الفاتح جبرا .. في ذمة الله
نعى اليم ...... سودانيز اون لاين دوت كم تحتسب د. الفاتح يوسف جبرا فى رحمه الله
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: فيصل محمد خليل)
|
ابو الحسن والحسين وضيوفه الكرام. (يعجبني في قصيدة "فاطني ام حجل" هذا المقطع: خليت وراي ظلم الحسن .. جاييكي بى ظلم الحسين الى ان يقول.. سوي لي في قلبك مكان وأديني خيمة لاجئين ياراتي لقلبي وحنين) عموماانا فتحت البوست ده: لعشاق الطمبور: بعض اغنيات الفنان محمد كرم الله
وماعارفكم عندكم كوم بجاي. حقيقي كنت شايل هم توصيل الاحساس والمادة للناس وعارف انها اذا بقت جافة وزي الحصة السابعة حتنفر الناس وما في زول حيستفيد منها. لذا استميحكم عذرا في التنويه لبوستكم العامر و(سرقة) بعض المواد منه اذا لزم الامر.
عجبني برضو هذا الديك الحمش وهو يقول للجدادة: (أمشي يا ولية ادخلي جوة هسة السقا بيجي).
رجاء تاني: انزال صورة فريق البركل والتاكد انها نزلت لانو ما قدرنا نشوفها(مطفية عندنا) ___________________________ بعد ده كلو وبالمناسبة انا محسي مرخص عندكم ولليلي نمري ما استلمتها خالي ربنا يديهو الصحة والعافية يكون كمال نصر صاحب تسجيلات الكمال بكريمة.
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: أبو الحسين)
|
كتب د. ياسينQuote: تسلم يا غالي حمدا لله على السلام غالي والطلب رخيص |
تسلم د. ياسين وإنشاء الله دايماً جُرابك بالخير ديمة مليان...
وأهديك والإخوة الكرام قصيدة وعد الحبيبة وما كتبه عنها الباشمهندس عادل عسوم في منتديات البركل... (بين يدي عبد الله محمد خير)...
وعــــــد الحبيبة
يحب الناس ويعشقون ...كلنا نعلم ذلك بداهة....ولكن؟!!!.... أيستصحب هذا العشق خلال زخم الحياة الزوجية؟....أتظل ناره بأوارها كحالها الأولى ؟!!!...أيكون له نفس ذاك الطعم كما كان قبل الزواج؟!!!.... تزوج عبدالله وهام بزوجته حبا......ولم ينقص حبه لأم زينب... ولم تذوي شعلة العشق أبدا...بل زاد حبه نضجا واشتعالا مع الأيام والسنين.... فكم ماست نخيل (الحسيناب) طربا لذاك الحب الشفيف...وكم طربت عصافير (الككر) وهي ترى الحبيبين آتيين أورائحين....وكم ساحت جداول الجابرية وهي ترتشف نخب ذاك الحب وذياك العشق.... وفي أحدى صباحات(الحسيناب) الجميلة....تبشر (الداية) شاعرنا بقدوم (زينوبة)....فرح عبدالله بأبوته....ولكن فرحه ذاك لم يدم طويلا....فقد أدرك أن الحمل قد زاد عليه.....فبدأ في التفكير في الهجرة ألى الخليج.....فأحبائه أهل لأن يشقى ويتعب من أجلهم....ويخدمه الحظ وينال مبتغاه فيتحصل على عقد العمل .....ويأتي يوم الوداع ....وياله من يوم.....كيف يدع قلبه ورئتيه في (الحسيناب) ويغادر؟!!....في تلك الليلة ظل ينظر ألى أم زينب في عينيها وتنظر أليه......وبكت كما لم تبك من قبل... وقرأ في عينيها بأحساس الشاعر الكثير من الكلام ....وكأن لسان حالها يقول وهي تودعه...
عديلة عليـك مـشاويـرك عديـلـه عديلـة أن كان قـصيـرة ان كان طويلة عديلـة علـيـك محـل ماتمشي تمشي يـا عديلـه أبقيلـو زي الغيمـه رشـي أما أنـا الهامانـي راحتـك أول الشـي أنـت تأمـرني وعلي أمرك بيـمشي
وأن نسي فلن ينسى أبدا قولها وعيناها ممتلئة بالدموع...وصوتها قد بح من البكاء.... بـس توعـدني ما طـول بيـك غيـبة فيضع سبابته على شفتيها ويقول بملئ فيه وبكل أحساس صاق ونبيل... وعـد مـن أنـبل حبيـب لاجمل حبيـبة ويسترسل... فيك شفت الدنيا قاصيها وقريبه ومنك أتعلمت كيف أقدر أجيبه ويصيح الديك أيذانا بصباح جديد...صباح يغادر فيه شاعرنا أرض الحسيناب ألى الخرطوم ومنها ألى أرض الغربة...ويلقي عصا الترحال بأحدى المؤسسات بالرياض.... ولكن منذ وصوله يتأبى عليه النوم... فقد ترك قلبه ورئتيه هناك...هناك في( الحسيناب)...ويتقلب في فراشه ولسان حاله يقول...
لا متين يانومي فيك رؤياي تصدق ولامتين ياشوق موالي قليبي تحرق تاني جود باللقيا يازمني المفرق وتاني ياأجمل صباح في عمري أشرق
ويجتهد شاعرنا في أن يشغل نفسه بالعمل ... ولكن كانت روحه تغدو وتروح في أزقة( الحسيناب) وفي بيوتها.... فعشرة كعشرة أم زينوبة ...وريدة كتلك الريدة... تظل دوما ترفرف بجناحيها فوق رأسه...فيناجي نفسه ويقول...
ياحلاة العشرة وكتين تبقى صح صح وياحلاة الريدة وكتين تصفى تفرح وياحلاة ليلا معاك مادرنا يصبح وياحلاة صبحا معاك تكون أنت المصبح
وفي يوم ربيعي يخرجه أصدقاءه ألى أحدى حدائق الرياض... آملين بأن يخرجوه من صمته وحزنه ذاك...ولكن ذلك يهيج أشجانه بأكثر مما كان عليه حاله من قبل... فيقول...
في الربيع قالوا الزهـور تنضـر تفتـح يا ربيع في حضنو كـم لفانـي وارتـح صار يباب بستاني من غيـرك مكـردح غير سموم في أم شير وغير أم شير تكتح
ولكنه كان يعزي نفسه بحبه ذاك ...فهو رصيده في الدنيا ...ويخاطب خيالها ويقول...
حبـك الخلانـي لـى زول مـا بجافـي وحبـك العلمنـي أنظـم ليـك قـوافـي حبك أكبر مهر لـي طهـري وعفافـي أي بحــبـك وأصلـو حبـك زيـو مافـي
وتتحول قصيدة (وعد الحبيبة) على شفاه قامة أخرى وهوالرائع صديق أحمد ألى أغنية خالدة....فمن من العرسان من لم(يسير ) بعديلة عليك...فهو تعبير مضمخ بالفرح...وهو فوق ذلك دعاء صادق... بأن يكون الحبيب مشمولا بمعية الله ...ومكلوء برحمة الله...ومصحوب بعناية الله... بالله عليك عش مع هذا الجمال وعد الحبيبة عبدالله محمد خير
عديلـة عليـك مـشاويـرك عديـلـه عديلـة أن كان قـصيـرة ان كان طويلة عديلـة علـيـك محـل ماتمشي تمشي يـا عديلـه أبقيلـو زي الغيمـه رشـي أما أنـا الهامانـي راحتـك أول الشـي أنـت تأمـرني وعلي أمرك بيـمشي بـس توعـدني ما طـول بيـك غيـبة وعـد مـن أنـبل حبيـب لاجمل حبيـبة فيك شفت الدنيا قاصيها وقريبه ومنك أتعلمت كيف أقدر أجيبه لا متين يانومي فيك رؤياي تصدق ولامتين ياشوق موالي قليبي تحرق تاني جود باللقيا يازمني المفرق وتاني ياأجمل صباح في عمري أشرق ياحلاة العشرة وكتين تبقى صح صح وياحلاة الريدة وكتين تصفى تفرح وياحلاة ليلا معاك مادرنا يصبح وياحلاة صبحا معاك تكون أنت المصبح في الربيع قالوا الزهـور تنضـر تفتـح يا ربيع في حضنو كـم لفانـي وارتـح صار يباب بستاني من غيـرك مكـردح غير سموم في أم شير وغير أم شير تكتح حبـك الخلانـي لـى زول مـا بجافـي وحبـك العلمنـي أنظـم ليـك قـوافـي حبك أكبر مهر لـي طهـري وعفافـي أي بحــبـك وأصلـو حبـك زيـو مافـي
ــــــــــــــــــــــــــــــــــــــــــــــــ
قواسيب مودتي وتعظيم سلام صاحب القلم المميز صديقي الجميل الباشمهندس عادل عسوم...
أبو الحســــــين...
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: أبو الحسين)
|
صديقي الجميل فيصل خليل...
منور الحوش يا اخوي بي طلتك الجميلة...
وأهديك وكل الأحباب هذا العمل الجميل من الأديب عبد العظيم الطاهر "نوري" وأهديه عبرك إلى ود أختي الجميل طارق الأمين عوض وفرقة الهيلاهوب...
هـي وهـو "الجزء الأول...
(1) هي ........
قمت بدري صحيت في عجل وعست كسري مليت التقل ورحت أكابس أكوس في الحِلل وجيت صنقر أحش في البصل وريحتي ريحـة طير الرخم وقمت جاري وأخم في الفحم عيني سـايلي ونفسي إنكتم كلـو للـدوبال آ السجـم راجـي جيتك وربع اللحم جيتني فاضي قفيفتك عـدم مزرزرني انا في شنو ..؟ تشنفني أنا في شنو ..؟
(2) هو .....
هابشـاني انـا في شنو نابشـاني انـا لى منو الشقاوة علي جـات ردوم وفوق كتوفي انا شايل الهموم وديمي شـايل الليل مابنوم والنهار في النهزي وأحوم وبرضو منك جـاييني لوم حمدي صرة ولوية خشوم والنبيشي تجـيني بالكوم هـابشاني انـا فـي شنو نـابشاني انـا لى منـو
(3) هي ....
فـوقي تهرج ليه يـا غشيم مـاني طيرة وبومـة حـريم وماني عايشي هناك في الخراتيم ياهـو أكلنـا زمان من قديم بى ربيـع الكيـلو أب عضيم بيهـو نفـرك وسـاد الخشيم يا تجيبـو و يـا تاكلـو نيم مـزرزرني انـا فـي شنو مـشنفني انـا فـي شنو
(4) هو ....
إن نضمتي حديسك مسيخ وديمي حسك عالي صريخ وإن سكتي تسوي نفيخ طوبة وأمشير كاتلاني بالفيخ وإن نضمت انا يبقى لبيخ وتبقى حجي هلال ومريخ دار أخييتو خشمي يا شيخ دار أسدو أسمنتي بالسيخ ماب تعرفي تسوي التبيخ كلو صلصة ومتل الفسيخ وإن فركتي تفركي فجيخ التقـولي فـركتي بتيـخ أشكي وأبكي انا عاد لى منو ــــــــــــــــــــــــــــــــــــــــ
وتعظيم سلام وتحايا نواضر لصديقي اللدود عبد العظيم الطاهر ويا بخت من أدخل البهجة والسرور على الآخرين...
أبو الحســــــين...
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: الطيب عبدالرازق النقر)
|
أحبابي الكرام...
صبحكم الله بالخير والرضا...
الشاعر مات... قصيدة من شاعرنا المبدع د. عمر عثمان "الزومة" أهديها لكم جميعاً...
******* في صبحًا بـدري الصايـح فـات ******* اللهْ الدايـم والله الحـي يـا نـاس الحلِّـي الشاعـر مــات الشاعـر مـات .. الشاعـر شوفـو مصيبـتـو الـجـات مـات الإلـهـام .. جــفّ الينـبـوع الـكـان جـمـام شـردت راحـت مـنّـو الكلـمـات .. الشـاعـر مــات مـات الإحسـاس .. الوحـيَ الـكـان مـاعـاد ونّــاس يا رب الناس الشاعر مات ويـا دوبـو إتعـدّى العشرينـات واحات شِعرو الكانـت دايمـاً مليانـة مشاعـر وروْيانـات لوحاتـو الروعـة المرسومـة إتجلّـت فيهـا الإبـداعـات ماتت واحاتو الرويانة .. منكوبـة تشوفـا خـراب ناشفـات بهتـتْ لوحاتـو الفنانـة ألـوانـن مـاهـن منسجـمـات الليل الكان مسرح مفتـوح فيهـو بنـات الأفكـار سارحـات الليـل الكـان وتـراً مشـدود أسلاكـو تدنـدن طربانـات الليل ما عاد الليل الكـان .. أشعـارو قوافـي بـلا ميـزان أصبح زي ليل الناس ممدود .. والشاعر فيهـو امـدّد مـات ,,,,,,,,,,, يـا نـاس الحلـي الشاعـر مــات ,,,,,,,,,,, الشاعر مات مـن يـوم سافرأدّاهـا الحلـي قفاهـو وفـات من يوم بدّلْ بي وطنو وطن يوم جرى فـوق درب المادّيـات من يـوم فـارق طيبـة القريـة وفـارق حنّيـةَ الحبوبـات يطلع كيفن شعراً مكتـوم .. مـن ويـن يلقاهـا الإلهامـات كان الإلهام في بلـدو هنـاك قـدّام العيـن صُـوَراً حيّـات ,, في طيبة الناس ,, في حب النـاس ,, فـي عيـون النـاس في وجوهاً ضاحكي ومبسوطة رغماً عن ضيق الحياة باسمات في كلمي تطيّبْ لـي الخاتـر قايلنّهـا بـي صِـدْقَ النيّـات في الناس العِرْفتْ درْب الله وما زلّتْ مـن فوقـو الخطـوات إلهامي هناك في بلد الخيـر .. بلـد الحلويـن بلـد الحلـوات إلهامي هناك في وطن الحب .. اليعْرف خد وماب يعرف هات إلهامي معـا النيـل الجـاري أمواجـو هديـراً متقاطـرات القعـدة حلاوتـا فـوق قيفـو نسماتـو تهبهـب نديـانـات أشجار السنط الفـوق جرفـو بالشـال الأخضـر ملفوفـات قوقيي القمرة يجيك طربان في الجـوْ طايـرات السريـولات النيل يا متعـة حقيقيـة .. يـا لوحـة ملاهـا الـرب آيـات النيل يا لحظة فرايحيـة سرحـان قضِّيـت فيـك الساعـات المنظـر فـوق قيفـك يعجـب الصُّـوَر الحيـة ومرئيـات وحدين خايدين وحدين عايمين .. وحدين راكبين فوق الطوفات وحديـن شبكاتـن مرميّـة .. وحديـن راميـن الجبّـادات وحدين مالين الليد مِتّيـق .. ووحديـن شايليـن السّلّوكـات ووحدين جمب المكنات واقفين لابسيـن الخِـرَقَ الشّمّـارات النيل يا روح الشاعر آه ... من يـوم خـلاكَ وسافـر فـات أشعـارو انحبسـت فـي حلقـو أنقلبَـتْ أنّـة وتنهـيـدات إلهامي هناك في زراعتنا فـي النـاس الحضنـو الطّوريـات تربالاً عدّلْ لي حوضو .. كادن لـي جدولـو بـي الجنبـات الموية ترقرق في القـرّاع منحـدري علـي قعـر الشتـلات طيـر البقـر الطايـر فوقـو جنحاتـو انفـردن شمشيـات نازلّـو فطـورو مـن الحلـي .. جايباهـو بناتـاً منْـدلات العَرِق الناذف مـن وشّـو التعـب البايـن فـي العضـلات ضايقلو متين العيش ينجض وبـي خيـرو يعبّـي الشـوّالات إلهامي هناك في ساقتنا فـي النخـل الضلّـلْ بقـي غابـات حاضن عرجونو علـي صـدرو إنشكَلَـن فوقـو القمريـات إلهامي هناك في العصرية في الجـوّ البـارد لـي الطلعـات آه يا ليل الحلة الحالـم .. الشاعـر مـن يـوم فاتـك مـات وين نسماتك .. وين قمراتك .. وين اللمّة .. ووين الونسـات القمـرة حليـلا نسيناهـا والدهشـة سمانـا بـلا نجـمـات يا قمر أرْبعْطاشر وينـك !! منضـاري ورا قعـر التمـرات في بلـداً صبْحَهـا زي ليـلا مليانـة كهـارب وضوّايـات فـي بيتـاً لاحوشـاً فيهـو أوضاتـو تحسّبـا زنـزانـات الليل يا ليل الشـوم ياليـل .. لافيكـا غنـاوي ولا حجـوات لافيـك المسـرح لا النـادي .. لاطــاراً دقّ ولاحـفـلات لافيـك دفـع الله ولاهمـزة لا فيـك النكتـة ولا القفـشـات يا ليل جامد مافيك حياة .. وبي موتك قلـب الشاعـر مـات يا ناس الحلـي بناديلكـم بـي صوتـاً خانقاهـو العبـرات يا ناس حبيتكن من جواي .. يا نـاس شايلكـم فـي ذكـراي يا روح الشاعـر يـا زادو يـا شعـرو المكتـوب بالميّـات الشاعر ودّرتُـو الغربـة .. أشعـارو إندفنـت فـي التربـة أبياتا تولول زعلانات .. يـا نـاس الحلـي الشاعـر مـات الشاعـر ميـن اليرثيهـو .. لاأخْتـاً تبكـي ولا عـمّـات تبكيهـو النفـس المقهـوره .. بالدمعـة عيونـو المسْقيـات تبكيهو القافيـة المهجـوره .. تبكيهـو الأفكـار الشـاردات تبكيهو دوايتـو المكسـوره .. تبكيهـو اقلامـو الحردانـات تبكيهـو اوراقـو المنثـوره .. تبكيهـو دفاتـرو المنْسيّـات تبكـي السلكايـي وطمبـوره .. نغماتـا يئنـنْ منّـاحـات تبكيهـو الحانـو الملـتْ الجـوْ والليلـي انقلبـت مرسيّـات تبكيهو تودّعـو مجبـورة .. أشعـارو النّـورتْ الساحـات الشاعر مات لمـان ماتـت فـي قلبـو جمـال الإحساسـات يومو اليرجع لي بلدو يعود .. ويشعر بي إنّو هوْ حيْ موجـود وسـط الاحبـاب مبـسـوط ويــوزّع فــي البسـمـات والنـاس الفاتـن بالسنـوات راجنّـو إديـهـن مـمـدودات يومو اليتكـرّفْ ريحـةَ الطيـن ويسمـع دوّيـر البابـورات يومو اليشرب من موية الزيـر وينساهـا حكايـة التلاجـات ويتمدّدْ في ضل ضحويـة والجبنـة تجيهـو معـا تمـرات يومو الفي شوارعَ الحلي يحـوم لانجـدة ورا ولا دوريـات يومو البيشارك فرح الناس ويشـارك فـي وكـتَ العوجـات يوم داكا الشاعر تاني يعود وتعـود مـن تانـي الإبداعـات والصايح تاني يقـوم بـدري ويلـفّ الحلـي تـلاتْ مـرات يا ناس الحلي الشاعر حيْ .. الشاعر حـي لسّـع مـا مـات ــــــــــــــــــــــــــــــــــــــــــــــــ
مع قواسيب مودتي وتحياتي للشاعر عمر عثمان "أبو علاء" ولكل مبدعي بلادي...
أبو الحســــــــين...
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: حاتم هاشم)
|
Quote: ابؤالحسين والعقد الفريد معليش علي الغيبه الطويله بس حال الدنيا.
تحياتي... حاتم هاشم. |
صديقي الجميل الخليفة أبو هاشم...
يا اخوي غيبتك طالت خلاااااااس وسائلين منك بي هني والخُلفاء بي هناك... نسأل الله يسهل عليك وعلينا أحوال الدنيا يااااااااارب...
لك قواسيب مودتي وأهديك والحِبان...
رائعة الأُستاذ/ علي محمد سند "جريف نوري"...
الناموسة .. بي وهَم التُقل مهووسة .. والمِسكيني دايرة العظمة ديمة هي في دروبا تكوسة ... قالوا يوم في شجرة ركَََّت وفاكري إنها هادِّي حيْلا .. قنَّبت وأخدت قُعادا كان مبيتا و كان مقيلا .. شايلي هم الشجرة قالت ووقعتا السوده وتقيلة كيف هي لي جنحينا قدرت وقعدتا الصعبة وطويلة وماها عارفي هي لي الحقيقة .. إنو راس شوكي بيشيلا ....
أنا خلاص يا الشجرة طايري أبقي عشرة على فروعك أمسكي الواطا وأصبري أصلي خايفي على ضلوعك ياما كم كسرتو غيرك كم وكم فترتو نوعك وبرضي خايفي عليك تموتي و خايفي من يحزن ربوعك
ضحكت الشجرة الوهيطي من كلام من مافي جاها وكيف هي حبة وقبة صِبحت المصيبة الفي رجاها من كلام ناموسة جنَّت كايسي لي الجاه والوجاهه وقوة في جنحيها تبقى بدعة الدنـيا وحجاها
وينك آ المسكينة إنتي ومن متييين شرفتي جيتي مافي زولا عارفك أصلو كان تقيّلي كان تبيتي إنتي في صفقاي راكي وللا أصلك في رِبيتي وللا ساكت جنبي حايمي لسه طايرابا الجتيتي ومن متين الريسة ليكي وللا جنيتي وغبيتي
يالله طيري وإنتي حره كان تطــيري وكان تقعدي إنتي مافي وقاعدي واحد أهبطي آالمسكينة أبردي ما بهمني لو تطيري مني والسنوات تعدي وللا باكر زي رفاقتك تاني لي تجي وتصدي لا بهزو هواكي فرعي لا بيجيب في لا بيودي ولا عروقي بعد تطيري بتجبدي أدناها وتشدي إلا معذوره أنت برضو لو عقيلك أصلو قدرك وده المخليكي أتوهمتي ولي الشدايد داقي صدرك
يالله يا مسكينة طيري بس مصيبتك صح تقيله إنتي لا حيل فيك يشيلك لا عقل تلقيبو حيله وديمة في الأمثال بقولو كل زول شيلتو بيشيلا والجمل بيشوف رقبتو سمحي ممدودة وعديله وكل فوله ومهما تبقى ليها كيالا البكيلا ـــــــــــــــــــــــــــــــــــــــــ
وتحايا نواضر للأُستاذ/ علي محمد سند وصديقه الذي أهدانا هذه القصيدة نادر رشاد "البركلاوي"... وأبقى لا تغيب تاني قدُر دا يا حاتم هاشم...
أبو الحســــــين...
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: yasiko)
|
الحبيب يا سكو سنجك مية واربعطاشر مشكور وتسلم يا الراقي اب زوقن سليم
مكحول العيون اللونو أسمر خدو السادة حالي لهيجو سكر نظراتو السهام في الجوف بتنحر قصد لي هلاكنا مالو وقّل فينا اكتر ــــــــــــــــــــــــــــ دامع ولجّه طرفي يا ابوطرفاًنحر والبسم المفلّج للأكباد نحر ماببرد حميمي لو أحسي البحر داري وماكا داري يا سمح النحر ـــــــــــــــــــــــــــ سلب نومي الملاك وصفاي عكّر زاد نبض القليب والدمع تفجّر معزز عند ابوهو البيهو بكّر أنا عقلي سرح معاهو فكر ــــــــــــــــــــــــــ كلو أذاي يا طبيبي في جوفي أنحصر حبك خلا عضمي يا نور البصر بالي ليس ألا قولاً مختصر والعند الله أقرب من لمح البصر
تسلم يا دكتور
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: أبو الحسين)
|
إخوتي الكرام...
بقلوبٍ ملؤها الحُزن والأسى ينعي الأعضاء المشاركين والقراء الكرام بحوش الشايقية الخليفة/ تاج السر منوفلي الذي وافته المنية أمس فرحل ملبياً نداء ربه نسأل الله تعالى أن يتقبله قبولاً حسناً ويسكنه الجنة مع الأبرار يااااااااااارب وصادق تعازينا لأُسرته الكريمة وأحبابه ومريديه بمنصوركتي وأم درمان والمملكة السعودية...
كتب عنه الخليفة أحمد العوض "عيدابي"
Quote: الفقيد الشيخ تاج السر منوفلى كان من اهل البر والخير وخدم القضاء الشرعى فترة من الزمن وكان عضو فى البرلمان فى اخر حكومة ديمقراطية عن الحزب الاتحادى الديمقراطى وعمل رئيساً للجنة التشريعات الاسلامية فى البرلمان وهو الامين العام لهيئة الدعوة والارشاد الاسلامى فى (السودان ) حتى وفاته وكان من المهتمين بخدمة اهل الطريقة الختمية والمنتسبين اليها |
نسألك يا الله أن تغفر لشيخنا تاج السر بقدر ما قدم لشعبه الذي أحبه بصدق وما الموكب الكبير الذي حضر تشييع جثمانه الطاهر إلى مقابر السيد/ المحجوب الميرغني ببحري إلا أكبر دليل على حبه الكبير في قلوب هذا الشعب الذي يحب ويعشق الإعتدال... ونحن نحسبه عند الله تعالى من المقبولين المرضي عنهم بإذن الله...
وإنا لله وإنا إليه راجعون...
أبو الحســـين...
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: أبو الحسين)
|
أحبابي الكرام...
أهديكم رائعة من روائع الأُستاذ/ خالد شقوري...
صابريه
طفت اطراف الفيافي شلت صبحي وليلي حافي مانسيت ارد القوافي زي طعم صبريه مافي زي عشم صبريه مافي زي نغم صبريه مافي
شافعي من عربان بلدنا منها وفيها الوداعه شتله في قيزان بلدنا قايمي بايده وضراعه القديم اللافه طرقي زاهي في روعة طباعه البسيمات في وجيها الباهي من زمن الرضاعه فاقعي زي شمس العصاري في العمر باقي له ساعه في القليب الشايله صافي زي صفا صبريه مافي في الهجير راحت تدقق في النهارالحار تورق للهدوم بالليل تلتق .... في الجرف زارعه له حوض راجي قبل الحين يبتق والبسالمه من بلدنا هي تقولو انشالله عافي زي كلام صبريه مافي وزي سلام صبريه مافي في كريقة خاله احمد شايله ليله وايده تنبح شوكي لاقته في دريبه لما كان بالمعز تسرح نامت المسكيني تقنت والفوينيس زادو روح باقي تمتمه في خشيمه تسال الله المسره تنجح ماله مال المسره الا شان حبيب روحه يفرح دي البنيه الريده وافي زي غرام صبريه مافي زي شعور صبريه مافي زي غرام صبريه مافي رادت الناس السمر رادت الصفا والعكر رادت الموج الهدر .......... ردات الحله وبيوته في عيون صبريه طلت ريدة الخلا للبحر نافري من قيلة الكرارق وخايفي من قولة السفر والرحيل السرو خافي في قلب صبريه مافي في زمن صبريه مافي وفي خيال صبريه مافي والنهايه المن فصول سيرة البنيه لما عادت للبيوت الكانو قبل المغربيه مالقت غير الزوامل شايله احلام الصبيه شايلي عيدان الكرراق في الصباحات والعشيه ضاربي بطن الوادي زفه لمت الناس والسعيه والمطيره الضاربي قبلي لاقت الدمعه العصيه والرحيل عز البوداي الرحيل وجع البنيه زي رحيل صبريه مافي ِ زي سفر صبريه مافي زي حلم صبريه مافي...
ــــــــــــــــــــــــــــــــــــــــ
يا ريت د. ياسين يتْبِن مكتبتو وينزلها لينا بي صوت النصري...
صديقي الجميل أبو قصي... أرجوك عدل الأُغنية وأجعلها تعمل بالضغط عليها حتى يتمكن الغير من إنزال غيرها...
ولكم جميعاً قواسيب مودتي...
أبو الحســـــين...
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: yasiko)
|
Quote: ود العم أبو الحسين،، 1000000000000000000000000000000000 مبرووووووووووووووووووووووووووووووووووووك لك كل الأمنيات الطيبة سائلا الله أن يبارك لكما ويبارك عليكما ويجمع بينكما بالمعروف،،
أفرحنا الخبر جداً تستاهل كل خير |
صديقي الجميل وابن عمي د. ياسين...
تسلم يا اخوي على ها الشعور الطيب ونسأل الله يتقبل دعواتك الصادقة ويجمعنا قريباً في ساعات الخير...
ولك قواسيب مودتي وإنشاء الله في حجتك الجايي تجد الصور والأشرطة في مكة برفقة الأخ الحسين العباس... نسأل الله يسهل علينا وعليكم ولا تنسانا من صالح دعواتك يا راجل يا بركة...
وأنا بإذن الله سأُغادر المملكة غداً والزواج سيكون في نفس المواعيد لو ربنا حبس العوارض يوم الثلاثاء 21/8/2007م...
وصيتي ليكم خلو بالكم شديد من الحوش دا إنت والحبان وعارفكم ماب تقصرو...
أبو الحســــين...
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: omer abdelsalam)
|
ابوالحسين حبيبنا
بسم الله ابتديت قولي السمح والزين والقول موهو داير البكتبو ويقرا
مشكور في الفريق لا بيت ولا بيتين لا لعب القمار لا جرب الخمرة
في اليوم المسوّم الليلة يا المبروك حراسك ملايكة وكان مشيت يبروك
مبروك والف مبروك الاف مألفة في المبارة يا ابوالحسين تسعد وتنعم وتتهنّى وتضوق نعيم الدنيا وسعوده قسمتك تبقالّك هنى في الدنيا وزخيرة ليوم الوقوف امام الديان الاحد فرحنا وزاد فرحنا أن أكملت دينك يا كامل العقل والراس كنا نمني النفس كان بقى قطر كريمي بجي بي عندنا والله كنا شبينا وركبنا وحضرنا اعقد واكلنا عقبو من البركاوي داك الطعمو حالي قلوبنا معك في يوم عقدك وسيرتك
لك التحية والتقدير
خالد
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: مجدي عبدالرحيم فضل)
|
ابو الحسن والحسين وضيوفه الكرام. (يعجبني في قصيدة "فاطني ام حجل" هذا المقطع: خليت وراي ظلم الحسن .. جاييكي بى ظلم الحسين الى ان يقول.. سوي لي في قلبك مكان وأديني خيمة لاجئين ياراتي لقلبي وحنين)
عموما انا فتحت البوست ده: لعشاق الطمبور: بعض اغنيات الفنان محمد كرم الله
وماعارفكم عندكم كوم بجاي. حقيقي كنت شايل هم توصيل الاحساس والمادة للناس وعارف انها اذا بقت جافة وزي الحصة السابعة حتنفر الناس وما في زول حيستفيد منها. لذا استميحكم عذرا في التنويه لبوستكم العامر و(سرقة) بعض المواد منه اذا لزم الامر.
عجبني برضو هذا الديك الحمش وهو يقول للجدادة: (أمشي يا ولية ادخلي جوة هسة السقا بيجي).
رجاء تاني: انزال صورة فريق البركل والتاكد انها نزلت لانو ما قدرنا نشوفها(مطفية عندنا) ___________________________ بعد ده كلو وبالمناسبة انا محسي مرخص عندكم ولليلي نمري ما استلمتها خالي ربنا يديهو الصحة والعافية يكون كمال نصر صاحب تسجيلات الكمال بكريمة.
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: نسرين جمال)
|
الأخوة الأفاضل رواد الحوش بدون فرز من صاحب الدار أبو الحسين مروراً بالأصدقاء د/ يس وعثمان رغيم الحسن وود منسي وإلى الاخت نسرين جمال (مرحباً بك في دارك ) حوش أبو الحسين مضياف خاصة بعد الزواج ألف مبروك بيت مال وعيال .
مشتاقين كتير،
حين ما عدت من الإجازة لم أجد الحوش حزنت خاصة وانا غشيم في التعهامل مع التكنلوجيا ما عرفت كيف أصلة. فرحتني طلالتكم الحلوة وإن شاء الله دائما تامين لامين وكل عام والجميع بخير .
الاخ أبو الحسين ستجد رسالة عبر الماسنجر .
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: موسى الحسين سيد أحمد)
|
ارجع بيكم تانى للفنان عبد الرحمن الكرو الذى اطلقت عليه فى مقالاتى بالفنان المسكين .. وقلت فى معنى وتفسير هذا الاسم انه متواضع ولا يحب الاضواء رغم انه يملك الكثير من الاغانى الجميلة بل اجملها سواء كان من اغانى التراث او الحديث وهو فنان مخضرم كما ذكرت عاصر كل مراحل اغنية الطمبور ابتداءا من اغنية الصف الى احدث اغنياته واجملها .. اضافة انه يرى ويسمع اغانية تغنى من قبل اخرين وتزور وتخططف ولا يتكلم .. او يغضب او يسال حتى ..
تصدقي يا محاسن لمن خبرك جاء وصلني انا جيت ابارك جراحي تنزف لدياركم ساحبة ظني بي بشيشكن يا عيوني يا دمعوع لا تفضحني طالما الأقدار بتحكم غصب عنك وغصب عني جيت في ليلة زفافك برضاي ورغبة مني أنا جيت اضم الشوق واقالد وانضم الأشعار واغني جيت في فرحك اشارك جيت اقول مبروك واهني جيت امد ايدي البترجف لي ايادي ملاني حني انا جيت اعاين واملا شوقي في العيون العذبني انا جيت اودع في خدودك البي صفاهن جرحني كان مناهن اعيش معاهن أه دا لو كان بالتمني قسمة والاقدار ارادن يحرمني ويحرمني التمن املي البنيتو حتىلي شوفتك امني ادي حالي انا يا ليالي لي بكاي ماك دار تحني كنت في عتمت همومي اللبن ما يرحمني وانتي في عش السعادة أه انا الشوقك كتلني ابكي في زحمة سنيني في الليالي العاكسني الوداع الوداع الوداع يا نور حياتي يا امل خاب فيهو ظني بي بشيشكن يا عيوني يا دمعوع لا تفضحني طالما الاقدار بتحكم غصب عنك وغصب عني
قد لا تعرف الانسان الا بعد ان تكون قريب منه وهذا ما حصل لى مع هذا الفنان الرائع .. اذ جمعتنا الغربة فى دولة الامارات التى جاء اليها ليرتاح كما قال ويحسن من احواله المادية ويبنى بيته فى جبرة.. وسعيت معه والاخوان هنا فى ابوظبى لتحقيق احلامه واستطعنا ان نلحقه معنا بصحيفة اخبار العرب .. موظف للامن.. وهو طبعا صاحب خبرة سابقة فى السلك العسكرى .. وبتواضعه وعفويته اتصل مباشرة بزوجته ليخبرها بالعمل الجديد وقال لى اننى حين اخبرتها بان عملى يبدا بالمساء وينتهى عند الصباح ..ان زوجته قالت له من عرفتك عملك بالليل الجديد شنو ... وبروحه الفكهة وعفويته حكى لى هذه القصة .. كان اول شىء تحدثنا فيه هو محاولة تجديد نشاطه الفنى فى ابوظبى وعمل فرقة ثابتة للمشاركة فى مختلف المناسبات للجالية .. واتخذنا من النادى السودانى نقطة للانطلاق وكانت فرقته واغانية القاسم المشترك فى كل المناسبات طيلة الفترة التى قضاها معنا الى ان غادر للوطن ...اواصل
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: yasiko)
|
صديقي الجميل د. ياسين...
الهمزي واللمزي لزومو شنو؟؟
وأنا داير أشيل نفسي وأجيك بي تقاريري عن البلد والصور الجبتها معاي وما تنسى سجلت زيارة عصراوية للحاج محمد ود ياسين والفقيرية بت ود شيخنا وكانت جلسة ما احلاها بس فاقداك...
والبركة فيكم يا عزيزي في فقيد الأراك ختم محيميد نسأل الله له الرحمة والمغفرة والجنة ونعيمها ياااااااااارب... صادق تعازينا لكل أهلنا بالزغولة...
وأكيد جاييك بي جرابي المليان بس شيلو الصبُر ولا تجاري خالد دا داير يجرجرلُو كلاماً تاني أنا عااااارفو...
مودتي...
أبو الحُســــــين...
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: أبو الحسين)
|
Quote: Quote: زواج فى قرية سودانية/متوكل طه محمد احمد
مجتمع الشايقية كسائر المجتمعات في السودان، يعيش في صراع بين القديم الموروث والجديد المستحدث بفعل حركة العمران البشري المتجددة دوماً، ونلحظ أن جدلية هذا الصراع لها حضور كثيف في أدبيات الطيب صالح وشخصياته الدائرية، كما حدث في رواية عُرس الزين الشهيرة، التي اتخذت من قرية ود حامد موطناً لها، حيث تعاظم الجدل بين الجد المحافظ "محجوب"، والحفيد النازع نحو تجديد الماضي التليد "الطريفي".
ونود في هذه الإطلالة أن نقف على فصول صراع تراجيدي آخر، نسج حيثياته شاعرنا المبدع الأستاذ السر عثمان الطيب في لوحة أدبية رفيعة الخيال ورمزية المعنى، تقوم على ثلاثية خلاقة، أبطالها: "بت البلد" التي تنادى بإقرار حقها المشروع في الحب، والدها "حاج مُحُمد" الذي ينظر إلى إله الحب نظرة احتقارٍ وتوبيخٍ، لأنه يعُدَّه إلهاً ناسخاً فاسخاً لعادات الأهل والعشيرة، و"ودالبلد" الذي يمثل الطرف الغائب في حيثيات الحوار، غياباً حسياً، والحاضر في مخيلة بت البلد حضوراً معنوياً، لا تؤمن بشرعيته أدبيات ذلك المجتمع الريفي الغارق في موروثات الماضي بخيرها وشرها. وفي تناولنا لهذه القصيدة الرمزية سيتركز النقاش حول المحاور التالية:
البيئة التي عاشت فيها بت البلد عاشت بت البلد في بيئة رغدة، وبسيطة من غير تعقيد، هائنة لا يكدر صفوها إلا صفاء قريحة أهلها الطيبين الأخيار... الفرد في ذلك المجتمع عبارة عن خلية حية في ذلك الجسد المترابط، ومشاركته فيه قائمة على عموميات وقيم تواضع عليها الأهلون، يحتفلون ولا يدركون حقيقة مشاعر المحتفي به، ويشاركهم المحتفي به الفرحة أحياناً بمشاعر مصطنعة وقناعات مهزوزة، دون اتخاذ موقف فردي يعكر صفو ذلك الاجتماع البشري، حتى لو كان ذلك الموقف على حساب قيم وأحساسيس ارتضاها لنفسه. وفي هذا الواقع المحكوم بقيم العقل الجمعي أذيع خبر زواج بت البلد من غير إعلان مسبق، علم به العوام دون الخواص، باركه الجميع لأنه عمل خير، يجب أن يتم دون مشورة صاحب الشأن، هكذا يصور لنا الأستاذ السر سرعة انتشار خبر خطبة بت البلد من ذلك العريس الذي اختباره لها والدها حاج مُحُمد في الأبيات التالية:
بلا خبر طق الخبر مالي البلد قالوا العريس قام بالأحد الحلة جاطت والحريم يتهامسن جاي الولد كوم من بنات للبير ورد يتحدثن جاي الولد يابختها وا شوقنا نحن اللينا جمر الشوق وقد ***** لامن خلاص الليل دخل آخر شعاع من الشمس روح نزل ضو القميره جاء من بعيد بهر قدل دافر ظلام الحله قدامو وصل **** ناس البلد النام رقد والماسك السبحي وعبد مشغول هو بى خبر العريس القالوا قام بالأحد
إذن ما هو موقف بت البلد صاحبة الشأن من هذا النبأ الذي لم يطرق سمعها من قريب أو بعيد؟ اغمضت بت البلد جفنيها على أحلام ضياع، منسوجة بخيال تطالعات أوهى من حبل العنكبوت، وذلك الضياع كان يتجسد في طيف "ود البلد" الذي أحبته دون أن تراه أو تعرف عنه شيئاً.
الليلة بي هناك بعيد بقادي في آخر الديار راكوبة ضلها أحر من حر النهار كوم من بروش وجريد تمر عيدان صغار دلوق هدوم موروثة من زمن الكبار تلات عناقريباً صغار كرابه منقطع نزل والنوم من البى فوقها روح تب جفل *** راقد هناك كوم من ضياع مركب مسافرة بلا شراع وأحلام مسافرة بلا وداع دموع ضياع تتجارى من غير انقطاع أحرف أنين ما خطتن أيد بيراع
الحلم الضائع والكنـز المفقود استيقظت بت البلد من قفوة حلم عابرة، وإحساس خفي أبحر بها إلى ضفة النيل اليمنى، حيث يسكن ود البلد ذلك الكنـز المفقود... أبحر بها الخيال إلى ذلك الشاطي المجهول، حيث رسى بها زورق الأحلام... بت البلد عبراتها سدت في الحلق تبكي وتنوح تشرب دموعها وتنشرق لمن حسيس نقارة جاها من الشرق *** قامت على الحيل صنقرت شالت طريحتها للدميعات كفكفت
فلا عجب أن هذا الحلم هو حلم طفولة باكرة عابثة، لأن بت البلد لازالت في هذه الأثناء ماثلةً أمام لوحة من خيال ماضيها الغرير، حيث يظهر في الأفق والدها حاج مُحُمد، وبجانبه روتين حياة هادئة وهائنة بما كسبت، حيث تبدأ من فجر صباحها البازغ إلى غروب شمسها الساكن عند ضفاف النيل الخالد: كوب من شاي الصباح الممزوج بحليب أغنام راتعات في مُراح مجاور لمنـزل حاج مُحُمد ... مصحوباً بحفنة تمر من ثمار شجيرات نخيلهم الباسقات ... ثم يعدون في العشي بزوامل بطان، ومعهم حِزم (كُليقات) من لوبي الجروف الذي يزرعونه على ضفاف النيل لقوت أنفسهم المتواضعة على البساطة، وقوت أنعامهم ذات الضروع الحالبة ... ويصورنا لنا الأستاذ السر هذا المشهد بقوله:
أتذكرت فجاة السنين الفاتو جن وأيام زمان اتلملمن أتذكرت كانت تقوم فجراً صباح لمن يقموا أهل الصلاح وأبوها شايل السبحي صاح ياشفعه شدي الشاي سريع سوي الملاح شيلي المناجل وأمشي قدامي الجرف أتذكر كانت تسبقو تمشي تنـزل بي تِحِتْ تمسك صبية التمرة بايده وتَحِتْ تقعد تحش اللوبي لي الكاويق تقش تصل البحر والموج يداعبها فوق هدومه ينط يرش وبعدين تشيل القش تفوت واليوم يفوت وتفوت سنين وتمر سنين يكبر عمير بت البلد ويكبر معاه كمان حنين
أريحية الفطرة ورمانسية الخيال تعاقبت حلقات الزمن على بت البلد، وكانت هذه الحلقات تمثل بُعداً مهماً من أبعاد حياتها الباكرة، حيث بدأ ينمو في صدرها الناهد شعور دفين وأحساس صادق بقيمة الحب في الحياة، حباً يربو على هامات الغريزة وماديات الحياة البازخة، لأن غاياته المنشودة تتجلى في عشقها العذري لود البلد، ذلك الفتي الذي بادلها المشاعر، ورأت في جبينه علامات الوفاء، وبين جفنيه سحائب الوجد والصبابة الهاطلة، وقد صورنا لنا ذلك الواقع الأستاذ السر عثمان الطيب بخياله الخصب في لوحة أدبية فريدة:
الليله في يوماً صباحو صباح هنا واحة عبير نغمة غنا ريحة لبينه مقننه مر الجنى وسلم على بت البلد ذي عادتو سلم وأبتعد تابعاه عين بت البلد بت البلد سمعت ضريبات القلب ياالله مالو دا ها القلب بعد الثبات كيفن خرب بت البلد عرفت تحب *** واليوم داك وماجاها نوم مادام خيال ود البلد يمشي ويحوم بين الخيال شافت وجيهو الهاش وباش شافت عيونو الفيها فيض أحلامها عاش شافت سحاب الريدة فوق واديها راش
أحلام مدينة "بت البلد" الفاضلة والمستقبل المجهول تاهت بت البلد مع وجدها المكتوم، وشرعت تبني في عش زوجية حالمة على أطراف مدينة فاضلة شُيد أساسها على رمال رومانسية متحركة في أرض لا تؤمن بقيمة الحب، تصورت أن ود البلد تقدم إليها، وطلب يدها من حاج مُحُمد، ثم هيأت لهما الأيام متكأً عند محفل عُرس، فجلسا سوياً وقت الأصيل والشمس تحن إلى خدرها جهة الغروب ... تبادلا نظرات الوفاق، بعدها تصافحا معلنين زوجهما على عامة أهل البلد. فلا غرو أنها أحلام وردية غُرست في أرض نكدة وواقع مرير، تجسدهما المقاطع التالية:
الليلة تاهت مع الشوق الما عاد ينكتم والصورة هادي في قليبه بتترسم تاهت مشت سايقاها دقات الدليب لي دار حبيبها منى القليب لي قعده عصراوية فوق العنقريب لي الونسة والخاطر يطيب لي مسكة في أيد الحبيب *** الوقفة قدم الجنيات القرمصيص وغنا البنات ياالله وين تلقى الثبات والصفقة من تال الولاد تسمعها جاياها من أخر بلاد
تراجيديا العواطف وتقاليد الزمن الغادر ثم بعد هذا المشهد الرومانسي ينقلنا الأستاذ السر إلى عرض حيثيات موقف حاج مُحُمد، وهو موقف شخصية معيارية في مجتمع تُلوى بين يديه صوالف الوجد والصبابة، وتُؤاد أحلام العذارى... مجتمع يكفر بقيمة حب، ولا يؤمن بأن للمرأة أحساس وعواطف ورغبات ذاتية تشد إليها نبلها... في ظل هذا الواقع التراجيدي يعقد حاج مُحُمد زواج ابنته خلسة من وراء حجاب مع العريس القادم بقطار الأحد، راجل موظف وعندو مال، وبذك يسدل الستار على مشاعر صادقة، كانت تود بت البلد أن تعيشها مع محبوبها ود البلد. حاولت بت البلد أن ترفض هذا العرض، لكنها قبلته كُرهاً عندما ...:
أتذكرت قول حاج مُحُمد والدها حالف يمين ود البلد ما يخدها لو كان ركع قدامها صلى يعبدها *** أتذكرت قول حاج مُحُمد والدها وصف العريس الجاي بقطر الأحد كتَّر محاسنو وعددها .... راجل موظف عندو مال يأويك في بيتاً الحلال تبقيلو أمً العيال
بالرغم من أصرار حاج مُحُمد إلا أن بت البلد حاولت أن تقدم رفضها الحاسس بالدونية في ظل إحساس عميق بغلظ قيود الواقع المرير، وكآبة البدائل المطروحة، وعند هذا المنعطف تحطمت الأحلام الوردية التي حلمت بها بت البلد:
أتذكرت لمن أبت قول حاج مُحُمد والدها كيف نهرها وكيف نهزرها حالف يمين بيودرها لو ما رضت بالجاي بي قطر الأحد *** قاليها: ما عندك أدب تعبان سنين فوقك تعب بديك لي زولاً كعب تربال عشتو عدم عدم لو قاري لو ماسك قلم تاخديهو تندمي صح ندم يشقيك يوريك الألم
هنا شعرت بت البلد بقساوة الزمن الجائر، وبدأت تعيد ذكرياتها مع ود البلد لكن لا حياة لمن تنادي... آمنت بت البلد بقدرها المحتوم، أن تكون كماً مهملاً من أكوام الضياع في بلاد لا تقدر قيمة الأحاسيس والمشاعر، وألقت لواء التحرر عندما هاجر دو البلد بوجدانه وجسده بغية البحث عن لقمة عيش كريم لتأمين مستقبل المجهول، وواقع حالها يقول:
أتذكرت كيف الحبيب ود البلد في الغربة سافر وأبتعد بكت لمن الخبر زاع في البلد أنو العريس قام بالأحد *** الحلة جاطت والحريم يتهامسن جاي الولد لكنهن ما عرفن الشوق كيفن وقد ما عرفن هي شوقها تب ما عندو حد مو للعريس للحبيب ود البلد دا الراح في زحمة ضياع ما توجد يا حليلك إنت يا بت البلد
هكذا استشهدت ريحانة التجديد في بلاد لا تؤمن بقيمة الحب، وبذلك شكلت حلقة من حلقات المقاومة الصامتة، التي حملت لواءها من قبل أمونة بت الشيخ حمد عندما ألقت بجسدها العاذر في جوف النيل الخالد، رافضة الزواج من رجل بلغ من الكبر عتية، اختاره لها والدها الشيخ حمد على حساب مشاعر صادقة تبادلتها مع الحبيب ود البلد. هكذا انتصر حاج مُحُمد الذي كان يمثل واقعاً كلاسيكياً، يعيش على اجترار الماضي دون شرعة ولا منهاج، على ريحانة التجديد (بت البلد) التي حاولت الانفصال عن ذلك الواقع لكن دون جدوى... هكذا بفضل حاج مُحُمد وأعوانه ظلت العواطف بمثابة برعم نامٍ وضع عليه صندوق اجتماعي ذو ثقب واحد، يأتي منه الهواء والضوء، وعلى الريحانه التي بداخله أن تكيف مسار حركتها تجاه ذلك الثقب، الذي يشكل ضمان بقائها على قيد الحياة، لذا ظل مصير العواطف والوجدان معوج القوام لعدم استقامة أصله، وهذا الأثر نجده واضحاً في أشعار الأقدمين من شعراء الشايقية والبديرية أمثال إسماعيل: حسن، وخضر محمود، وإبراهيم ابن عوف، وفي أدبيات المحدثين أمثال: علاء الدين أبوسير، وحاتم حسن الدابي، والأخ الصديق: محمد على الحبيِّب.
http://www.omaniyat.com/vb/showthread.php?t=3621[/QUOTE] |
لعشاق الطمبور (3) .. ود اليمني ومحمد جبارة..
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: الرفاعي عبدالعاطي حجر)
|
بسم الله الرحمن الرحيم سلام ...
يا حبيبي انا افتقدتك ............................
انت عارف روحي غيرك لا بتموت لا تبقي حية يا حبيبي انا افتقدتك لما طال الشوق عليا يا حليلي انا كنت قايلك من زمان مهتمي بي في الحزن تحزن معايا ويوم اغيب تسال عليا باختصار انا كنت دايرك تبقي اقرب مني ليا انت تاريك بي مشاعرك مستقر فوق الثريا الصباح الفي عيونك باعني لي مر الاسية سابني بين شطانو هايم جاري لا عند العشية انا لاني قادر اقول كفاية لا ني راضي اكون ضحية المصيبة انا كان بكيت ول جنيت هيه هيه الليل كل مصيبتي هويت عيونك في زمن ظالم شوية يكره الحب والتفاني ويعشق الجفاء والرزية الطيور وكتين تغني الزهور تصبح ندية الا عاد كيفن تغني وعينها فوق عين الحدية الليل افتقدتك وانت عارف زي يقضي الليل سجية مستعد ما عندو مانع انو يهدي الروح تحية لا بهادن لا بسامح لا ببيع ابدا قضية لو تمر الدنيا فوقو ارتكب مليون جنية افتقدتك يا مناي يا سعد روحي الشقية لما فاضت بي همومي والامور لاجت عليا افتقدتك يا نصيري العزول عاصب عيني افتقدتك يا صباحي الظلام ضامي العشية افتقدتك الف مرة لما شمتوا اصحابي فيا شفت كيف انا افتقدتك قدرة الالم العتية انت ماك جايب خبيري وما بتفكر تبقي جية حتي يوم لاقيت صحابك منك اتوقع تحية الا وا خيبة رجايا ويا حلات الحسرة بيا . .................................
تحياتي ...
حاتم هاشم .
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: أبو الحسين)
|
إخوتي الكرام... نهاركم سعيد...
يقول الشــــــاعر...
نعم الإله على العباد كثيرة... وأجلهُن نجابة الأبناءِ...
حقيقي إخوتي الكرام... كانت ليلة أمس الثلاثاء 4 ديسمبر 2007م غير بالنسبة لآل الحُسين العباس بمكة المكرمة... حيث تم تكريم إبننا مازن الحُسين العباس بواسطة وكيل إمارة مكة المكرمة الشيخ/ عبد الله الفائز ومدير إدارة التعليم بالعاصمة المقدسة مع عدد من الطلاب المتفوقين في حفل كبير لإحرازه المركز الأول على منطقة مكة المكرمة في إمتحانات ثالث متوسط بدرجة المجموع الكامل 100%... فكان حقاً علينا أن نفاخر بهذا المازِن الحُسيني... ونباهي به فهو بإذن الله تعالى ـ مع غيره من متوفقي بلادي ـ هم أمل السودان الأخضر...
شكراً لك إبننا مازن فكُنت كما عودتنا دائماً في المقدمة "قدَّامي" وإنشاء الله دائماً هكذا من نجاح إلى نجاح... ونسأل الله تعالى أن يديم عليك نعمة التفوق والصلاح وعقبال أن نحتفل في مقبل السنوات بشقيقك العباس وإخوتك الكرام أبناء البركل دوت كوم... آمين... فهلا شاركتمونا الفرحة أحبتي..
مع قواسيب مودتي... خالك الطال بي تفوقك مترين لا فوق "وله الحق في ذلك"... جمال أحمد الحسن...
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: أبو الحسين)
|
Quote: خالك الطال بي تفوقك مترين لا فوق "وله الحق في ذلك"... |
الأستاذ العريس جمال لك التحية انتو كنتو عايزين الولد دا يطلع غير كدة؟؟ ماشاء الله عليه وعيني باردي " ود الفار حفار " الوالد طالع على ذكاء ابوه وعمه محمد العباس الرجل الخلوق "الوالد خال" وأزيدك هينين "اقلب القدر على فمو يطلع الولد لي امو" ماشاء الله يا زول دي أسرة يحفظها الله وانا بفكر في تحسين النسل الآن من آل العباس ومن عندكم التهاني بلا حدود وامانة في عنقك تصل للحبيب الحسين وام مازن ومحمد والجميع
| |
|
|
|
|
|
|
|