مصطفى يا مدّثر فرحتني بوعد "حشرات الروح"، وسأنتحك إميل فوراً وحقيقي مليان شغف لأعرف ماذا فعلت بالكتاب وفيه. دا بنتموا على الميل.
Quote: ياخي حسن موسى ماشاف توب قنز لسع.
عارف يا مصطفى مدّثر، وحاة الله عارف. أمّال أنا بقولك في شنو يا صديقي؟ قلتلك حسن بِدْفِن دِقِن –بدرييي- ما برجى التُب قنز تجيهو وتخلي محلو درين. الباسيورد بتاعي اتشال (هرباً) ليشنو؟ مش إنت بنفسك و(بقلمك) شهدت بمكر الحكاية دي وعدم قانونيتها؟ طيب قرايتك ليها شنو؟ وكمان بعد دا بتجي بنفس فاتحة تقول حسن موسى غلادييتر، حسن دا ما جرى من هنا عينك عينك عبر نشل باسويردي "بالحرام": http://www.sudaneseonline.com/forum/viewtopic.php?t=1708&...2adf1724b1c6ebc2980f والله كان الأمَّة دي تشوف شوف! من شجرة الغول المغلغلننا بيها دي، ولاعن بولتيك الجسد. حسن موسى ردّ علي محمّد حسبو بشنو؟ ماهو داك كلامو معلّق لهسّع. رد علي قصي همرور بياتو؟ ما هو داك كلامو مشرور لمّا نشف. حسن موسى لامن يموت ما عندي ليهو غير هاون بضرب خلف الساتر ودا صحيح، بس لما يجيهو تُوب قنز بدفن دقن فوراً. ينتقد ولا يقبل أن يُنتقد أبداً. أنا الإنت حاسبني وليد دا أنضج منو في الحتّة دي، وكل الوليدات المعاي ديل أنضج منو في تقبّل النقد!
Quote: حسن عندو خبرة طويلة جدا في الكتابة النقدية يعني ما ممكن بحكم سنك تتوفر عليها ولا حتى أسامة الأقدم منك وبالتالي فهو غلادييتر.
والله ضحكتني يا مصطفى مدّثر جنس ضحك، ضحك شديد. جادي إنت!؟ في حكاية برهان المعادلة "النقدية" التي يمثّل أحد طرفيها "عُمُر" محسن خالد دي! كلامك دا يا أخوي عن "النقد والفكر" وألا "الجيش" يا عزيزي؟ كلامك دا عن مفكّرين ونقّاد وألا ألوية جيش ورقباء؟ وألا مجالس جعليين زي حقّتنا ديك!؟ اجري ياجنى أكل مع رفاقتك معانا ضيوف كبار! لكن لقيتهم أكلوا يابا. طيب خلاص أكل مع النسوان! علي بالحلال ناسك الأقدمين ديل غير إنّهم ولدوهم قبلي ما يبقالك عذر ودرب مرافعة ليهم. عااارف كدا. شوف بالمختصر يا مدّثر، حسن موسى مفكّر خطير إذا دخلنا ليه من باب كونه فنّاناً تشكيلياً. لكن فقر وبؤس كتابتو النقدية والفكرية الما عارف يقول عدس بس. قرأتُ له في مجمل ما قرأت ملاحظات ذكية، وتفكيك جيد، وسخرية معقولة، وأسلوب فوق الوسط بقليل (الوسط دا في نافوخي، غير متوفّر في الأسواق إلا كانتباهات صعبة التدوين). ولكني يا مدّثر لم أقرأ له "أفكاراً حقيقية" إلا فيما ندر، لأنّه مهتم بالمجتمع و"العمل العام"، هل دا فيهو أفكار في ذمتك!؟ ما كلام رجراج وعن شيء رجراج أكتر منو، وكل يوم متبدّل. وحتّى عن الرسم ذااتو تجده يتكلّم كصانع فقري وخطير بالفعل ولكن ليس كمفكّر رسم خطير. (حركات علم الاجتماع وكدا). أمّا حكاية (مشروع فكري من ابتداعه) فدي أنساها. إنت بتتونّس ساكت يا مصطفى مدّثر عارفك، وناسك الأقدمين ديل ما عارفين القصة ذاتها شنو، والمثقف السوداني -كان ياهو البنقراهو في النت دا- فأبله من اكتشاف ذلك. وحدّك مع كتابتهم دي، تترجمها بس، لأنو في ضفاف اللغات الأخرى استنكاح مافي، والحاجات البتخلع العوام والصغار –عندنا- دي.. ناس الضفاف التانية هم العملوها على هامش ولائم "الفكر". نحن لسّع في مرحلة تدهشنا مجرَّد مقالة منظمة ومتماسكة منطقياً، و(بس). يعني هسّع ود المكي دا فشل حتى في الحكاية دي، وزي ما قال متوكّل فشل حتى في إنو يمتّعنا بحبّة صعلكة وقفشات ساكت. وما تفتكر إنّو ود المكي مسكين في مقالو دا، أبداً، المقال دا لو جيت هسّع عملت ليك ليهو قراءة بجانبه بتشوف من مكر الدبلوماسية ما لا يراه أي قارئ مطلّش! المقال دا ضعيف آي، لكن عيبه الأكبر إنو (غير سوي) مش (غير جيّد تماماً). عشان كدا المقال دا بركاكتو دي حسن بكون ممغوص منّو جداً جداً لأنو ملان مكر. حسن موسى ما اتماكر علي ود المكي –دي شهادة حق- بل جاهو بالدرب عديل، طاخ طاخ، عينك في عينك.
وبرضك تقول لي فكر؟ والشباب كلّهم مالين البوست فكر فكر فكر. ياخ إنت شفت ليك "فكر" وألا "نقد" لا تكاد تخلو منه صفحة واحدة من ذرائع ما يسميه حسن موسى "بالعمل العام". لاقاك فكر وألا نقد فيه "عمل عام"، إنت بصحّك؟ لاقاك كتاب في أساسيات المعرفة وألا المنطق، وألا المنطقية الإيجابية، وألا الواقعية النقدية، وألا النسبية، وألا علم الجمال دا ذاتو الحشوا رأسنا بيهو دا، بتونّس عمَّا يشبه، وقلت للطيب صالح إنت عبد شايقية ساكت والشرك قبض؟ المادية ذاتها في عضمها "الفكري" الذي تأسَّست عليه الشيوعية، هل بتتكلم عن "عمل عام"؟ لاقاك فيها عمل عام إنت؟ فلامن تجي (للحقل) المعرفي ذاته، والأدوات التي تناولته، واتّجاه "النقد" أي شارعو الذي بداخل "حقله"، دا عند الدكتور تجده مملوءاً بتمامه بـ"لا أفكار" حسن. هو شنو هو كلامو عن الأفريقانية وعن ود المكي والطيب صالح، ياخي دي مهمة الأحزاب ما مهمة الناقد، ناقد هو وألا إمام جامع؟ وألا إنت حاسب الناس الفي سنّنا دي برضهم سُذَّج زي "أجيال" خبراءك هؤلاء. الكلام عن الأخطاء السياسية للطيب صالح وود المكي ومحسن خالد، إنت حاسبو فكر؟ الفكر ينتهي مع آخر نقطة من الرواية أو القصيدة أو البحث. وحتّى لو داير تقسّم العمل لمجموعة من دوائر الوعي زي ما قال أخوك دا بهناك في الليركس، فبرضو بترجع للعمل ذاته، مش تقطع للطيب صالح ضَروُّب في القاهرة، وتقول ليه إنت عبد شايقية ساكت، ياخي نقعد نشرح ليك إنت في الكلام دا!؟ الكلام البعمل فيه حسن موسى دا مهمة الكنيسة والجامع والأحزاب السياسية يا زول، كان نائم أصحى. ونوافقه عليه –معرفياً- من باب "العمل العام" دا ذاتو، بس عارفين إنّو الكلام دا ما ليهو دخل بأبواب "الفكر" دييييك.. الدييب.. السقراطية، النيتشوية، الانيشتانيوية، أو الرَّسْلية، وقع ليك؟ لسّع البوست بتاع ود المكي قاعد، و(الغلادييتر بتاعك دا زائغ منو، ما علّق حتى على كلام بولا، كما هي عادته "الفابية" نسبة لفابيوس، والغلادييتر يا مدّثر بتلبّب معركته وبياكل نارها). كلامي الهسّع دا ونسة، لو داير نشرح ليك الحكاية دي كويس –وبأدواتها- خلي حسن موسى يجيب الباسويرد بتاعي راجع، وعينك تشوف براااها في بوست ود المكي دا ذاتو. خلي يرجِّع الباسويرد. العمل العام دا ما فيهو ناس بغلطوا وما فيهو مسامحة؟ وألا "شنو"؟ لأنو الباسويرد في الحقيقة ما اتشال بالعام وإنما بالخاص، فالعام يمسح بالمراجعة والمحاسبة "الجماعية"، ولكن الخاص يبقى ويخلد "بما في الأنفس من مقاصد"! ووينو الباسويرد؟ أكلو الدودو؟ وليشنو؟ ما ياهو عشانك وعشان مؤمنين متلك كُتار يقعدوا يتونسوا: متك، وجيتك، وفتك.... الفتك بجري؟ وألا بسعى لحذف الآخرين من محل فتاكتو دا بطرق غير المنازلة؟ كلامي معاك ومعاه ومع الخلق دي كلّها قصيير، بس خليهو يرجع الباسويرد وأنا مستعد "للمحاسبة الجماعية"، نظام عمل عام وكدا. دا طبعاً لو أصلاً هو ما شالو "هرباً" من مزايا الغلادييتر على وجه التحديد، وبدون وجه حق! يا فردة ما تسكت ساي، ما تخلي التوب قنز دا يلف أربع لفات ويجيك بالصفارة ديك، تيييييت والملاجئ الملاجئ: Missiles in bound, Missiles in bound قال ("ميم" "غين" "صاد" وتقرأ مغص.. "ألف لام ميم راء" دا فكر قال)، وهي في قراءة سودانيز أون لاين (تظكرة، والضكر، وتقرأ عن سجيمان التذكرة والذكر) برضها فكر، مش؟ نسيت أقول ليك، حسن موسى كتابته لا تتطور، واقفة تج: ونسة، قلبنة مفردات، وقلبنة أمثال، سخرية مكرّرة، ولا يجتهد مطلقاً في استيلاد الأفكار وإلى يوم يبعثون.. كدي راجع كتابات محمّد حسبو المبكّرة هنا، وشوف الزول دا هسّع بكتب كيف، ماشي بسرعة الصاروخ البجر مركبة عشان يفقع بيها الجاذبية. وراجع حسن موسى في أوّل مقال كتبو ولاعن العمالقة، شوف حراكو بطئ كيف! ذات الأسلوب، والاستخدام البسيط للغة العامة. و"أنكلمك ضُحى" ومعاها حقوق الحفظ للجريفاوي، أتقول لا سمع العبّادي في شعر ولا سمع جعليين بتونسوا! بقاها لينا حقة الجريفاوي. هسّع عليك الله مش مكنة رأسك قلبت جلود من تكرار "عدم الحيا" و"كم تور"؟ تاني أكرّر ليك "كركرة حسنية"، لو حسن موسى غلادييتر خليهو يرجّع الباسيورد ولأجل قصير كمان، وأعد بإعادته باك كعُهدة. بس نشرح للمؤمنين حكاية إنو "الفكر" الجد جد، لا علاقة له بالعمل العام. ناسك الأقدمين ديل دقسوا يا مدّثر وما قروا (محل الفكر الجد جد) بتاع العلوم الطبيعية المعاصرة دي، التي غيّرت مفاهيم المعرفة كلّها وماية تمانية وتمانين درجة "دي جديدة". كان نسبية كان ميكانيك كم كان انتروبيا كان طوبولجي كان بيولجي كان ميكانيك كان دايناميك كان غيرن. الفلسفة الثرثارة والغالاطة دي مات عهدها يا رفيق. قدماؤك هؤلاء –هم بالفعل قدماء- تفلسفوا بينما هم لا يملكون تصوراً واحداً صحيحاً للمعرفة أو الوجود، لا وبل لو شرحت لهم –الآن- فلن يفهموا حتّى الفهم، يعني راحت ليهم. وكان مكضبني أعزمهم على البوست الفاتحو شاب جميل وجانا جديد اسمو (شهاب كرّار) وخليهم يقدروا يفهموا مجرّد الفهم الزول دا بقول في شنو! ناهيك عن ينظّروا وألا يشاركوا، يا ناس المعرفة أكلت ملف كبير كبير لدرجة لا تُوصف. تقول لي (الأعمار) يا مدّثر! بالله دقيقة، لأنو نسبية وكوانتم وأنتروبيا العلوم الطبيعية الحااارة دي –نديدتن تتخيّل؟- لكن ناس الفنون ديل ما بقدروا عليها، قلت ليك خليهم في فنونهم أحسن ليهم وبنعتبرهم مفكرين من الجانب دا (ويكفِّنوا الميتة دي علي كدا). وبلاش نفخ فاضي معاك في مسألة الأعمار المقدودة دي، والله ما بتأكل عيش مع شُفَّع اليومين ديل، و=الأعمار بيد الله= (هنا بقلّد في طريقة حسن الكتابية). أمّا الخبرة دي فما تنسى إنها برضو مرشحة لأن تكون خبرة أهل الكهف. هسّع عليك الله إنت قديديمك دا معطون في دوف الرجل الأميبي، اللهي الكتابة حقتك برضو كما تقول، وبعد دا داير تقول حسن بعرف يتكي الفكرة للضبح من وين؟ ياخي لو كدا الرجل الأميبي دا أختاهو جاي وألا جاي، ما بتعرف ليهو ذاتو، وأمشي أتونس مع حسن صاحبك دا. خليهو الأميبي لناس تانين يحفروهوا ليك منجم بعد منجم، ما يلقوا فيهو تكرار واحد، ولا قلبنة واحدة لمثل معلن أو سري، ولا حبّة (عمل عام). خالٍ من دسم (العمل العام). عمل عام، عمل عام، عمل عام، عمل عام، عمل عام... إلى ما لا نهاية! وبرضو يقولك فكر! ياخي الفكر بسوق دربو براهو، كان بقى عمل عام ونفع فمرحبا، ولا يتورّع أبداً إنو يبقى قنبلة نووية يمسح كل ناس العام والخاص، دا الفكر. لاهو صاحب الإنسان ولا صديق النسويات ولا مصلح المجتمع ولا يحانن ولا يخالط ولا يرحم. زح كدا وألا كدا مسوِّي جضيماتك الكنديات ديل! {الفكر ليس هو الأيدولوجيا... راجع المُفَكِّر ليونيل في (الخيال الحُر)}. يضحك نهارك
----------------------- يا مصطفى يا صاحبي، لو صحي ما في تُب قنز وحسن موسى فتك بالجد، وما بخاف مصير (المدرعة) الفي الفيديو أدناه دي، جيب الباسويرد وأنا فوَّضتك كغلادييتر للمسألة دي، أصالة عن نفسي، ونيابة عن كل من يحبون المنازلات، خلينا نمتّع الخلق دي ياخ. ما يقعد حسن موسى يزعمط –بالبلاغة السياسية- في ناس ما بقدروا عليه ويجي الزيك دا يقول لينا: فكر، وفتك. إنت يا فردة قايل دلانا لوري طوب بتاع علم اجتماع وألا كيف!؟ (أيوة أنا عندي ضحكة خالص خالص في أمور "علم الاجتماع" دي. لأنو ما عندو أدوات مسك كلو كلو، زي ما بتمسك كجّامة الهندسة التحليلية وألا التفاضل والتكامل فريستها). وأديب أديب القدّوا رأسي بيها دي ما هي إلا كجّامات أبتكرها أدبياً على ضوء كجّامات التحليلية والتفاضل ديل ذاتهم. فلو سموني (مترجم علوم بالأدبي) لأنصفوني أكثر من شتميتهم لي يومياً بالأديب. وبدل كل ما مرّة أقعد أتعذّر من "أديب" الاتجوّد بيها علي بكري دي وأنا –قبلتها- من باب سد الظنون، يمين الله إلا أغيرها ليكم لمفكّر وألا فيلسوف قريباً وأقطع رأسكم في حكاية أديب دي.
-------------------------------------------- هات الباسويرد، وموعدنا بوست ود المكي دا ذاتو، خلّي "الفتك" دا يجرّب لو صحي غلادييتر!!؟؟ لأنّي شايف إطلاق صواريخ زي الفوق دا من محلّي هنا، يفتقر لشرف الخصومة المعرفية الما بعرفوها قبيلة ومحليَّة "الفورلاب". قال فور أوول قال!؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محسن خالد
فيس بوك
تويتر
انستقرام
يوتيوب
بنتيريست