re: المغترب دة ... يا رب يطلع من نفْسك (Re: عبدالفتاح أبوشيمة)
|
Quote: و لا يهمك يا زول ... ال بيبيعك بيعو |
نظرية والله لكن ياربى ممكن تطبيقها دائما بيكون فى طرف كابى الجرسة وماباقى ليهو حسع شوف قعدة زولك الفى الكرسى ده
لكن بالمنطق كدى المثل ده بيشبه { الفاتك فوتو} ولا { اللى يحبك ولا التحبو}
يعنى ماممكن تكون اللى يحبك وتحبو البيفوتك سكو لمن يتعب ويستسلم والبيبيعك اشترى ليهو من حديقة الروح اجمل الورود
تنظيرات منى ساكتََّّ!!
---------
ابوجهينة ازيك
| |
|
|
|
|
|
|
Re: المغترب دة ... يا رب يطلع من نفْسك (Re: عبدالفتاح أبوشيمة)
|
سلامات اخى عبدالفتاح
فى البداية مرحب بيك فى البورد اضافة تثرى الحوار الموضوعى والرصين
الكلام الكتبتو ده كلو مقصود بيهو فعلا الاقتباس اللى اقتبستو من استاذنا جلال يعنى خاص فعلا بالموضوع وفى البوست بتاع روزمين انا لسه ماقلت رأى- عملت فقط كوتيشن لحدى ما اجىء للحوار معاك
لكن هنا جد جد كدى مقصود فعلا الفلتو فوق خاصة الى انى ما بخلط الاوراق- يعنى لو فى حوار بقولو ليك دغرى وفى المكان والزمان المناسبين
فيا اخوى ماتكون حساس شديد!!
وبينا المودة والاحترام
| |
|
|
|
|
|
|
Re: المغترب دة ... يا رب يطلع من نفْسك (Re: عبدالفتاح أبوشيمة)
|
أخي أبا جهينة سلام على روحك الطيبة
{ يا صديق المتعبين والعاشقين والشماسة والمتكسبين ..يا حبيب الذين تعرفهم بسيماهم، ممن يحسبهم الجاهل أغنياء من التعفف حين تبرهم، وتزورهم بليل فتمسح دمعة وتوقد شمعةيا أنيس المتفردين والمستوحشين، والمغلوبين على أمرهم والمأزومين} .. قل لي يا صديقي و صديقهم أين يصنف المغتربون بين هؤلاء؟!! قل لي مرة أخرى بربك يا صديقي وصديقهم؛ يا هذا الذي أنت كالشمس من حيث التفت رأيته، يهدى إلى عينيك نورا ثاقبا.. هلآ أهديتني أجابة تقيني ذل سؤال غيرك .. مودتي
| |
|
|
|
|
|
|
Re: المغترب دة ... يا رب يطلع من نفْسك (Re: ابوبكر يوسف إبراهيم)
|
يوسفي الروح د. أبوبكر
سلام كبير
Quote: يا صديق المتعبين والعاشقين والشماسة والمتكسبين ..يا حبيب الذين تعرفهم بسيماهم، ممن يحسبهم الجاهل أغنياء من التعفف حين تبرهم، وتزورهم بليل فتمسح دمعة وتوقد شمعة يا أنيس المتفردين والمستوحشين، والمغلوبين على أمرهم والمأزومين} ..
قل لي يا صديقي و صديقهم أين يصنف المغتربون بين هؤلاء؟!! |
يا صديقي .. شكرا على هذا الثوب الذي ألْبستنيه ، و الذي أخجل تواضعي ..
فلنمسك بكل فئة و نصنفها مع المغتربين :
_ المتعبين : تعب الأجساد هينٌ هو ، و لكن كل المغتربين مجهدون في دواخلهم .. و ما أتعس المتعب في دواخله. - العاشقين : المغتربون أصناف : فيهم من هرب من عشقه إلى غربته ، و فيهم من لجأ للغربة ليثبت أركان عشقه ، و فيهم من فقد الأمل في العشق و أغترب فغرق في بحر العشق و الغربة معاً ، و هذا الأخير هو أحسنهم حالاً -الشماسة : أهناك هجير أسوأ من هجير الغربة ؟ أليس المغترب و إن سكن في ناطحة سحاب هو تحت لفْح رياح الغربة ؟ إذن هو شماسي 5 نجوم المتكسبين : حين يجلس المغترب بينه و بين نفسه في جلسة حساب ، يجد أن رصيده في ما قدم من مساعدة للغير تحمل أصفارا كثيرة يساراً ، و أصفاراً أكثر في رصيده يميناً. المتفردين المستوحشين : ما أقسى أن تكون في الغربة بين الناس و تشعر بأنك منفصم عنهم ، يلفك الليل في غمامة من هواجس.
و الحكي يطول ... و الحديث معك يُغْري بالإسترسال. بعد الأرشفة سنتحدث أكثر عن كل هذا و ذاك
| |
|
|
|
|
|
|
Re: المغترب دة ... يا رب يطلع من نفْسك (Re: ابو جهينة)
|
سلامات يا أبا جهينة..
تعرف أكتر حاجة بسطتني من الزول المشلهت المفلس دا أنه لم يتمن حاجة بطالة لأمجد ، وإنما فقط سأل الله أن يمرق من نفس حبيبته.. دا زول ظريف.. بعدين زي ما قال أخونا أبو بكر المغترب دا حالتو برضها تستحق التعاطف..
شكرا يا زول..
ياسر
| |
|
|
|
|
|
|
Re: المغترب دة ... يا رب يطلع من نفْسك (Re: Yasir Elsharif)
|
عزيزي د. ياسر
سلام كبير
Quote: تعرف أكتر حاجة بسطتني من الزول المشلهت المفلس دا أنه لم يتمن حاجة بطالة لأمجد ، وإنما فقط سأل الله أن يمرق من نفس حبيبته.. دا زول ظريف.. بعدين زي ما قال أخونا أبو بكر المغترب دا حالتو برضها تستحق التعاطف.. |
كيفن يا ياسر ما إتمنى حاجة بطالة ؟ قال ليهو : يخمك بلا يا شبه رخم الخلا ثم أردف قائلا : دعيت ربي يوم العيد ، بين أبوك و الكفيل تقع مشكلة
أها يا يا ياسر ، في غتاتة أكتر من كدة ؟
دمتم
| |
|
|
|
|
|
|
Re: المغترب دة ... يا رب يطلع من نفْسك (Re: ابو جهينة)
|
ياريس.......
بهديك تحياتى والخوة الجميلة.................
المغترب ألفيهو إتعرفت..بقو يقولوا لينا ...ألله يعينكم....
نصل السودان..بعرفونا طوالى...بنفاصل فى ألأسعار بكثرة.ومفرهدين اول ألأيام زى الجرجير الراشنو بالموية.........
وبعد داك..زهج وقلق..وحق المكالمة عشان تكلم أخوانك فى مكان غربتك..ما تلقاهو..نحن لافين فى دائرة والدائرة ما ليها نقطة نهاية..ربنا يصلح الحال...قلبت المواجع بى أغنيتك دى ياريس...راعى المشاعر.. إسماعيل محمد احمد عباس..
| |
|
|
|
|
|
|
Re: المغترب دة ... يا رب يطلع من نفْسك (Re: ismeil abbas)
|
يا جميل ازيك عارف المغتربين انواع كانوا اول حاجة ناس السعودية وبعد داك اتحولت النظرة من السعودية الى الامارات وفى فترة ليبيا لكن ليبيا دى (قطعوه معاها ناشف ) ليبيا انشا الله تعقرى وبرضو اليمن اليمن ضياع زمن وبعد الانقاذ ماجات بقت لندن نسكن لندن عمارات فوق مع انها لافيها عمارات كتيرة ولا حاجة اها بعد داك بقت كندا والقصة ماشة امريكا واستراليا وبعد شوية اسرائيل حسب مؤشرات ال(كاش) هسى ابصلعة الاخدرانى بقى فى امرا ضيق مع اليورو شفت كيف؟
| |
|
|
|
|
|
|
Re: المغترب دة ... يا رب يطلع من نفْسك (Re: سلمى الشيخ سلامة)
|
الأخت العزيزة سلمى
سلمك الله من كل شر
تحياتي العطرة
Quote: عارف المغتربين انواع كانوا اول حاجة ناس السعودية |
قبل السعودية ، كانت مصر قبلة لهجرة أهلنا النوبة
Quote: وفى فترة ليبيا لكن ليبيا دى (قطعوه معاها ناشف ) ليبيا انشا الله تعقرى |
صراحة مغتربي ليبيا أضاعوا زمنهم ، مجرد غياب عن الوطن ، خلاف بقية المغتربين على الأقل في موضوع التحويلات المالية كمصاريف
تعرفي يا سلمى أقسى أنواع الغربة هي وين ؟ الغربة في الوطن
دمت
| |
|
|
|
|
|
|
Re: المغترب دة ... يا رب يطلع من نفْسك (Re: ابو جهينة)
|
يا ريس : المغتربين بقوا حنك بيش ساي وبنات السودان بقوا ما بيقتنعوا بيهم الواحدة تجيها تقول ليها عايز اعرسك تقول ليك شغال وين تقول ليها في السعودية تقول ليك اها مهنتك شنو ؟ تقول ليها مهندس كمبيوتر ... تقول ليك لالالا انا ما قصدي في الجواز في الاقامة شنو ؟ تقول ليها مهندس كمبيوتر ..تقول ليك أها ونازلة في الحاسب بتاع مكتب العمل في السعودية كده ؟ بقن شفتااااات يا ريس .. عشان كده انا من انصار جكس الداخل وزواج الداخل كلو بي 500 ريال نقل كفالة + 400 ريال تأجير إستراحة + كبسة بي 600 ريال يعني كلها كده بتطلع ليك بي 1500 ريال بالمييت ..
| |
|
|
|
|
|
|
Re: المغترب دة ... يا رب يطلع من نفْسك (Re: عمر الفاروق)
|
عمر الفاروق
سلام يا زول
Quote: المغتربين بقوا حنك بيش ساي وبنات السودان بقوا ما بيقتنعوا بيهم |
حتى الحنك ال بيش بقى فيهو قولان ... و في رواية أخرى حنك ذاتو ما عندهم من كترة الذهول
Quote: الواحدة تجيها تقول ليها عايز اعرسك تقول ليك شغال وين تقول ليها في السعودية تقول ليك اها مهنتك شنو ؟ تقول ليها مهندس كمبيوتر ... تقول ليك لالالا انا ما قصدي في الجواز في الاقامة شنو ؟ تقول ليها مهندس كمبيوتر .. تقول ليك أها ونازلة في الحاسب بتاع مكتب العمل في السعودية كده ؟ |
دي عروس ولا معقب ؟
Quote: عشان كده انا من انصار جكس الداخل وزواج الداخل كلو بي 500 ريال نقل كفالة + 400 ريال تأجير إستراحة + كبسة بي 600 ريال يعني كلها كده بتطلع ليك بي 1500 ريال بالمييت .. |
كبسة بي 600 ريال ؟ قسم بالله يجوك نجيب زيادة معاهو 5 من العتاولة ياكلو الكبسة و الخروف و يقولوا ليك ( دي المقبلات )
دمتم
| |
|
|
|
|
|
|
|