|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: الكيك)
|
كتب الأُستاذ/ معالي...
Quote: وعشان ما ابعد بعيد عن عبد الرحمن الكرو اقول انه صاحب لونية خاصة واجمل ما تغنى به الفنانون اغنبته المشهورة والتى يغنيها بصوته الحنون بششيكن يا عيونى بالدموع لا تخذلنى ما دام الاقدار بتحكم غصب عنك وغصب عنى
|
أخي الكريم معالي...
حقيقي الفنان عبد الرحمن الكرو من القلائل الذين تجدهم فيهم محنة الشايقية وذلك لما تميز به من ألحان وكلمات معظمها للشاعر ذو اللجهة الشايقية الخُلُص "محمد جيب الله كدكي"... فما أروع عبد الرحمن الكرو... لمن يقول ليك:
يا حليل زمن الناس حُنان يا حليل الماضي الزمان...
البيت يشيلُّو تماني إخوان... يا حليل زمن الناس حنان... وكُلهم عايشين في أمان... يا حليل زمن الناس حنان... فيهم اليادوب عزب كان... والمعرِّس ووالد البطان... يا حلييييييل...
عليك الله يا أخي شوف الحالة التكافلية بين الناس ديل كيف... يعني مهما كان حجم البيت دا الواحد ما يقدر يتصور العيشة فيهو تكون كيف... لكن القلوب لو إنطايبت البيت مااااااااااب يغلب يشيل الإخوان مع بعض...
وبجيك راجع لي عبد الرحمن الكرو بنفس هذه الأُغنية...
قواسيب مودتي...
أبو الحســـــــين...
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: أبو الحسين)
|
ممرت على هذا البوست مرار...سواء إن كان فى نسخته القديمه...أو نسخته الجديده...لكن الكسل يمنعنى من المداخله فى كل مره...وربما( الغيره ) هى التى منعتنى فالبوست ماشاءالله كثير الزوار والردود... المهم قبل حوالى السنتين كتبت بوستا عن الشوايقه...ورأيى فيهم...إستأذنكم فى إعادة نشره الآن....فهو يصب فى نفس الإتجاه.... **** عندما تهَجَّم علينا جارنا الشايقى يريد علقتى بالبَسْطونه..!ه لن أكون مبالغاً إن قلت لكم أننى أكثر سودانى غير شايقى يحب الشوايقه..!ه وأعتقد جازماً أن الكلام الذى يقال عن الشوايقه من قِبَل القوميات الأخرى ما هو إلا حسد ظاهر من باب "المابتحصِّلو جدِّعوا..." وحبى للشوايقه لم يأتى من فراغ....إذ جاورتهم فى مدينة عطبره طوال سنوات طفولتى ومراهقتى..!ه ويتميز هؤلاء القوم-والحديث عن الشوايقه- باللَحْلَحَه الشديده فى أمور الحياه...وخوفهم وحرصهم الزائد على أبنائهم...والأب الشايقى مستعد للتضحيه اللانهائيه من أجل أبنائه...أما المرأه الشايقيه فهى مشهوره بمقدرتها على (مَسْك) الرجل...ونادراً ما تُطلق زوجه شايقيه كما قال لى صديقى فى الجامعه-الوجيه- حسن عاصقيل...ه أما دفء العلاقه فى عش الشوايقه الزوجى لا يحتاج-منِّى – إلى كثير دليل...فرائحة الدخان المميزه تَعَكِل كل يوم الى رب السماء-وبكثافه غير عاديه- فى المدينه العماليه المكتظه بهم..!ه وعندما أنشأ المستعمر مدينة عطبره عرف الشوايقه-بحاستهم القويه- أن المال والجاه هواهُ عطبراوى...فيمموا شطر المدينه بكثافه متسلحين بحكمتهم: الوطن الحقيقى هو الذى يوفر الحياه الكريمه...فلم يربطوا أنفسهم-على مر الدهور- بمساحه جغرافيه محدده..!ه وفى صدد الهجره إلى عطبره والتشجيع إليها أنشد شاعرهم:
مانِى راجعين...مانِى راجعين وكان سألتو فى الداخلى قاعدين الشاى باللبن كُبَّايتو مِلِّين مانِى راجعين..مانِى راجعين...!
والداخله هو أقدم حى فى عطبره...وهو بمثابة نواة المدينه..وكان يطلق عليها- فى البدايه- بالداخله...ه وتجد الشايقى يكابد ايما مكابده فى الحياه من أكل وشرب...لكنه يحرص-رغم ضنك ظروفه- على إمتلاك منزل وبنائه بصوره جيده..ويجد فى ذلك مسانده شديده و قويه من زوجته...إذ تتحمل معه ظروف التوفير القاسيه...صابره على أكل الفول والويكى دون نقنقه أو تذمر...ولا تجد أى شايقى-رغم كثرتهم فى المدينه- يسكن فى بيت إيجار..ه وحُب الشوايقه لأبنائهم وحرصهم الزائد على سلامتهم يشكل قنبله موقوته كثيراً ما كانت تُعَكِّر صفو سماء أحياء المدينه العمَّاليه...ه وأذكر فى نهار أحد الأيام والوالد غائب فى العمل....إذا بطرْقٍ عنيف على باب منزلنا..ولسوء حظى كنتُ أنا من فتَح الباب...وإذا بشايقى جارَنا يحملُ بَسْطونَه مُدَنْكَلَه وبجواره إبنه الذى يزاملنى فى المدرسه الإبتدائيه...والذى أعرفه كجوع بَطْنى..!ه إبتدرنى جارنا الشايقى بحِدَّه مخيفه: نِحنا دايرين مكى...وين مكى؟؟...!!ه فطأطأتُ رأسى بخوف شديد...حتى أدركتنى الوالده بِحِسها الأمنى فجاءت تجرى نحو الباب بعد أن أسرعت بلبس توبها...وسألت الرجل بجزع : فِى شنو؟...الحاصِل شنو؟!ه فرد جارنا الشايقى: ولدى ده-مُشيراً إلى إبنه- دايماً يشكى من واحد إسمو مكى...دايماً مكى ده داقِّيهو وشايل حاجاتو (!!)..ومخَّوِفو من المدرسه...نحنا دايرين مكى...ده مُش بيت مكى..؟!ه فردّت الوالده: يا هو ده مكى...وده ولد مسكين شديد...وما ممكن يدُق ليهو زول..والكديسه تاكل عشاهو... فتغير وجه جارنا الشايقى: مكى يا هو ده؟؟..هَى يا ولد-وإلتفت إلى إبنه- يا هو الفنطوط ده البى يدقك كل يوم؟؟! فرد إبنه-زميلى فى المدرسه- ولسوء حظه..أيوه يا هو ده فتجهم وجه جارنا الشايقى...وإغتاظ...إذ كان- على ما يبدو- قد رسم صوره ماك تايسونيه (Mack Tyson) للمدعو مكى....وإلتفت الى أبنه يضربه ضرباً مبرحا بالبسطونه..إنت يا ود خايس..يدقك فنطوط زى ده..يلا أمِش قدامى البيت وإنجلت حملة هكس باشا-من على منزلنا- بسلام...!
مع تحياتى للجميع
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: mekki)
|
كتب الأُستاذ/ مكي...
Quote: لن أكون مبالغاً إن قلت لكم أننى أكثر سودانى غير شايقى يحب الشوايقه..!ه |
ونحن يا اخوي ذاااااااااتنا نحبك وكل أهلنا الطيبين الحلوين في عطبرة الجميلة...
Quote: ونادراً ما تُطلق زوجه شايقيه كما قال لى صديقى فى الجامعه-الوجيه- حسن عاصقيل |
لووووووووووووول يا صديقي...
لكن بيني وبينك بما أنني من قلب الحدث وقريييييييب ليهن فكلامك دا صح بدرجة مية في المية... لكن ما يعني إنو السرِج حقهِن جاهز ـ بس إحتمال من درجة الحنية الزايدي والذي مِنُّو ـ "دا الكلام القُلتو إنت"!!
Quote: وفى صدد الهجره إلى عطبره والتشجيع إليها أنشد شاعرهم:
مانِى راجعين...مانِى راجعين وكان سألتو فى الداخلى قاعدين الشاى باللبن كُبَّايتو مِلِّين مانِى راجعين..مانِى راجعين...!
|
حقيقي أخي مكي هناك أُسرة كبيرة مستوطنة في عطبرة منذ زمن بعيد منهم أُسرة الخليفة علي محي الدين وأُسرة الخليفة حسين عبد القيوم وأُسرة أولاد محجوب ود سعد إلى يومنا هذا... فعطبرة هي دوحة نضيرة كم أتمنى زيارتها إلا القدم ليهو رافع...
Quote: وإلتفت الى أبنه يضربه ضرباً مبرحا بالبسطونه..إنت يا ود خايس..يدقك فنطوط زى ده..يلا أمِش قدامى البيت وإنجلت حملة هكس باشا-من على منزلنا- بسلام...! |
ويا اخوي الجاتك في قطعة قلبك سامحتك... بركة الربنا نجاك من بسطونة الخيزران...
لك قواسيب مودتي وشكراً جميلاً على السرد المعسول الواحد إلا يقراهو بي نفس وااااحد "وشرطاً بي نمرة تلاتة مع رخية في الأبنص"... وأبقى قريب...
أبو الحســــــــين..
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: فدوى الشريف)
|
Quote: هيا ياناس لاداخل سلامات اعلكن طيبين؟ مستعجلي بمشي وبجي اشرب معاكن الجبنه |
شنو يا بتنا فدوى آل الشريف دايماً مستعجلي وخاتْفِي كِرَيْعِك إستهدي بالله واخدِيلِك قعدة... هسع عليك الله شوفي كرِّقة طارق ود جبرين دي مُو تديم العافي في العضيمات...
شكراً للطلة وأهديك وكل الأحباب المتاوقين قصيدة شاعرنا الرائع مولانا أزهري شرشاب... لما ترحل...
لـمّا تـرحـل إنتَ عارف لمّا ترحل عمرى يصبـح كلـو آهـه والفؤاد بيكون مجـرّح وروحـى يتجـدد عَناهـا
الدنيا بعدك ماله ضلمه والشمس يـادوب ضحاهـا جانا فـى دنيانـا طلّـه وبالفـرح نـوّر سماهـا
آه عيونك وينـه لـىَّ مالـه عينـى مـا بتراهـا ماله لو جات لىَّ تانـى وخففـت للـروح شقاهـا وراك ماصبحت حزينه وتانى عادت لـى أساهـا والألم خيّـم عليهـا والفـرح فـات عـاد نساهـا لسه بعشق لى دروبك ورحـى روحـك مُشتهاهـا وأنـتَ ليـه بالله فتـه وكنـتَ إلهامـه وهواهـا
ماله صبحت روحى تايه وفى الدروب ضلّت خطاها وإنتَ نوره الكان يضوى فى الظلام يكشف هُداهـا
النجوم فاتتنى راحت وتانى ماعـاد لـىْ ضياهـا ماله صبحت فى كآبه وحالفـه مـا يشلـع سناهـا الرياض ماتـت وروده وكنـت أطيـاره وشذاهـا والزمن صوّح زهورهاوإنـتَ منـك كـان نداهـا الجداول الكان بتجرى مالـه بـس جفـت مياهـا والخمايل تانى يبست والربيـع مـا عـاد غشاهـا ماله ماكان زايده خضره والكنار عاشـق غَواهـا مالو روّح مـن رحلتـه والنسيـم فـارق أباهـا
حياتى بعدك ماله قاحله والضباب عكّـر صفاهـا والمشاعر الطيبه نحوك صبحت الأحـزان رِداهـا
الأمانى الدابـه شبـت القـدر عـاد لـىْ محاهـا قول لِى ياسيد الأمانى مالـه ماتـت فـى صِباهـا لسه بهواك وبريدك ونفسى بس كـان يـوم مناهـا تبقى جنبها طول حياته وفى الدرب تصبح معاهـا لسـه كلماتـك معايـا جـوه يتـردد صـداهـا وأحيا عمرى أنا فى رجاكَ وروحك إتعشـم لقاهـا
أبقى عايش روحى صابره وليها ترجـع يامناهـا وإن كمان ما جيتنى تانى تبقى ذكراك بس عزاهـا
ــــــــــــــــــــــــــــــــــــــــــــــ
مع قواسيب مودتي وأبقي قريبة... وما زال سؤالي عن الرائعين أُستاذ/ خالد المنسي والخليفة أبو هاشم يا ناس لا برة شوفو حاصلهم شنو عساهم بخير وعافية...
أبو الحســــــين...
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: هاشم نوريت)
|
Quote: ابو الحسين دبايوا شكرا للواحة الوارفة واتمنى ان يسع الجميع لتعريفنا بما غاب عنا بسبب المدنية الدخيلة علينا........................... اقول ان كل من لم يتذوق صحن قراصى بملاح بامية مفروكية وجنبها بصلة يفجخها كش بايدو ويقرم منها مع كل لقمة فاته خيرا كثير..طبعا بعدها يشوف ليهو ضل شديرة... |
صديقي الجميل هاشم...
دبايوا ـ وسلامات وحبابك عشرة بلا كشرة في ديار أهلك وأحبابك آل شايق...
وتسلم يا اخوي على الدفعة المعنوية وبمناسبة طلتك الجميلة أهديك هذه اللوحة الرائعة ولكل أهلنا الطيبين السمحين في شرقنا الحبيب...
مع قواسيب مودتي...
أبو الحســــــــين...
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: أبو الحسين)
|
إخوتي الكرام...
صبحكم الله بالخير والرضا...
أهديكم سيرة عريس من الزمن الجميل... ومعاها اللوحة الجميلة دي...
بلاَّل يا بلاَّل أب ذوق عشا امو
بلال يا بلال أب ذوق عشا امو... المنفل خالو بين الناس وعمو...
جزايرك بي تحت وزينا رزَّم... وعطف فوق القيوف نخلك مردَّم...
تكبر يا عشانا ولينا تسلم... وتصول فوق حقَّك الصح مُو ملمْلَم...
تسافر برة للتعليم تحصل... وتجينا نجحت في ساحاتنا تقدل...
تعود للحوبة للوسخان تغسل... وتزور حلتنا للفتران تنشِّل...
تقدل يا خزينا مع رباعتك... يا مُقنع قفانا وضو جماعتك...
خايلي القدلة فيك مع شداعتك... وتضوي بلا القمر يا خيري ساحتك...
إن بقى في الحرابات يبقى صايل... وان بقى في العلم يفتي ويجادل...
وان بقى في المحاكم ماهُو مايل... وان بقى في التجار ميزانو عادل...
مناي تكبر تزيد يا السمحي ذاتك... واخواتك يقولِن لك وحاتك...
أشوفك جرتَقُوك وياااااااحلاتك... ونَسِل فوقك سيوف خالك واْباتك...
شحدت الله الكريم المال يلِمو... يواصل أهلو والناقص يتمو...
واشوف أنا حيَّة ياخُد بت اعمو... ويبكر بي وليد وانا اشيلو اشِمو...
وِكْت الحارة والفراس يقلو... قرقَر خجَّة دالاتُو اب كَبَلو...
يَبَردِح سيفو فوق العُوق يسلو... يغنِنْلُو البنات ويزَغْرِتِلُّو...
ــــــــــــــــــــــــــــــــــــــــــــــ
قواسيب مودتي...
أبو الحســــــــين...
| |
|
|
|
|
|
|
Re: الشــــايقية... ماضيهم المُشرق... حاضِرهم الأخضر... ومستقبلهم الواعد... الجزء الثاني... (Re: خالد علي محجوب المنسي)
|
Quote: يا حليلو الراسي يوم بابورو صفرَّ
كنت مغرود فيها من زمن لامن فتْش خشم البقرة زي سيد الرايحة عودتنا الحبيب ياسكو بالجميل والمتجدد
ابوالحسين سيد لحوش كفنك يا يابا علك عافي وطيبي انقطع منكم كنت في اجازة قضيتها مع الاخوة وابناء العم في الامارات سلخت القهنوبي وشيي ومرقت لي جنس عرق وملح من جلدي بقيت ابيض الناس ماعرفوني لما رجع لبلدي |
صديقي الجميل وإبن العم خالد...
حمداً لله على سلامة وصولك يا اخوي وحوش الشايقية نور بي أركانو... بس يا اخوي شفقتنا عليك وإنت أتاريك عند قعر أضانا هني وماني عارفنك؟؟ مالك ماب تجينا خافس علي الخُبر كلها مائتين كيلو ولة أقل...
أما سؤالك عن الغالية ست البنات يبقى لي عرسها بعد نزول البحر وحش التمر حسب ما قال لي درب التُرُك...
أها قول لي إنشاء الله تكون قابلت ود عمك د. ود بادي في عين الإمارات؟؟؟
لك قواسيب مودتي لامِن أجيك المرة الجايي بي رائعة من روائعه...
أبو الحســـــــين...
| |
|
|
|
|
|
|